ದುಬೈ: ಮುಂಬೈ ಇಂಡಿಯನ್ಸ್ ವಿರುದ್ಧ 2021ರ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯ 39ನೇ ಪಂದ್ಯದ ತಂಡದ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದ್ದ ಹರ್ಷಲ್ ಪಟೇಲ್ ಹ್ಯಾಟ್ರಿಕ್ ಬಾಲ್‌ಗೆ ರೂಪಿಸಿದ್ದ ತಮ್ಮ ಯೋಜನೆಯನ್ನು ಬಹಿರಂಗಪಡಿಸಿದ್ದಾರೆ. ಭಾನುವಾರ ರಾತ್ರಿ ಇಲ್ಲಿನ ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದಿದ್ದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ್ದ ಆರ್‌ಸಿಬಿ, ಹಾಗೂ ಗ್ಲೆನ್ ಮ್ಯಾಕ್ಸ್ವೆಲ್ ಅರ್ಧಶತಕಗಳಿಂದ ತನ್ನ ಪಾಲಿನ 20 ಓವರ್‌ಗಳಿಗೆ 165 ರನ್‌ ಗಳಿಸಿತ್ತು ಹಾಗೂ ಮುಂಬೈ ಇಂಡಿಯನ್ಸ್‌ಗೆ 166 ರನ್‌ ಸವಾಲಿನ ಗುರಿ ನೀಡಿತ್ತು. ಬಳಿಕ ಗುರಿ ಹಿಂಬಾಲಿಸಿದ್ದ ಮುಂಬೈ ಇಂಡಿಯನ್ಸ್‌ಗೆ ರೋಹಿತ್‌ ಶರ್ಮಾ(43) ಹಾಗೂ ಕ್ವಿಂಟನ್‌ ಡಿ ಕಾಕ್(24) ಉತ್ತಮ ಆರಂಭ ತಂದುಕೊಟ್ಟಿದ್ದರು. ಆದರೆ, ಈ ಇಬ್ಬರ ವಿಕೆಟ್‌ ಉರುಳಿದ ಬಳಿಕ ಪಂದ್ಯದ ದಿಕ್ಕು ಸಂಪೂರ್ಣ ಬದಲಾಯಿತು. ಅದರಲ್ಲೂ ಹಾರ್ದಿಕ್‌ ಪಾಂಡ್ಯ, ಕೈರೊನ್ ಪೊಲಾರ್ಡ್ ಹಾಗೂ ರಾಹುಲ್‌ ಚಹರ್‌ ಅವರನ್ನು ಹರ್ಷಲ್ ಪಟೇಲ್ ಹ್ಯಾಟ್ರಿಕ್ ವಿಕೆಟ್‌ಗೆ ಬಲಿ ಪಡೆದರು ಹಾಗೂ 3.1 ಓವರ್‌ಗಳಿಗೆ ಅವರು ಕೇವಲ 17 ರನ್‌ ನೀಡಿ 4 ವಿಕೆಟ್‌ ಕಿತ್ತಿದ್ದರು. ಟೈಲ್‌-ಎಂಡರ್‌ ರಾಹುಲ್‌ ಚಹರ್‌ಗೆ ಹ್ಯಾಟ್ರಿಕ್ ಬಾಲ್‌ ಎಸೆತದ ತಮ್ಮ ಯೋಜನೆಯ ಬಗ್ಗೆ ಹರ್ಷಲ್ ಪಟೇಲ್ ಬೆಳಕು ಚೆಲ್ಲಿದರು. ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ನಿಧಾನಗತಿಯ ಎಸೆತಗಳನ್ನು ಎದುರಿಸುವಲ್ಲಿ ವಿಫಲರಾಗಿದ್ದರಿಂದ ಚಹರ್‌ಗೆ ಸ್ಲೋವರ್‌ ಎಸೆತ ಹಾಕಿದೆ ಹಾಗೂ ಇದು ನನಗೆ ವರ್ಕ್‌ಔಟ್‌ ಆಯಿತು ಎಂದು ಹೇಳಿಕೊಂಡಿದ್ದಾರೆ. "ಒಂದು ವೇಳೆ ನಿಧಾನಗತಿಯ ಎಸೆತಗಳನ್ನು ಸಮರ್ಥವಾಗಿ ಎದುರಿಸುವಲ್ಲಿ ಬ್ಯಾಟ್ಸ್‌ಮನ್‌ಗಳು ವಿಫಲರಾದರೆ, ಬೌಲರ್‌ಗಳಿಗೆ ಈ ಎಸೆತಗಳು ತುಂಬಾ ಕಠಿಣವಾಗಲಿದೆ ಎಂಬುದನ್ನು ಅರಿತುಕೊಂಡಿದ್ದೆ. ಹಾಗಾಗಿ, ರಾಹುಲ್‌ ಚಹರ್‌ಗೂ ಅದೇ ಎಸೆತವನ್ನು ಹಾಕಬೇಕೆಂದು ಪಣತೊಟ್ಟಿದ್ದೆ. ಒಟ್ಟಾರೆ ಇದು ನನ್ನ ಆರನೇ ಹ್ಯಾಟ್ರಿಕ್ ವಿಕೆಟ್‌ ಸಾಧನೆಯಾಗಿದೆ. ಕೊನೆಗೂ ಮತ್ತೊಂದು ಹ್ಯಾಟ್ರಿಕ್ ವಿಕೆಟ್‌ ಪಡೆದಿದ್ದರಿಂದ ತುಂಬಾ ಖುಷಿಯಾಗುತ್ತಿದೆ," ಎಂದು ಹರ್ಷಲ್ ಪಟೇಲ್ ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. 2021ರ ಐಪಿಎಲ್‌ನಲ್ಲಿ ಪರ್ಪಲ್‌ ಕ್ಯಾಪ್‌ ಹೊಂದಿರುವ ಹರ್ಷಲ್ ಪಟೇಲ್(23 ವಿಕೆಟ್‌) ಹ್ಯಾಟ್ರಿಕ್ ವಿಕೆಟ್‌ ಸಾಧನೆ ಮಾಡಿದ ಆರ್‌ಸಿಬಿಯ ಮೂರನೇ ಬೌಲರ್‌ ಆಗಿದ್ದಾರೆ. 2010ರ ರಾಜಸ್ಥಾನ್‌ ರಾಯಲ್ಸ್ ವಿರುದ್ಧ ಪ್ರವೀಣ್‌ ಕುಮಾರ್‌ ಈ ಸಾಧನೆ ಮಾಡಿದ್ದರು ಹಾಗೂ 2017ರಲ್ಲಿ ಸ್ಯಾಮ್ಯೂಲ್‌ ಬದ್ರೇ ಅವರು ಮುಂಬೈ ಇಂಡಿಯನ್ಸ್ ವಿರುದ್ಧ ಈ ಸಾಧನೆಗೆ ಭಾಜನರಾಗಿದ್ದರು. ಪೊಲಾರ್ಡ್‌ಗೆ ವೈಡ್‌ ಆಗಿ ಸೆಳೆಯುವುದು ತಂತ್ರವಾಗಿತ್ತು: ಕೈರೊನ್ ಪೊಲಾರ್ಡ್ ವಿಕೆಟ್‌ ಪಡೆಯಲು ರೂಪಿಸಿದ್ದ ಗೇಮ್‌ ಪ್ಲಾನ್ ಅನ್ನು ಇದೇ ವೇಳೆ ಹರ್ಷಲ್ ಪಟೇಲ್ ಬಹಿರಂಗಪಡಿಸಿದ್ದಾರೆ. "ಕೈರೊನ್ ಪೊಲಾರ್ಡ್‌ಗೆ ಅವರದೇ ಜಾಗದಲ್ಲಿ ಬೌಲ್‌ ಮಾಡಿದರೆ, ಖಂಡಿತಾ ಅವರು ಪಂದ್ಯವನ್ನು ದುರ್ಬಲಗೊಳಿಸುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಹಾಗಾಗಿ, ಆತನಿಗೆ ಸ್ವಲ್ಪ ವೈಡ್‌ ಆಗಿ ಎಸೆಯುವುದು ನಮ್ಮ ಯೋಜನೆಯಾಗಿತ್ತು. ಒಮ್ಮೆ ನೀವು ಅವರನ್ನು ವೈಡ್‌ ಆಗಿ ಸೆಳೆದುಕೊಂಡರೆ, ಖಂಡಿತಾ ಅವರನ್ನು ತಬ್ಬಿಬ್ಬುಗೊಳಿಸಬಹುದೆಂದು ನಮಗೆ ಮೊದಲೇ ತಿಳಿದಿತ್ತು ಹಾಗೂ ಇದು ನಮಗೆ ವರ್ಕ್‌ಔಟ್‌ ಆಯಿತು," ಎಂದು ಹರ್ಷಲ್ ಹೇಳಿದ್ದಾರೆ. ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಹರ್ಷಲ್ ಪಟೇಲ್44 ರನ್‌ ನೀಡಿ 9 ವಿಕೆಟ್‌ಗಳನ್ನು ಉರುಳಿಸಿದ್ದಾರೆ. ಇದರಲ್ಲಿ ಒಂದು 5 ವಿಕೆಟ್‌ ಸಾಧನೆ ಹಾಗು ಒಂದು ಹ್ಯಾಟ್ರಿಕ್ ವಿಕೆಟ್‌ ಪಡೆದುಕೊಂಡಿದ್ದಾರೆ. ಮ್ಯಾಕ್ಸ್ವೆಲ್, ಸಿರಾಜ್‌, ಚಹಲ್‌ರನ್ನು ಶ್ಳಾಘಿಸಿದ ಹರ್ಷಲ್: ಮಧ್ಯಮ ಓವರ್‌ಗಳಲ್ಲಿ ಅತ್ಯುತ್ತಮ ಬೌಲ್‌ ಮಾಡಿದ ಮೊಹಮ್ಮದ್ ಸಿರಾಜ್‌, ಗ್ಲೆನ್ ಮ್ಯಾಕ್ಸ್ವೆಲ್ ಹಾಗೂ ಯುಜ್ವೇಂದ್ರ ಚಹಲ್‌ ಅವರನ್ನು ಇದೇ ವೇಳೆ ಹರ್ಷಲ್ ಪಟೇಲ್ ಗುಣಗಾನ ಮಾಡಿದ್ದಾರೆ. "ಸಿರಾಜ್‌ ಬೌಲ್‌ ಆರಂಭಿಸಿದ ರೀತಿ ನಮಗೆ ವಿಶ್ವಾಸ ಹೆಚ್ಚಿಸಿತು. ಮಧ್ಯಮ ಓವರ್‌ಗಳಲ್ಲಿ ಗ್ಲೆನ್ ಮ್ಯಾಕ್ಸ್ವೆಲ್ ಹಾಗೂ ಯುಜ್ವೇಂದ್ರ ಅವರ ಬೌಲಿಂಗ್‌ ನಿಜಕ್ಕೂ ಬುದ್ದಿವಂತಿಕೆಯಿಂದ ಕೂಡಿತ್ತು. ಈ ಹಿನ್ನೆಲೆಯಲ್ಲಿ ಎದುರಾಳಿ ಆಟಗಾರರು ಡೆತ್‌ ಓವರ್‌ಗಳಲ್ಲಿ ಒತ್ತಡಕ್ಕೆ ಒಳಗಾಗಿದ್ದರು ಹಾಗೂ ನಾವು ನಮ್ಮ ಯೋಜನೆಯನ್ನು ಅತ್ಯುತ್ತಮವಾಗಿ ಕಾರ್ಯಗತಗೊಳಿಸಿದೆವು," ಎಂದು ಹರ್ಷಲ್ ಪಟೇಲ್ ತಿಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3CQ7H2I
