ಸಂತೋಷ್‌ ಶೆಟ್ಟಿ ಗೋಳಿಯಂಗಡಿ ಮಂಗಳೂರು: ಕರಾವಳಿಯಲ್ಲಿ ರಾತ್ರಿ ಹೊತ್ತಿನಲ್ಲಿ ಮೈಕೊರೆಯುವ ಚಳಿಯಿದ್ದರೂ, ಮಧ್ಯಾಹ್ನ ಸೂರ್ಯ ನಡುನೆತ್ತಿಯ ಮೇಲೆ ಬಂದಂತೆ ಬಿಸಿಲಿನ ತಾಪ ಹೆಚ್ಚುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಆಧುನಿಕ ತಂಪು ಪಾನೀಯಗಳಿಗೆ ಜನರು ಮೊರೆ ಹೋಗುತ್ತಿದ್ದರೂ ನಿಸರ್ಗದತ್ತವಾಗಿ ಸಿಗುವ ತಾಳೆಬೊಂಡಕ್ಕೆ ಬೇಡಿಕೆ ಕಡಿಮೆಯಾಗಿಲ್ಲ. ಬಿಸಿಲಿನ ದಾಹಕ್ಕೆ ದೇಹ ತಂಪಾಗಿಸಲು ಕರಾವಳಿಯಲ್ಲಿ ಎಳನೀರಿಗೆ ಬದಲಾಗಿ ಸಿಗುವುದೇ ತಾಳೆ ಬೊಂಡ. ತುಳುವಿನಲ್ಲಿ ‘’ ಎಂದು ಕರೆಯಲ್ಪಡುವ ಈ ತಾಳೆ ಬೊಂಡಕ್ಕೆ ಕರಾವಳಿಯಲ್ಲಿ ಹಿಂದಿನಿಂದಲೂ ಬೇಡಿಕೆ ಇದ್ದೇ ಇದೆ. ಸಾಮಾನ್ಯವಾಗಿ ಎರಡು ಅಥವಾ ಮೂರು ಕಣ್ಣುಗಳಿರುವ ದ್ರವ ರೂಪದಲ್ಲಿ ಇಲ್ಲದಿದ್ದರೂ ತಿನ್ನಲು ಬಲುರುಚಿಯಾಗಿ ಮನಸ್ಸಿಗೆ ಹಿತವಾಗಿ ಆರೋಗ್ಯಕರವಾಗಿರುತ್ತದೆ. ವಿವಿಧ ಭಾಗಗಳಲ್ಲಿ ಬೇರೆ ಬೇರೆ ಹೆಸರುಗಳಿಂದ ಕರೆಯುವ ತಾಳೆಬೊಂಡ ಪ್ರಕೃತಿದತ್ತವಾದುದು. ಕುಂದಾಪುರದಲ್ಲಿ ಹಣೆ ಬೊಂಡ ಎಂದು ಕರೆಯುತ್ತಾರೆ. ಯಾವುದೇ ರಾಸಾಯನಿಕ ಅಥವಾ ಸಾವಯವ ಗೊಬ್ಬರ ಬಳಸದೆ ಸಿಗುವ ತಾಳೆ ಬೊಂಡ ಬಿಸಿಲಿನ ದಾಹ ತಣಿಸುತ್ತದೆ. ಅನೇಕ ಕುಟುಂಬಗಳಿಗೆ ಜೀವನಾಧಾರವಾಗಿದೆ. ಮುಳ್ಳುಗಳಿಂದ ಆವೃತವಾದ ಮರವನ್ನು ಹತ್ತಿ ಬೊಂಡ ಕೀಳುವುದು ಕಷ್ಟವಾದರೂ, ಬಡ ಕುಟುಂಬಗಳ ಆದಾಯದ ಮೂಲವಾಗಿದೆ. ಬಿಳಿಯ ತೆಳುವಾದ ಪದರದೊಳಗೆ ದ್ರವರೂಪದಲ್ಲಿರುವ ನೀರನ್ನು ಸವಿಯುವುದೇ ಮನಸ್ಸಿಗೆ ಮುದ ನೀಡುತ್ತದೆ. ನೈಸರ್ಗಿಕವಾದ ತಾಳೆ ಬೊಂಡ ಸವಿಯುವಾಗ ಮನಸ್ಸಿಗೆ ಮುದವಾಗುವುದು ಮಾತ್ರವಲ್ಲದೆ ಹಸಿವು ಬಿಸಿಲಿನ ದಾಹ ನೀಗಿಸುತ್ತದೆ. ತಾಳೆ ಮರ ಬೃಹತ್‌ ಗಾತ್ರದಲ್ಲಿರುವುದರಿಂದ ಅದನ್ನು ಏರುವುದು ಸಾಹಸ ಹಾಗೂ ತಾಳೆ ಬೊಂಡದಿಂದ ಅದರ ಕಣ್ಣು ತೆಗೆಯುವುದು ನಾಜೂಕಿನ ಕೆಲಸ. ಮರ ಏರುವುದು ಕಷ್ಟವಾದರೂ ಅದನ್ನು ತಿನ್ನಲು ಜನರು ಮುಗಿಬೀಳುತ್ತಿರುವುದು ವ್ಯಾಪಾರಿಗಳ ಮುಖದಲ್ಲಿ ಮಂದಹಾಸ ಮೂಡಲು ಸಹಕಾರಿಯಾಗಿದೆ. ತಾಳೆ ಬೊಂಡ ಎಲ್ಲ ಅವಧಿಯಲ್ಲಿ ಸಿಗುವುದಿಲ್ಲ. ನವೆಂಬರ್‌ನಲ್ಲಿ ಪ್ರಾರಂಭಗೊಂಡು ಏಪ್ರಿಲ್‌-ಮೇ ತಿಂಗಳವರೆಗೆ ಸಿಗುತ್ತದೆ. 30 ರೂ.ಗಳಿಗೆ ಮೂರು ಕಣ್ಣು ಮಾತ್ರ ಸಿಗುವುದಾದರೂ ತಿನ್ನುವವರ ಸಂಖ್ಯೆ ಕಡಿಮೆಯಾಗಿಲ್ಲ. ಜನಸಾಮಾನ್ಯರು ಬೇಸಿಗೆಯ ದಣಿವನ್ನು ನಿವಾರಿಸಲು ರಾಸಾಯನಿಕಯುಕ್ತ ದುಬಾರಿ ಬೆಲೆಯ ವಿದೇಶಿ ಪಾನೀಯ ಕುಡಿಯುವುದಕ್ಕಿಂತ ಪ್ರಕೃತಿದತ್ತವಾದ ತಾಳೆ ಬೊಂಡ ತಿಂದಲ್ಲಿ ದೇಹಕ್ಕೂ ಒಳ್ಳೆಯದು. ಆ ವೃತ್ತಿಯನ್ನು ಅವಲಂಬಿಸಿ ಜೀವನ ನಡೆಸುತ್ತಿರುವವರ ಬದುಕಿಗೂ ಆಸರೆ ಕಲ್ಪಿಸಿಕೊಟ್ಟಂತಾಗುತ್ತದೆ. ಬೆಲೆ ಏರಿಕೆಯ ಕಾಲಘಟ್ಟದಲ್ಲಿ ಪ್ರಕೃತಿದತ್ತವಾಗಿ ವಿಶೇಷ ರುಚಿಯನ್ನು ಕಾಯ್ದುಕೊಂಡಿರುವ ತಾಳೆ ಬೊಂಡ ಬಿಸಿಲಿನ ತಾಪ ತಣಿಸುವುದರೊಂದಿಗೆ ದಾಹ ನೀಗಿಸುತ್ತದೆ. ಆರೋಗ್ಯಕ್ಕೆ ಉತ್ತಮ ಜೀವಸತ್ವ ಒದಗಿಸುವುದರಿಂದ ಆಧುನಿಕ ಪೇಯಗಳಿಗೆ ಮಾರುಹೋಗದೆ ನೈಸರ್ಗಿಕವಾಗಿರುವ ತಾಳೆ ಬೊಂಡಕ್ಕೆ ಬೇಡಿಕೆ ಹೆಚ್ಚುತ್ತಿದೆ. ಅನೇಕ ಕುಟುಂಬಗಳಿಗೆ ಜೀವನಾಧಾರವಾಗಿದೆ. ಪ್ರತಿ ವರ್ಷ ಕೋಟ ಸುತ್ತಮುತ್ತ ತಾಳೆ ಬೊಂಡದ ಮರಗಳನ್ನು ವಹಿಸಿಕೊಂಡು ಅಲ್ಲಿಂದ ತಾಳೆ ಬೊಂಡವನ್ನು ತೆಗೆದು ತಂದು ಮಾರಾಟ ಮಾಡುತ್ತೇವೆ. ಮುಳ್ಳುಗಳಿಂದ ಆವೃತವಾದ ಮರವಾದ ಕಾರಣ ಮರ ಏರಲೂ ಯಾರೂ ಸಿಗುವುದಿಲ್ಲ. ಮರ ಹತ್ತಿ ಬೊಂಡ ಕೀಳುವುದು ಸಹ ಕಷ್ಟ. 3 ಕಣ್ಣಿಗೆ 30 ರೂ.ಗೆ ಮಾರಾಟ ಮಾಡುತ್ತೇವೆ. ದೂರದೂರಿನಿಂದ ತಂದು ಮಾರಾಟ ಮಾಡುವುದರಿಂದ ಖರ್ಚು ವೆಚ್ಚ ಜಾಸ್ತಿ. ಆದರೂ ಜನರು ಇಷ್ಟಪಟ್ಟು ವ್ಯಾಪಾರ ಮಾಡುತ್ತಿರುವುದು ಖುಷಿ ತಂದಿದೆ ಎನ್ನುತ್ತಾರೆ ಈರೊಲ್ ವ್ಯಾಪಾರಿ ಪ್ರಶಾಂತ ಅಲ್ಬಾಡಿ
from India & World News in Kannada | VK Polls https://ift.tt/3si66ka
