ದುಬೈ: ಹಾಲಿ ಚಾಂಪಿಯನ್ಸ್ ಮುಂಬೈ ಇಂಡಿಯನ್ಸ್ ವಿರುದ್ಧ 54 ರನ್‌ಗಳ ಭರ್ಜರಿ ಜಯ ಗಳಿಸಿದ ಹೊರತಾಗಿಯೂ ನಾಯಕತ್ವದ ತಂಡದ ಮನಸ್ಥಿತಿಯನ್ನು ಇಂಗ್ಲೆಂಡ್‌ ಮಾಜಿ ನಾಯಕ ಟೀಕಿಸಿದ್ದಾರೆ. ಭಾನುವಾರ ಇಲ್ಲಿನ ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದಿದ್ದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ್ದ ಆರ್‌ಸಿಬಿ ತನ್ನ ಪಾಲಿನ 20 ಓವರ್‌ಗಳಿಗೆ 6 ವಿಕೆಟ್‌ ನಷ್ಟಕ್ಕೆ 165 ರನ್‌ ಗಳಿಸಿತ್ತು ಹಾಗೂ ಮುಂಬೈ ಇಂಡಿಯನ್ಸ್‌ಗೆ 166 ರನ್‌ ಸವಾಲಿನ ಗುರಿ ನೀಡಿತ್ತು. ಬಳಿಕ ಗುರಿ ಹಿಂಬಾಲಿಸಿದ್ದ ಮುಂಬೈ ಮುಂಬೈ ಇಂಡಿಯನ್ಸ್‌ಗೆ ರೋಹಿತ್‌ ಶರ್ಮಾ(43) ಹಾಗೂ ಕ್ವಿಂಟನ್‌ ಡಿ ಕಾಕ್(24) ಉತ್ತಮ ಆರಂಭದ ಹೊರತಾಗಿಯೂ 18.1 ಓವರ್‌ಗಳಿಗೆ 111 ರನ್‌ಗಳಿಗೆ ಆಲೌಟ್ ಆಯಿತು. ಆ ಮೂಲಕ ಮುಂಬೈ ಹ್ಯಾಟ್ರಿಕ್‌ ಸೋಲಿನ ಆಘಾತ ಅನುಭವಿಸಿತು. ಕ್ರಿಕ್‌ಬಝ್‌ ಜೊತೆ ಮಾತನಾಡಿದ ಮೈಕಲ್‌ ವಾನ್‌, ಕೊಹ್ಲಿ ಪಡೆಯ ಮನಸ್ಥಿತಿಯನ್ನು ಪ್ರಶ್ನಿಸಿದರು ಹಾಗೂ ತಪ್ಪು ಸಮಯದಲ್ಲಿ ತಪ್ಪು ಕ್ಷಣವನ್ನು ಸಂಭ್ರಮಿಸುವ ಆರ್‌ಸಿಬಿ ಆಟಗಾರರ ಗುಂಪಿನಲ್ಲಿ 'ಅಪಕ್ವತೆ ಇದ್ದು ಕಾಣುತ್ತಿದೆ' ಎಂದು ದೂರಿದ್ದಾರೆ. ಅಲ್ಲದೆ, ವೈಯಕ್ತಿಕ ಪ್ರದರ್ಶನಗಳ ಹಿಂದೆ ಬಿದ್ದಿರುವ ಆರ್‌ಸಿಬಿ ಆಟಗಾರರಲ್ಲಿ ಸಾಮೂಹಿಕ ಐಕ್ಯತೆಯ ಕೊರತೆಯಿದೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ. "ನಿಮ್ಮೊಂದಿಗೆ ಪ್ರಾಮಾಣಿಕವಾಗಿ ಹೇಳುವುದೇನೆಂದರೆ, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಬೇಕೆಂತಲೇ ಆರಿಸಿಕೊಳ್ಳಲು ನನಗೆ ಇಷ್ಟವಿಲ್ಲ. ಆದರೆ, ಅವರ ಮನಸ್ಥಿತಿಯನ್ನು ನಾನು ಇಷ್ಟಪಡುವುದಿಲ್ಲ. 9ನೇ ಓವರ್‌ನಲ್ಲಿ ಯಾರೋ ಒಬ್ಬ ಬ್ಯಾಟ್ಸ್‌ಮನ್‌ ಸಿಕ್ಸರ್ ಸಿಡಿಸಿದರೆ, ಅದಕ್ಕೂ ಸಂಭ್ರಮಿಸುತ್ತಾರೆ. ನೀವು ಸಿಕ್ಸರ್ ಹೊಡೆಯುವುದು ಅದು ನಿಮ್ಮ ಕೆಲಸ. ಹಾಗಾಗಿ, ಪಂದ್ಯದಲ್ಲಿ ಗೆಲುವು ಪಡೆದ ಬಳಿಕ ಸಂಭ್ರಮಿಸಿ. ಆದರೆ, ತಪ್ಪು ಸಮಯದಲ್ಲಿ ತಪ್ಪು ಕ್ಷಣವನ್ನು ಸಂಭ್ರಮಿಸುವುದು ಸರಿಯಲ್ಲ," ಎಂದು ವಾನ್‌ ಆರ್‌ಸಿಬಿ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. "ಅದರಲ್ಲೂ ತಂಡದಲ್ಲಿ ಪ್ರಬುದ್ಧತೆಯ ಕಾರ್ಯವಿಧಾನ ಕಾಣುತ್ತಿಲ್ಲ. 8 ನೇ ಓವರ್‌ನಲ್ಲಿ ಯಾರೋ ಒಬ್ಬರು ಸಿಕ್ಸರ್ ಬಾರಿಸುವುದನ್ನು ಸಂಭ್ರಮಿಸುವುದು ಪ್ರಬುದ್ಧತೆ ಅಲ್ಲ. ಅದಕ್ಕೆ ಯಾರು ತಾನೆ ತಲೆ ಕೆಡಿಸಿಕೊಳ್ಳುತ್ತಾರೆ ನೀವೇ ಹೇಳಿ? ಆದರೆ, ಕೆಲ ಗಂಟೆಗಳ ಬಳಿಕ ನೀವು ಸಂಭ್ರಮಿಸುವ ಸಮಯ ಬಂದೇ ಬರುತ್ತದೆ, ಆಗ ಸಂಭ್ರಮಿಸಿ. ಮತ್ತೊಂದು ಅಂಶವೇನೆಂದರೆ, ಸಾಮೂಹಿಕವಾಗಿ ಆಡುವ ಬದಲು ವೈಯಕ್ತಿಕವಾಗಿ ಆಡುವ ಕಡೆಗೆ ಆಟಗಾರರು ಗಮನ ಕೊಡುತ್ತಾರೆ," ಎಂದು ಇಂಗ್ಲೆಂಡ್‌ ಮಾಜಿನಾಯಕ ಟೀಕಿಸಿದ್ದಾರೆ. ಪಂದ್ಯದ ಗೆಲುವಿನ ಬಳಿಕ ಮಾತನಾಡಿದ ವಿರಾಟ್‌ ಕೊಹ್ಲಿ, ಮುಂಬೈ ಇಂಡಿಯನ್ಸ್ ನಂತಹ ಅಗ್ರ ತಂಡದ ಮೇಲೆ ಆರಂಭದಿಂದಲೂ ಪ್ರಾಬಲ್ಯ ಸಾಧಿಸಿದ ಮಹತ್ವದ ಬಗ್ಗೆ ಒತ್ತಿ ಹೇಳಿದರು ಹಾಗೂ ತಂಡದ ಪ್ರದರ್ಶನದ ಬಗ್ಗೆ ಮುಕ್ತಕಂಠದಿಂದ ಗುಣಗಾನ ಮಾಡಿದರು. "ಮುಂಬೈ ವಿರುದ್ಧ ನಾವು ಗೆದ್ದ ಹಾದಿಯ ಬಗ್ಗೆ ನನಗೆ ತುಂಬಾ ಸಂತೋಷವಾಗಿದೆ. ಎರಡನೇ ಓವರ್‌ನಲ್ಲಿಯೇ ದೇವದತ್‌ ಪಡಿಕ್ಕಲ್‌ ವಿಕೆಟ್‌ ಕಳೆದುಕೊಂಡ ನಮಗೆ ತುಂಬಾ ಕಠಿಣವಾಗಿತ್ತು. ಆ ಓವರ್‌ನಲ್ಲಿ ಜಸ್‌ಪ್ರಿತ್‌ ಬುಮ್ರಾ ಬೌಲಿಂಗ್‌ ಹಾದಿ ನೋಡುತ್ತಿದ್ದರೆ, ಪಂದ್ಯ ಮುಂಬೈ ಇಂಡಿಯನ್ಸ್ ಕಡೆ ಟರ್ನ್ ಆಗುವ ಸಾಧ್ಯತೆ ದಟ್ಟವಾಗಿತ್ತು. ಈ ಒತ್ತಡದಲ್ಲಿ ನಾವು ಸ್ವಲ್ಪ ಅಪಾಯವನ್ನು ಸ್ವೀಕರಿಸುವುದು ತುಂಬಾ ಮುಖ್ಯವಾಗಿತ್ತು. ನಾನು ಉತ್ತಮ ಆರಂಭ ಪಡೆದುಕೊಂಡೆ ಹಾಗೂ ಕೆಎಸ್‌ ಭರತ್‌ ನನ್ನಿಂದ ಒತ್ತಡವನ್ನು ಕಸಿದುಕೊಂಡರು. ಅದರಲ್ಲೂ ಮ್ಯಾಕ್ಸ್‌ವೆಲ್‌ ಇನಿಂಗ್ಸ್ ನಂಬಲು ಅಸಾಧ್ಯವಾಗಿತ್ತು," ಎಂದು ಕೊಹ್ಲಿ ಗುಣಗಾನ ಮಾಡಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3D3XH6b
