ಅಡಿಲೇಡ್‌: ಪ್ರತಿಷ್ಠಿತ ಆ್ಯಷಸ್‌ ಸರಣಿಯಲ್ಲಿ ಎದುರು ಆತಿಥೇಯ ತಂಡ 2-0 ಅಂತರದ ಮೇಲುಗೈ ಪಡೆದುಕೊಂಡಿದೆ. ಇಲ್ಲಿನ ಓವಲ್‌ ಕ್ರೀಡಾಂಗಣದಲ್ಲಿ ನಡೆದ ಸರಣಿಯ ಎರಡನೇ ಹಾಗೂ ಪಿಂಕ್‌ ಬಾಲ್‌ ಟೆಸ್ಟ್‌ನಲ್ಲಿ ಆತಿಥೇಯ ಆಸ್ಟ್ರೇಲಿಯಾ 275 ರನ್‌ಗಳ ಭರ್ಜರಿ ಜಯ ದಾಖಲಿಸಿತ್ತು. ಅಂದಹಾಗೆ ದ್ವಿತೀಯ ಟೆಸ್ಟ್‌ನ ಐದನೇ ದಿನದಾಟದಲ್ಲಿ ಆಸೀಸ್‌ ಗೆಲುವಿಗೆ ತಡೆ ಗೋಡೆಯಾಗಿ ನಿಂತದ್ದು, ಇಂಗ್ಲೆಂಡ್‌ನ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ . ತಮ್ಮ ಸ್ವಾಭಾವಿಕ ಆಟಕ್ಕೆ ತದ್ವಿರುದ್ಧವಾಗಿ ಬ್ಯಾಟ್‌ ಮಾಡಿದ್ದ ಬಟ್ಲರ್‌ ಬರೋಬ್ಬರಿ 207 ಎಸೆತಗಳಲ್ಲಿ 26 ರನ್‌ಗಳನ್ನುಗಳಿಸಿ ಪಂದ್ಯ ಡ್ರಾ ಮಾಡಲು ತಮ್ಮ ಸರ್ವವನ್ನೂ ಪಣಕ್ಕಿಟ್ಟಿದ್ದರು. ಚೀನಾದ ಗೋಡೆಯಂತೆ ಕ್ರೀಸ್‌ನಲ್ಲಿ ಭದ್ರವಾಗಿ ನೆಲೆ ನಿಂತಿದ್ದ ಬಟ್ಲರ್‌ ವಿಕೆಟ್‌ ಪಡೆಯಲು ನಡೆಸಿದ ದಾಳಿಯೆಲ್ಲವೂ ವಿಫಲವಾಗಿ ಆಸೀಸ್‌ ಬೌಲರ್‌ಗಳು ದಣಿದಿದ್ದ ಸಂದರ್ಭದಲ್ಲಿ ಬಟ್ಲರ್‌ ವಿಚಿತ್ರ ರೀತಿಯಲ್ಲಿ ಔಟ್‌ ಆಗುವ ಮೂಲಕ ನಿರಾಶೆ ಅನುಭವಿಸಿದರು. ಜೇ ರಿಚರ್ಡ್ಸನ್‌ ಬೌಲಿಂಗ್‌ನಲ್ಲಿ ಕ್ರೀಸ್‌ನ ಒಳಗೆ ನಿಂತು ಬ್ಯಾಟ್‌ ಮಾಡುತ್ತಿದ್ದ ಬಟ್ಲರ್‌ ಬ್ಯಾಕ್‌ ಫುಟ್‌ ಡಿಫೆನ್ಸ್‌ ಮೂಲಕ ಚೆಂಡನ್ನು ಪಾಯಿಂಟ್‌ ವಿಭಾಗಕ್ಕೆ ತಳ್ಳಿ ಒಂದು ರನ್‌ ಕಡಿಯುವ ಪ್ರಯತ್ನ ಮಾಡುವಾಗಿ ಕಾಲಿನಿಂದ ಸ್ಟಂಪ್‌ಗೆ ಒದ್ದು ಬೇಲ್ಸ್‌ ಬೀಳಿಸಿದರು. ಪರಿಣಾಮ ಹಿಟ್‌ ವಿಕೆಟ್‌ ಆಗುವ ಮೂಲಕ ಪೆವಿಲಿಯನ್‌ ಸೇರುವಂತ್ತಾಯಿತು. "ಇಂಥದ್ದೊಂದು ಕಥೆ ಬರೆಯಲು ಖಂಡಿತಾ ಸಾಧ್ಯವಿಲ್ಲ. ಸಾಧ್ಯವೇ? ಆತ ಕ್ರೀಸ್‌ನಿಂದ ಹಿಂದೆ ಸರಿದು ಬ್ಯಾಟ್‌ ಮಾಡುತ್ತಿದ್ದಾನೆ ಎಂದು ಹೇಳುತ್ತಲೇ ಇದ್ದೆವು. ಎಷ್ಟು ಹಿಂದೆ ಸರಿದರೆಂದರೆ ಅವರೇ ಖುದ್ದಾಗಿ ತಮ್ಮ ಬೇಲ್ಸ್‌ ಕೆಡವಿಕೊಂಡರು. ಔಟ್‌ ಆಗಲು ಇದಕ್ಕಿಂತಲೂ ಹೊಟ್ಟೆ ಉರಿಯುವಂತಹ ವಿಧಾನ ಮತ್ತೊಂದಿಲ್ಲ. ಕ್ರಿಕೆಟ್ ಆಟ ಕೆಲವೊಮ್ಮೆ ಬಹಳಾ ಕ್ರೂರಿ," ಎಂದು ಕಾಮೆಂಟರಿ ವೇಳೆ ಆಸೀಸ್‌ನ ಮಾಜಿ ಕ್ರಿಕೆಟಿಗ ಮಾರ್ಕ್‌ ವಾ ಬಟ್ಲರ್‌ ವಿಕೆಟ್‌ ಪತನವನ್ನು ಈ ರೀತಿ ಬಣ್ಣಿಸಿದರು. ಅಂದಹಾಗೆ ಒಂದು ತಿಂಗಳ ಹಿಂದಷ್ಟೇ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ ಎದುರಿಸಿದ ಪ್ರತಿ ಚೆಂಡನ್ನು ಕ್ರೀಡಾಂಗಣದಿಂದ ಆಚೆಗೆ ಹೋಗುವಂತೆ ಬಡಿದಟ್ಟುವ ಪ್ರಯತ್ನ ಮಾಡುತ್ತಿದ್ದ ಬಟ್ಲರ್‌, ಈಗ ಟೆಸ್ಟ್‌ ಕ್ರಿಕೆಟ್‌ಗೆ ಹೊಂದಿಕೊಳ್ಳುವ ಮೂಲಕ 207 ಎಸೆತಗಳ ಮ್ಯಾರಥಾನ್‌ ಇನಿಂಗ್ಸ್‌ ಆಡಿದ ಬಗ್ಗೆ ಕ್ರಿಕೆಟ್ ಜಗತ್ತಿನಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ಬಟ್ಲರ್‌ 7ನೇ ವಿಕೆಟ್‌ಗೆ ಆಲ್‌ರೌಂಡರ್ ಕ್ರಿಸ್‌ ವೋಕ್ಸ್‌ (44) ಜೊತೆಗೂಡಿ 61 ರನ್‌ಗಳ ಜೊತೆಯಾಟವಾಡಿದರೂ ಸೋಲು ತಪ್ಪಿಸಲು ಸಾಧ್ಯವಾಗಲಿಲ್ಲ. ಜೇ ರಿಚರ್ಡ್ಸನ್‌ (42ಕ್ಕೆ 5) ಮಾರಕ ಬೌಲಿಂಗ್‌ ದಾಳಿ ನಡೆಸಿ ಇಂಗ್ಲೆಂಡ್‌ನ ಟೇಲೆಂಡರ್‌ಗಳನ್ನು ಪೆವಿಲಿಯನ್‌ಗೆ ಸೇರಿಸುವಲ್ಲಿ ಯಶಸ್ವಿಯಾದರು. ಈಗ ಸರಣಿಯ 3ನೇ ಟೆಸ್ಟ್‌ ಡಿ.26ರಿಂದ ಮೆಲ್ಬೋರ್ನ್‌ ಕ್ರಿಕೆಟ್ ಗ್ರೌಂಡ್‌ (ಎಂಸಿಜಿ) ಕ್ರೀಡಾಂಗಣದಲ್ಲಿ ನಡೆಯಲಿದೆ. ಅಡಿಲೇಡ್‌ ಟೆಸ್ಟ್‌ನ ಸಂಕ್ಷಿಪ್ತ ಸ್ಕೋರ್‌ ಆಸ್ಟ್ರೇಲಿಯಾ: ಮೊದಲ ಇನಿಂಗ್ಸ್‌ 473/9 ಡಿಕ್ಲೇರ್‌ ಮತ್ತು ಎರಡನೇ ಇನಿಂಗ್ಸ್‌ 230/9 ಡಿಕ್ಲೇರ್‌. ಇಂಗ್ಲೆಂಡ್: ಮೊದಲ ಇನಿಂಗ್ಸ್‌ 236ಕ್ಕೆ ಆಲ್‌ಔಟ್‌ ಮತ್ತು 2ನೇ ಇನಿಂಗ್ಸ್‌ 113.1 ಓವರ್‌ಗಳಲ್ಲಿ 192ಕ್ಕೆ ಆಲ್‌ಔಟ್‌ (ರೋರಿ ಬರ್ನ್ಸ್‌ 34, ಡಾವಿಡ್‌ ಮಲಾನ್‌ 20, ಜೋ ರೂಟ್ 24, ಜೋಸ್‌ ಬಟ್ಲರ್‌ 26, ಕ್ರಿಸ್‌ ವೋಕ್ಸ್‌ 44; ಜೇ ರಿಚರ್ಡ್ಸನ್‌ 42ಕ್ಕೆ 5, ಮಿಚೆಲ್‌ ಸ್ಟಾರ್ಕ್ 43ಕ್ಕೆ 2, ನೇಥನ್‌ ಲಯಾನ್‌ 55ಕ್ಕೆ 2, ಮೈಕಲ್‌ ನೆಸೆರ್‌ 28ಕ್ಕೆ 1). ಪಂದ್ಯ ಶ್ರೇಷ್ಠ: ಮಾರ್ನಸ್‌ ಲಾಬುಶೇನ್‌
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3pfHnel
