ಸಾಲಿಗ್ರಾಮ (ಕೆ. ಆರ್‌.ನಗರ): ಮಹಾನ್‌ ಮಾನವತವಾದಿ ಡಾ. ಬಿ. ಆರ್‌. ಅಂಬೇಡ್ಕರ್‌ ಮೇಲಾಣೆ, ನನ್ನ ತಂದೆ ತಾಯಿಯಾಣೆ, ನನ್ನ ಮನೆದೇವರಾಣೆಯಾಗಿ ಸುದೀರ್ಘ ಶಾಸಕ ಅವಧಿಯಲ್ಲಿ ಒಂದೇ ಒಂದು ನಯಾಪೈಸೆ ಲಂಚ ಪಡೆದಿಲ್ಲ. ರಾಜಕಾರಣಕ್ಕಾಗಿ ನನ್ನ ಆಸ್ತಿಯನ್ನು ಕಳೆದುಕೊಂಡಿದ್ದೇನೆ, ರಾಜಕೀಯ ಬಿಡಲು ತಯಾರಿದ್ದೇನೆ, ರಾಜಕಾರಣದಿಂದ ಬೇಸತ್ತಿದ್ದೇನೆ ಎಂದು ಶಾಸಕ ಸಾ.ರಾ.ಮಹೇಶ್ ಕಣ್ಣೀರು ಹಾಕಿದ್ದಾರೆ. ತಾಲೂಕಿನ ಗಾಯನ ಹಳ್ಳಿಯಲ್ಲಿ ಭಾನುವಾರ ನಡೆದ ಡಾ.ಬಿ.ಆರ್‌.ಅಂಬೇಡ್ಕರ್‌ ಅವರ ಪ್ರತಿಮೆ ಲೋಕಾರ್ಪಣಾ ಸಮಾರಂಭ ಹಾಗೂ ನೇತ್ರದಾನ ಶಿಬಿರದಲ್ಲಿ ಮಾತನಾಡಿದರು. ‘ನನ್ನ ತಂದೆ ಒಬ್ಬ ಉಪನ್ಯಾಸಕ. 1989ರಲ್ಲಿ ನಾನು 95 ಸಾವಿರ ರೂ.ಗಳಿಗೆ ಖರೀದಿಸಿದ ಒಂದು ಎಕರೆ ಭೂಮಿ ಪ್ರಸ್ತುತ 10 ಕೋಟಿ ರೂ.ಬೆಲೆ ಬಾಳುತ್ತಿದೆ. ನಾನು ಸಂಪಾದಿಸಿದ ಆಸ್ತಿಯಿಂದ ಬಂದ ಆದಾಯದಲ್ಲಿ ಜನಸೇವೆ ಮಾಡುತ್ತಿದ್ದೇನೆ. ಯಾವುದೇ ಅಧಿಕಾರಿಗಳಾಗಲಿ, ಗುತ್ತಿಗೆದಾರರಾಗಲಿ ಇಲ್ಲವೆ ಜನರಾಗಲಿ ನನಗೆ ಒಂದೇ ಒಂದು ರೂ. ಲಂಚ ಕೊಟ್ಟಿದ್ದೇನೆ ಎಂದು ಸಾಬೀತು ಮಾಡಿದರೆ ಅಂದೇ ಸಾರ್ವಜನಿಕ ಜೀವನಕ್ಕೆ ಗುಡ್‌ಬೈ ಹೇಳುತ್ತೇನೆ. ದಯಮಾಡಿ ನನ್ನನ್ನು ಅರ್ಥ ಮಾಡಿಕೊಳ್ಳಿ’ ಎಂದು ಭಾವುಕರಾಗಿ ನುಡಿದರು. ‘14 ವರ್ಷದ ಶಾಸಕ ಅಧಿಕಾರವಧಿಯಲ್ಲಿ ನಾನೆಂದೂ ಜಾತಿ ರಾಜಕಾರಣ ಮಾಡಿಲ್ಲ. ಜಾತಿವಾದಿಯಾಗಿದ್ದರೆ ನಾನೂ ಸಹ ಸಾರ್ವಜನಿಕ ಸ್ಥಳದಲ್ಲಿ ಕೆಂಪೇಗೌಡರು, ಕುವೆಂಪು, ಬಾಲಗಂಗಾಧರನಾಥ ಸ್ವಾಮೀಜಿಯವರ ಪುತ್ಥಳಿ ಸ್ಥಾಪಿಸಬಹುದಿತ್ತು. ಯಾರು ನನ್ನನ್ನು ಪ್ರೀತಿಸುತ್ತಾರೋ ಅವರೆ ನನ್ನವರು. ನೂತನ ತಾಲೂಕು ಕೇಂದ್ರ ಸಾಲಿಗ್ರಾಮದ ಮೊದಲ ತಹಸೀಲ್ದಾರ್‌ ಅಲ್ಲದೆ ಪೊಲೀಸ್‌ ಇನ್ಸ್‌ಪೆಕ್ಟರ್‌ಅನ್ನು ದಲಿತರನ್ನೇ ನೇಮಕ ಮಾಡಿಸಿದ್ದೇನೆ’ ಎಂದರು. ‘ಕೆ.ಆರ್‌.ನಗರದಲ್ಲಿ (ಮೈಸೂರು-ಹಾಸನ ಹೆದ್ದಾರಿ ಪಕ್ಕ) ಸುಮಾರು 10 ಕೋಟಿ ರೂ.ಬೆಲೆಬಾಳುವ ಜಾಗದಲ್ಲಿ ಡಾ.ಬಿ.ಆರ್‌.ಅಂಬೇಡ್ಕರ್‌ ಭವನ ನಿರ್ಮಾಣ ಮಾಡಲು ಅನುದಾನ ಮಂಜೂರು ಮಾಡಿಸಿದ್ದೇನೆ. 3.50 ಕೋಟಿ ರೂ.ವೆಚ್ಚದಲ್ಲಿ ಡಾ.ಬಿ.ಆರ್‌.ಅಂಬೇಡ್ಕರ್‌ ವಿದ್ಯಾರ್ಥಿ ನಿಲಯ ತೆರೆಯಲಾಗಿದೆ. ಬಹುತೇಕ ಕಡೆ ಡಾ.ಅಂಬೇಡ್ಕರ್‌ ಭವನ ತೆರೆಯಲಾಗಿದೆ’ ಎಂದು ಮಾಹಿತಿ ನೀಡಿದರು. ತಿ.ನರಸೀಪುರ ನಳಂದ ಬುದ್ದ ವಿಹಾರದ ಬೋಧಿರತ್ನ ಬಂತೇಜಿ, ಕಾಂಗ್ರೆಸ್‌ ಮುಖಂಡ ಡಿ.ರವಿಶಂಕರ್‌, ಬಿಎಸ್‌ಪಿ ರಾಜ್ಯಾಧ್ಯಕ್ಷ ಕೃಷ್ಣಮೂರ್ತಿ, ಜಿ.ಪಂ.ಮಾಜಿ ಸದಸ್ಯ ಅಚ್ಯುತಾನಂದ, ರಾಷ್ಟ್ರೀಯ ಅಂಬೇಡ್ಕರ್‌ ಪ್ರಶಸ್ತಿ ಪುರಸ್ಕೃತ ದೇವರಾಜ ಒಡೆಯರ್‌, ಪೊಲೀಸ್‌ ಇನ್ಸ್‌ಪೆಕ್ಟರ್‌ ಶ್ರೀಕಾಂತ್‌, ಜೆಡಿಎಸ್‌ ಗ್ರಾಮಾಂತರ ಕಾರ್ಯದರ್ಶಿ ಹನಸೋಗೆ ನಾಗರಾಜ್‌, ಗ್ರಾ.ಪಂ.ಅಧ್ಯಕ್ಷೆ ರಾಣಿರೇವಣ್ಣ, ತಾ.ಪಂ.ಮಾಜಿ ಸದಸ್ಯರಾದ ಚಿಕ್ಕನಾಯಕನಹಳ್ಳಿ ವೈರಮುಡಿ, ಶ್ರೀನಿವಾಸಪ್ರಸಾದ್‌, ಗ್ರಾ.ಪಂ.ಮಾಜಿ ಸದಸ್ಯ ನಟರಾಜ್‌, ಅಂಬೇಡ್ಕರ್‌ ಯುವಕರ ಸಂಘದ ಅಧ್ಯಕ್ಷ ಜಿ.ಎನ್‌.ಮಾದೇಶ್‌ ಸೇರಿದಂತೆ ದಲಿತ ಮುಖಂಡರು, ಗ್ರಾಮಸ್ಥರು ಸೇರಿದಂತೆ ಇತರರು ಇದ್ದರು.
from India & World News in Kannada | VK Polls https://ift.tt/3yZpYtJ
