ಬೋರ್‌ವೆಲ್‌ ಗ್ರಾಹಕರಿಗೂ ಒಳಚರಂಡಿ ವಿಶೇಷ ಶುಲ್ಕ; ಮೈಸೂರಿನಲ್ಲಿ ಅನುಷ್ಠಾನಕ್ಕೆ ಪಾಲಿಕೆ ಯೋಜನೆ!

ಹರೀಶ ಎಲ್‌. ತಲಕಾಡು ಮೈಸೂರು: ನಗರದಲ್ಲಿ ವಾಣಿ ವಿಲಾಸ ನೀರು ಸರಬರಾಜು ವಿಭಾಗದಿಂದ ನೀರಿನ ಸಂಪರ್ಕ ಹೊಂದಿರುವುದರೊಂದಿಗೆ ಪ್ರತ್ಯೇಕವಾಗಿ ಸಂಪರ್ಕ ಹೊಂದಿರುವ ಗ್ರಾಹಕರಿಗೆ ವಿಶೇಷ ಒಳಚರಂಡಿ ವಿಧಿಸಲು ಪಾಲಿಕೆ ಮುಂದಾಗಿದೆ. ನಗರ ಪಾಲಿಕೆ ಪ್ರತಿ ತಿಂಗಳ ನೀರಿನ ಶುಲ್ಕದಲ್ಲಿ ಶೇ.30ರಷ್ಟು ಶುಲ್ಕವನ್ನೂ ಸಂಗ್ರಹಿಸುತ್ತಿದೆ. ಬೋರ್‌ವೆಲ್‌ನಿಂದ ನೀರು ಪಡೆಯುತ್ತಿರುವ ಗ್ರಾಹಕರಿಂದ ಯಾವುದೇ ಒಳಚರಂಡಿ ಶುಲ್ಕ ಸಂಗ್ರಹಿಸಲು ಸಾಧ್ಯವಾಗುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ಬೆಂಗಳೂರು ಬೃಹತ್‌ ಮಹಾನಗರ ಪಾಲಿಕೆ ಮಾದರಿಯಲ್ಲಿ ಈ ವಿಶೇಷ ಶುಲ್ಕ ವಿಧಿಸುವ ಮೂಲಕ ಒಳಚರಂಡಿ ನಿರ್ವಹಣೆ ವ್ಯವಸ್ಥೆಯನ್ನು ಮತ್ತಷ್ಟು ಉತ್ತಮಗೊಳಿಸಲು ಪಾಲಿಕೆ ನಿರ್ಧರಿಸಿದೆ. ನಗರಕ್ಕೆ ನಿತ್ಯ ಪೂರೈಸುತ್ತಿರುವ 250 ಎಂಎಲ್‌ಡಿ ನೀರು ಮತ್ತು 40 ಎಂಎಲ್‌ಡಿ ಬೋರ್‌ವೆಲ್‌ ನೀರಿನ ಶೇ. 80ರಷ್ಟು ತ್ಯಾಜ್ಯ ನೀರು ಅಂದರೆ 232 ಎಂಎಲ್‌ಡಿಯಷ್ಟು ತ್ಯಾಜ್ಯ ನೀರು ಸಂಸ್ಕರಣಾ ಘಟಕ ಸೇರುತ್ತಿದೆ. ಘಟಕಗಳ ಸಾಮರ್ಥ್ಯಕ್ಕಿಂತ ಶೇ.50ರಷ್ಟು ಹೆಚ್ಚುವರಿ ನೀರು ಸೇರ್ಪಡೆಯಾಗುತ್ತಿರುವುದರಿಂದ ತ್ಯಾಜ್ಯ ನೀರಿನ ಸಂಸ್ಕರಣಾ ಪ್ರಕ್ರಿಯೆಯ ಗುಣಮಟ್ಟ ಕಡಿಮೆಯಾಗುತ್ತಿದೆ. ಇದರೊಂದಿಗೆ ನಗರದಲ್ಲಿ ಗೃಹ ಬಳಕೆ, ಗೃಹೇತರ ಬಳಕೆ, ವಾಣಿಜ್ಯ ಬಳಕೆಯಾದ ಹೋಟೆಲ್‌ ಉದ್ಯಮ, ಮಾಲ್‌, ಕಲ್ಯಾಣ ಮಂಟಪ, ಕೈಗಾರಿಕೆಗಳು ಪ್ರತ್ಯೇಕವಾಗಿ ಬೋರ್‌ವೆಲ್‌ ಹೊಂದಿದ್ದು, ಬಳಕೆಯಾದ ನೀರನ್ನು ಯಾವುದೇ ಶುಲ್ಕ ಪಾವತಿಸದೇ ನೇರವಾಗಿ ಪಾಲಿಕೆಯ ಒಳಚರಂಡಿ ಜಾಲಕ್ಕೆ ವಿಲೇವಾರಿ ಮಾಡುತ್ತಿವೆ. ಇದರಿಂದ ಒಳಚರಂಡಿ ಜಾಲದ ಮೇಲೆ ಒತ್ತಡ ಹೆಚ್ಚಾಗಿದ್ದು, ನಿರ್ವಹಣೆ ಸಮಸ್ಯೆಯಾಗಿದೆ. ಈ ಹಿನ್ನೆಲೆಯಲ್ಲಿ ಒಳಚರಂಡಿ ಜಾಲವನ್ನು ಪರಿಣಾಮಕಾರಿಯಾಗಿ ನಿರ್ವಹಿಸಲು ಅನುಕೂಲವಾಗಲು ಈ ವಿಶೇಷ ಶುಲ್ಕ ವಿಧಿಸಲು ಯೋಜನೆ ರೂಪಿಸಲಾಗಿದೆ ಎನ್ನುತ್ತಾರೆ ಪಾಲಿಕೆ ಒಳಚರಂಡಿ ವಿಭಾಗದ ಅಧಿಕಾರಿಗಳು. 740 ಕಿ.ಮೀ. ಜಾಲ 1910ರಲ್ಲಿಯೇ ನಗರಕ್ಕೆ ಒಳಚರಂಡಿ ವ್ಯವಸ್ಥೆಯನ್ನು ಪರಿಚಯಿಸಲಾಗಿದ್ದು, 740 ಕಿ.ಮೀ. ವ್ಯಾಪ್ತಿಯ ಬೃಹತ್‌ ಜಾಲ ಹೊಂದಿದೆ. ನಾಲ್ಕು ಕಡೆ ತ್ಯಾಜ್ಯ ನೀರು ಸಂಸ್ಕರಣಾ ಘಟಕಗಳಲ್ಲಿ ಒಳಚರಂಡಿ ನೀರನ್ನು ಸಂಸ್ಕರಿಸಿ ನದಿಗೆ ಬಿಡಲಾಗುತ್ತಿದೆ. ನೀರು ಬಳಕೆ ಗ್ರಾಹಕರನ್ನು ಎರಡು ವರ್ಗದಲ್ಲಿ ವಿಂಗಡಿಸಲಾಗುತ್ತಿದ್ದು, ಪಾಲಿಕೆ ನೀರಿನೊಂದಿಗೆ ಬೋರ್‌ವೆಲ್‌ ನೀರು ಬಳಸುವ ಗ್ರಾಹಕರು ಮತ್ತು ಪ್ರತ್ಯೇಕವಾಗಿ ಬೋರ್‌ವೆಲ್‌ ನೀರು ಬಳಕೆ ಮಾಡುವ ಗ್ರಾಹಕರು ಎಂದು ಗುರುತಿಸಲಾಗಿದ್ದು, ಅದಕ್ಕೆ ತಕ್ಕಂತೆ ಒಳಚರಂಡಿ ಶುಲ್ಕ ವಿಧಿಸಲಾಗುತ್ತಿದೆ. ಪ್ರಸ್ತಾವಿತ ವಿಶೇಷ ಒಳಚರಂಡಿ ಶುಲ್ಕ (ಮಾಸಿಕ, ರೂ.ಗಳಲ್ಲಿ)

• ಎಲ್ಲಾ ರೀತಿಯ ಹೋಟೆಲ್‌ಗಳು- 2000 ರೂ.
• ದರ್ಶಿನಿ ಹೋಟೆಲ್‌ಗಳು, ಕೆಫೆಟೇರಿಯಾ ಮತ್ತು ಕಾಫಿ ಶಾಪ್‌-1000
• 50 ರೂಮ್‌ಗಳನ್ನೊಳಗೊಂಡ ಹೋಟೆಲ್‌ ಮತ್ತು ಲಾಡ್ಜ್‌-2000
• 50ರಿಂದ 100 ರೂಮ್‌ಗಳನ್ನೊಳಗೊಂಡ ಹೋಟೆಲ್‌ ಮತ್ತು ಲಾಡ್ಜ್‌- 4000
• 100ಕ್ಕಿಂತ ಹೆಚ್ಚಿನ ರೂಮ್‌ಗಳನ್ನು ಹೊಂದಿರುವ ಹೋಟೆಲ್‌ ಮತ್ತು ಲಾಡ್ಜ್‌-10,000
• ಬಾರ್‌ ಆ್ಯಂಡ್‌ ರೆಸ್ಟೋರೆಂಟ್‌-2000
• ಹಾಸ್ಟೆಲ್‌ ಮತ್ತು ಪಿಜಿ-2000
• ಶಾಪಿಂಗ್‌ ಮಾಲ್‌-25000
• ಸೂಪರ್‌ ಬಜಾರ್‌-5000
• ಮಲ್ಟಿಪ್ಲೆಕ್ಸ್‌, ಚಿತ್ರ ಮಂದಿರ-10,000
• ಕಲ್ಯಾಣ ಮಂಟಪ-7,500
• ಚೌಟ್ರಿ, ಪಾರ್ಟಿ ಹಾಲ್‌(250 ಆಸನ ವ್ಯವಸ್ಥೆ)-2,000

ನಗರದಲ್ಲಿ ವಾಣಿ ವಿಲಾಸ ನೀರು ಸರಬರಾಜು ವಿಭಾಗದಲ್ಲಿ ನೀರು ಸರಬರಾಜು ಸಂಪರ್ಕ ಹೊಂದಿರುವ ಗ್ರಾಹಕರು ಹೆಚ್ಚುವರಿಯಾಗಿ ಬೋರ್‌ ವೆಲ್‌ ಸಂಪರ್ಕ ಹೊಂದಿದ್ದಾರೆ. ಇನ್ನೂ ಕೆಲವರು ಪ್ರತ್ಯೇಕವಾಗಿ ಬೋರ್‌ವೆಲ್‌ ನೀರಿನ ಸಂಪರ್ಕ ಹೊಂದಿದ್ದು, ಇದರಿಂದ ಒಳಚರಂಡಿ ನೀರಿನ ಪ್ರಮಾಣ ಹೆಚ್ಚಾಗಿದೆ. ಇದರ ನಿರ್ವಹಣೆಗೆ ಬೆಂಗಳೂರು ಮಾದರಿಯಲ್ಲಿ ಒಳಚರಂಡಿ ಶುಲ್ಕ ವಿಧಿಸಲು ಯೋಜನೆ ರೂಪಿಸಲಾಗಿದೆ. ಸಿಂಧು, ಕಾರ್ಯಪಾಲಕ ಎಂಜಿನಿಯರ್‌, (ಯುಜಿಡಿ)ಪಾಲಿಕೆ. ನಗರದಲ್ಲಿ ಒಳಚರಂಡಿ ನಿರ್ವಹಣೆಯನ್ನು ಪರಿಣಾಮಕಾರಿ ನಿರ್ವಹಣೆ ಮಾಡಲು ಬೋರ್‌ವೆಲ್‌ ನೀರು ಬಳಕೆ ಮಾಡುವ ಗ್ರಾಹಕರಿಗೂ ಒಳಚರಂಡಿ ಶುಲ್ಕ ವಿಧಿಸಲು ಚಿಂತಿಸಲಾಗಿದೆ. ಈ ಬಗ್ಗೆ ಕೌನ್ಸಿಲ್‌ ಸಭೆಯಲ್ಲಿ ಚರ್ಚಿಸಿ ಅನುಷ್ಠಾನಗೊಳಿಸಲಾಗುವುದು. ಸುನಂದಾ ಪಾಲನೇತ್ರ, ಮೇಯರ್‌

from India & World News in Kannada | VK Polls https://ift.tt/3DfcLO7