ಹೊಸದಿಲ್ಲಿ: ವರದಕ್ಷಿಣಿ ಕಿರುಕುಳ ಪ್ರಕರಣಗಳಲ್ಲಿ ಆರೋಪಿ ಗಂಡನ ಜತೆಗೆ ಆತನ ಮನೆಯವರ ವಿರುದ್ಧವೂ ಆರೋಪ ಹೊರಿಸಿ ಕೋರ್ಟ್‌ಗೆ ಎಳೆಯುವುದು ಸರ್ವೆಸಾಮಾನ್ಯವಾಗಿದೆ. ಆದರೆ, ಬಲವಾದ ಸಾಕ್ಷ್ಯಾಧಾರ ಇಲ್ಲದೇ ಆರೋಪಿಯ ಮನೆಯವರ ವಿರುದ್ಧ ತಪ್ಪು ಹೊರಿಸುವುದು ಸರಿಯಲ್ಲ ಎಂದು ಸುಪ್ರೀಂ ಕೋರ್ಟ್‌ ಅಭಿಪ್ರಾಯಪಟ್ಟಿದೆ. ‘ಗಂಡನ ವಿರುದ್ಧ ಹೆಂಡತಿ ದೂರು ನೀಡಿದರೆ ಸಾಕು, ಗಂಡನ ಮನೆಯವರೆಲ್ಲರ ಹೆಸರನ್ನೂ ಎಫ್‌ಐಆರ್‌ನಲ್ಲಿ ದಾಖಲಿಸಲಾಗುತ್ತದೆ. ಸಾಂದರ್ಭಿಕ ಪ್ರಸ್ತಾಪ ಮಾಡಿ ಅವರ ಹೆಸರು ದಾಖಲಿಸುವುದು ವಾಡಿಕೆ. ಇದರಿಂದ ಅಮಾಯಕರಿಗೆ ಅನಗತ್ಯ ಕಿರುಕುಳ ನೀಡಿದಂತಾಗುತ್ತದೆ’ ಎಂದು ನ್ಯಾಯಮೂರ್ತಿಗಳಾದ ಆರ್‌.ಸುಭಾಶ್‌ ರೆಡ್ಡಿ ಮತ್ತು ಹೃಷಿಕೇಶ್‌ ರಾಯ್‌ ಅವರನ್ನು ಒಳಗೊಂಡ ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ. ಪ್ರಕರಣದಲ್ಲಿ ಸಂತ್ರಸ್ತೆಯ ಕುಟುಂಬದವರು ದಾಖಲಿಸಿದ್ದ ಪ್ರಕರಣವೊಂದರಲ್ಲಿ ಮನೆಯವರ ಹೆಸರು ಸೇರಿಸಿದ್ದನ್ನು ಅಲಹಾಬಾದ್‌ ಹೈಕೋರ್ಟ್‌ ಮಾನ್ಯ ಮಾಡಿತ್ತು. ‘ಶರಣಾಗಿ, ನಂತರ ಜಾಮೀನಿಗೆ ಅರ್ಜಿ ಸಲ್ಲಿಸಿ’ ಎಂದು ಕುಟುಂಬಸ್ಥರಿಗೆ ಕೋರ್ಟ್‌ ಆದೇಶ ನೀಡಿತ್ತು. ಇದನ್ನು ಪ್ರಶ್ನಿಸಿ ಸಲ್ಲಿಸಿದ್ದ ಮೇಲ್ಮನವಿಯನ್ನು ಪರಿಶೀಲಿಸಿದ ಸುಪ್ರೀಂ ಕೋರ್ಟ್‌, ಹೈಕೋರ್ಟ್‌ ಆದೇಶಕ್ಕೆ ತಡೆ ನೀಡಿ, ಸಂತ್ರಸ್ತರ ವಿರುದ್ಧದ ತೀರ್ಪನ್ನು ವಜಾಗೊಳಿಸಿತು. ‘ಎಫ್‌ಐಆರ್‌ನಲ್ಲಿ ಆರೋಪಿ ಪತಿ ಮನೆಯವರ ಅನೇಕ ಹೆಸರುಗಳನ್ನು ಸೇರಿಸಲಾಗಿದೆ. ಘಟನೆಯಲ್ಲಿ ಅವರ ಪಾತ್ರ ಏನಿತ್ತು ಎನ್ನುವ ವಿವರ ಎಲ್ಲಿಯೂ ಇಲ್ಲ. ಸಾಂದರ್ಭಿಕ ಪ್ರಸ್ತಾಪದೊಂದಿಗೆ ಈ ಹೆಸರುಗಳನ್ನು ಸೇರಿಸಲಾಗಿದೆ. ಇದು ತಪ್ಪು. ಈ ರೀತಿ ಮಾಡುವುದರಿಂದ ಸಹಜ ನ್ಯಾಯದಾನದ ಉಲ್ಲಂಘನೆಯಾಗುತ್ತದೆ’ ಎಂದು ನ್ಯಾಯಪೀಠ ಹೇಳಿತು.
from India & World News in Kannada | VK Polls https://ift.tt/3FuGFQc
