: ಕೊರೊನಾ ರೂಪಾಂತರಿ ''ಗಿಂತಲೂ ಅತ್ಯಂತ ವೇಗವಾಗಿ ಪ್ರಸರಿಸುತ್ತಿರುವ 'ಓಮಿಕ್ರಾನ್' ರೂಪಾಂತರಿ ವೈರಾಣು ಜಗತ್ತಿನಾದ್ಯಂತ ಕೊರೊನಾ ನಾಲ್ಕನೇ ಅಲೆಯ ಸೃಷ್ಟಿಗೆ ಕಾರಣವಾಗಿದೆ. ಇಂತಹ ಸಂದರ್ಭದಲ್ಲಿ ನಾವು ಕೊಂಚ ಎಚ್ಚರ ತಪ್ಪಿದರೂ ಅಪಾಯ ತಪ್ಪಿದ್ದಲ್ಲ ಎಂದು ಎಚ್ಚರಿಸಿದೆ. ದೇಶಾದ್ಯಂತ ಕ್ರಿಸ್‌ಮಸ್‌ ಮತ್ತು ಹೊಸ ವರ್ಷಾಚರಣೆ ಸಂಭ್ರಮ ಬಿರುಸು ಪಡೆಯುತ್ತಿರುವ ಸಂದರ್ಭದಲ್ಲಿಯೇ ಕೇಂದ್ರ ಸರಕಾರ ದೇಶದ ಜನತೆಗೆ ಮತ್ತೊಮ್ಮೆ ಎಚ್ಚರಿಕೆಯ ಸಂದೇಶ ನೀಡಿದೆ. 'ದೇಶದಲ್ಲಿ ಕೇವಲ 24 ಗಂಟೆಗಳಲ್ಲಿ 112 ಓಮಿಕ್ರಾನ್ ಸೋಂಕು ತಗುಲಿದ ಹೊಸ ಪ್ರಕರಣಗಳು ವರದಿಯಾಗಿವೆ. ದೇಶದಲ್ಲಿ ಸೋಂಕಿತರ ಸಂಖ್ಯೆ 358ಕ್ಕೆ ಏರಿಕೆಯಾಗಿದೆ. ಹೀಗಾಗಿ ಓಮಿಕ್ರಾನ್ ಪ್ರಸರಣವನ್ನು ನಿರ್ಲಕ್ಷಿಸುವುದು ಸರಿಯಲ್ಲ. ಜಗತ್ತು ನಾಲ್ಕನೇ ಅಲೆಯನ್ನು ಎದುರಿಸುತ್ತಿದ್ದರೂ, ಕಟ್ಟುನಿಟ್ಟಿನ ಮುನ್ನೆಚ್ಚರಿಕೆ ಕ್ರಮಗಳ ಪಾಲನೆಯಿಂದ ಭಾರತದಲ್ಲಿ ಮೂರನೇ ಅಲೆಯೂ ಆರಂಭವಾಗಿಲ್ಲ. ಈ ಹಂತದಲ್ಲಿ ಸ್ವಲ್ಪ ಮೈ ಮರೆತರೂ ಓಮಿಕ್ರಾನ್ ಅತ್ಯಂತ ವೇಗವಾಗಿ ಪ್ರಸರಣ ಹೊಂದುವ ಅಪಾಯ ಇದೆ' ಎಂದು ಕೇಂದ್ರ ಆರೋಗ್ಯ ಸಚಿವಾಲಯದ ಕಾರ್ಯದರ್ಶಿ ರಾಜೇಶ್‌ ಭೂಷಣ್‌ ಹೇಳಿದ್ದಾರೆ. 'ವಿಶ್ವಾದ್ಯಂತ ಪಾಸಿಟಿವಿಟಿ ಸರಾಸರಿ ದರವು ಶೇ. 6.1 ರಷ್ಟಿದೆ. ಭಾರತದಲ್ಲಿ ಪಾಸಿಟಿವಿಟಿ ದರ ಶೇ. 1.20ರಷ್ಟಿದೆ. ಯುರೋಪ್‌, ಉತ್ತರ ಅಮೆರಿಕ ಹಾಗೂ ಆಫ್ರಿಕಾದಲ್ಲಿ ಓಮಿಕ್ರಾನ್ ಆರ್ಭಟ ಸ್ಥಳೀಯ ಆರೋಗ್ಯ ವ್ಯವಸ್ಥೆಯನ್ನು ಚಿಂತೆಗೆ ದೂಡುತ್ತಿದೆ. ಇಸ್ರೇಲ್‌ ಸೇರಿದಂತೆ ಅನೇಕ ರಾಷ್ಟ್ರಗಳು ಜನರಿಗೆ ನಾಲ್ಕನೇ ಡೋಸ್‌ ನೀಡುವ ಸಿದ್ಧತೆ ನಡೆಸುತ್ತಿವೆ. ಅದೃಷ್ಟವಶಾತ್‌, ಏಷ್ಯಾದಲ್ಲಿ ಮಾತ್ರ ಕೊರೊನಾದ ಹೊಸ ಅಲೆಯ ಸ್ಫೋಟ ಸಂಭವಿಸಿಲ್ಲ' ಎಂದು ಭೂಷಣ್‌ ಹೇಳಿದ್ದಾರೆ. 'ವಿಶ್ವ ಆರೋಗ್ಯ ಸಂಸ್ಥೆಯು (ಡಬ್ಲ್ಯೂಎಚ್‌ಒ) ಮೂರು ದಿನಗಳಲ್ಲಿ ಓಮಿಕ್ರಾನ್ ಸೋಂಕಿತರ ಸಂಖ್ಯೆ ದ್ವಿಗುಣವಾಗುವುದು ಎಚ್ಚರಿಕೆಯ ಗಂಟೆ ಎಂದಿದೆ. ಭಾರತದಲ್ಲಿ ಓಮಿಕ್ರಾನ್ ಸೋಂಕಿತರ ಸಂಖ್ಯೆ ಒಂದೂವರೆ ದಿನಗಳಲ್ಲಿ ದುಪ್ಪಟ್ಟಾಗುತ್ತಿದೆ. ಹಾಗಾಗಿ, ಓಮಿಕ್ರಾನ್ ರೂಪಾಂತರಿಯನ್ನು ಲಘುವಾಗಿ ಪರಿಗಣಿಸಬಾರದು. ಎಲ್ಲ ರಾಜ್ಯಗಳು ಜನರಿಗೆ ಕೊರೊನಾ ಮುನ್ನೆಚ್ಚರಿಕೆ ಪಾಲನೆ ಮಾರ್ಗಸೂಚಿಯನ್ನು ಕಡ್ಡಾಯಗೊಳಿಸಬೇಕು' ಎಂದು ಭೂಷಣ್‌ ತಿಳಿಸಿದ್ದಾರೆ. ಲಸಿಕೆ ಪಡೆದ ಶೇ.91 ಜನರಿಗೆ ಸೋಂಕು ಓಮಿಕ್ರಾನ್ ಸೋಂಕಿತರ ಪೈಕಿ 183 ಮಂದಿಯ ಕುರಿತು ಅಧ್ಯಯನ ನಡೆಸಲಾಗಿದೆ. ಅವರಲ್ಲಿ ಶೇ.91ರಷ್ಟು ಮಂದಿ ಕೊರೊನಾ ನಿರೋಧಕ ಲಸಿಕೆಯ ಎರಡೂ ಡೋಸ್‌ಗಳನ್ನು ಪಡೆದಿದ್ದಾರೆ. ಇವರಲ್ಲಿ ಮೂವರು ಬೂಸ್ಟರ್‌ ಡೋಸ್‌ ಪಡೆದಿದ್ದಾರೆ. ಹಾಗಿದ್ದೂ ಕೂಡ ಓಮಿಕ್ರಾನ್ ಸೋಂಕಿಗೆ ತುತ್ತಾಗಿದ್ದಾರೆ. ಇನ್ನು, ಶೇ. 70ರಷ್ಟು ಸೋಂಕಿತರಲ್ಲಿ ಅನಾರೋಗ್ಯದ ಲಕ್ಷಣಗಳೇ ಗೋಚರವಾಗಿಲ್ಲ. ಅದರಲ್ಲೂ ಪುರುಷರೇ ಹೆಚ್ಚು. ಅಂದರೆ, ಶೇ.61ರಷ್ಟು ಪುರುಷ ಸೋಂಕಿತರಲ್ಲಿ ಓಮಿಕ್ರಾನ್ , ಅನಾರೋಗ್ಯದ ಸೋಂಕನ್ನೇ ಕಾಣಿಸದಂತೆ ಮಾಡಿದೆ. ಹಾಗಾಗಿ ಅವರಿಂದ ಬೇರೊಬ್ಬರಿಗೆ ಮತ್ತು ಕುಟುಂಬಸ್ಥರಿಗೆ ಬೇಗನೇ ಓಮಿಕ್ರಾನ್ ಹಬ್ಬಿದೆ. ಇದು ರೋಗ ನಿರೋಧಕತೆ ಕಡಿಮೆ ಇರುವವರಿಗೆ ಅಪಾಯಕಾರಿ ಆಗುವ ಸಾಧ್ಯತೆಯಿದೆ' ಎಂದು ರಾಜೇಶ್‌ ಭೂಷಣ್‌ ವಿವರಿಸಿದ್ದಾರೆ. ಕರ್ನಾಟಕ ಸೇರಿ 5 ರಾಜ್ಯದಲ್ಲಿ ಎಚ್ಚರ: ದೇಶದಲ್ಲಿ ಕರ್ನಾಟಕ, ಕೇರಳ, ಮಹಾರಾಷ್ಟ್ರ, ತಮಿಳುನಾಡು ಹಾಗೂ ಪಶ್ಚಿಮ ಬಂಗಾಳದ ಒಟ್ಟು 20 ಜಿಲ್ಲೆಗಳಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಿದೆ. ವಾರದ ಸರಾಸರಿ ಪಾಸಿಟಿವಿಟಿ ದರವು 5-10% ನಡುವೆ ಇದೆ. ಇದು ಆತಂಕಕಾರಿ ಬೆಳವಣಿಗೆಯಾಗಿದೆ. ಅಲ್ಲದೆ, ಉತ್ತರ ಪ್ರದೇಶ, ಪಂಜಾಬ್‌ ಹಾಗೂ ಇತರ ರಾಜ್ಯಗಳು ಚುನಾವಣೆಗೆ ಸಜ್ಜಾಗುತ್ತಿರುವ ಹಿನ್ನೆಲೆಯಲ್ಲಿ ಲಸಿಕೆ ನೀಡುವಿಕೆಯ ವೇಗ ಹೆಚ್ಚಾಗಬೇಕಿದೆ. ಈ ರಾಜ್ಯಗಳಲ್ಲಿ ಇನ್ನೂ ಬಹಳ ಮಂದಿ ಕೊರೊನಾ ನಿರೋಧಕ ಲಸಿಕೆಯ ಎರಡೂ ಡೋಸ್‌ ಪಡೆಯಬೇಕಿದೆ ಎಂದು ಕಾರ್ಯದರ್ಶಿ ರಾಜೇಶ್‌ ಭೂಷಣ್‌ ತಿಳಿಸಿದ್ದಾರೆ. ರಾಜ್ಯಗಳಿಗೆ ಕೇಂದ್ರದ 'ಪಂಚ' ಸೂತ್ರ - ನೈಟ್‌ ಕರ್ಫ್ಯೂ ಅಗತ್ಯತೆ ಪರಿಶೀಲಿಸಿ ಕೂಡಲೇ ಜಾರಿ ಮಾಡಬೇಕು - ಜನಜಂಗುಳಿ ಬೇಡ, ಧಾರ್ಮಿಕ, ಸಾಮಾಜಿಕ, ರಾಜಕೀಯ ಸಭೆಗಳ ನಿಯಂತ್ರಣ ಕಡ್ಡಾಯ - ಜಿಲ್ಲಾವಾರು ಆಸ್ಪತ್ರೆಗಳಲ್ಲಿ ಸೋಂಕಿತರ ಪ್ರಾಥಮಿಕ ಚಿಕಿತ್ಸೆಗೆ ಅಗತ್ಯ ವ್ಯವಸ್ಥೆ ಉನ್ನತೀಕರಿಸಿ, ಬೆಡ್‌ಗಳ ಸಂಖ್ಯೆ ಕೂಡ ಹೆಚ್ಚಿಸಬೇಕು - ಜಿಲ್ಲಾವಾರು ಆಸ್ಪತ್ರೆಗಳಿಗೆ ಅಗತ್ಯವಾದ ವೈದ್ಯಕೀಯ ಸಾಧನಗಳನ್ನು ತ್ವರಿತಗತಿಯಲ್ಲಿ ಪೂರೈಕೆ ಮಾಡಬೇಕು. ಗ್ರಾಮೀಣ ಭಾಗಕ್ಕೆ ಸೋಂಕು ಲಗ್ಗೆ ಇಡದಂತೆ ನಿಗಾವಹಿಸಬೇಕು - ಕೊರೊನಾ ಮುನ್ನೆಚ್ಚರಿಕೆ ಕ್ರಮಗಳಾದ ಮಾಸ್ಕ್‌ ಧಾರಣೆ, ಸಾಮಾಜಿಕ ಅಂತರ ಪಾಲನೆ ಕಡ್ಡಾಯಗೊಳಿಸಬೇಕು ರಾಜ್ಯಗಳಲ್ಲಿ ಹೊಸ ನಿರ್ಬಂಧ - ಮಹಾರಾಷ್ಟ್ರದಲ್ಲಿ ರಾತ್ರಿ 9 ರಿಂದ ಬೆಳಗ್ಗೆ 8 ಗಂಟೆವರೆಗೆ ನಿಷೇಧಾಜ್ಞೆ ಜಾರಿ - ಹರಿಯಾಣದಲ್ಲಿ ಲಸಿಕೆ ಪಡೆಯದ ವ್ಯಕ್ತಿಗಳಿಗೆ ಸಾರ್ವಜನಿಕ ಸ್ಥಳದಲ್ಲಿ ಪ್ರವೇಶ ನಿರ್ಬಂಧ - ಉತ್ತರ ಪ್ರದೇಶದಲ್ಲಿ ರಾತ್ರಿ 9 ರಿಂದ ಬೆಳಗ್ಗೆ 5ರವರೆಗೆ ರಾತ್ರಿ ಕರ್ಫ್ಯೂ ಜಾರಿ 24 ಗಂಟೆಗಳಲ್ಲಿ 122 ಮಂದಿಗೆ ಓಮಿಕ್ರಾನ್ ದೃಢ: ಮಹಾರಾಷ್ಟ್ರದಲ್ಲಿ ನಿರ್ಬಂಧ ಶುಕ್ರವಾರದಂದು 24 ಗಂಟೆಗಳಲ್ಲಿ ದೇಶಾದ್ಯಂತ 122 ಮಂದಿಗೆ ಹೊಸದಾಗಿ ಓಮಿಕ್ರಾನ್ ಸೋಂಕು ತಗುಲಿರುವುದು ಖಾತರಿಯಾಗಿದೆ. ಈ ಮೂಲಕ ಒಟ್ಟಾರೆ ಸೋಂಕಿತರ ಸಂಖ್ಯೆ 360 ದಾಟಿದೆ. ಆ ಪೈಕಿ ದಿಲ್ಲಿಯಲ್ಲಿ ಶುಕ್ರವಾರದಂದು 180 ಹೊಸ ಕೋವಿಡ್‌ ಕೇಸ್‌ಗಳು ವರದಿಯಾಗಿ ಆತಂಕ ಮೂಡಿಸಿದೆ. ಮುಂಬಯಿನಲ್ಲಿ 680 ಜನರಿಗೆ ಹೊಸದಾಗಿ ಕೊರೊನಾ ತಗುಲಿದೆ. ಕಳೆದ 78 ದಿನಗಳಲ್ಲೇ ಗರಿಷ್ಠ ಮಟ್ಟದ ಏಕದಿನ ಸೋಂಕಿತರು ಶುಕ್ರವಾರ ಮುಂಬಯಿನಲ್ಲಿ ವರದಿಯಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರ ಸರಕಾರವು, ರಾತ್ರಿ 9 ರಿಂದ ಬೆಳಗ್ಗೆ 6 ಗಂಟೆಯವರೆಗೆ ನೈಟ್‌ ಕರ್ಫ್ಯೂ ಜಾರಿ ಮಾಡಿದೆ. ಹರಿಯಾಣ ಕೂಡ ರಾತ್ರಿ 11 ಗಂಟೆಯಿಂದ ಬೆಳಗ್ಗೆ 5ರವರೆಗೆ ನೈಟ್‌ ಕರ್ಫ್ಯೂ ಜಾರಿಗೆ ತಂದಿದೆ. ಬೂಸ್ಟರ್‌ ಡೋಸ್‌ ಅಧ್ಯಯನ: ಫೆ.3ರಂದು ಪೀಕ್‌ ಲಸಿಕೆಯಯ ಎರಡೂ ಡೋಸ್‌ ಪಡೆದಿರುವ 3 ಸಾವಿರ ಜನರ ಮೇಲೆ ಬೂಸ್ಟರ್‌ ಡೋಸ್‌ನ ಪರಿಣಾಮಗಳ ಕುರಿತು ಕೇಂದ್ರ ಆರೋಗ್ಯ ಸಚಿವಾಲಯವು ಅಧ್ಯಯನ ನಡೆಸಲು ಸಿದ್ಧತೆ ನಡೆಸಿದೆ. ಫರಿದಾಬಾದಿನ ಟ್ರಾನ್ಸ್‌ಲೇಷನಲ್‌ ಹೆಲ್ತ್‌ ಸೈನ್ಸಸ್‌ ಮತ್ತು ಟೆಕ್ನಾಲಜಿ ಇನ್‌ಸ್ಟಿಟ್ಯೂಟ್‌ಮನಲ್ಲಿಈ ಅಧ್ಯಯನ ನಡೆಯಲಿದೆ. ಮತ್ತೊಂದೆಡೆ, ಕಾನ್ಪುರದ ಐಐಟಿಯಲ್ಲಿ ನಡೆದಿರುವ ಅಧ್ಯಯನ ಪ್ರಕಾರ ಭಾರತದಲ್ಲಿ ಈಗಾಗಲೇ ಕೊರೊನಾ ಮೂರನೇ ಅಲೆ ಆರಂಭವಾಗಿದೆ. ಫೆಬ್ರುವರಿ 3ರ ಒಳಗೆ ಓಮಿಕ್ರಾನ್ ಹಾಗೂ ಡೆಲ್ಟಾ ರೂಪಾಂತರಿಗಳ ಮಿಶ್ರಿತ ಸೋಂಕಿನ ವಾತಾವರಣದಿಂದಾಗಿ ದೇಶದಲ್ಲಿ ಮೂರನೇ ಅಲೆಯು ಉತ್ತುಂಗ ಮುಟ್ಟಲಿದೆ ಎನ್ನಲಾಗಿದೆ.
from India & World News in Kannada | VK Polls https://ift.tt/3qlm0Yp
