ಪಿ.ವೀರೇಂದ್ರಗೌಡ (ಬಳ್ಳಾರಿ ಜಿಲ್ಲೆ) ಬಳ್ಳಾರಿ: ಗಣಿನಾಡು ಬಳ್ಳಾರಿ ಜಿಲ್ಲೆಯ ಸಂಡೂರು ತಾಲೂಕು ಪ್ರಕೃತಿಯ ಅಚ್ಚರಿಗಳನ್ನು ತನ್ನೊಳಗೆ ಹುದುಗಿಸಿಕೊಂಡಿರುವ ಪ್ರದೇಶ. ಉತ್ತರ ಕರ್ನಾಟಕದ ಪ್ರಮುಖ ಆಕ್ಷಿಜನ್‌ ಬ್ಯಾಂಕ್‌ ಎಂದೇ ಹೆಸರಾದ ಇಲ್ಲಿನ ಕಾಡು ಬೆಟ್ಟಗುಡ್ಡಗಳಲ್ಲಿ ಮೊಗೆದಷ್ಟು ಪ್ರಾಕೃತಿಕ ಅಚ್ಚರಿಗಳು ಗೋಚರಿಸುತ್ತವೆ. ಇತ್ತೀಚೆಗೆ ಇಲ್ಲಿನ ಸ್ವಾಮಿಮಲೈ ಅರಣ್ಯ ಪ್ರದೇಶದ ಸುಬ್ಬರಾಯನ ಹಳ್ಳಿಯಿಂದ ದೂರದ ಕಣಿವೆಯಲ್ಲಿ 7 ಕಬ್ಬಿಣದ ಅದಿರಿನ ಗುಹೆಗಳನ್ನು ಚಾರಣಿಗರು ಪತ್ತೆ ಹಚ್ಚಿದ್ದಾರೆ. ತಾಲೂಕಿನ ಸುಬ್ಬರಾಯನಹಳ್ಳಿಯಿಂದ ಬಲ ಬದಿಗೆ ಕೆಳಗೆ ಕಾಡಿನ ಕಣಿವೆಗಳಲ್ಲಿ ಇಳಿಯುತ್ತಾ ಹೋದಾಗ 500 ಮೀ. ಗೂ ಹೆಚ್ಚಿನ ಆಳದಲ್ಲಿ ಮಾನವ ಸಂಪರ್ಕವಿಲ್ಲದ ಪ್ರದೇಶಕ್ಕೆ ಚಾರಣಿಗರು ಇಳಿದಿದ್ದಾರೆ. ದೊಡ್ಡ ಬಂಡೆಗಳನ್ನು ದಾಟಿ ಮುಂದೆ ಹೋದಾಗ ಕಣಿವೆಗಳಲ್ಲಿಒಂದಾದ ಮೇಲೊಂದಂತೆ 7 ಕಬ್ಬಿಣದ ಅದಿರಿನಿಂದ ಸಮೃದ್ಧವಾದ ಗುಹೆಗಳು ಕಾಣಿಸಿಕೊಂಡಿವೆ. ಈ ಗುಹೆಗಳು 40-50 ಮೀಟರ್‌ ಉದ್ದವಿವೆ ಎಂದು ಅಂದಾಜಿಸಲಾಗಿದೆ. ಕೆಲವರು ಗುಹೆ ಪ್ರವೇಶಿಸಿಸಲು ಯತ್ನಿಸಿದರಾದರೂ ಗುಹೆಗಳ ಒಳಗೆ ತೀರಾ ಕಗ್ಗತ್ತಲ ಆವರಿಸಿದ್ದರಿಂದ ಬಾವಲಿ ಹಾಗೂ ಅಪಾಯಕಾರಿ ಕಾಡು ಪ್ರಾಣಿಗಳಿಂದ ತೊಂದರೆಯಾಗಬಹುದು ಎಂದು ಚಾರಣಿಗರ ಗೈಡ್‌ ಸುರೇಶ ಅವರು ನೀಡಿದ ಎಚ್ಚರಿಕೆಯಿಂದ ಹಿಂಜರಿದು ವಾಪಸ್‌ ಆಗಿದ್ದಾರೆ. 'ಅಪ್ಪುಡು ದಿಪ್ಪಡು ಸ್ವಾಮಿಯ ಗುಹೆಗಳು' ಗುಹೆಗಳಿಗೆ ಸಮೀಪದಲ್ಲಿರುವ ಸುಬ್ಬರಾಯನಹಳ್ಳಿ ಹಾಗೂ ಕಮತೂರು ಗ್ರಾಮದ ಜನ ಮಾತನಾಡಿ, ಈ ಗುಹೆಗಳನ್ನು 'ಅಪ್ಪುಡು ದಿಪ್ಪಡು ಸ್ವಾಮಿಯ ಗುಹೆಗಳು' ಎಂದು ಕರೆಯುತ್ತಾರೆ. ಶತಮಾನಗಳ ಹಿಂದೆ ಈ ಗುಹೆಗಳಲ್ಲಿಅಪ್ಪುಡು ದಿಪ್ಪುಡು ಎಂಬ ಹೆಸರಿನ ನಿಶಾಚರಿ ಸ್ವಾಮಿಗಳು ನೆಲೆಸಿದ್ದರು. ಅವರು ಯಾವಾಗಾದರೊಮ್ಮೆ ನಮ್ಮ ಗ್ರಾಮಗಳಿಗೆ ಬಂದು ಒಂದಷ್ಟು ಅಹಾರ ಧಾನ್ಯಗಳನ್ನು ಕೊಂಡೊಯ್ಯುತ್ತಿದ್ದರು ಎಂದು ನಮ್ಮ ಹಿರಿಯರು ನಮಗೆ ಹೇಳಿದ ನೆನಪಿದೆ. ಜತೆಗೆ ಆ ಎಲ್ಲ ಗುಹೆಗಳು ಜನ ಸಂಪರ್ಕದಿಂದ ತೀರಾ ದೂರದಲ್ಲಿವೆ ಕಾಡಿನ ಕಣಿವೆಗಳಲ್ಲಿ ದಾರಿ ಮಾಡಿಕೊಂಡು ಸಾಗಬೇಕಿದೆ. ಕೆಲ ಗುಹೆಗಳಲ್ಲಿಸ್ಕಂದನ (ಐತಿಹಾಸಿಕ ಕುಮಾರಸ್ವಾಮಿ) ಮೂರ್ತಿಗಳಿವೆ. ತೀವ್ರ ಸಂಕಷ್ಟದಲ್ಲಿದ್ದಾಗ ಗ್ರಾಮದ ಕೆಲ ಸಾಹಸಿಗಳು, ಕಾಡಿನ ಪರಿಚಯ ಇರುವವರು ಗುಹೆಗಳ ಬಳಿ ತೆರಳಿ ಸ್ಕಂದನ ಮೂರ್ತಿಗೆ ಪೂಜೆ ಸಲ್ಲಿಸಿ ತಮ್ಮ ಸಂಕಷ್ಟ ಪರಿಹಾರ ಮಾಡಿಕೊಂಡಿದ್ದಾರೆ ಎಂದು ಹಿರಿಯರು ನಮಗೆ ಹೇಳಿದ್ದಾರೆ. ದಟ್ಟ ಕಾಡಿನಲ್ಲಿದ್ದ 7 ಕಬ್ಬಿಣದ ಗುಹೆಗಳನ್ನು ಗೈಡ್‌ ಸುರೇಶ, ಚಾರಣಿಗರಾದ ರಾಮಗಢ ಶ್ರೀನಿವಾಸ, ರಾಜ್‌, ವೆಂಕಟಸುಬ್ಬಯ್ಯ, ದಯಾನಂದ, ಶಿವಕುಮಾರ್‌, ಮುತ್ತು ಪ್ರಕಾಶ, ನಾಗೇಂದ್ರ, ಕಾರ್ತೀಕ ಸಿಂಧೆ, ಅನುಧರ್‌, ಪ್ರವೀಣ್‌, ನಿಶಾಂತ್‌ ಮಸೂತಿ ಅವರು ಪತ್ತೆಹಚ್ಚಿದ್ದಾರೆ. ತಾಲೂಕಿನ ಸ್ವಾಮಿಮಲೈ ಅರಣ್ಯದ ಸುಬ್ಬರಾಯನಹಳ್ಳಿಯಿಂದ ಬಲಕ್ಕೆ 500 ಮೀ. ಆಳದ ಕಾಡಿನ ಕಡಿದಾದ ಕಣಿವೆಯಲ್ಲಿ ಇಳಿದರೆ 7 ಕಬ್ಬಿಣದ ಗುಹೆಗಳು ಕಾಣುತ್ತವೆ. ಕೆಲ ಗುಹೆಗಳು ಮರಗಳಿಂದ ಮುಚ್ಚಿಹೋಗಿವೆ. ಇಲ್ಲಿನ ಕಾಡಿನ ದಟ್ಟತೆ ಅಮೇಜಾನ್‌ ಕಾಡನ್ನು ಮೀರಿಸುವಂತಿದೆ. ಗುಹೆಗಳಲ್ಲಿ ಬಾವಲಿ, ಕಾಡು ಪ್ರಾಣಿಗಳು ವಾಸಿಸುತ್ತಿರಬಹುದು ಪ್ರವೇಶಿಸಿದಲ್ಲಿ ತೊಂದರೆಯ ಸಾಧ್ಯತೆ ಹೆಚ್ಚು ಎಂದು ನಮ್ಮ ಗೈಡ್‌ ಸುರೇಶರವರು ನೀಡಿದ ಎಚ್ಚರಿಕೆಯಿಂದ ವಾಪಸಾದೆವು. ರಾಮಗಢ ಶ್ರೀನಿವಾಸ, ಹವ್ಯಾಸಿ ಚಾರಣಿಗರು, ಸಂಡೂರು
from India & World News in Kannada | VK Polls https://ift.tt/3i9oANZ
