ಹೊಸದಿಲ್ಲಿ: ಅನುಚಿತ ವರ್ತನೆಯ ಕಾರಣ ನೀಡಿ ಪ್ರತಿಪಕ್ಷಗಳ ರಾಜ್ಯಸಭೆಯ 12 ಸದಸ್ಯರನ್ನು ಚಳಿಗಾಲ ಅಧಿವೇಶನದಿಂದ ಅಮಾನತುಗೊಳಿಸಿದ್ದ ಶಿಸ್ತುಕ್ರಮ ಕುರಿತಂತೆ ರಾಜ್ಯಸಭೆ ಸಚಿವಾಲಯ ಗುರುವಾರ ಸ್ಪಷ್ಟನೆ ನೀಡಿದೆ. ಮುಂಗಾರು ಅಧಿವೇಶನದ ಕೊನೆಯ ದಿನ ಪ್ರತಿಪಕ್ಷ ಸದಸ್ಯರು ಭಾರಿ ದಾಂಧಲೆ ನಡೆಸಿದ್ದರು. ಸಭಾಪತಿ ಕುರ್ಚಿಯತ್ತ ಪೇಪರ್‌ ತೂರಿ, ಹಿಗ್ಗಾಮುಗ್ಗಾ ದೂಷಣೆ ಮಾಡಿದ್ದರು. ಇದಕ್ಕೆ ಪ್ರತಿಯಾಗಿ ಚಳಿಗಾಲ ಅಧಿವೇಶನದಿಂದ ಅವರನ್ನು ಅಮಾನತುಗೊಳಿಸಿ ಸಭಾಪತಿ ಕ್ರಮ ಕೈಗೊಂಡಿದ್ದರು. ‘ಇದು ಸರಕಾರದ ಈರ್ಷ್ಯೆಯ ಕ್ರಮ. ತಮಗೆ ಇಷ್ಟವಾಗುವ ವಿಧೇಯಕಗಳಿಗೆ ಅಂಗೀಕಾರ ಪಡೆದುಕೊಳ್ಳಲು ಮಾಡಿದ ಸಂಚು’ ಎಂದು ಪ್ರತಿಪಕ್ಷ ಮುಖಂಡರು ಆರೋಪಿಸಿದ್ದರು. ಇದಕ್ಕೆ ಸಂಬಂಧಿಸಿದಂತೆ ಅಧಿವೇಶನ ಕೊನೆಗೊಂಡ ಮರು ದಿನ ರಾಜ್ಯಸಭೆ ಸಚಿವಾಲಯ ಸ್ಪಷ್ಟನೆ ನೀಡಿದೆ. ‘ಸದಸ್ಯರ ವಿರುದ್ಧದ ಶಿಸ್ತು ಕ್ರಮವನ್ನು ಪ್ರತಿಪಕ್ಷ ಮುಖಂಡರು ತಪ್ಪಾಗಿ ಭಾವಿಸಿ ಸರಕಾರದ ವಿರುದ್ಧ ಆರೋಪ ಮಾಡುತ್ತಿದ್ದಾರೆ. ಈ ಪ್ರಕರಣದಲ್ಲಿ ನಡೆದ ಸಂಗತಿ ಬೇರೆಯೇ ಇದೆ’ ಎಂದು ಸಚಿವಾಲಯ ತಿಳಿಸಿದೆ. ‘ಮಳೆಗಾಲದ ಅಧಿವೇಶನದ ಕೊನೆಯ ದಿನವಾದ ಆ.11ರಂದು ಸದನದಲ್ಲಿ ನಡೆದ ಗದ್ದಲ ಕುರಿತು ತನಿಖೆ ನಡೆಸಲು ಸಮಿತಿ ರಚಿಸಲು ತೀರ್ಮಾನಿಸಲಾಗಿತ್ತು. ಆದರೆ ಕೆಲವು ಪಕ್ಷಗಳು ತಮ್ಮ ಪಕ್ಷದ ಪ್ರತಿನಿಧಿಯ ಹೆಸರನ್ನೇ ಸೂಚಿಸಲಿಲ್ಲ. ಹೀಗಾಗಿ ಅನುಚಿತವಾಗಿ ವರ್ತಿಸಿದ ಸದಸ್ಯರನ್ನು ಅಮಾನತುಗೊಳಿಸುವ ನಿರ್ಧಾರಕ್ಕೆ ಬರಲಾಯಿತು. ಕೆಲವು ಮುಖಂಡರು ಆರೋಪಿಸಿರುವಂತೆ 12 ಸದಸ್ಯರ ವಿರುದ್ಧ ಸರಕಾರಕ್ಕೆ ಯಾವುದೇ ಪೂರ್ವಾಗ್ರಹ ಇರಲಿಲ್ಲ. ಅವರ ಅಮಾನತು ಒಂದು ಶಿಸ್ತಿನ ಕ್ರಮವಷ್ಟೇ ಆಗಿತ್ತು’ ಎಂದು ಸಚಿವಾಲಯ ತಿಳಿಸಿದೆ. ‘ಅಮಾನತು ಹಿಂಪಡೆಯಲು ಸಭಾಪತಿ ಎಂ. ವೆಂಕಯ್ಯ ನಾಯ್ಡು ನೇತೃತ್ವದಲ್ಲಿ ಸತತ ಪ್ರಯತ್ನ ನಡೆದಿತ್ತು. ಸಂಸದರು ತಪ್ಪಿಗಾಗಿ ವಿಷಾದ ವ್ಯಕ್ತಪಡಿಸಿದರೆ ಸಾಕು, ಅಮಾನತು ಆದೇಶ ಹಿಂಪಡೆಯಲಾಗುವುದು ಎಂದು ಸಭಾಪತಿ ಸ್ಪಷ್ಟಪಡಿಸಿದರು. ಆರಂಭದಲ್ಲಿ ಇದಕ್ಕೆ ಸದನ ನಾಯಕರು ಸಮ್ಮತಿಸಿದ್ದರು. ತಾವೇ ವಿಷಾದ ವ್ಯಕ್ತಪಡಿಸುವುದಾಗಿಯೂ ತಿಳಿಸಿದ್ದರು. ಆದರೆ, ಹೊರಗಡೆ ಪ್ರತಿಭಟನೆ ನಡೆಸುತ್ತಿದ್ದ ಅಮಾನತುಗೊಂಡ ಪ್ರತಿಪಕ್ಷಗಳ ಸದಸ್ಯರು ಈ ನಿರ್ಧಾರವನ್ನು ವಿರೋಧಿಸಿದರು. ಪ್ರತಿಪಕ್ಷ ನಾಯಕರ ಅಭಿಪ್ರಾಯಕ್ಕೆ ಅವರಿಂದಲೇ ವಿರೋಧ ಬಂತು. ಇದರಿಂದ ಇಡೀ ಪ್ರಕರಣ ಕಗ್ಗಂಟಾಯಿತು’ ಎಂದು ಸಚಿವಾಲಯ ಸ್ಪಷ್ಟನೆ ನೀಡಿದೆ.
from India & World News in Kannada | VK Polls https://ift.tt/3Enau3x
