ಕೆ.ವೀರಭದ್ರಗೌಡ ಕುರುಗೋಡು (): ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಡ್ರ್ಯಾಗನ್ ಫ್ರೂಟ್ಗೆ ಬಹು ಬೇಡಿಕೆಯಿದ್ದು, ಈ ಬೆಳೆಯನ್ನು ಬೆಳೆಯುವ ಮೂಲಕ ಪಟ್ಟಣದ ಮಂಜುನಾಥ ಗೌಡ ಅವರು ಗಮನ ಸೆಳೆದಿದ್ದಾರೆ. ಪಟ್ಟಣದ ಬಾದನಹಟ್ಟಿ ರಸ್ತೆ ಮಾರ್ಗದಲ್ಲಿರುವ ತಮ್ಮ ಸ್ವಂತ ಜಮೀನಿನಲ್ಲಿ ಕಳೆದ ಹಲವು ವರ್ಷಗಳಿಂದ ಕೃಷಿಯಲ್ಲಿ ತೊಡಗಿರುವ ಇವರು, ಹೊಸ ಹೊಸ ಪ್ರಯೋಗಳ ಮೂಲಕ ಕೃಷಿ ಕ್ಷೇತ್ರದಲ್ಲಿ ಉತ್ತಮ ಆದಾಯ ಕಂಡುಕೊಳ್ಳುತ್ತಿದ್ದಾರೆ. ಇದರ ಭಾಗವಾಗಿ ಡ್ರ್ಯಾಗನ್ ಫ್ರೂಟ್ ಬೆಳೆದು ಮಾದರಿ ರೈತರಾಗಿದ್ದಾರೆ. ಯೂಟೂಬ್ನಲ್ಲಿ ಮಾಹಿತಿ: ವರ್ಷದ ಹಿಂದೆ ಯೂಟ್ಯೂಬ್ನಲ್ಲಿ ಮಾಹಿತಿ ತಿಳಿದು ಮುಂಬೈನಿಂದ ಡ್ರ್ಯಾಗನ್ ಹಣ್ಣಿನ ಬೀಜ ತರಿಸಿಕೊಂಡು ಬೇಸಾಯ ಮಾಡಲು ಮುಂದಾದರು. ಇದಕ್ಕೆ ಅವರ ಕುಟುಂಬ ವರ್ಗ ಪ್ರೋತ್ಸಾಹ ನೀಡಿತು. ಪ್ರಯೋಗಶೀಲ ಮನಸ್ಥಿತಿಯ ಮಂಜುನಾಥ ಗೌಡರು ಡ್ರ್ಯಾಗನ್ ಫ್ರೂಟ್ ಬೆಳೆ ಬೆಳೆಯುವಲ್ಲಿ ಹಿಡಿತ ಸಾಧಿಸುವ ಮೂಲಕ ಮಾರುಕಟ್ಟೆಯಲ್ಲಿ ಉತ್ತಮ ಲಾಭ ಕಂಡುಕೊಂಡಿದ್ದಾರೆ. 4 ಎಕರೆಯಲ್ಲಿ ಸೇಬು, 4 ಎಕರೆಯಲ್ಲಿ ಜಂಬು ನೇರೆಳೆ , 1 ಎಕರೆಯಲ್ಲಿ ತರಕಾರಿ, 1 ಎಕರೆಯಲ್ಲಿ ನರ್ಸರಿ ಹಾಗೂ 1.5 ಎಕರೆಯಲ್ಲಿ ಡ್ರ್ಯಾಗನ್ ಬೆಳೆಯುತ್ತಿದ್ದಾರೆ. ಬೆಳೆ ವಿಧಾನ, ವೆಚ್ಚ: ಈ ಬೆಳೆ ಬೆಳೆಯಲು ಮೊದಲು ಸಿಮೆಂಟ್ ಕಂಬದ ಬದಿ ಸಸಿ ನಾಟಿ ಮಾಡಲಾಗುತ್ತದೆ. 1 ಕಂಬದಿಂದ 4 ಅಡಿ ಅಂತರದಲ್ಲಿ ಮತ್ತೊಂದು ಕಂಬ ಮತ್ತು 8 ಅಡಿ ಅಂತರದ ಸಾಲು, ಎಕರೆಗೆ 500 ಕಂಬಗಳು ಬರುತ್ತವೆ. ಒಂದು ಕಂಬಕ್ಕೆ 4 ಹಣ್ಣಿನ ಸಸಿಗಳಂತೆ ಒಟ್ಟು 2,000 ಸಸಿ ನಾಟಿ ಮಾಡಲಾಗುತ್ತದೆ. ಇವುಗಳಿಗೆ ಹನಿ ನೀರಾವರಿ ಮೂಲಕ ನೀರುಣಿಸಲಾಗುತ್ತದೆ. 1 ಎಕರೆಗೆ 5 ಲಕ್ಷ ರೂ, 1.5 ಎಕರೆಗೆ 8 ಲಕ್ಷ ರೂ. ವೆಚ್ಚ ತಗುಲಿದೆ. ಈ ಬೆಳೆಗೆ ಒಂದು ಸಾರಿ ವೆಚ್ಚ ಮಾಡಿದರೆ ಸತತ 20 ವರ್ಷಗಳ ಕಾಲ ಲಾಭ ಪಡೆಯಬಹುದು ಎಂದು ರೈತ ಮಂಜುನಾಥ ಗೌಡ ಹೇಳುತ್ತಾರೆ. ಡ್ರ್ಯಾಗನ್ ಹಣ್ಣಿನ ಸಸಿ ನಾಟಿ ಮಾಡಿದ ನಂತರ 1 ವರ್ಷದಲ್ಲಿ ಫಸಲು ಬರುತ್ತದೆ. ಮಾರುಕಟ್ಟೆಯಲ್ಲಿ 1 ಕೆಜಿ ಹಣ್ಣಿಗೆ 150 ರೂ. ದರ ಇದೆ. ಇದರಿಂದ ಮೊದಲನೆ ವರ್ಷ 3 ಲಕ್ಷ ರೂ ಲಾಭ ಬಂದಿದೆ. ಇನ್ನೂ 10 ಲಕ್ಷ ರೂಗಳ ಲಾಭದ ನಿರೀಕ್ಷೆಯಲ್ಲಿರುವುದಾಗಿ ಅವರು ಹೇಳುತ್ತಾರೆ. 'ರೈತ ಮಂಜುನಾಥ ಅವರು ಧೈರ್ಯ ಮಾಡಿ ಡ್ರ್ಯಾಗನ್ ಹಣ್ಣಿನ ಬೆಳೆ ಬೆಳೆದು ಉತ್ತಮ ಲಾಭ ಕಂಡುಕೊಂಡಿದ್ದಾರೆ. ಅವರಿಗೆ ನಮ್ಮ ಇಲಾಖೆ ವತಿಯಿಂದ ನರೇಗಾ ಯೋಜನೆಯಲ್ಲಿ ಆರ್ಥಿಕ ಸಹಾಯ ಮಾಡಿದ್ದೇವೆ. ಇದೇ ರೀತಿ ಪ್ರತಿಯೊಬ್ಬ ರೈತರು ಪರ್ಯಾಯ ಬೆಳೆ ಬೆಳೆಯಲು ಮುಂದಾಗಬೇಕು' ಎಂದು ಬಳ್ಳಾರಿ ಜಿಲ್ಲಾ ತೋಟಗಾರಿಕೆ ಇಲಾಖೆ ಹಿರಿಯ ಸಹಾಯಕ ನಿರ್ದೇಶಕ ಎಚ್. ಕೆ. ಯೋಗೀಶ್ ಹೇಳಿದ್ದಾರೆ.
from India & World News in Kannada | VK Polls https://ift.tt/3lSpcZm