ಪ್ರಕಾಶ್ ಜಿ. ಹಾಸನ: ಇತಿಹಾಸ ಪ್ರಸಿದ್ಧ ಹಾಸನ ದನಗಳ ಜಾತ್ರೆಗೆ ಪುನಃ ಚಾಲನೆ ನೀಡಲು ಮುಂದಾಗಿರುವ ನಗರಸಭೆ ಆ ಮೂಲಕ ಗತಕಾಲದ ಇತಿಹಾಸವನ್ನು ಮರು ನೆನಪಿಸಲು ಹೆಜ್ಜೆ ಇರಿಸಿದೆ. ಜಿಲ್ಲೆಯಲ್ಲಿ ಕೃಷಿಯೊಂದಿಗೆ ರೈತಾಪಿ ವರ್ಗ ಬದುಕು ಕಟ್ಟಿಕೊಂಡಿದೆ. ಕೃಷಿ ಚಟುವಟಿಕೆಯ ಹೊರತಾದ ದಿನದಲ್ಲಿ ಜಾತ್ರೆ, ಉತ್ಸವ ಇತ್ಯಾದಿ ಮೂಲಕ ಸಾಂಪ್ರದಾಯಿಕ ಆಚರಣೆಗಳನ್ನು ನಡೆಸಿಕೊಂಡು ಬಂದಿರುವುದು ಇತಿಹಾಸ. ಈ ಕಾರಣದಿಂದಾಗಿಯೇ ಹಾಸನದ ದನಗಳ ಜಾತ್ರೆ- ವಸ್ತುಪ್ರದರ್ಶನ ತನ್ನದೇ ಆದ ಮಹತ್ವ ಪಡೆದುಕೊಂಡಿತ್ತು. ಬಿ.ಎಂ.ರಸ್ತೆಯ ಬಂದೀಖಾನೆ ಮುಂಭಾಗ ಬಸವನ ಪ್ರತಿಮೆಯನ್ನು ಸ್ಥಾಪಿಸಿ ಇತಿಹಾಸವನ್ನು, ಹಿನ್ನೆಲೆಯನ್ನು ಬಣ್ಣಿಸಲಾಗುತ್ತಿತ್ತು. ಅಂತೆಯೇ ಡಿ.20ರಿಂದ ಒಂಬತ್ತು ದಿನಗಳ ಕಾಲ ಹಾಸನ ಗೊರೂರು ರಸ್ತೆಯ ನಗರಸಭೆ ಹಿಂಭಾಗದಲ್ಲಿ ದನಗಳ ಜಾತ್ರೆ ನಡೆಸಲು ನಗರಸಭೆ ಮುಂದಾಗಿದೆ. ನಾಟಕ ಪ್ರದರ್ಶನ ದನಗಳ ಜಾತ್ರೆ ನೆಪದಲ್ಲಿ ಗುಬ್ಬಿವೀರಣ್ಣ, ಮಾಸ್ಟರ್ ಹಿರಣ್ಣಯ್ಯ, ಚಿಂದೋಡಿ ಲೀಲಾ ಅವರಂತಹ ಪ್ರಸಿದ್ಧ ನಾಟಕ ಕಂಪನಿಗಳು ನಗರದ ಕೇಂದ್ರ ಗ್ರಂಥಾಲಯ ಆವರಣದಲ್ಲಿ ಟೆಂಟ್ ಹಾಕಿ ನಾಟಕ ಪ್ರದರ್ಶನ ಕಾಣುತ್ತಿತ್ತು ಎನ್ನುತ್ತಾರೆ ನಗರಸಭೆ ಮಾಜಿ ಸದಸ್ಯ, ಹಿರಿಯ ನಾಗರಿಕರಾದ ಡಾ.ವೈ.ಎಸ್.ವೀರಭದ್ರಪ್ಪ. ವಸ್ತುಪ್ರದರ್ಶನ ದನಗಳ ಜಾತ್ರೆ ಹಿನ್ನೆಲೆಯಲ್ಲಿಯೇ ನಗರಸಭೆಗೆ ಹೊಂದಿಕೊಂಡಿರುವ ವಿಶಾಲವಾದ ಜಾಗದಲ್ಲಿ ತಿಂಗಳುಗಟ್ಟಲೆ ವಸ್ತು ಪ್ರದರ್ಶನ ಕೂಡ ನಡೆಯುತ್ತಿತ್ತು. ಡಿಸೆಂಬರ್ನಲ್ಲಿ ಪ್ರಾರಂಭಗೊಂಡದ್ದು ಜನವರಿ ಸಂಕ್ರಾಂತಿ ಹಬ್ಬದವರೆಗೂ ನಡೆಯುತ್ತಿತ್ತು. ಅಲ್ಲೂ ವಸ್ತು ಪ್ರದರ್ಶನವಷ್ಟೇ ಅಲ್ಲದೆ ಬಯಲು ರಂಗಮಂದಿರದಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮ ವಿಜೃಂಬಿಸುತ್ತಿತ್ತು. ನಾಟಕ, ರಸಮಂಜರಿ ಇತ್ಯಾದಿ ಕಾರ್ಯಕ್ರಮಗಳಲ್ಲಿ ಖ್ಯಾತ ಚಲನಚಿತ್ರ ನಟರೂ ಭಾಗವಹಿಸಿದ ಉದಾಹರಣೆ ಸಾಕಷ್ಟಿದೆ. ವಸ್ತು ಪ್ರದರ್ಶನ ಮಳಿಗೆಗಳಲ್ಲಿ ಕೃಷಿ, ಕೈಗಾರಿಕೆ, ಹೈನುಗಾರಿಕೆ ಮಳಿಗೆಗಳು ಕೂಡ ಆಕರ್ಷಕವಾಗಿ ತಲೆ ಎತ್ತುತ್ತಿದ್ದ ಜತೆಗೆ ಅದರ ಬಗ್ಗೆ ಯುವ ಜನಾಂಗಕ್ಕೆ ಜಾಗೃತಿ ಮೂಡಿಸುವ ಕೆಲಸವಾಗುತ್ತಿತ್ತು. ಅರಣ್ಯ ಇಲಾಖೆ ಕೂಡ ಅರಣ್ಯ ಸಂರಕ್ಷಣೆ, ಪ್ರಾಣಿ ಸಂಕುಲಗಳ ಬಗ್ಗೆ ಮಾಹಿತಿ ಒದಗಿಸುತ್ತಿತ್ತು. ಒಟ್ಟಾರೆ ಅರ್ಥಪೂರ್ಣ ದನಗಳ ಜಾತ್ರೆ ಹಾಗೂ ವಸ್ತುಪ್ರದರ್ಶನ ಮಾಹಿತಿಪೂರ್ಣ ಹಾಗೂ ಅರ್ಥಪೂರ್ಣವಾಗಿ ನಗರವಷ್ಟೇ ಅಲ್ಲದೆ ಜಿಲ್ಲೆ, ಹೊರ ಜಿಲ್ಲೆಯಲ್ಲೂ ಮನೆಮಾತಾಗಿತ್ತು. ಆಧುನಿಕ ಭರಾಟೆಯಲ್ಲಿ ಜಾತ್ರೆ ಇತಿಹಾಸ ಪುಟ ಸೇರಿತು ಎನ್ನುವಾಗ ಮಾಜಿ ಶಾಸಕ ದಿ.ಎಚ್.ಎಸ್.ಪ್ರಕಾಶ್ ಹಾಗೂ ಅವರ ಸಹೋದರ ನಗರಸಭೆ ಮಾಜಿ ಅಧ್ಯಕ್ಷ ಎಚ್.ಎಸ್.ಅನಿಲ್ಕುಮಾರ್ ತಮ್ಮ ಅಧಿಕಾರ ಅವಧಿಯಲ್ಲಿ 2018ಕ್ಕೆ ಮುನ್ನ ದನಗಳ ಜಾತ್ರೆಯನ್ನು ಒಂದಷ್ಟು ದಿನಗಳ ಕಾಲ ನಡೆಸಲು ವ್ಯವಸ್ಥೆ ಕಲ್ಪಿಸಿದ್ದರು. ಹಾಲಿ ಶಾಸಕ ಪ್ರೀತಂ ಜೆ.ಗೌಡ ಕೂಡ ಈ ಬಗ್ಗೆ ಆಸಕ್ತಿ ವಹಿಸಿ ದನಗಳ ಜಾತ್ರೆಯನ್ನು ನಗರಸಭೆ ವತಿಯಿಂದ ನಡೆಸಲು ಮುಂದಾಗಿದ್ದಾರೆ. ಡಿ.20ರಿಂದ ಒಂಬತ್ತು ದಿನಗಳ ಕಾಲ ದನಗಳ ಜಾತ್ರೆ ನಡೆಯಲಿದೆ ಎಂಬುದೇ ಸಂತೋಷದಾಯಕ ಸಂಗತಿ.
from India & World News in Kannada | VK Polls https://ift.tt/32ijZDL
