ಬ್ಯಾಡಗಿ: ಬ್ಯಾಡಗಿ ಕೃಷಿ ಉತ್ಪನ್ನ ಮಾರುಕಟ್ಟೆಗೆ ಗುರುವಾರ 97 ಸಾವಿರಕ್ಕೂ ಅಧಿಕ ಮೆಣಸಿನಕಾಯಿ ಚೀಲಗಳು ಆವಕವಾಗಿದ್ದು, ಆವಕದಲ್ಲಿ ನಿರೀಕ್ಷೆಗೂ ಮೀರಿದ ಏರಿಕೆ ಕಂಡುಬಂದಿದೆ. ಅಕಾಲಿಕ ಮಳೆ, ಹವಾಮಾನ ವೈಪರೀತ್ಯದಿಂದಾಗಿ ಆವಕದಲ್ಲಿ ಭಾರಿ ಇಳಿಕೆ ಕಂಡು ಬಂದಿತ್ತು. ಇದರಿಂದ ವ್ಯಾಪಾರಸ್ಥರಲ್ಲಿ ಆತಂಕ ಉಂಟು ಮಾಡಿತ್ತು. ಆದರೆ ಕಳೆದ ಸೋಮವಾರ 72,446 ಮೆಣಸಿನಕಾಯಿ ಚೀಲಗಳು ಆವಕವಾಗಿದ್ದು ಸಮಾಧಾನ ನೀಡಿತ್ತು. ಇದೀಗ ಗುರುವಾರ ಮತ್ತೆ 97,751 ಚೀಲಗಳು ಬಂದಿದ್ದು ವ್ಯಾಪಾರಸ್ಥರಲ್ಲಿ ಹರ್ಷ ತಂದಿದೆ. ಇತ್ತ ಮಾರುಕಟ್ಟೆಗೆ ರೈತರು ತಂದಿದ್ದ ಮೆಣಸಿನ ಕಾಯಿ ಚೀಲಗಳಲ್ಲಿ ಬಹುತೇಕ ಮೆಣಸಿನ ಕಾಯಿ ಹಸಿಯಾಗಿದ್ದ ಕಾರಣ ಸುಮಾರು 268 ದಲಾಲರ ಅಂಗಡಿಯಲ್ಲಿ ಟೆಂಡರ್‌ಗೆ ಇಡಲಾಗಿದ್ದ ಒಟ್ಟು 1006 ಲಾಟ್‌ಗಳನ್ನು ವ್ಯಾಪರಸ್ಥರು ಯಾವುದೇ ಬಿಡ್‌ ಮಾಡದೇ ತಿರಸ್ಕರಿಸಿದ್ದಾರೆ. ದರ ನಿಗದಿ, ರೈತರ ಪ್ರತಿಭಟನೆ ಮೆಣಸಿನ ಕಾಯಿಗೆ ಉತ್ತಮ ದರ ನೀಡಿಲ್ಲ ಎಂದು ಗುರುವಾರವು ಸಹ ನೂರಾರು ಜನ ರೈತರು ಎಪಿಎಂಸಿ ಎದುರು ಪ್ರತಿಭಟನೆ ನಡೆಸಿದರು. ಮೆಣಸಿನಕಾಯಿಗೆ ಇಷ್ಟೊಂದು ಕನಿಷ್ಠ ಬೆಲೆ ನಿಗದಿ ಮಾಡುತ್ತಿದ್ದರೂ ಎಪಿಎಂಸಿ ಕಣ್ಣುಮುಚ್ಚಿ ಕುಳಿತಿದೆ. ಗುರುವಾರ ದೊರೆತಿರುವ ಬೆಲೆ, ಹಮಾಲಿ ಹಾಗೂ ಲಾರಿ ಬಾಡಿಗೆಗೆ ಕೂಡ ಸಾಕಾಗುವುದಿಲ್ಲ. ಕೂಡಲೇ ಸಮಸ್ಯೆ ಪರಿಹರಿಸಿ ಮೆಣಸಿನಕಾಯಿಗೆ ಉತ್ತಮ ದರ ದೊರಕಿಸಿಕೊಡುವಂತೆ ಪಟ್ಟು ಹಿಡಿದರು. ಮಧ್ಯ ಪ್ರವೇಶಿಸಿದ ಎಪಿಎಂಸಿ ಅಧ್ಯಕ್ಷ ವೀರಭದ್ರಪ್ಪ ಗೊಡಚಿ, ಪ್ರತಿ ವಾರವೂ ಇದೇ ರೀತಿ ಸಮಸ್ಯೆ ಹೊತ್ತು ತರುವುದು ಸರಿಯಲ್ಲ. ಗುರುವಾರದ ಮಾರುಕಟ್ಟೆಯಲ್ಲಿ ಗುಣಮಟ್ಟದ ಮೆಣಸಿನಕಾಯಿ ತರದೇ ಇರುವುದಕ್ಕೆ ಸುಮಾರು 1 ಸಾವಿರ ಲಾಟಗಳಿಗೆ ವ್ಯಾಪಾರಸ್ಥರು ಬಿಡ್‌ ಮಾಡಿಲ್ಲ. ನಿಮ್ಮ ಮೆಣಸಿನಕಾಯಿಗೆ ಅನುಗುಣವಾಗಿ ದರ ನಿಗದಿ ಮಾಡಲಾಗಿದೆ. ಒಂದು ವೇಳೆ ಮೆಣಸಿನಕಾಯಿ ಗುಣಮಟ್ಟದ್ದಿದ್ದು, ಅದಕ್ಕೆ ಬೆಲೆ ಕಡಿಮೆ ಆಗಿದ್ದರೆ ಮತ್ತೊಮ್ಮೆ ಟೆಂಡರ್‌ಗಿಡಿ ಎಂದು ತಿಳಿ ಹೇಳಿದ ನಂತರ ಪ್ರತಿಭಟನಕಾರರು ಪ್ರತಿಭಟನೆ ಕೈಬಿಟ್ಟರು. ಪ್ರಸಕ್ತ ಮಾರುಕಟ್ಟೆ ದರ
| ತಳಿ | ಗರಿಷ್ಠ | ಕನಿಷ್ಠ | ಸರಾಸರಿ |
| ಕಡ್ಡಿ | 35,599 | 1,609 | 14,209 |
| ಡಬ್ಬಿ | 44,222 | 2,289 | 19,869 |
| ಗುಂಟೂರು | 12,869 | 829 | 6,099 |
from India & World News in Kannada | VK Polls https://ift.tt/3poQysR
