ಮದ್ದೂರು: ಬೆಳಗಾವಿ ಕರ್ನಾಟಕದ ಅಂಗವೆಂದು ಬಹು ಹಿಂದೆಯೇ ತೀರ್ಮಾನವಾಗಿದ್ದು ವರ್ಷಕ್ಕೊಮ್ಮೆ ಆದರೂ ಈ ವಿಚಾರದಲ್ಲಿ ಖ್ಯಾತೆ ತೆಗೆಯುತ್ತಿರುವ ಶಿವಸೇನೆ ಮತ್ತು ಎಂಇಎಸ್‌ ಸಂಘಟನೆಗಳ ವಿರುದ್ಧ ಕ್ರಮವಹಿಸಲು ಗೃಹ ಸಚಿವರಿಗೆ ಪತ್ರ ಬರೆದಿರುವುದಾಗಿ ಸಂಸದೆ ಸುಮಲತಾ ಅಂಬರೀಷ್‌ ತಿಳಿಸಿದರು. ಮದ್ದೂರು ಪಟ್ಟಣದಲ್ಲಿ ಸುದ್ಧಿಗಾರರೊಡನೆ ಮಾತನಾಡಿದ ಅವರು ಇದು ಸಹಿಸಲು ಅಸಾಧ್ಯವಾದ ಕೃತ್ಯವಾಗಿದ್ದು ರಾಜ್ಯದ ನೆಲ, ಭಾಷೆ ವಿಚಾರದಲ್ಲಿ ಭಾವನೆಗಳಿಗೆ ಧಕ್ಕೆಯುಂಟಾಗದಂತೆ ಕ್ರಮ ಕೈಗೊಳ್ಳಲು ಮನವಿ ಮಾಡಿರುವುದಾಗಿ ಹೇಳಿದರು. ಮತಾಂತರ ತಡೆ ಕಾಯ್ದೆ ಜಾರಿ ಸಂಬಂಧ ಉತ್ತರಿಸಿದ ಸಂಸದರು ಸದರಿ ಕಾಯ್ದೆಯ ರೂಪು ರೇಷೆಗಳು ತಿಳಿಯುವ ಮೊದಲೇ ಪ್ರತಿಕ್ರಿಯಿಸುವುದು ತರವಲ್ಲ ಎಂದರಲ್ಲದೇ ಕಾಯ್ದೆ ಬಗ್ಗೆ ವಿವರವಿಲ್ಲದೆ ಮಾತನಾಡಲು ಸಾಧ್ಯವಿಲ್ಲವೆಂದರು. ಮೈಷುಗರ್‌ ಕಾರ್ಖಾನೆ ಸ್ಥಾಪನೆಗೆ ಬಲವಾಗಿ ಒತ್ತಾಯಿಸಿದ್ದ ತಾವು ಯಾವುದೇ ರೂಪದಲ್ಲಾದರೂ ಆರಂಭಿಸುವಂತೆ ಬಳಿಕ ಸಾಧ್ಯ ಅಸಾಧ್ಯತೆಗಳನ್ನು ಅರಿತು ಮುಂದಡಿ ಇಡುವಂತೆ ಕೋರಿದ್ದಾಗಿ ಸರಕಾರಿ ಸ್ವಾಮ್ಯದಲ್ಲೇ ಆರಂಭಿಸಿದರೆ ತಮ್ಮ ಆಕ್ಷೇಪವಿಲ್ಲವೆಂದು ಆದರೂ ಈ ಕೆಲಸ ಆಗಿಲ್ಲವೆಂದು ಅಸಮಾಧಾನ ವ್ಯಕ್ತಪಡಿಸಿದರು. ಮೈಷುಗರ್‌ ವಿಚಾರದಲ್ಲಿ ಪ್ರತಿಭಟನೆ ನಡೆಸುತ್ತಿದ್ದವರ ವಿರುದ್ಧ ಹರಿಹಾಯ್ದ ಸಂಸದರು ಈಗ ಎಲ್ಲಿ ಇದ್ದಾರೆಂದು ಪ್ರಶ್ನಿಸಿದರಲ್ಲದೇ ಇಷ್ಟರಲ್ಲೇ ಆರಂಭವಾಗಬೇಕಿದ್ದ ಕಾರ್ಖಾನೆ ಈವರೆವಿಗೂ ಏನೊಂದನ್ನೂ ಕಂಡಿಲ್ಲವೆಂದು ಜರಿದರು. ಮುಖ್ಯಮಂತ್ರಿಗಳೊಡನೆ ಕಾರ್ಖಾನೆ ಆರಂಭ ಸಂಬಂಧ ಚರ್ಚಿಸಿದ್ದು ಬೆಳಗಾವಿ ಅಧಿವೇಶನದ ಬಳಿಕ ಚರ್ಚಿಸಿ ಕ್ರಮ ಕೈಗೊಳ್ಳುವ ಬಗ್ಗೆ ಭರವಸೆ ನೀಡಿರುವುದಾಗಿ ಹೇಳಿದರು.
from India & World News in Kannada | VK Polls https://ift.tt/3qsV5tC
