ವಿಜಯ್‌ ಕೋಟ್ಯಾನ್‌ ಮಂಗಳೂರು: ದೇಶಾದ್ಯಂತ ಡಿಜಿಟಲ್‌ ಇಂಡಿಯಾ ವ್ಯವಹಾರಕ್ಕೆ ಒತ್ತು ನೀಡಲಾಗುತ್ತಿದ್ದು, ಈ ಬಗ್ಗೆ ದೊಡ್ಡಮಟ್ಟದ ಪ್ರಚಾರವೇ ನಡೆಯುತ್ತಿದೆ. ಆದರೆ ಇದೇ ತಂತ್ರಜ್ಞಾನವನ್ನು ವಿದ್ರೋಹಿ ಸಂಘಟನೆಗಳು ದುರ್ಬಳಕೆ ಮಾಡುತ್ತಿರುವ ಬಗ್ಗೆ ಗುಪ್ತಚರ ಇಲಾಖೆಗೆ ಮಾಹಿತಿ ಲಭಿಸಿದ್ದು, ಪ್ರತಿನಿತ್ಯ ಕೋಟ್ಯಂತರ ರೂ. ವಂಚಿಸಲಾಗುತ್ತಿದೆ. ಬ್ಯಾಂಕ್‌ ಇನ್ನಿತರ ಹಣಕಾಸಿನ ವ್ಯವಹಾರ ಈಗ ಆನ್‌ಲೈನ್‌ನಲ್ಲೇ ನಡೆಯುತ್ತಿವೆ. ಕಳೆದೆರಡು ವರ್ಷಗಳಿಂದ ಶೇ.50ರಷ್ಟು ಆನ್‌ಲೈನ್‌ ವ್ಯವಹಾರ ವೃದ್ಧಿಯಾಗಿದ್ದು, ದಿನದ 24 ಗಂಟೆಯೂ ವ್ಯವಹಾರ ಸುಲಲಿತವಾಗಿ ನಡೆಯುತ್ತಿದೆ. ಆದರೆ ಡಿಜಿಟಲ್‌ ಇಂಡಿಯಾ ಬೆಳೆದಷ್ಟೇ ವೇಗದಲ್ಲಿ ಸೈಬರ್‌ ಅಪರಾಧ ಪ್ರಕರಣಗಳ ಸಂಖ್ಯೆಯೂ ಹೆಚ್ಚಾಗುತ್ತಿದೆ. ಇದರ ಹಿಂದೆ ನಕ್ಸಲ್‌ ಸೇರಿದಂತೆ ವಿದ್ರೋಹಿ ಸಂಘಟನೆಗಳು ಭಾಗಿಯಾಗಿರುವ ಬಗ್ಗೆ ಗುಪ್ತಚರ ಇಲಾಖೆಗೆ ಮಾಹಿತಿ ಲಭಿಸಿದ್ದು, ಈ ಬಗ್ಗೆ ನಿಗಾ ವಹಿಸಲಾಗಿದೆ ಎನ್ನುತಾರೆ ಹಿರಿಯ ಸೈಬರ್‌ ಅಧಿಕಾರಿ. 1 ಸಾವಿರಕ್ಕೆ ಆಧಾರ್‌ ಮಾರಾಟದಕ್ಷಿಣ ಕನ್ನಡ ಸೇರಿದಂತೆ ರಾಜ್ಯದಲ್ಲಿ ನಡೆಯುತ್ತಿರುವ ಸೈಬರ್‌ ಅಪರಾಧದ ಮೂಲ ಬಹುತೇಕ ಉತ್ತರ ಭಾರತದ ಜಾರ್ಖಂಡ್‌, ಪಶ್ಚಿಮ ಬಂಗಾಲ, ಬಿಹಾರ, ದಿಲ್ಲಿ, ಒಡಿಶಾ ಆಗಿದೆ. ವಿದ್ರೋಹಿ ಸಂಘಟನೆಯಲ್ಲಿ ಗುರುತಿಸಿಕೊಂಡವರು ಆ ರಾಜ್ಯದ ಕುಗ್ರಾಮ, ಆದಿವಾಸಿಗಳು, ಹಳ್ಳಿಯಲ್ಲಿರುವ ಮುಗ್ಧ ಜನರ ಆಧಾರ್‌ ಕಾರ್ಡ್‌ನ್ನು 1 ಸಾವಿರ ರೂ.ಗೆ ಪಡೆದು ಅದೇ ಆಧಾರದಲ್ಲಿ ಮೊಬೈಲ್‌ ಸಿಮ್‌ ಪಡೆಯುತ್ತಾರೆ. ಬಳಿಕ ಅದನ್ನೇ ದಾಖಲೆಯಾಗಿಟ್ಟು ಆನ್‌ಲೈನ್‌ ಮೂಲಕ ಬ್ಯಾಂಕ್‌ ಖಾತೆ ತೆರೆದು ದಂಧೆ ಶುರುವಿಟ್ಟುಕೊಳ್ಳುತ್ತಾರೆ. ಕ್ಷಣ ಮಾತ್ರದಲ್ಲಿ ಹಣ ಡ್ರಾಜಾಲದಲ್ಲಿ ತೊಡಗಿಸಿಕೊಂಡವರು ವಂಚನೆಗೊಳಗಾದ ವ್ಯಕ್ತಿಯ ಖಾತೆಯಿಂದ ಹಣವನ್ನು ಬೇನಾಮಿ ಖಾತೆಗೆ ವರ್ಗಾಯಿಸಿದ ಬಳಿಕ ಕ್ಷಣ ಮಾತ್ರದಲ್ಲಿ ಹಣ ಡ್ರಾ ಮಾಡುತ್ತಾರೆ. ಇದರಿಂದ ತನಿಖೆಗೆ ದೂರದ ಬಿಹಾರ, ಜಾರ್ಖಂಡ್‌ಗೆ ತೆರಳಿದ ಮಂಗಳೂರು ಪೊಲೀಸರಿಗೆ ಸಿಗುವುದು ಝಿರೋ ಬ್ಯಾಲೆನ್ಸ್‌ ಇರುವ ಆದಿವಾಸಿ, ಕುಗ್ರಾಮಗಳ ಜನರ ಬ್ಯಾಂಕ್‌ ಖಾತೆ. ಅಲ್ಲಿಯ ಜನರಿಗೆ ಆನ್‌ಲೈನ್‌ ದೋಖಾ ಬಗ್ಗೆ ಯಾವುದೇ ಮಾಹಿತಿಯಿಲ್ಲದೆ ಪೊಲೀಸರು ಬರಿಗೈಲಿ ವಾಪಸಾಗುತ್ತಿದ್ದಾರೆ. ವಿದ್ರೋಹಿಗಳ ಬಗ್ಗೆ ಶಂಕೆ ಆನ್‌ಲೈನ್‌ ವಂಚನೆಯ ಜಾಲದ ಶೋಧ ನಡೆಸಿದಾಗ ಅದರ ಮೂಲ ಪತ್ತೆಹಚ್ಚುವುದು ಪೊಲೀಸರಿಗೆ ತಲೆನೋವಾಗಿದೆ. ಇದರ ಹಿಂದೆ ನಕ್ಸಲ್‌ ಸೇರಿದಂತೆ ವಿದ್ರೋಹಿ ಸಂಘಟನೆಗಳ ಜಾಲವಿರುವ ಸಾಧ್ಯತೆಯಿದೆ. ಸೈಬರ್‌ ಅಪರಾಧ ಸೆಂಟ್ರಲೈಸ್ಡ್‌ ಆದಾಗ ಮಾತ್ರ ಇಂತಹ ಪ್ರಕರಣಗಳನ್ನು ಸುಲಭ ಮತ್ತು ಕ್ಷಿಪ್ರವಾಗಿ ಬಗೆಹರಿಸಲು ಸಾಧ್ಯವಿದೆ ಎನ್ನುತ್ತಾರೆ ಪೊಲೀಸರು. 50 ಕೋಟಿ ರೂ.ಗೂ ಅಧಿಕ ವಂಚನೆಮಂಗಳೂರು ಸೆನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರತಿನಿತ್ಯ 2ರಿಂದ 5 ಲಕ್ಷ ರೂ. ವಂಚನೆ ದೂರುಬರುತ್ತಿದೆ. ಇದೇ ರೀತಿ ದೇಶದಲ್ಲಿ 200ಕ್ಕೂ ಅಧಿಕ ಪೊಲೀಸ್‌ ಠಾಣೆಗಳಿದ್ದು ವಂಚನೆ ಮೂಲಕ 50ರಿಂದ 100 ಕೋಟಿ ರೂ. ವಂಚನೆಯಾಗುತ್ತಿದೆ. ಇದರಲ್ಲಿ ಶೇ.50ರಷ್ಟು ಹಣ ನಕ್ಸಲ್‌ ಸೇರಿದಂತೆ ನಾನಾ ವಿದ್ರೋಹಿ ಸಂಘಟನೆಗಳಿಗೆ ಸೇರುತ್ತಿದೆ ಎನ್ನುತ್ತಾರೆ ಸೈಬರ್‌ ಪೊಲೀಸ್‌ ಠಾಣೆಯ ಹಿರಿಯ ಅಧಿಕಾರಿ. ಪ್ರತಿನಿತ್ಯ ಇಷ್ಟು ದೊಡ್ಡ ಮೊತ್ತದ ಹಣ ವಿದ್ರೋಹಿ ಸಂಘಟನೆಗಳಿಗೆ ಸುಲಭವಾಗಿ ಸಿಗುವಾಗ ಯಾವುದೇ ಕೃತ್ಯ ನಡೆಸುವುದಕ್ಕೆ ಹೇಸುವುದಿಲ್ಲ ಎನ್ನುತ್ತಾರೆ ಸೈಬರ್‌ ಪೊಲೀಸರು. ಕ್ಯೂಆರ್‌ ಕೋಡ್‌ ಕೂಡ ಡೇಂಜರ್‌ ಪೆಟ್ರೋಲ್‌ ಬಂಕ್‌, ಶಾಪಿಂಗ್‌ ಮಾಲ್‌, ಮೆಡಿಕಲ್‌ ಸೇರಿದಂತೆ ನಾನಾ ಕಡೆ ಪೇಟಿಎಂ, ಕ್ಯೂಆರ್‌ ಕೋಡ್‌ ಹಾಕಲಾಗುತ್ತಿದ್ದು, ಆ ಮೂಲಕ ಗ್ರಾಹಕರು ಪೇಮೆಂಟ್‌ ವ್ಯವಹಾರ ಮಾಡುತ್ತಿದ್ದಾರೆ. ಆದರೆ ಈ ವ್ಯವಹಾರ ಕೂಡ ಡೇಂಜರ್‌ ಆಗಿದ್ದು, ಒರಿಜಿನಲ್‌ ಕ್ಯೂಆರ್‌ ಕೋಡ್‌ ಮೇಲೆ ಯಾರದೋ ಕ್ಯೂಆರ್‌ ಕೋಡ್‌ ಲಗತ್ತಿಸಿ ವಂಚನೆ ಮಾಡುತ್ತಿರುವ ಪ್ರಕರಣ ಬೆಳಕಿದೆ ಬಂದಿದೆ ಎನ್ನುತ್ತಾರೆ ಸೈಬರ್‌ ಪೊಲೀಸರು. ಹೊಸ ಆನ್‌ಲೈನ್‌ ದೋಖಾಗಳು
- ಬ್ಯಾಂಕ್‌ ಖಾತೆದಾರರಿಗೆ ಕೆವೈಸಿ ಅಪ್ಡೇಟ್‌ ಮಾಡಲು ಸಂದೇಶ ಬರುತ್ತಿದ್ದು, ಈ ಲಿಂಕ್‌ ಒತ್ತಿ ವ್ಯವಹರಿಸಿದರೆ ಖಾತೆಗೆ ಪಂಗನಾಮ
- ಸಂಸ್ಥೆಗಳ ಕ್ಯೂಆರ್‌ ಕೋಡ್‌ ಬೋರ್ಡ್‌ಗೆ ನಕಲಿ ಕ್ಯೂಆರ್‌ ಕೋಡ್‌ ಅಂಟಿಸಿ ವಂಚನೆ
- ಕೋವಿಡ್‌ ಲಸಿಕೆ ಸಾಮಾಜಿಕ ಜಾಲತಾಣದಲ್ಲಿ ಶೇರ್‌ ಮಾಡಬೇಡಿ. ಇದರಿಂದಲೂ ನಡೆಯುತ್ತಿದೆ ವಂಚನೆ
- ಅನಾಮಿಕ ವಿಡಿಯೊ ಕರೆ ಮಾಡಿ ಅರೆಬೆತ್ತಲೆ ವಿಡಿಯೊ ಚಿತ್ರೀಕರಣ
- ಸೈಬರ್‌ ಕ್ರಿಮಿನಲ್‌ಗಳಿಂದ ಆನ್‌ಲೈನ್‌ ಗೇಮ್ಸ್‌ ಮೂಲಕ ವಂಚನೆ
- ಉದ್ಯೋಗದ ನೆಪದಲ್ಲಿ ಲಿಂಕ್‌ ಕಳುಹಿಸಿ ವಂಚನೆ
from India & World News in Kannada | VK Polls https://ift.tt/3xY2Z1L
