ಜೈಪುರ: ಪರೀಕ್ಷೆಯಲ್ಲಿ ನಕಲು ಮಾಡಲು ಅಭ್ಯರ್ಥಿಗಳು ಇನ್ನಿಲ್ಲದ ಕಸರತ್ತು ಮಾಡುತ್ತಾರೆ. ಪರೀಕ್ಷಾ ಅಕ್ರಮಗಳಿಗೆ ಬ್ರೇಕ್‌ ಹಾಕಲು ಸರ್ಕಾರ ಎಷ್ಟೇ ಕ್ರಮ ಕೈಗೊಂಡರೂ, ಅವುಗಳನ್ನೂ ಮೀರಿದ ಬುದ್ಧಿವಂತಿಕೆಯನ್ನು ವಿದ್ಯಾರ್ಥಿಗಳು ಪ್ರದರ್ಶನ ಮಾಡುತ್ತಾರೆ. ಇಂಥ ಖತರ್ನಾಕ್‌ ಗ್ಯಾಂಗ್‌ ಒಂದನ್ನು ಪೊಲೀಸರು ಬೇಧಿಸಿದ್ದು, ಧರಿಸಿ ನಕಲು ಮಾಡುತ್ತಿದ್ದ ವಿದ್ಯಾರ್ಥಿಗಳನ್ನು ಬಂಧಿಸಲಾಗಿದೆ. ರಾಜಸ್ಥಾನದ ಶಿಕ್ಷಕರ ನೇಮಕಾತಿ ಪರೀಕ್ಷೆಯಲ್ಲಿ ಈ ಅಕ್ರಮ ನಡೆದಿದ್ದು, ಐವರು ಅಭ್ಯರ್ಥಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ರಾಜಸ್ಥಾನ ಶಿಕ್ಷಕರ ಅರ್ಹತಾ (ರೀಟ್) ಬರೆಯುವ ಅಭ್ಯರ್ಥಿಗಳು ಚಪ್ಪಲ್‌ನಲ್ಲಿ ಯಂತ್ರವನ್ನು ಅಳವಡಿಸಿ ಚೀಟಿಂಗ್‌ ಮಾಡುತ್ತಿದ್ದ ದಂಧೆ ಇದಾಗಿದ್ದು, ಅಜ್ಮೇರ್‌ನಲ್ಲಿ ಮೊದಲ ಅಭ್ಯರ್ಥಿಯ ಬಂಧನ ಮಾಡಲಾಗಿತ್ತು. ಇದಾದ ಬೆನ್ನಲ್ಲೇ ಎಚ್ಚೆತ್ತುಕೊಂಡ ಪೊಲೀಸರು ರಾಜ್ಯದ ಹಲವೆಡೆ ಕಾರ್ಯಾಚರಣೆ ನಡೆಸಿ ಐವರು ಅಭ್ಯರ್ಥಿಗಳನ್ನು ಬಂಧಿಸಿದ್ದಾರೆ. ಬಿಕಾನೇರ್‌ ಹಾಗೂ ಸಿಖರ್‌ನಲ್ಲಿ ಅಭ್ಯರ್ಥಿಗಳನ್ನು ಬಂಧಿಸಲಾಗಿದೆ. ₹ 2 ರಿಂದ ₹ 6 ಲಕ್ಷದ ವರೆಗೆ ಮಾರಾಟ ಈ ದಂಧೆಯ ಹಿಂದೆ ಪ್ರಭಾವಿಗಳ ಕೈವಾಡ ಇರುವುದರ ಬಗ್ಗೆ ಸಂಶಯ ವ್ಯಕ್ತವಾಗಿದ್ದು, ಪೊಲೀಸರು ಈ ನಿಟ್ಟಿನಲ್ಲಿಯೂ ತನಿಖೆ ಮಾಡುತ್ತಿದ್ದಾರೆ. ಈ ಚಪ್ಪಲಿಗಳನ್ನು ತಯಾರು ಮಾಡುವ ಕಾರ್ಖಾನೆಯೇ ಇದೇ ಎನ್ನುವ ಸಂಶಯವೂ ಪೊಲೀಸರಿಗೆ ಇದೆ. ಭಾರೀ ಬುದ್ಧಿವಂತಿಕೆಯಿಂದ ಈ ಚಪ್ಪಲಿಗಳನ್ನು ತಯಾರು ಮಾಡಲಾಗಿದ್ದು, ಬ್ಲೂಟೂಥ್‌ ಚಪ್ಪಲಿಗಳನ್ನು ₹ 2 ಲಕ್ಷದಿಂದ ಹಿಡಿದು ₹ 6 ಲಕ್ಷದ ವರೆಗೂ ಮಾರಾಟ ಮಾಡುತ್ತಿದ್ದರು ಎಂದು ಪೊಲೀಸರು ಹೇಳಿದ್ದಾರೆ. 'ಬ್ಲೂಟೂಥ್‌ ಮೂಲಕ ನಕಲು ಮಾಡಲು ತಯಾರಿ ನಡೆಸುತ್ತಿದ್ದ ಓರ್ವ ಅಭ್ಯರ್ಥಿಯನ್ನು ನಾವು ಪರೀಕ್ಷೆಗೆ ಮುಂಚಿತವಾಗಿ ಬಂಧಿಸಿದ್ದೇವೆ. ತಕ್ಷಣವೇ ನಾವು ಇತರ ಜಲ್ಲೆಗಳ ಪರೀಕ್ಷಾ ಕೇಂದ್ರಕ್ಕೂ ಮಾಹಿತಿ ರವಾನೆ ಮಾಡಿದ್ದೇವೆ. ಮುಂದಿನ ಪರೀಕ್ಷೆಯಲ್ಲಿ ಅಭ್ಯರ್ಥಿಗಳು ಚಪ್ಪಲಿ, ಶೂ, ಸಾಕ್ಸ್‌ಗಳನ್ನು ಹಾಕಿಕೊಂಡು ಪರೀಕ್ಷಾ ಕೊಠಡಿ ಒಳಗೆ ಪ್ರವೇಶ ಮಾಡುವುದನ್ನು ನಿಷೇಧಿಸಲಾಗಿದೆ. ಈ ದಂಧೆಯ ಲಿಂಕ್ ಎಲ್ಲೆಲ್ಲಾ ಇದೆ ಎನ್ನುವ ಬಗ್ಗೆ ತನಿಖೆ ಸಾಗಿದೆ' ಎಂದು ಅಜ್ಮೇರ್‌ ಪೊಲೀಸ್‌ ಅಧಿಕಾರಿ ಜಗದೀಶ್‌ ಚಂದ್ರ ಶರ್ಮಾ ಹೇಳಿದ್ದಾರೆ. ಬ್ಲೂಟೂಥ್‌ ಚಪ್ಪಲ್‌ ಚೀಟಿಂಗ್‌ ಹೇಗೆ..? ಪರೀಕ್ಷೆ ಬರೆಯುವ ಅಭ್ಯರ್ಥಿಗಳ ಚಪ್ಪಲಿ ಒಳಗಡೆ ಮೊಬೈಲ್‌ ಫೋನ್‌ ಹಾಗೂ ಬ್ಲೂಟೂಥ್‌ ಅಳವಡಿಸಲಾಗಿರುತ್ತದೆ. ಸಣ್ಣದಾದ ಇಯರ್‌ ಬಡ್‌ಗಳ ಮೂಲಕ ಅಭ್ಯರ್ಥಿಗಳು ಬ್ಲೂಟೂಥ್‌ನೊಂದಿಗೆ ಸಂಪರ್ಕ ಕಲ್ಪಿಸುವಂತೆ ವ್ಯವಸ್ಥೆ ಮಾಡಲಾಗಿರುತ್ತದೆ. ಇದರ ಮೂಲಕ ಪರೀಕ್ಷೇ ಕೇಂದ್ರದ ಹೊರಗಡೆ ಇರುವ ಮಂದಿ ಅಭ್ಯರ್ಥಿಗಳಿಗೆ ಉತ್ತರ ಹೇಳಿ ಕೊಡುತ್ತಿದ್ದರು. ಪರೀಕ್ಷೆಗೂ ಮುಂಚಿತವಾಗಿ ಪರೀಕ್ಷಾ ಅಕ್ರಮವನ್ನು ತಡೆಯಲು ರಾಜಸ್ಥಾನದ ಹಲವು ಜಿಲ್ಲೆಗಳಲ್ಲಿ ಸುಮಾರು 12 ಗಂಟೆಗಳ ಕಾಲ ಮೊಬೈಲ್‌ ಇಂಟರ್ನೆಟ್‌ ಹಾಗೂ ಎಸ್ಎಂಎಸ್‌ ಸೌಲಭ್ಯಗಳನ್ನು ಬಂದ್‌ ಮಾಡಲಾಗಿತ್ತು. ಸರ್ಕಾರಿ ಶಾಲೆಗಳಲ್ಲಿ ಖಾಲಿ ಇರುವ 31,000 ಹುದ್ದೆಗಳಿಗೆ ಸುಮಾರು 16 ಲಕ್ಷ ಅಭ್ಯರ್ಥಿಗಳು ಪರೀಕ್ಷೆ ಬರೆದಿದ್ದಾರೆ. ರಾಜಸ್ಥಾನದಲ್ಲಿ ಸರ್ಕಾರಿ ಶಾಲಾ ಶಿಕ್ಷಕರಿಗೆ ರೀಟ್ ಪರೀಕ್ಷೆ ಪಾಸು ಮಾಡುವುದು ಕಡ್ಡಾಯ
from India & World News in Kannada | VK Polls https://ift.tt/2Y0VZn3
