ಹೊಸಕೋಟೆ: ತನ್ನ ಸಂಬಂಧಿ ಯುವಕನೊಂದಿಗೆ ಕಾರಿನಲ್ಲಿ ಕುಳಿತು ತಂಪು ಪಾನಿಯ ಸೇವಿಸುತ್ತಿದ್ದ ವಿದ್ಯಾರ್ಥಿನಿಯನ್ನು ಬೆದರಿಸಿದ 5 ಮಂದಿ ಅಪರಿಚಿತರು, ಐದು ಲಕ್ಷ ರೂ.ಗಳಿಗೆ ಡಿಮ್ಯಾಂಡ್‌ ಮಾಡಿರುವ ಘಟನೆ ಹೊಸಕೋಟೆ ತಾಲೂಕಿನ ಹಂದೇನಹಳ್ಳಿ ಗ್ರಾಮದ ಬಳಿ ಶನಿವಾರ ನಡೆದಿದೆ. ಈ ಸಂಬಂಧ ವಿದ್ಯಾರ್ಥಿನಿ ನೀಡಿದ ದೂರಿನ ಆಧಾರದ ಮೇಲೆ ಅನುಗೊಂಡಹಳ್ಳಿ ಪೊಲೀಸರು ಐವರ ಮೇಲೆ ಪ್ರಕರಣ ದಾಖಲಿಸಿದ್ದಾರೆ. ನಗರದ ಹೂಡಿಯಲ್ಲಿ ನೆಲೆಸಿರುವ 20 ವರ್ಷದ ವಿದ್ಯಾರ್ಥಿನಿಯೊಬ್ಬಳು ತನ್ನ ಸಂಬಂಧಿ ಯುವಕನೊಂದಿಗೆ ಕಾರಿನಲ್ಲಿ ಸೆ.25 ರಂದು ಬೆಳಗ್ಗೆ 11.30 ಸಮಯದಲ್ಲಿ ಹೊಸಕೋಟೆ ತಾಲೂಕಿನ ದುನ್ನಸಂದ್ರ ಕ್ರಾಸ್‌ ಹಂದೇನಹಳ್ಳಿ ಗ್ರಾಮದ ಹತ್ತಿರವಿರುವ ಖಾಸಗಿ ಲೇಔಟ್‌ ಬಳಿ ಬಂದಿದ್ದರು. ಈ ವೇಳೆ ಕಾರು ನಿಲ್ಲಿಸಿಕೊಂಡು ಸ್ನ್ಯಾಕ್ಸ್ ಮತ್ತು ತಂಪು ಪಾನಿಯ ಸೇವಿಸುತ್ತಿದ್ದೆವು. ಈ ವೇಳೆ 5 ಮಂದಿ ಅಪರಿಚಿತರು ಕಾರು ಹತ್ತಿರ ಬಂದು 'ಪೋಟೊ, ವಿಡಿಯೊ ಮಾಡಿದ್ದೀವಿ' ಎಂದು ಕೈ ಹಿಡಿದು ಎಳೆದಾಡಿದರು. ಈ ವೇಳೆ ಜತೆಗಿದ್ದ ನನ್ನ ಸಂಬಂಧಿ ಯುವಕ, ಅಪರಿಚಿತರ ಕೈಯಿಂದ ನನ್ನನ್ನು ಬಿಡಿಸಿ, ಕಾರಿನಲ್ಲಿ ಕುಳ್ಳಿರಿಸಿದ್ದ. ಆನಂತರ ಅವರು ನಮಗೆ ಐದು ಲಕ್ಷ ರೂ. ಕೊಡಬೇಕು. ಇಲ್ಲದಿದ್ದರೇ ಮೊಬೈಲ್‌ನಲ್ಲಿ ಚಿತ್ರೀಕರಿಸಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಡುತ್ತೇವೆ ಎಂದು ಅವಾಚ್ಯ ಶಬ್ದಗಳಿಂದ ನಿಂದಿಸಿ ಹೆದರಿಸಿದರು. ಈ ವೇಳೆ ದೂರದಲ್ಲಿ ಜನರು ಬರುವುದನ್ನು ಕಂಡು ಅಲ್ಲಿಂದ ಪರಾರಿಯಾದರು ಎಂದು ದೂರಿನಲ್ಲಿ ವಿದ್ಯಾರ್ಥಿನಿ ತಿಳಿಸಿದ್ದಾರೆ. ಘಟನೆ ಸಂಬಂಧ ಹಂದೇನಹಳ್ಳಿಯ ಆಸೀಫ್‌(29), ನಯಾಜ್‌ ಪಾಷ(22), ಲಯಾಖತ್‌ ಪಾಷ(30), ಮಾರಸಂದ್ರ ಸಲ್ಮಾನ್‌ ಖಾನ್‌(28), ಹಂದೇನಹಳ್ಳಿ ರೋಹೀದ್‌(26) ವಿರುದ್ಧ ಪ್ರಕರಣ ದಾಖಲಿಸಿ, ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಮೈಸೂರು ಅತ್ಯಾಚಾರ ಪ್ರಕರಣದಲ್ಲೂ 3 ಲಕ್ಷಕ್ಕೆ ಬೇಡಿಕೆ!ದೇಶಾದ್ಯಂತ ಭಾರೀ ಸಂಚಲನ ಉಂಟು ಮಾಡಿದ್ದ ಮೈಸೂರಿನಲ್ಲಿ ವೈದ್ಯಕೀಯ ವಿದ್ಯಾರ್ಥಿನಿಯ ಮೇಲೆ ನಡೆದ ಸಾಮೂಹಿಕ ಅತ್ಯಾಚಾರ ಪ್ರಕರಣದಲ್ಲಿ ಕೂಡ ಆ ಪ್ರಕರಣದಲ್ಲಿ ಬಂಧಿತ ಆರೋಪಿಗಳು ಯುವಕ ಮತ್ತು ಯುವತಿಗೆ 3 ಲಕ್ಷ ರೂಪಾಯಿ ಕೊಡುವಂತೆ ಬೇಡಿಕೆ ಇಟ್ಟಿದ್ದರು. ಆಗಸ್ಟ್‌ 24ರ ಸಂಜೆ ವೈದ್ಯಕೀಯ ವಿದ್ಯಾರ್ಥಿನಿ ತನ್ನ ಸ್ನೇಹಿತನ ಜೊತೆ ಮೈಸೂರಿನ ಜೆಎಸ್‌ಎಸ್‌ ಆಯುರ್ವೇದಿಕ್ ಕಾಲೇಜಿನ ಮುಂದೆ ಇರುವ ವಾಟರ್‌ ಟ್ಯಾಂಕ್‌ ಬಳಿಯ ಕಚ್ಛಾ ರಸ್ತೆಯಲ್ಲಿ ವಾಕಿಂಗ್‌ಗೆ ತೆರಳಿದ್ದರು. ಈ ವೇಳೆ ಅಲ್ಲಿಗೆ ಬಂದ ಆರು ಮಂದಿ ಕಾಮುಕರು ಯುವಕನಿಗೆ ಗಂಭೀರವಾಗಿ ಹಲ್ಲೆ ನಡೆಸಿ ಯುವತಿಯನ್ನು ಪೊದೆಗೆ ಎಳೆದೊಯ್ದು ಸಾಮೂಹಿಕ ಅತ್ಯಾಚಾರ ನಡೆಸಿದ್ದರು. ಈ ಘಟನೆ ದೇಶಮಟ್ಟದಲ್ಲಿ ಭಾರೀ ಸದ್ದು ಮಾಡಿತ್ತು. ಕರ್ನಾಟಕದ ಘನತೆಗೆ ಧಕ್ಕೆಯುಂಟು ಮಾಡಿದ್ದ ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದ ಪೊಲೀಸರು ಆರು ಮಂದಿ ಕಾಮುಕರನ್ನು ತಮಿಳುನಾಡಿನಲ್ಲಿ ಬಂಧಿಸಿ ಕರೆತಂದಿದ್ದರು. ಬಳಿಕ ಈ ಘಟನೆ ಕುರಿತು ಪೊಲೀಸರಿಗೆ ಹೇಳಿಕೆ ನೀಡಿದ್ದ ಯುವತಿಯ ಸ್ನೇಹಿತ ಅಂದು ನಡೆದ ಘಟನೆಯ ಬಗ್ಗೆ ಮಾಹಿತಿ ನೀಡಿದ್ದ.
from India & World News in Kannada | VK Polls https://ift.tt/39HUnB0
