ಬೆಂಗಳೂರು: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಹಾಗೂ ಯಲಹಂಕ ಕ್ಷೇತ್ರದ ಶಾಸಕ ಎಸ್‌.ಆರ್‌. ವಿಶ್ವನಾಥ್‌ ಹತ್ಯೆಗೆ ಸಂಚು ರೂಪಿಸಿದ ವಿಡಿಯೋ ಬುಧವಾರ ಬಹಿರಂಗಗೊಂಡು ರಾಜ್ಯ ರಾಜ್ಯಕಾರಣದಲ್ಲಿ ಸಂಚಲನ ಮೂಡಿಸಿದೆ. ಕಳೆದ ವಿಧಾನಸಭೆ ಚುನಾವಣೆಯಲ್ಲಿ ವಿಶ್ವನಾಥ್‌ ವಿರುದ್ಧ ಕಾಂಗ್ರೆಸ್‌ನಿಂದ ಸ್ಪರ್ಧಿಸಿ ಪರಾಭವಗೊಂಡಿದ್ದ ಮತ್ತು ಕೈ ಕಾರ್ಯಕರ್ತ ಕುಳ್ಳ ದೇವರಾಜ್‌ ನಡುವೆ ನಡೆದ ಸಂಭಾಷಣೆ ಇದಾಗಿದ್ದು, ಹೈದರಾಬಾದ್‌, ಪಾಂಡಿಚೇರಿ ಮೂಲದ ಶಾರ್ಪ್ ಶೂಟರ್‌ಗಳನ್ನು ಕರೆಸಿ ಹತ್ಯೆ ನಡೆಸುವ ಸಂಚು ವಿಡಿಯೋದಲ್ಲಿ ದಾಖಲಾಗಿದೆ. ''ವಿಶ್ವನಾಥ್‌ ವಿರುಧಿದ್ಧ ಗೆಲ್ಲಲು 100 ಕೋಟಿ ರೂ.ಗಳಿಗೂ ಹೆಚ್ಚು ಹಣ ಬೇಕು. 5 ಕೋಟಿ ರೂ. ಕೊಡುತ್ತೇನೆ. ನೀನೇ ಹೊಡೆದು ಹಾಕು'' ಎಂದು ಗೋಪಾಲಕೃಷ್ಣ, ಕುಳ್ಳ ದೇವರಾಜ್‌ಗೆ ಡೀಲ್‌ ಒಪ್ಪಿಸುತ್ತಾರೆ. ಸದ್ಯದಲ್ಲೇ ಕೆಲಸ ಪೂರ್ಣಗೊಳಿಸುವುದಾಗಿ ದೇವರಾಜ್‌ ಒಪ್ಪಿಕೊಂಡಿರುವುದು ದೃಶ್ಯ-1ರಲ್ಲಿ ಸೆರೆಯಾಗಿದೆ. ಇನ್ನು, ಎರಡನೇ ದೃಶ್ಯದಲ್ಲಿ ಶಾರ್ಪ್ ಶೂಟರ್‌ಗಳನ್ನು ಕರೆಸಿ ತೋಟದ ಮನೆಗೆ ಕಳಿಸಿದ್ದಾಗಿ ದೇವರಾಜ್‌ ಮಾತನಾಡಿದ್ದಾನೆ. ಶೂಟರ್‌ಗಳ ಖರ್ಚಿಗೆ ಪ್ರತಿ ದಿನ 5 ಸಾವಿರ ರೂ. ಕೊಡುವಂತೆ ಕೇಳಿದ್ದು, ಮುಂದಿನ ವಾರ ಕೊಡುವುದಾಗಿ ಗೋಪಾಲಕೃಷ್ಣ ಒಪ್ಪಿಕೊಂಡಿರುವುದು ಸೆರೆಯಾಗಿದೆ. ವಿಡಿಯೋ ಬಹಿರಂಗಗೊಳ್ಳುತ್ತಿದ್ದಂತೆಯೇ ಎಸ್‌.ಆರ್‌. ವಿಶ್ವನಾಥ್‌ ವಿಧಾನಸೌಧಕ್ಕೆ ಆಗಮಿಸಿ ಸುದ್ದಿಗೋಷ್ಠಿ ನಡೆಸಿದರು. ಇನ್ನೊಂದೆಡೆ ಗೋಪಾಲಕೃಷ್ಣ ಸಹ ಆರೋಪ ತಳ್ಳಿಹಾಕಿದ್ದಾರೆ. ದೂರು ಸಲ್ಲಿಕೆ 'ಮುತ್ತುಗದಹಳ್ಳಿ ಗೋಪಾಲಕೃಷ್ಣ ಮತ್ತು ಇತರರಿಂದ ನನ್ನ ವಿರುದ್ಧ ಕೊಲೆ ಸಂಚು, ಮಾನಹಾನಿಗೆ ಸಂಬಂಧ ಅನವಶ್ಯಕ ವಿಷಯಗಳು ಹಾಗೂ ಅಪರಾಧ ಪ್ರಕರಣಗಳಲ್ಲಿ ಸಿಲುಕಿಸುವ ಪ್ರಯತ್ನ ನಡೆಸಿ ಜೀವ ಭಯ ಉಂಟು ಮಾಡಿದ್ದಾರೆ ಎಂದು ರಾಜಾನುಕುಂಟೆ ಪೊಲೀಸ್‌ ಠಾಣೆಗೆ ಶಾಸಕ ಎಸ್‌.ಆರ್‌. ವಿಶ್ವನಾಥ್‌ ದೂರು ನೀಡಿದ್ದಾರೆ. ನ.30ರ ಮಂಗಳವಾರ ನನಗೆ ಬಂದ ಮಾಹಿತಿಯಂತೆ ಮುತ್ತುಗದಹಳ್ಳಿ ಗೋಪಾಲಕೃಷ್ಣ ಮತ್ತು ದೇವರಾಜ ಅಲಿಯಾಸ್‌ ಕುಳ್ಳ ದೇವರಾಜ ಕೊಲೆಗೆ ಸಂಚು ರೂಪಿಸಿದ್ದಾರೆ. ಶಾಸಕನಾಗಿ ಜನಸೇವೆ ಮಾಡುತ್ತಿರುವುದನ್ನು ಸಹಿಸಲಾಗದೆ ದ್ವೇಷದಿಂದ ಸಂಚು ರೂಪಿಸಿದ್ದು, ಈ ಹಿಂದೆ ಕಡಬಗೆರೆ ಸೀನ ಅಲಿಯಾಸ್‌ ಶ್ರೀೕನಿವಾಸ್‌ ಕೊಲೆ ಸಂಚು ಪ್ರಕರಣದಲ್ಲಿ ನನ್ನ ಮತ್ತು ನನ್ನ ಹಲವಾರು ಸ್ನೇಹಿತರ ಕಡೆಯಿಂದ ಬಲವಂತದ ಹೇಳಿಕೆ ನೀಡುವ ಪ್ರಯತ್ನ ಮಾಡಿದ್ದಾರೆ. ಕೆಲವು ಪ್ರಕರಣಗಳಲ್ಲಿಯೂ ಈತನ ಕೈವಾಡ ಇರುವ ಬಗ್ಗೆ ತೀವ್ರ ಅನುಮಾನವಿದೆ. ನನ್ನ ತೋಟಕ್ಕೆ ಒಂಟಿಯಾಗಿ ಹೋಗಿ ಬರುವ ವೇಳೆ, ಒಂಟಿಯಾಗಿ ವಾಕಿಂಗ್‌ ಮಾಡುವ ವೇಳೆ, ಕಾರ್ಯಕ್ರಮಗಳಿಗೆ ಹೋಗಿ ಬರುವ ವೇಳೆ ನನ್ನ ಮೇಲೆ ಹಲ್ಲೆಮಾಡಿ ಎರಡೇ ಏಟಿಗೆ ಹೊಡೆಯಬೇಕು ಮತ್ತು ಪೂರ್ತಿಯಾಗಿ ಮುಗಿಸಬೇಕು ಎಂಬ ಆತನ ದ್ವೇಷ ಮನೋಭಾವ ಮತ್ತು ಸಂಚಿಗೆ ಪೂರಕವಾಗಿ ನನ್ನ ಮೇಲೆ ಹಲ್ಲೆಮಾಡುವ ಪ್ರಯತ್ನವೂ ಸಾರ್ವಜನಿಕರ ಗಮನಕ್ಕೆ ಬಂದಿದೆ. ಹಾಗೆ ನೋಡಿದರೆ ಆತ ಚುನಾವಣೆ ದೃಷ್ಟಿಯಿಂದ ನನ್ನ ಮಾನಹಾನಿ ಮಾಡುವ, ಕೊಲೆ ಮಾಡಲು ಸಂಚು ಹಾಗೂ ಸುಪಾರಿ ನೀಡಿರುವುದು ಕಂಡು ಬಂದಿದ್ದು, ಇದರಿಂದ ನನ್ನ ಕ್ಷೇತ್ರದ ಜನ ಆತಂಕಕ್ಕೆ ಒಳಗಾಗಿದ್ದಾರೆ. ಈ ಬಗ್ಗೆ ವಿಚಾರಣೆ ಮಾಡಿ ಸೂಕ್ತ ಕಾನೂನು ಕ್ರಮ ವಹಿಸುವಂತೆ ದೂರಿನಲ್ಲಿ ಕೋರಿದ್ದಾರೆ. ಪ್ರತಿಭಟನೆ ಎಸ್‌.ಆರ್‌. ವಿಶ್ವನಾಥ್‌ ಹತ್ಯೆ ಸಂಚು ಖಂಡಿಸಿ ಕಾಂಗ್ರೆಸ್‌ ಮುಖಂಡ ಗೋಪಾಲಕೃಷ್ಣ ಮತ್ತು ಆತನ ಸಹಚರ ಕುಳ್ಳದೇವರಾಜ್‌ ವಿರುದ್ಧ ಗುರುವಾರ ಕ್ಷೇತ್ರದ ಹೋಬಳಿ ಕೇಂದ್ರಗಳಲ್ಲಿ ಬೃಹತ್‌ ಪ್ರತಿಭಟನೆ ನಡೆಸಲಾಗುವುದು ಎಂದು ಯಲಹಂಕ ಬಿಜೆಪಿ ಗ್ರಾಮಾಂತರ ಮಂಡಲದ ಅಧ್ಯಕ್ಷ ಹನುಮಯ್ಯ ತಿಳಿಸಿದ್ದಾರೆ. ಹಣ ನೀಡಿ ಹತ್ಯೆಗೆ ಸಂಚು ನೀಡಿರುವುದು ಕ್ಷೇತ್ರದ ನಾಗರಿಕರಿಗೆ , ಪಕ್ಷದ ಕಾರ್ಯಕರ್ತರಿಗೆ ದಿಗ್ಭ್ರಮೆ ಉಂಟು ಮಾಡಿದೆ. ಸಂಚು ರೂಪಿಸಿದವರ ವಿರುದ್ಧ ಕಠಿಣ ಕಾನೂನು ಕ್ರಮ ತೆಗೆದುಕೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ. ಆರೋಪ ತಳ್ಳಿ ಹಾಕಿದ ಗೋಪಾಲಕೃಷ್ಣ ವಿಡಿಯೋ ಎಡಿಟ್‌ ಮಾಡಲಾಗಿದೆ. ಸುಳ್ಳು ಸುದ್ದಿ ಹರಿಬಿಡಲಾಗಿದೆ. ಹತ್ಯೆಗೆ ಸಂಚು ರೂಪಿಸಲಾಗಿದೆ ಎಂಬುದು ಸುಳ್ಳು. ಪರಿಚಯಸ್ಥ ಸೇಟು ಒಬ್ಬರಿಗೆ ಸೇರಿದ 8 ಎಕರೆ ಜಮೀನು ಮಾರಾಟ ವಿಷಯಕ್ಕೆ ಶಾಸಕರು ತೊಂದರೆ ಕೊಡುತ್ತಿದ್ದಾರೆ. ಸೆಟ್ಮೆಂಟ್‌ ಮಾಡಿಕೊಡಿ ಎಂದು ದೇವರಾಜ್‌ ನನ್ನ ಬಳಿ ಬಂದಿದ್ದ. 5 ಲಕ್ಷ ರೂ. ತಂದು ಅದರಲ್ಲಿ 2 ಲಕ್ಷ ವಾಪಸ್‌ ತೆಗೆದುಕೊಂಡು ಹೋದ. ಆನಂತರ ಈ ರೀತಿಯ ವಿಡಿಯೋ ಮಾಡಿ ಹರಿ ಬಿಟ್ಟಿರಬಹುದು ಎಂದು ಗೋಪಾಲಕೃಷ್ಣ ತಿಳಿಸಿದ್ದಾರೆ. ಈ ಹಿಂದೆ ಕಡಬಗೆರೆ ಸೀನ ಕೊಲೆಯಾಗಿದ್ದನ್ನು ಸಿಬಿಐ ತನಿಖೆಗೆ ಒಳಪಡಿಸಬೇಕು ಎಂದು ಆಗ್ರಹಿಸಿದ್ದಾರೆ. ಸೀನ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಸ್‌.ಆರ್‌.ವಿಶ್ವನಾಥ್‌ ಮತ್ತು ಸಹಚರರ ಕೈವಾಡ ಇದೆಯೇ ಎಂಬುದರ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸದ ಅವರು 'ಇರಬಹುದು.. ಇರಬಹುದು' ಎಂದರು. ''ಪೊಲೀಸರು ನಿಷ್ಪಕ್ಷಪಾತ ತನಿಖೆ ನಡೆಸಿ ದೇವರಾಜ್‌ ಕಾಲ್‌ ರೆಕಾರ್ಡ್‌ ಲಿಸ್ಟ್‌ ತೆಗೆಸಲಿ. ಆಗ ಸತ್ಯ ಹೊರ ಬರುತ್ತದೆ'' ಎಂದು ಒತ್ತಾಯಿಸಿದರು. ''ನನಗೆ ಸೂಕ್ತ ಭದ್ರತೆಗಾಗಿ ಸರಕಾರಕ್ಕೆ ಮನವಿ ಮಾಡುತ್ತೇನೆ. ಸಿಸಿಬಿ ವಿಚಾರಣೆ ನಡೆಸಿದ್ದಾರೆ. ಎಲ್ಲವನ್ನೂ ಹೇಳಿದ್ದೇನೆ. ದೇವರಾಜ್‌ ವಿರುದ್ಧ ಮಾನನಷ್ಟ ಮೊಕದ್ದಮೆ ದೂರು ದಾಖಲಿಸುತ್ತೇನೆ, ಎಂದರು. ಈ ನಡುವೆ, ವಿಶ್ವನಾಥ್‌ ಮತ್ತು ದೇವರಾಜ್‌ ಇತ್ತೀಚೆಗೆ ಜತೆಯಾಗಿರುವ ಫೋಟೋ ಒಂದನ್ನು ಮಾಧ್ಯಮ ಪ್ರತಿನಿಧಿಗಳ ಮುಂದೆ ಪ್ರದರ್ಶಿಸಿದರು. ನನ್ನ ಹತ್ಯೆಗೆ ಗೋಪಾಲಕೃಷ್ಣ ಸಂಚು ಶಾಸಕ ಎಸ್‌.ಆರ್‌. ವಿಶ್ವನಾಥ್‌ ಆರೋಪ ನನ್ನ ಹತ್ಯೆಯ ಸಂಚಿನ ಬಗ್ಗೆ ಸಿಎಂ ಹಾಗೂ ಗೃಹ ಸಚಿವರಿಗೆ ಮಾಹಿತಿ ನೀಡಿದ್ದೇನೆ. ಪ್ರಕರಣದ ನಿಷ್ಪಕ್ಷಪಾತ ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಕೋರಿದ್ದೇನೆ ಎಂದು ಬಿಡಿಎ ಅಧ್ಯಕ್ಷರಾದ ಶಾಸಕ ಎಸ್‌.ಆರ್‌. ವಿಶ್ವನಾಥ್‌ ಹೇಳಿದ್ದಾರೆ. ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘‘ಎರಡು ಬಾರಿ ನನ್ನ ವಿರುದ್ಧ ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಿ ಪರಾಭವಗೊಂಡಿರುವ ಗೋಪಾಲಕೃಷ್ಣ ರಾಜಕೀಯ ದ್ವೇಷದಿಂದ ನನ್ನ ಕೊಲೆಗೆ ಸಂಚು ರೂಪಿಸಿರಬಹುದು. ಚಾಲಕ, ಅಂಗರಕ್ಷಕನನ್ನು ಹೊರತುಪಡಿಸಿ ನನಗೆ ಯಾವುದೇ ಭದ್ರತೆ ಇಲ್ಲ. ಹಲವು ದಿನಗಳ ಹಿಂದೆಯೇ ನನ್ನ ವಿರುದ್ಧ ಷಡ್ಯಂತ್ರ ನಡೆಯುತ್ತಿರುವ ಅನುಮಾನ ಮೂಡಿತ್ತು. ಆದರೆ ಹತ್ಯೆಗೆ ಸಂಚು ನಡೆಯುತ್ತಿರುವುದು ತಿಳಿದಿರಲಿಲ್ಲ,’’ ಎಂದು ತಿಳಿಸಿದರು. ‘‘ಕಡಪ, ಆಂಧ್ರಪ್ರದೇಶದ ಕೆಲವರಿಗೆ ಸುಪಾರಿ ನೀಡಿ ವಿಶ್ವನಾಥ್‌ ಅವರನ್ನು ಕೊಲೆ ಮಾಡಿಸುವುದಾಗಿ ಗೋಪಾಲಕೃಷ್ಣ ಪ್ರಾಣ ಬೆದರಿಕೆ ಹಾಕಿದ್ದಾನೆ ಎಂದು ಕುಳ್ಳ ದೇವರಾಜ್‌ ತಪ್ಪೊಪ್ಪಿಗೆ ಪತ್ರದಲ್ಲಿ ಹೇಳಿಕೊಂಡಿದ್ದಾರೆ. ಹಿಂದೆ ಕಡಬಗೆರೆ ಶೀನನ ಶೂಟೌಟ್‌ ಪ್ರಕರಣದಲ್ಲಿ ಇದೇ ಗೋಪಾಲಕೃಷ್ಣ, ಶೀನನಿಂದ ಬಲವಂತದಿಂದ ನನ್ನ ಹೆಸರನ್ನು ಹೇಳಿಸಿಕೊಂಡಿದ್ದ. ಇಂತಹ ರಾಜಕೀಯದ ಬದಲಿಗೆ ಚುನಾವಣೆ ಎದುರಿಸಲಿ,’’ ಎಂದು ವಿಶ್ವನಾಥ್‌ ಸವಾಲು ಹಾಕಿದರು. ‘‘ಕುಳ್ಳ ದೇವರಾಜ್‌ ಕಾಂಗ್ರೆಸ್‌ ಕಾರ್ಯಕರ್ತರಾಗಿದ್ದು, ನನಗೆ ಎಲ್ಲ ಪಕ್ಷದಲ್ಲೂ ಸ್ನೇಹಿತರಿದ್ದಾರೆ. ನನಗೂ ದೇವರಾಜ್‌ಗೂ ಯಾವುದೇ ಸಂಬಂಧವಿಲ್ಲ. ಮಂಗಳವಾರ ಸಿಸಿಬಿ ಅಧಿಕಾರಿಗಳು ಗೋಪಾಲಕೃಷ್ಣನನ್ನು ವಿಚಾರಣೆಗೆ ಕರೆದೊಯ್ದಿದ್ದಾರೆ. ಆದರೆ ರಾತ್ರಿ ಹೊತ್ತಿಗೆ ಪ್ರಭಾವಿ ರಾಜಕಾರಣಿಯೊಬ್ಬರು ಬೆದರಿಕೆ ಹಾಕಿ ಬಿಡಿಸಿದ್ದಾರೆ,’’ ಎಂದು ವಿಶ್ವನಾಥ್‌ ಆರೋಪಿಸಿದರು. ಅಪರಿಚಿತರಿಂದ ಪತ್ರ ರವಾನೆ ಯಲಹಂಕದ ನನ್ನ ಗೃಹ ಕಚೇರಿಗೆ ಮಂಗಳವಾರ ಸಂಜೆ ಪತ್ರವೊಂದು ಬಂದಿತ್ತು. ಅದು ಕುಳ್ಳ ದೇವರಾಜ್‌ ಬರೆದಿದ್ದ ಕ್ಷಮಾಪಣಾ ಪತ್ರ. ‘‘ಶಾಸಕ ವಿಶ್ವನಾಥ್‌ ಅವರನ್ನು ಕೊಲೆ ಮಾಡದಿದ್ದರೆ ನಿನ್ನನ್ನು ಮತ್ತು ವಿಶ್ವನಾಥ್‌ ಅವರನ್ನು ಕೊಲೆ ಮಾಡುವುದಾಗಿ ಗೋಪಾಲಕೃಷ್ಣ ಬೆದರಿಕೆ ಹಾಕಿದ್ದಾರೆ. ನಾನು ಆರ್ಥಿಕ ಮುಗ್ಗಟ್ಟಿನಿಂದ ಗೋಪಾಲಕೃಷ್ಣನ ಜತೆಗೆ ಕೈಜೋಡಿಸಿದ್ದು ತಪ್ಪಾಗಿದ್ದು, ನನ್ನನ್ನು ಕ್ಷಮಿಸಿ’’ ಎಂದು ಆತ ಸಿಎಂ, ಗೃಹ ಸಚಿವರು, ನಗರ ಪೊಲೀಸ್‌ ಆಯುಕ್ತರಿಗೆ ಪತ್ರ ಬರೆದಿದ್ದಾನೆ. ಅದರ ಪ್ರತಿಯನ್ನು ಅಪರಿಚಿತರ ಮೂಲಕ ನನ್ನ ಕಚೇರಿಗೆ ದೇವರಾಜ್‌ ತಲುಪಿಸಿದ್ದಾನೆ ಎಂದು ವಿಶ್ವನಾಥ್‌ ಹೇಳಿದರು. ಡಿಕೆಶಿ ಸಾಧು ಸಂತರ ಜತೆ ಓಡಾಡುತ್ತಾರೆಯೇ? ನಾನು ರೌಡಿಗಳನ್ನಿಟ್ಟುಕೊಂಡು ಓಡಾಡುತ್ತೇನೆ ಎಂಬುದಾಗಿ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಹೇಳಿದ್ದಾರೆ. ಹಾಗಾದರೆ ಅವರು ಸಾಧು ಸಂತರ ಜತೆ ಓಡಾಡುತ್ತಾರೆಯೇ? ಅವರ ಹಿನ್ನೆಲೆ ಏನು ಎಂಬುದು ಎಲ್ಲರಿಗೂ ತಿಳಿದಿದೆ. ಹತ್ಯೆ ಸಂಚಿನಂತಹ ಪ್ರಕರಣದಲ್ಲಿಅವರು ನನ್ನ ಪರ ನಿಲ್ಲುವ ಬದಲು ಸಂಚು ರೂಪಿಸಿದವರ ಪರವಾಗಿ ಮಾತನಾಡಿರುವುದು ಸರಿಯಲ್ಲ. ಈ ಹಿಂದೆ ಕಾಂಗ್ರೆಸ್‌ ಶಾಸಕ ಅಖಂಡ ಶ್ರೀನಿವಾಸಮೂರ್ತಿ ಅವರ ಮನೆಗೆ ದುಷ್ಕರ್ಮಿಗಳು ಬೆಂಕಿ ಹಚ್ಚಿದ ಘಟನೆಯಲ್ಲೂ ಡಿ.ಕೆ.ಶಿವಕುಮಾರ್‌ ಅವರು ತಮ್ಮ ಶಾಸಕರ ಬೆಂಬಲಕ್ಕೆ ನಿಲ್ಲಲಿಲ್ಲ ಎಂದು ವಿಶ್ವನಾಥ್‌ ಹೇಳಿದರು. ಶಾಸಕ ಎಸ್‌.ಆರ್‌. ವಿಶ್ವನಾಥ್‌ ಹತ್ಯೆ ಸಂಬಂಧ ನಡೆದ ಸಂಭಾಷಣೆ ಹತ್ಯೆಗೆ ಸಂಚು ದೃಶ್ಯ - 1 ಗೋಪಾಲಕೃಷ್ಣ(ಗೋ): ಎಂ.ಎಲ್‌.ಎ ಫಿನಿಷ್‌ ಆಗಬೇಕು. ಸೈಲೆಂಟ್‌ ಆಗಿ ಮಾಡಬೇಕು. ದೇವರಾಜ್‌: ಸೈಲೆಂಟ್‌ ಆಗಿ ಮಾಡಿ ಬಿಡ್ತಾರೆ. ಒಂದು ಹೊಡೆದವನಿಗೆ ಇನ್ನೊಂದು ಹೊಡೆಯೋದು ಕಷ್ಟನಾ? ಸ್ವಲ್ಪ ರಿಸ್ಕ್‌ ಆಗುತ್ತೆ. ಡಿಪಾರ್ಟ್‌ಮೆಂಟ್‌ನದ್ದು ನನ್‌ ಇಂಚಾರ್ಜ್. ಒಂದ್‌ ಏಟೂ ಮುಟ್ಟಬಾರದು. ಗೋ: ಆದ್ರೆ ಫಿನಿಶ್‌ ಆಗಲೇಬೇಕು. ಅರ್ಧಬಂರ್ಧ ಇರಬಾರದು. ಎಲ್ಲಿ ಹೊಡೆದ್ರೂ, ಯಾರ್‌ ಹೊಡೆದ್ರೂ ಗೊತ್ತಾಗಬಾರದು. ದೇ: ಏ... ಹುಡುಗರು ಇದ್ದಾರೆ ಬಿಡಣ್ಣ. ಗೋ: ಎರಡೇ ಏಟಿಗೆ ಹೋಗ್ಬೇಕು, ಏನು? ದೇ. ಕರೆಕ್ಟಾಗಿ ಇಕ್ತಾರೆ ಬಾರಣ್ಣ. ಹೈದರಾಬಾದ್‌ನಿಂದ ಕರೆಸ್ತಾರೆ(ಶಾರ್ಪ್ ಶೂಟರ್‌) ಗೋ: ಅವರೇ ಕರೆಸಿಕೊಳ್ತಾರೆ (ಶಾರ್ಪ್ ಶೂಟರ್‌) ದೇ. ಶಾರ್ಪ್ ಶೂಟರ್‌ ಹೊಡೀತಾರೆ. ಹೊಡೆಯೋದು ಇವ್ರು.. ಹೋಗೋದು ಅವ್ರು. ಗೋ: ಒಕೆ ಒಕೆ .... ದೇ: ನಿಂಗೇನ್‌ ಗೊತ್ತಿಲ್ವಾ.. ಹೊಸದಾಗಿ ಕೇಳಿದ್ದೀಯಾ... ಹ್ಹ..ಹ್ಹ....ಹ್ಹ..... ಗೋ: ನಾನು ಇವರೇ ಹೊಡೀತಾರೇನೋ? ಅನ್ಕೊಂಡೆ ದೇ: ಶಾರ್‌ ಶೂಟರ್‌ ಕರೆಸಿ ಹೊಡಿಸೋದು..., ಇವತ್‌ ಇರ್ತೀವಿ. ನಾಳೆ ಸಾಯ್ತೀವಿ. ಅಷ್ಟರಲ್ಲಿ ಯಾವುದಾದ್ರೂ ಮುಗಿಸಿಬಿಟ್‌ ಹೋಗ್ತಿರಬೇಕು. ಗೋ: ಒಳ್ಳೇ ಪ್ಲ್ಯಾನ್‌ ಮಾಡಿ, ಕರೆಕ್ಟಾಗಿ ಮಾಡು ದೇ: ರೆಡಿ ಮಾಡ್ತೀನಿ. ಗೋ: ಕರೆಕ್ಟ್ ಆಗಿ ಮಾಡು. ಏನು? ದೇ: ಆಯ್ತು ಬಿಡಣ್ಣ.. ಹತ್ಯೆಗೆ ಸಂಚು ದೃಶ್ಯ - 2 ದೇ: ಅಣ್ಣ ಗೋ: ಬೆಳಗ್ಗೆ 6 ರಿಂದ 7.30ರೊಳಗೆ ಒಬ್ಬನೇ ಇರ್ತಾನೆ. ಆವಾಗ್ಲೇನೆ ಒಳ್ಳೆ ಚಾನ್ಸ್‌, ದೇ: ಇವತ್ತು ಬೆಳಗ್ಗೆ ಕಳಿಸಿದ್ದೆ. ಎರಡು ಪಲ್ಸರ್‌ನಲ್ಲಿ ಬಂದಿದ್ರು. ಇವತ್ತು ತೋಟಕ್ಕೆ ಹೋಗಿದ್ರು. ಗೋ: ಬೆಳಗ್ಗೆ ಯಾವನೂ ದಿಕ್ಕೇ ಇರೋದಿಲ್ಲ. ದೇ: ಹುಂ, ಹೋಗಿ 7 ಗಂಟೆಗೆ ವಾಪಸ್‌ ಬಂದ್ರು. ಗೋ: ಅದಕ್ಕೆ ನಿನ್‌ ಹತ್ರ ಹೇಳ್ದೆ. ಮೊದಲು ಒಂದೆರಡು ದಿನ ವಾತಾವರಣ ನೋಡಿ ಆಮೇಲೆ ಮಾಡ್ಬೇಕು. ದೇ: ಪ್ರತಿನಿತ್ಯ ಅವರನ್ನು ನಿಭಾಯಿಸೋಕೆ 5 ಸಾವಿರ ಬೇಕು. ಎಲ್ಲಿಂದ ತರಲಿ. ಖರ್ಚಿಗೆ ಹಣ ಕೊಡು ಗೋ: ಹೌದಾ ದೇ: ಹೂ ಮತ್ತೆ, ನಾಲ್ಕು ಜನ ಇದಾರೆ. ಗೋ: ಎಲ್ಲಿಯೋರು ಅವರೆಲ್ಲ. ದೇ: ಪಾಂಡಿಚೇರಿ, ಅವರಿಗೆ ಎಂಎಲ್‌ಎ ಅಂತ ಗೊತ್ತಿಲ್ಲ. ಸಿಂಪಲ್‌ ಆಗಿ ರಿಯಲ್‌ ಎಸ್ಟೇಟ್‌ ಅವರು ಅಂತ ಹೇಳಿದ್ದೇನೆ. ಅವರನ್ನು ತೋರಿಸಿದ್ದೇನೆ. ನೀನು ಬೇಗ ರೆಡಿ (ಹಣ)ಮಾಡಿದ್ರೆ.... ಗೋ: ಹೂಂ. ದೇ: ಮುಂದಿನ ವಾರಾನಾ? ಗೋ: ಹೂಂ... ದೇ: ಪಲ್ಸರ್‌ ಬೆಸ್ಟಾ. ಹೇಗೆ? ಗೋ: ಸಾಕು ಎರಡು ಪಲ್ಸರ್‌... ಅವನು ಜೀಪು ಓಡಿಸಿಕೊಂಡು ಬರ್ತಾನೆ. ಬಂದಾಗ ಮಾಡಬೇಕು.
from India & World News in Kannada | VK Polls https://ift.tt/32HAIAI
