ಹೊಸದಿಲ್ಲಿ: ಕ್ರಿಕೆಟ್ ವೃತ್ತಿ ಜೀವನದ ಕಠಿಣ ದಿನಗಳಲ್ಲಿ ಭಾರತ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್‌ ಧೋನಿ ನೀಡಿದ್ದ ಸಲಹೆ ಮಾನಸಿಕ ಆಘಾತದಿಂದ ಹೊರ ಬರಲು ಸಹಾಯವಾಯಿತು ಎಂದು ಹಿರಿಯ ಆಫ್‌ ಸ್ಪಿನ್ನರ್‌ ಆರ್‌ ಅಶ್ವಿನ್‌ ಹೇಳಿಕೊಂಡಿದ್ದಾರೆ. ಪ್ರಸಕ್ತ ವರ್ಷ ಆರ್‌ ಅಶ್ವಿನ್‌ ಪಾಲಿಗೆ ಅತ್ಯಂತ ಮಹತ್ವದ್ದಾಗಿದೆ. ಒಟ್ಟು ಎಂಟು ಟೆಸ್ಟ್ ಪಂದ್ಯಗಳಾಡಿರುವ ಆರ್‌ ಅಶ್ವಿನ್‌ 52 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ. ಆ ಮೂಲಕ 2021ರ ವರ್ಷದಲ್ಲಿ ಅತಿ ಹೆಚ್ಚು ಟೆಸ್ಟ್ ವಿಕೆಟ್‌ ಕಬಳಿಸಿದ ಬೌಲರ್‌ ಎನಿಸಿಕೊಂಡಿದ್ದಾರೆ. ಬೌಲಿಂಗ್‌ ಜೊತೆಗೆ ಬ್ಯಾಟಿಂಗ್‌ನಲ್ಲಿಯೂ ಅವರು ಅಗತ್ಯ ಸಮಯದಲ್ಲಿ ತಂಡಕ್ಕೆ ನೆರವಾಗಿದ್ದಾರೆ. ಅಂದಹಾಗೆ 2017ರಲ್ಲಿ ಆರ್‌ ಅಶ್ವಿನ್‌ ಭಾರತ ಓಡಿಐ ಹಾಗೂ ಟಿ20 ತಂಡದಲ್ಲಿ ತಮ್ಮ ಸ್ಥಾನವನ್ನು ಕಳೆದುಕೊಂಡಿದ್ದರು ಅಷ್ಟೇ ಅಲ್ಲದೆ, ಆಗ ತಾನೆ ಟೀಮ್‌ ಇಂಡಿಯಾಗೆ ಬಂದಿದ್ದ ನೂತನ ಸ್ಪಿನ್ನರ್‌ ಕುಲ್ದೀಪ್‌ ಯಾದವ್ ಅವರನ್ನು ಆಗಿನ ಕೋಚ್‌ ರವಿ ಶಾಸ್ತ್ರಿ ಮುಕ್ತಕಂಠದಿಂದ ಶ್ಲಾಘಿಸಿದ್ದರು. ಈ ವೇಳೆ ಅಶ್ವಿನ್‌ಗೆ ಭಾರಿ ಹಿನ್ನಡೆಯಾಗಿತ್ತು. ಅಷ್ಟೇ ಅಲ್ಲದೆ, 2018-19ರ ಆವೃತ್ತಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಟೆಸ್ಟ್ ಸರಣಿಯ ಕೊನೆಯ ಮೂರು ಪಂದ್ಯಗಳಲ್ಲಿಯೂ ಅಶ್ವಿನ್‌ ಆಡಿರಲಿಲ್ಲ. ಈ ಅವಧಿಯಲ್ಲಿ ಅನುಭವಿಸಿದ್ದ ಸತತ ಗಾಯದ ಸಮಸ್ಯೆ ಹಾಗೂ ಮಾನಸಿಕ ಹಿನ್ನಡೆಯಿಂದ ಹೊರಬರಲು ನೀಡಿದ್ದ ಸಲಹೆ ನೆರವಾಗಿತ್ತು ಎಂದು ಇತ್ತೀಚಿನ ಸಂದರ್ಶನವೊಂದರಲ್ಲಿ ಆರ್‌ ಅಶ್ವಿನ್‌ ಹೇಳಿಕೊಂಡಿದ್ದಾರೆ. "ನನಗೆ ಸ್ವಯಂ ಅರಿವು ತುಂಬಾ ಹೆಚ್ಚಾಗಿತ್ತು ಎಂದು ನಾನು ಭಾವಿಸುತ್ತೇನೆ. ಇತರರಿಗೆ ಹೋಲಿಸಿದರೆ ಇದು ನನಗೆ ಒಂದು ಪಟ್ಟು ಜಾಸ್ತಿಯೇ ಇತ್ತು. ಆದರೆ ಇದೇ ನನ್ನ ಪಾಲಿಗೆ ಮುಳುವಾಗುತ್ತಿತ್ತು. ಒಮ್ಮೆ ಗಾಯಕ್ಕೆ ತುತ್ತಾಗಿ ಸಂಪೂರ್ಣ ಗುಣಮುಖರಾಗಿ ತಂಡಕ್ಕೆ ಕಮ್‌ಬ್ಯಾಕ್‌ ಮಾಡುವಾಗ ಇದು ನನಗೆ ತುಂಬಾ ಕಾಡುತ್ತಿತ್ತು," ಎಂದು ತಿಳಿಸಿದ್ದಾರೆ. "ಗಾಯಕ್ಕೆ ತುತ್ತಾದಾಗ ಉಂಟಾಗುವ ಮಾನಸಿಕ ಅಘಾತವನ್ನು ನಿಭಾಯಿಸುವುದು ತುಂಬಾ ಕಠಿಣವಾಗಿರುತ್ತದೆ. ಈ ಅನುಭವದಿಂದಾಗಿ ನಾನು ಇದೀಗ ಉತ್ತಮ ಸ್ಥಾನದಲ್ಲಿದ್ದೇನೆ. ಜೀವನದ ಪ್ರತಿಕೂಲತೆಗಳನ್ನು ಎದುರಿಸಲು ಇದು ನನಗೆ ಸಾಕಷ್ಟು ನೆರವಾಗಿದೆ. ಈ ವಿಷಯದಲ್ಲಿ ನನಗೆ ಸಂತಸವಿದೆ," ಎಂದರು. ವೃತ್ತಿ ಜೀವನದ ಕಠಿಣ ಸಮಯದಲ್ಲಿ ಮಹೇಂದ್ರ ಸಿಂಗ್‌ ಧೋನಿ ನೀಡಿದ್ದ ಸಲಹೆಯನ್ನು ಸ್ಮರಿಸಿಕೊಂಡ ಆರ್‌ ಅಶ್ವಿನ್‌, "ನನ್ನ ಜೀವನದಲ್ಲಿನ ವೈಫಲ್ಯತೆ ಬಗ್ಗೆ ನನಗೆ ಭಯವಿಲ್ಲ. ಮೈದಾನಕ್ಕೆ ತೆರಳಿ ಪ್ರದರ್ಶನ ತೋರಿ ವೈಫಲ್ಯ ಅನುಭವಿಸಿದರೂ ಪರವಾಗಿಲ್ಲ, ಇದು ಒಳ್ಳೆಯದೆ ಎಂದು ಭಾವಿಸುತ್ತೇನೆ. ಏಕೆಂದರೆ, ಇದು ಫಲಿತಾಂಶದ ಎದುರಿನ ಪ್ರಕ್ರಿಯೆ ಎಂದು ಎಂಎಸ್‌ ಧೋನಿ ಸದಾ ಹೇಳುತ್ತಿರುತ್ತಾರೆ. ಹಾಗಾಗಿ, ಪ್ರಕ್ರಿಯೆಯನ್ನು ಭೇದಿಸಿದ್ದೇನೆಂಬ ವಿಶ್ವಾಸ ನನಗಿದೆ. ದಶ ಅಥವಾ ಶತಕೋಟಿ ಜನರ ಮುಂದೆ ಪ್ರದರ್ಶನ ತೋರಿ ವೈಫಲ್ಯ ಅನುಭವಿಸುವುದರ ಬಗ್ಗೆ ನನಗೆ ಕಿಂಚಿತ್ತೂ ಭಯವಿಲ್ಲ. ಕನಿಷ್ಠ ಯಶಸ್ಸು ಅಥವಾ ವೈಫಲ್ಯತೆ ಅನುಭವಿಸಲು ನನಗೆ ಅವಕಾಶ ಸಿಕ್ಕಿದೆ. ಆದರೆ, ಬಹುತೇಕ ಮಂದಿಗೆ ಈ ಅವಕಾಶವೂ ಸಿಗುವುದಿಲ್ಲ," ಎಂದು ತಿಳಿಸಿದ್ದಾರೆ. ಆರ್‌ ಅಶ್ವಿನ್‌ ಸದ್ಯ ಪ್ರವಾಸದಲ್ಲಿರುವ ಭಾರತ ಟೆಸ್ಟ್ ತಂಡದಲ್ಲಿದ್ದು, ಮುಂಬರುವ ಮೂರು ಪಂದ್ಯಗಳ ಟೆಸ್ಟ್ ಸರಣಿಗೆ ಸಜ್ಜಾಗುತ್ತಿದ್ದಾರೆ. ಡಿಸೆಂಬರ್‌ 26 ರಿಂದ ಸೆಂಚೂರಿಯನ್‌ನಲ್ಲಿ ಆರಂಭವಾಗಲಿರುವ ಮೊದಲನೇ ಟೆಸ್ಟ್ ಮೂಲಕ ಭಾರತ ತಂಡದ ಆಫ್ರಿಕಾ ಪ್ರವಾಸ ಅಧಿಕೃತವಾಗಿ ಆರಂಭವಾಗಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3qfQoDw
