ಸ್ವಾತಿ ಬಾಳ್ತಿಲ್ಲಾಯ : ಉದ್ದನೆಯ ಕೆಂಪು ಬಿಳುಪಿನ ನಿಲುವಂಗಿ, ತಲೆಗೊಂದು ಕೆಂಪಿನ ಟೋಪಿ, ಉದ್ದನೆಯ ಬಿಳಿ ಗಡ್ಡ, ಗಾಡಿಯ ತುಂಬೆಲ್ಲ ಬಲೂನುಗಳ ಅಲಂಕಾರ. ಹೀಗೆ ಅನೇಕ ವರ್ಷಗಳಿಂದ ಕೊಕ್ಕಡ-ನೆಲ್ಯಾಡಿ ಪರಿಸರದಲ್ಲಿ ಕ್ರಿಸ್ಮಸ್‌ ಸಂದೇಶ ಸಾರುತ್ತಿದ್ದ ಸಾಂತಾಕ್ಲಾಸ್‌ ನಿರೀಕ್ಷೆಯಲ್ಲಿ ನೀವಿದ್ದರೆ ಈ ವರ್ಷ ನಿರಾಸೆಯಾಗುವುದು ಖಂಡಿತ. ಹೌದು. ಸುಮಾರು 21 ವರ್ಷಗಳಿಂದ ಕೊಕ್ಕಡ-ನೆಲ್ಯಾಡಿ ಸೇರಿದಂತೆ ಜಿಲ್ಲೆಯ ನಾನಾ ಭಾಗಗಳಲ್ಲಿ ಕ್ರಿಸ್ಮಸ್‌ ಆಚರಣೆಯನ್ನು ವಿಭಿನ್ನವಾಗಿ ಆಚರಿಸಿ, ಕ್ರಿಸ್ಮಸ್‌ ಸಂದೇಶವನ್ನು ಎಲ್ಲ ಪ್ರದೇಶ, ಎಲ್ಲ ಧರ್ಮದವರಿಗೂ ಸಾರುವ ಸಾಂತಾಕ್ಲಾಸ್‌ ವೇಷಧಾರಿ ಕೊಕ್ಕಡದ ಬೋಳದಬೈಲು ನಿವಾಸಿ ವಿನ್ಸೆಂಟ್‌ ಮಿನೇಜಸ್‌ ಈ ವರ್ಷ ತಮ್ಮ ಅಲ್ಪಕಾಲದ ಅನಾರೋಗ್ಯ ನಿಮಿತ್ತ ಸಾಂತಾಕ್ಲಾಸ್‌ ವೇಷ ಧರಿಸುತ್ತಿಲ್ಲ. 2000ನೇ ವರ್ಷದಲ್ಲಿ ಆರಂಭಿಸಿದ ಅವರ ಈ ಸಂದೇಶ ಯಾತ್ರೆ, 22ನೇ ವರ್ಷಕ್ಕೆ ಮುಂದುವರಿದಿದೆ. ಆದರೆ ಕೆಲ ದಿನಗಳ ಹಿಂದೆ ಮನೆಯಲ್ಲೇ ಕೆಲಸ ಮಾಡುವಾಗ ಬಿದ್ದು ಭುಜಕ್ಕೆ ನೋವು ಮಾಡಿಕೊಂಡಿದ್ದ ವಿನ್ಸೆಂಟ್‌ ವೈದ್ಯರ ಸಲಹೆ ಮೇರೆಗೆ ಮೂರು ವಾರಗಳ ವಿಶ್ರಾಂತಿಯಲ್ಲಿದ್ದಾರೆ. ಹಾಗಾಗಿ ಈ ಬಾರಿ ತಿರುಗಾಡಲು ಸಾಧ್ಯವಾಗುತ್ತಿಲ್ಲ ಎಂದು ಬೇಸರಿಸುತ್ತಾರೆ. ವಿನ್ಸೆಂಟ್‌ ಪದವೀಧರ ಕೃಷಿಕ. ಒಳ್ಳೆಯ ನಿರೂಪಕ ಹಾಗೂ ಕಲಾವಿದ. ತಮ್ಮ ಕೃಷಿ ಹಾಗೂ ಪ್ರವೃತ್ತಿಯಲ್ಲಿ ಬಂದ ಹಣವನ್ನು ಸಾಂತಾಕ್ಲಾಸ್‌ ಯಾತ್ರೆಗೆ ಮೀಸಲಿಡುತ್ತಾರೆ. ಯಾರ ಬಳಿಯೂ ಕೈಚಾಚಿ ಕೇಳುವುದಿಲ್ಲ. ಯಾರಾದರೂ ಕೊಟ್ಟರೆ ವಿನಮ್ರದಿಂದ ಸ್ವೀಕರಿಸುತ್ತಾರೆ ಮತ್ತು ಅದನ್ನು ಸಿಹಿ ಹಂಚುವ ಕಾರ್ಯಕ್ಕೆ ವಿನಿಯೋಗಿಸುತ್ತಾರೆ. ಸುಮಾರು 25ರಿಂದ 30 ಸಾವಿರ ರೂಪಾಯಿ ಈ ಯಾತ್ರೆಗೆ ಬೇಕಾಗುತ್ತದೆ. ಈ ಹಿಂದೆ ಪುತ್ತೂರಿನ ಪ್ರತಿಷ್ಠಿತ ದ್ವಿಚಕ್ರ ಶೋರೂಂ ಮಾಲೀಕರು ಇವರ ಯಾತ್ರೆಗೆ ಉಚಿತ ಸ್ಕೂಟಿ ವಾಹನ ಹಾಗೂ ಉಚಿತ ಪೆಟ್ರೋಲ್‌ ನೀಡಿದ್ದರು. ಕ್ರಿಸ್ಮಸ್‌ಗೆ ವಾರ ಇರುವಾಗಲೇ ಈ ಯಾಧಿತ್ರೆಗೆ ತಯಾರಿ ನಡೆಸುವ ವಿನ್ಸೆಂಟ್‌ ತಮ್ಮ ದ್ವಿಚಕ್ರ ವಾಹನವನ್ನು ಅಲಂಕರಿಸುವ ಪರಿಯೇ ವಿಭಿನ್ನ. ಗಾಡಿಯ ಸುತ್ತಲೂ ಕೋಲುಗಳನ್ನು ಕಟ್ಟಿ ಅದಕ್ಕೆ ಬಣ್ಣಬಣ್ಣದ ಬಲೂನುಗಳನ್ನು ಕಟ್ಟಿಕೊಂಡು ಗಾಡಿಯ ತುಂಬೆಲ್ಲ ಚಾಕ್ಲೆಟ್‌, ಸ್ವೀಟ್‌ ಬಾಕ್ಸ್‌ಗಳನ್ನು ತುಂಬಿಕೊಂಡು ಕೊಕ್ಕಡದ ಅವರ ಮನೆಯಿಂದ ಆರಂಭಿಸಿ ರಿಕ್ಷಾ ತಂಗುದಾಣ, ಬಸ್‌ ತಂಗುದಾಣ, ಶಾಲೆಗಳು, ವೃದ್ಧಾಶ್ರಮ, ಹೆದ್ದಾರಿ ಹೀಗೆ ಎಲ್ಲ ಕಡೆಯೂ ಪ್ರಯಾಣಿಸಿ ಕ್ರಿಸ್ತ ಹುಟ್ಟಿದ ಸಂತೋಷವನ್ನು ಜನತೆಗೆ ಸಾರಿಕೊಂಡು ಹೋಗುತ್ತಾರೆ. ಸಾಂತಾಕ್ಲಾಸ್‌ ಯಾತ್ರೆ ಕೈಗೊಂಡ ವಿನ್ಸೆಂಟ್‌ ಮಿನೇಜಸ್‌ ಅನಾಥಾಶ್ರಮಗಳಿಗೆ ಹೋದಾಗ ಅಲ್ಲಿನ ವೃದ್ಧೆಯರು ಭಾವನಾತ್ಮಕವಾಗಿ ಮಾತನಾಡುವಾಗ ತಾವು ಕೂಡ ಕಣ್ಣೀರಾಗುತ್ತಾರೆ. ಸಂದೇಶಗಳ ಜತೆ ಸಾಂತ್ವನ ನೀಡುವ ಇವರು ಈ ಸೇವೆಯಲ್ಲಿ ನನಗೆ ಆತ್ಮತೃಪ್ತಿ ಇದೆ ಎಂದು ಹೇಳಿಕೊಳ್ಳುತ್ತಾರೆ. ಯಾತ್ರೆ ಸಂದರ್ಭ ಮನೆ ಬಿಟ್ಟು 3-4 ದಿನ ಹೊರಗಿರಬೇಕಾಗುತ್ತದೆ. ಆಗ ಮನೆಯ ಸಂಪೂರ್ಣ ಜವಾಬ್ದಾರಿ ಶಿಕ್ಷಕಿಯಾಗಿರುವ ಪತ್ನಿ ಕ್ರಿಸ್ತೀನಾ ಮತ್ತು ಪುತ್ರಿಯರು ನಿಭಾಯಿಸುತ್ತಾರೆ. ಈ ಬಾರಿ ಕೊರೊನಾ ಬಗ್ಗೆ ಜಾಗೃತಿ ಸಂದೇಶಗಳನ್ನಿಟ್ಟು ಯಾತ್ರೆಗೆ ತಯಾರಿ ನಡೆದಿತ್ತು. ಆದರೆ ಅಚಾನಕ್ಕಾಗಿ ಬಿದ್ದ ಕಾರಣ ಯಾತ್ರೆ ಈ ಬಾರಿ ರದ್ದಾಗಿದೆ. ಮುಂದಿನ ಬಾರಿ ಮತ್ತೆ ಮುಂದುವರಿಸುವ ಭರವಸೆ ವಿನ್ಸೆಂಟ್‌ ಅವರಲ್ಲಿದೆ.
from India & World News in Kannada | VK Polls https://ift.tt/33Y3g9V
