ಮಡಹಳ್ಳಿ ಮಹೇಶ್‌ ಗುಂಡ್ಲುಪೇಟೆ ಚಾಮರಾಜನಗರ: ಹಿಂಗಾರು ಉತ್ತಮ ಬೆಳೆ ನಿರೀಕ್ಷೆಯಲ್ಲಿ ಹುರುಳಿ, ಮುಸುಕಿನ ಜೋಳ, ಅಲಸಂದೆ ಇತರೆ ಬೆಳೆಗಳ ಬಿತ್ತನೆ ಮಾಡಿದ ರೈತರು ಕೊರತೆಯಿಂದ ತಲೆ ಮೇಲೆ ಕೈ ಹೊತ್ತು ಆಕಾಶ ನೋಡುವ ಸ್ಥಿತಿ ನಿರ್ಮಾಣವಾಗಿದೆ. ಮಳೆ ಕೊರತೆಯಿಂದ ಮುಂಗಾರಿನಲ್ಲಿ ಸೂರ್ಯಕಾಂತಿ, ನೆಲಗಡಲೆ, ಜೋಳ, ಹತ್ತಿ, ಹಲಸಂದೆ ಇನ್ನೂ ಹಲವು ಬೆಳೆಗಳು ಒಣಗಿದವು. ಸಾಧಾರಣ ಮಳೆಯಾದ ಕಾರಣ ಚಾಮರಾಜನಗರ ಹಾಗೂ ಗುಂಡ್ಲುಪೇಟೆ ತಾಲೂಕಿನ ಕೆಲವು ಪ್ರದೇಶಗಳ ರೈತರಿಗೆ ಮಾಡಿದ ಖರ್ಚು ಬಂದಿದ್ದರ ಹೊರತಾಗಿ ಉಳಿದ ರೈತರು ಕೈಸುಟ್ಟುಕೊಂಡರು. ಬೇಸಿಗೆಗೆ ಬೇಕಾಗುವ ಒಂದಷ್ಟು ಮೇವು ಸಂಗ್ರಹಿಸಲು ಕೆಲವರಿಗೆ ಸಾಧ್ಯವಾಯಿತು. ಇದರಿಂದ ನಿರಾಶರಾಗಿದ್ದ ರೈತರು ಹಿಂಗಾರು ಬೆಳೆಗಳ ನಿರೀಕ್ಷೆಯಲ್ಲಿ ಮತ್ತೆ ಸಾಹಸಕ್ಕೆ ಕೈ ಹಾಕಿದಂತಾಗಿದ್ದು, ಹಿಂಗಾರು ಬಿತ್ತನೆ ಮಾಡಿ ತಪ್ಪು ಮಾಡಿದೆವು ಎಂದು ಬೇಸರಗೊಳ್ಳುವುದು ಸಾಮಾನ್ಯವಾಗಿದೆ. ಹೆಚ್ಚು ಪ್ರದೇಶದಲ್ಲಿ ಬಿತ್ತನೆ ಶ್ರಮ, ಖರ್ಚು ಎನ್ನುವುದರ ಹೊರತಾಗಿ ಹಿಂದಿನ ವರ್ಷಗಳಲ್ಲಿ ಬೇಡಿಕೆ ಹೆಚ್ಚಾಗಿ ಹುರುಳಿಗೆ ಉತ್ತಮ ಬೆಲೆ ಸಿಕ್ಕಿತ್ತು. ಹೀಗಾಗಿ ಭವಿಷ್ಯದಲ್ಲೂ ಅಂತಹದ್ದೇ ವಾತಾವರಣ ಇರುತ್ತದೆ ಎಂಬುದು ರೈತರ ನಿರೀಕ್ಷೆಯಾಗಿತ್ತು. ಅಲ್ಲದೇ ಮುಂಗಾರಿನಲ್ಲಿ ಜೋಳ, ರಾಗಿ, ನೆಲಗಡಲೆ ಬೆಳೆ ಬಾರದ ಹಿನ್ನೆಲೆಯಲ್ಲಿ ಬೇಸಿಗೆಗೆ ಬೇಕಾಗುವ ಒಣಮೇವು ಸಂಗ್ರಹ ರೈತರಿಗೆ ಸಾಧ್ಯವಾಗಿರಲಿಲ್ಲ. ಈ ಎಲ್ಲಾ ಬೆಳವಣಿಗೆಗಳು ಮತ್ತು ಹಿಂಗಾರು ಬೆಳೆಯಾಗಿ ಬಿತ್ತನೆ ಮಾಡುವ ಹುರುಳಿ ಬಿತ್ತನೆ ಬೀಜವನ್ನು ತಾವೇ ಸಂಗ್ರಹಿಸುವ ಕಾರಣಕ್ಕೆ ಬಿತ್ತನೆ ಮಾತ್ರ ಹಣ ಖರ್ಚಾಗುತ್ತದೆ. ಮುಂಗಾರಿನಲ್ಲಿ ಸಮರ್ಪಕ ಮಳೆಯಾಗದ ಕಾರಣ ಹಿಂಗಾರಿನಲ್ಲಾದರೂ ಮಳೆಯಾಗುತ್ತದೆ ಎಂಬ ನಿರೀಕ್ಷೆ ರೈತರದಾಗಿತ್ತು. ಇದರಿಂದ ಕೃಷಿ ಇಲಾಖೆ ಮಾಹಿತಿ ಪ್ರಕಾರ ತಾಲೂಕಿನಲ್ಲಿ 3046 ಹೆಕ್ಟೇರ್‌ ಪ್ರದೇಶದಲ್ಲಿ ಹುರುಳಿ ಬಿತ್ತನೆಯಾಗಿತ್ತು. ಬಿತ್ತನೆಯಾಗಿ 15 ದಿನಗಳು ಕಳೆದರೂ ಮಳೆ ಬಿದ್ದಿಲ್ಲ. ಹಾಗಾಗಿ ಬೆಳೆ ಪೈರಿನ ಹಂತದಲ್ಲೇ ಒಣಗುತ್ತಿದ್ದು, ರೈತರು ಹತಾಶರಾಗಿದ್ದಾರೆ. ಹಿಂಗಾರು ಬೆಳೆಯಾಗಿ ತಾಲೂಕಿನಲ್ಲಿ ಮುಸುಕಿನ ಜೋಳ, ಮೇವಿನ ಸಲುವಾಗಿ ಕೆಂಪುಜೋಳ (ಡೈರಿ ಜೋಳ) ಬಿತ್ತನೆಯೂ ಆಗಿತ್ತು. ಮುಂಚಿತವಾಗಿ ಬಿತ್ತನೆ ಮಾಡಿದ್ದ ಕಾರಣ ಮುಸುಕಿನ ಜೋಳ ಎದೆಯೆತ್ತರಕ್ಕೆ ಬೆಳೆದಿತ್ತು. ಮೇವಿನ ಜೋಳ ಕೂಡ ಪೈರಿನಲ್ಲೇ ಒಣಗುತ್ತಿದೆ ಎಂಬುದು ಬೇಸರದ ಸಂಗತಿ. ಗಾಯದ ಮೇಲೆ ಬರೆ ಮುಂಗಾರಿನಲ್ಲಿ ಮಳೆಯಿಲ್ಲದೇ ಬೆಳೆಗಳು ಸಂಪೂರ್ಣ ಒಣಗಿದವು. ಪ್ರಾರಂಭದಲ್ಲಿ ಹಿಂಗಾರು ಮಳೆ ಆಶಾದಾಯಕವಾಗಿ ಆಗುವ ಲಕ್ಷಣಗಳು ಗೋಚರಿಸಿದವು. ಇದರಿಂದ ರೈತರು ಮರಳಿ ಯತ್ನವ ಮಾಡು ಎಂಬಂತೆ ಖಾಸಗಿಯಾಗಿ ಸಾಲ ಮಾಡಿ, ಕೂಲಿ ಮಾಡಿ ಸಂಗ್ರಹಿಸಿದ್ದ ಹಣದಲ್ಲಿ ಹುರುಳಿ ಇತರೆ ಬೆಳೆ ಬಿತ್ತನೆ ಮಾಡಿದ್ದರು. ಟ್ರ್ಯಾಕ್ಟರ್ ಉಳುಮೆ, ಬಿತ್ತನೆಗೆ ರೋಟವೇಟರ್‌, ಕಲ್ಟಿವೇಟರ್‌ ಬಾಡಿಗೆಗೆ, ಬಿತ್ತನೆಗೆಂದು ಸಾಕಷ್ಟು ಹಣ ಖರ್ಚಾಗಿತ್ತು. ಆದರೆ ಬಿತ್ತನೆ ನಂತರ ಮಳೆಯಿಲ್ಲದ ಕಾರಣ ಮುಂಗಾರಿನಂತೆ, ಹಿಂಗಾರಿನಲ್ಲೂ ಕೈಸುಟ್ಟುಕೊಂಡೆವು. 2016ನೇ ಸಾಲಿನಲ್ಲಿ ಹುರುಳಿ ಬೆಳೆಗೆ ವಿಮೆ ಮಾಡಿಸಿದ್ದು, ಬೆಳೆ ನಾಶವಾದರೂ ವಿಮಾ ಪರಿಹಾರ ಧನ ಸಿಗಲಿಲ್ಲ. ಈ ಕಾರಣಕ್ಕೆ ವಿಮೆಯನ್ನು ಕಟ್ಟಲಿಲ್ಲ ಎಂದು ರೈತರಾದ ನಾಗಪ್ಪ, ಸಿದ್ದಮಲ್ಲಿಕಾರ್ಜುನಸ್ವಾಮಿ, ಶಾಂತಪ್ಪ, ಕರಿಯಯ್ಯ, ಚಂದ್ರಶೇಖರ್‌, ಮಹದೇವು, ಕೆಂಪೇಗೌಡ, ಉದ್ದಂಡಶೆಟ್ಟಿ ಬೇಸರ ವ್ಯಕ್ತಪಡಿಸಿದರು. ತಾಲೂಕಿನಲ್ಲಿ 2021-22ನೇ ಸಾಲಿಗೆ 4200 ಹೆಕ್ಟೇರ್‌ ಹುರುಳಿ ಬಿತ್ತನೆ ಗುರಿ ನಿಗದಿಯಾಗಿತ್ತು. ಈ ಪೈಕಿ 3046 ಹೆಕ್ಟೇರ್‌ ಪ್ರದೇಶದಲ್ಲಿ ಬಿತ್ತನೆಯಾಗಿದೆ. ನಾನಾ ಹಂತದಲ್ಲಿ ಬಿತ್ತನೆಯಾಗಿರುವ ಹುರುಳಿ ಬೆಳೆ ಮಳೆಯಿಲ್ಲದ ಕಾರಣ ಒಣಗುತ್ತಿದೆ. ಎರಡ್ಮೂರು ದಿನದಿಂದ ವಾತಾವರಣವಿದ್ದರೂ ಮಳೆ ಬೀಳಲಿಲ್ಲ. ಬೆಳೆ ಒಣಗುತ್ತಿರುವ ಬಗ್ಗೆ ಬೇಸರವಾಗಿದೆ. ರಂಗಸ್ವಾಮಿ, ಸಹಾಯಕ ಕೃಷಿ ನಿರ್ದೇಶಕರು, ಗುಂಡ್ಲುಪೇಟೆ
from India & World News in Kannada | VK Polls https://ift.tt/3m4Vroh
