ಪ್ರತಿಯೊಬ್ಬರ ದಿನದ 24 ಗಂಟೆಯೂ ನಿಯಮಿತವಾಗಿ ಬಡಿದುಕೊಳ್ಳುವುದೇ ಜೀವಂತಿಕೆಯ ಸೆಲೆ. ಅದು ನಿರಂತರ ಬಡಿದುಕೊಳ್ಳುತ್ತಿದ್ದರೆ ಜೀವನ. ಈ ಪುಟ್ಟ ಹೃದಯ ಪ್ರತಿಯೊಬ್ಬರ ಭಾವನೆಗಳ ಮೂಲವೂ ಆಗಿದೆ. ಅದಕ್ಕೆಂದೇ ಹೃದಯವಂತ ಎಂಬ ಪದ ಚಲಾವಣೆಯಲ್ಲಿದೆ. ಇಂಥ ಅಮೂಲ್ಯ ಹೃದಯವನ್ನು ಪ್ರತಿಯೊಬ್ಬರೂ ಸಂರಕ್ಷಣೆ ಮಾಡಿಟ್ಟುಕೊಳ್ಳಲೇಬೇಕು. ಹೃದಯದ ಕಾಳಜಿ ವಹಿಸಿ, ಅದುವೇ ಆರೋಗ್ಯದ ಗುಟ್ಟು . ಇದು ವಿಜಯಪುರದ ಹೆಸರಾಂತ ವೈದ್ಯರಾದ ಡಾ.ನಿತಿನ್‌ ಅಗರ್‌ವಾಲ್‌ ಹಾಗೂ ಡಾ.ಕಿರಣ್‌ ಚುಳಕಿ ಅವರು ಜನತೆಗೆ ನೀಡಿದ ಹೃದಯ ಸಂರಕ್ಷಣೆಯ ಟಿಫ್ಸ್‌. ಸೆ.29ರಂದು ವಿಶ್ವ ಹೃದಯ ದಿನಾಚರಣೆ ಅಂಗವಾಗಿ ವಿಜಯಕರ್ನಾಟಕ ಪತ್ರಿಕೆ ಏರ್ಪಡಿಸಿದ್ದ ಸಂವಾದದಲ್ಲಿ ಪಾಲ್ಗೊಂಡ ಅವರು, ಹೃದಯ ಸಂಬಂಧಿ ಕಾಯಿಲೆ, ಅದಕ್ಕೆ ಕಾರಣ, ಚಿಕಿತ್ಸೆ, ಉತ್ತಮ ಆರೋಗ್ಯಕ್ಕಾಗಿ ಹೃದಯ ಸಂರಕ್ಷಣೆ ಎಷ್ಟು ಮಹತ್ವಎಂಬುದರ ಕುರಿತು ಉಪಯುಕ್ತ ಮಾಹಿತಿ ನೀಡಿದರು. ಹೃದಯದ ಬಗ್ಗೆ ನಿಷ್ಕಾಳಜಿ ಬೇಡ, ಪುಟ್ಟ ಹೃದಯದ ಮಿಡಿತ ಚೆನ್ನಾಗಿರಬೇಕೆಂಬ ಸದುದ್ದೇಶದಿಂದಲೇ ಜಿನೇವಾದಲ್ಲಿರುವ ವಿಶ್ವ ಹಾರ್ಟ್‌ ಫೆಡರೇಶನ್‌ ಪ್ರತಿವರ್ಷ ಸೆ. 29 ರಂದು ಜಾಗತಿಕ ಮಟ್ಟದಲ್ಲಿ ವಿಶ್ವ ಹೃದಯ ದಿನವನ್ನಾಗಿ ಆಚರಿಸುತ್ತಿದೆ. ಆರಂಭಿಕ ವರ್ಷಗಳಲ್ಲಿ ಸೆಪ್ಟೆಂಬರ್‌ ತಿಂಗಳ 4ನೇ ಭಾನುವಾರ ವಿಶ್ವ ಹೃದಯದ ದಿನ ಆಚರಿಸಲಾಗುತ್ತಿತ್ತು. ವಿಶ್ವ ಹಾರ್ಟ್‌ ಫೆಡರೇಶನ್‌ ಹಾಗೂ ವಿಶ್ವ ಆರೋಗ್ಯ ಸಂಸ್ಥೆ ಜತೆಗೂಡಿ ಸೆ.29ರಂದು ವಿಶ್ವ ಹೃದಯ ರೋಗ ದಿನಾಚರಣೆ ಮೂಲಕ ಜಗತ್ತಿನಾದ್ಯಂತ ಹೃದಯ ಸಂಬಂಧಿ ರೋಗಗಳ ವಿರುದ್ಧ ಹೋರಾಡುವುದು ಮತ್ತು ಅವುಗಳು ಬಾರದಂತೆ ತಡೆದು ಹೃದಯವನ್ನು ಆರೋಗ್ಯವಾಗಿಡುವುದು ಈ ದಿನಾಚರಣೆಯ ಮೂಲ ಉದ್ದೇಶವಾಗಿದೆ ಎಂದು ಆಯುಷ್‌ ಆಸ್ಪತ್ರೆಯ ತಜ್ಞ ವೈದ್ಯ ಡಾ.ನಿತಿನ್‌ ಅಗರ್‌ವಾಲ್‌ ವಿವರಿಸಿದರು. ಹೃದಯದ ನಿರ್ಲಕ್ಷ್ಯ ಸಲ್ಲದು ಜಗತ್ತಿನಲ್ಲಿ ಪ್ರತಿ ವರ್ಷ ಹೃದಯ ಸಂಬಂಧಿ ಕಾಯಿಲೆಗಳಿಂದ ಸುಮಾರು 173 ಲಕ್ಷ ಜನರು ಸಾವನ್ನಪ್ಪುತ್ತಿದ್ದಾರೆ. ಈ ಸಂಖ್ಯೆ ಅಭಿವೃದ್ಧಿ ಹೊಂದುತ್ತಿರುವ ರಾಷ್ಟ್ರಗಳಲ್ಲಿ ಶೇ. 80 ರಷ್ಟಿರುವುದು ಅಘಾತಕಾರಿ ಸಂಗತಿ. ಆದಾಗ್ಯೂ ಜನರು ಹೃದಯ ಸಂಬಂಧಿ ಕಾಯಿಲೆಗಳ ಬಗ್ಗೆ ಅಸೀಮ ನಿರ್ಲಕ್ಷ್ಯ ತಾಳುತ್ತಿದ್ದಾರೆ. ಇದು ಸಲ್ಲದು ಎಂದರು. ಈ ಹಿಂದೆಯೂ ಸಾಕಷ್ಟು ಜನರು ಹೃದಯಾಘಾತದಿಂದ ಸಾವನ್ನಪ್ಪುತ್ತಿದ್ದರು. ಆದರೆ ಹಿಂದಿನವರು ದಿನದ 24 ಗಂಟೆಯೂ ಶರೀರವನ್ನು ದಂಡಿಸುತ್ತಿದ್ದರು. ಹೀಗಾಗಿ ಸಾವಿನ ಸಂಖ್ಯೆ ಕಡಿಮೆಯಿತ್ತು. ಆದರೆ ಇತ್ತೀಚಿನ ವರ್ಷಗಳಲ್ಲಿ ಜನರ ಆರ್ಥಿಕ ಸ್ಥಿತಿ ಸುಧಾರಣೆಯಾಗಿ, ಜೀವನ ಶೈಲಿ, ಆಹಾರ ಕ್ರಮ ಬದಲಾಗಿದೆ. ಹೀಗಾಗಿ ಹೆಚ್ಚು ಜನರು ಹೃದಯಘಾತಕ್ಕೊಳಗಾಗಿ ಸಾವನ್ನಪ್ಪುತ್ತಿದ್ದಾರೆ. ಕಾರಣವಿಷ್ಟೇ ಶ್ರಮರಹಿತ ಕೆಲಸ. ಇದರೊಟ್ಟಿಗೆ ಬಹುತೇಕ ಜನರು ತುಂಬಾಕು, ಸಿಗರೇಟ್‌ ಮತ್ತಿತರ ದುಶ್ಚಟಗಳ ದಾಸರಾಗುತ್ತಿದ್ದಾರೆ. ಹೀಗಾಗಿ ಪ್ರತಿ ಮೂರು ವ್ಯಕ್ತಿಗಳಲ್ಲಿಒಬ್ಬ ಹೃದಯಘಾತಕ್ಕೊಳಗಾಗಿ ಅಮೂಲ್ಯ ಜೀವನ ಕಳೆದುಕೊಳ್ಳುತ್ತಿದ್ದಾರೆ. ಇದರಿಂದಾಗಿ ಹೃದಯಾಘಾತದಿಂದ ಸಾವಿಗೀಡಾಗುವವರ ಸಂಖ್ಯೆ ಅಧಿಕವಾಗುತ್ತಿದೆ. ಸಣ್ಣ ವಯಸ್ಸಿನವರಿಗೂ ಸಮಸ್ಯೆ ಇತ್ತೀಚಿನ ದಿನಗಳಲ್ಲಿ ವಯಸ್ಸಿನ ಮಿತಿಯೂ ಇಲ್ಲ, ಮಕ್ಕಳಾದಿಯಾಗಿ 25-30 ವರ್ಷ ವಯಸ್ಸಿನವರಿಗೂ ಹೃದಯ ಸಂಬಂಧಿ ಕಾಯಿಲೆ ಕಾಣಿಸಿಕೊಳ್ಳುತ್ತಿದೆ. ಇವರೆಲ್ಲ ಶರೀರವನ್ನು ದಂಡಿಸದೇ ಇರುವುದರಿಂದ ರಕ್ತದೊತ್ತಡ, ಡಯಾಬಿಟಿಸ್‌, ಬೊಜ್ಜುತನ ಮತ್ತಿತರ ಕಾಯಿಲೆಗಳಿಗೆ ತುತ್ತಾಗುತ್ತಾರೆ. ಬಳಿಕ ಹೃದಯ ಕಾಯಿಲೆಗಳಿಂದ ಬಳಲಿ ಸಾವನ್ನಪ್ಪುತ್ತಿರುವುದು ಆತಂಕಕಾರಿ ಸಂಗತಿಯಾಗಿದೆ ಎಂದು ಇಬ್ಬರು ತಜ್ಞ ವೈದ್ಯರು ಕಳವಳ ವ್ಯಕ್ತಪಡಿಸಿದರು. ಆದರೆ ಈ ಹೃದಯ ಸಂಬಂಧಿ ಕಾಯಿಲೆ 20-25 ವಯಸ್ಸಿನಲ್ಲಿ ಕಾಣಿಸಿಕೊಳ್ಳುತ್ತಿದೆ. ಬಹುತೇಕರು ಹೃದಯ ಚಿಕಿತ್ಸೆ ಮಾಡಿಕೊಳ್ಳುತ್ತಿದ್ದಾರೆ. ಇಂಥ ತಾರುಣ್ಯಾವಸ್ಥೆಯಲ್ಲಿ ಹೃದಯ ಕಾಯಿಲೆಯಿಂದ ಬಳಲುತ್ತಿದ್ದರೆ, ಜೀವಕ್ಕೆ ಅಪಾಯ ಕಟ್ಟಿಟ್ಟ ಬುತ್ತಿ. ಹೀಗಾಗಿ ಇಡೀ ಕುಟುಂಬ ಆಪತ್ತಿಗೆ ಸಿಲುಕಿಕೊಳ್ಳಬೇಕಾಗುತ್ತದೆ ಎಂದು ಹೃದಯರೋಗ ತಜ್ಞ ಡಾ.ಕಿರಣ್‌ ಚುಳಕಿ ಕಳವಳ ವ್ಯಕ್ತಪಡಿಸಿದರು. 40 ವರ್ಷಗಳ ಹಿಂದೆ ಹೃದಯಾಘಾತಕ್ಕೆ ವಿಶೇಷ ಚಿಕಿತ್ಸೆ ಇರಲಿಲ್ಲ. ಅವರಿಗೆ ಬೆಡ್‌ ರೆಸ್ಟ್‌ ಒಂದೇ ಮಂತ್ರವಾಗಿತ್ತು. ಅದೆಷ್ಟು ಮಂದಿ ಸಕಾಲಕ್ಕೆ ಚಿಕಿತ್ಸೆ ಸಿಗದೆ ಸಾವನ್ನುಪ್ಪುತ್ತಿದ್ದರು. ಈಗ ಹಾಗಿಲ್ಲ. ಅತ್ಯಾಧುನಿಕ ಹಾಗೂ ಮುಂದುವರಿದ ಚಿಕಿತ್ಸೆ, ಶಸ್ತ್ರ ಚಿಕಿತ್ಸೆ, ಔಷಧಿ ಬಂದಿವೆ. ಹೀಗಾಗಿ ಲೈಫ್‌ ಸೇವಿಂಗ್‌ ಆಗುತ್ತಿದೆ. ಸಕಾಲದಲ್ಲಿಸೂಕ್ತ ಚಿಕಿತ್ಸೆಯಿಂದ ಶೇ.90ರಷ್ಟು ಜನ ಬದುಕುಳಿಯುತ್ತಿರುವುದು ಸಂತಸದ ಸಂಗತಿ ಎಂದರು. ಹಾರ್ಟ್‌ ಅಟ್ಯಾಕ್‌ ಯಾಕೆ ಹೃದಯಕ್ಕೆ ರಕ್ತ ಪೂರೈಸುವ ರಕ್ತನಾಳಗಳು ಬಂದ್‌ ಆದರೆ ವ್ಯಕ್ತಿ ಹೃದಯಾಘಾತದಿಂದ ಸಾವನ್ನಪ್ಪುವ ಸಂಭವ ಇರುತ್ತದೆ. ಸಾಕಷ್ಟು ಜನ ಹೃದಯಘಾತ, ಹೃದಯ ಸಂಬಂಧಿ ಕಾಯಿಲೆ ಬಗ್ಗೆ ಅನೇಕರು ನಿರ್ಲಕ್ಷ್ಯ ವಹಿಸಿ, ಕೊನೆ ಹಂತದಲ್ಲಿ ತಪಾಸಣೆ, ಚಿಕಿತ್ಸೆಗೆ ಮುಂದಾಗುವುದರಿಂದ ಮಾರ್ಗ ಮಧ್ಯದಲ್ಲೇ ಮರಣ ಹೊಂದುವ ಸಾಧ್ಯತೆ ಇರುತ್ತದೆ. ಹೀಗಾಗಿ ಹೃದಯ ಸಂರಕ್ಷಣೆಗೆ ಪ್ರತಿಯೊಬ್ಬರೂ ಆದ್ಯತೆ ನೀಡಬೇಕೆಂದು ಡಾ.ನಿತಿನ್‌ ಅಗರ್‌ವಾಲ್‌ ಸಲಹೆ ನೀಡಿದರು. ಹೃದಯ ಕಾಳಜಿ ಜಾಗೃತಿ ಹೃದಯ ಸಂಬಂಧಿ ಕಾಯಿಲೆ. ಹೃದಯ ಕಾಳಜಿ, ಚಿಕಿತ್ಸೆ ಬಗ್ಗೆ ಇನ್ನೂ ವ್ಯಾಪಕ ಜಾಗೃತಿ ಮೂಡಿಸುವ ಅಗತ್ಯವಿದೆ. ಹೈಪರ್‌ ಅಸಿಡಿಟಿ (ಪಿತ್ತ) ಹಾಗೂ ಹೃದಯ ಸಂಬಂಧಿ ಕಾಯಿಲೆಯ ಅದೆಷ್ಟೋ ಪ್ರಕರಣಗಳಲ್ಲಿಒಂದೇ ರೀತಿಯ ಲಕ್ಷಣಗಳಿರುತ್ತವೆ. ಹೀಗಾಗಿ ಬಹಳಷ್ಟು ಜನ ಅಸಿಡಿಟಿಯೆಂದು ನಿರ್ಲಕ್ಷ್ಯ ವಹಿಸಿ ಅಪಾಯ ತಂದೊಡ್ಡುಕೊಳ್ಳುತ್ತಾರೆ. ಸ್ವಲ್ಪ ಎದೆನೋವು ಕಾಣಿಸಿಕೊಂಡಿದೆ ಎಂದರೆ, ತಕ್ಷಣಕ್ಕೆ ಹತ್ತಿರದ ವೈದ್ಯರಿಗೆ ತೋರಿಸಿಕೊಂಡು ಸೂಕ್ತ ಚಿಕಿತ್ಸೆ ಪಡೆದು ಸಮಸ್ಯೆಯಿಂದ ಪಾರಾಗಬಹುದೆಂದು ಇಬ್ಬರೂ ತಜ್ಞವೈದ್ಯರು ಸಲಹೆ ನೀಡಿದರು. ಲಕ್ಷಣಗಳ ನಿರ್ಲಕ್ಷ್ಯ ಸಲ್ಲ ಇದ್ದಕ್ಕಿದ್ದಂತೆಯೇ ಬೆವರು, ಧಮ್ಮು, ಉಸಿರಾಟ ತೊಂದರೆ, ವಾಂತಿ ಆಗುವುದು, ಅಸಿಡಿಟಿ, ಕಣ್ಣು ಉರಿಯುತ್ತಿದ್ದರೆ, ಅವು ಹೃದಯಾಘಾತದ ಲಕ್ಷಣಗಳು. ಅವುಗಳನ್ನು ಅಲಕ್ಷ್ಯ ಹಾಗೂ ಹಗುರವಾಗಿ ಪರಿಗಣಿಸದೇ, ತಕ್ಷಣಕ್ಕೆ ಸಮೀಪದ ವೈದ್ಯರನ್ನು ಕಂಡು ಹೃದಯಾಘಾತದಿಂದ ಪಾರಾಗಬೇಕೆಂದರು. ಈ ಹಂತದಲ್ಲಿದ್ದಾಗ ತಕ್ಷಣ ಇಸಿಜಿ, ಎಕೋ, ಟಿಎಂಟಿ ಟೆಸ್ಟ್‌ ಮಾಡಿಸಿಕೊಂಡು ಕಡಿಮೆ ಖರ್ಚಿನಲ್ಲಿ ಅಮೂಲ್ಯ ಜೀವ ರಕ್ಷಿಸಿಕೊಳ್ಳಬಹುದಾಗಿದೆ ಎಂದರು. ಒಂದೊಮ್ಮೆ ಈ ಲಕ್ಷಣಗಳು ಕಂಡು ಬಳಿಕ ಮಾಯವಾದರೂ ಪಿತ್ತಾಗಿತ್ತೇನೋ ಎಂದು ಅಲಕ್ಷಿಸಬೇಡಿ. ವೈದ್ಯರ ಸಲಹೆಯಂತೆ ಚಿಕಿತ್ಸೆ ಪಡೆದುಕೊಳ್ಳುವ ಮೂಲಕ ಅಕಾಲಿಕ ಸಾವಿನಿಂದ ಪಾರಾಗಬಹುದಾಗಿದೆ ಎಂದು ತಜ್ಞರು ತಿಳಿಸಿದರು. ಅವಶ್ಯ ಬಿದ್ದರೆ ಈ ವಿಷಯದಲ್ಲಿ ರೋಗಿಯ ರೋಗ ಲಕ್ಷಣಗಳ ಹಿಸ್ಟ್ರಿ ಅಗತ್ಯಗತ್ಯ. ಹಾಗಾಗಿ ವೈದ್ಯರು ಇಸಿಜಿ, ಇಕೊ, ಟಿಎಂಟಿ, ಆ್ಯಂಜಿಯೋಗ್ರಫಿಯಂಥ ಹಂತ-ಹಂತವಾದ ಚಿಕಿತ್ಸೆಗೊಳಪಡಿಸಿದರೆ, ಅದಕ್ಕೊಳಪಡುವ ಮೂಲಕ ಸಾವಿನ ದವಡೆಯಿಂದ ಪಾರಾಗಬಹುದಾಗಿದೆ ಎಂದರು. ವಿಷಯದಲ್ಲಂತೂ ಮಧುಮೇಹ, ಬಿಪಿ, ಒಬೆಸಿಟಿ, ಅಸಿಡಿಟಿ, ಥೈರಾಯ್ಡ್‌ನಿಂದ ಬಳಲುತ್ತಿದ್ದವರಂತೂ ಬಹಳಷ್ಟು ಜಾಗೃತರಾಗಿರಬೇಕು. ಇಂಥವರೆಲ್ಲ ವರ್ಷಕ್ಕೊಮ್ಮೆ ಇಲ್ಲವೇ 6 ತಿಂಗಳಿಗೊಮ್ಮೆ ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳುತ್ತಿರಬೇಕು ಎಂದು ಇಬ್ಬರೂ ವೈದ್ಯರು ಅಮೂಲ್ಯ ಸಲಹೆ ನೀಡಿದರು. ನಿಯಮಿತ ಆಹಾರ, ಅಗತ್ಯ ವಿಹಾರ ಹೃದಯ ಸಂಬಂಧಿ ಕಾಯಿಲೆ ಬರದಂತೆ ತಡೆಯಲು ಆಹಾರ ಹಾಗೂ ವಿಹಾರ ನಿಯಮಿತವಾಗಿರಬೇಕು. ನಾಲಿಗೆ ರುಚಿಗಾಗಿ ಸಿಕ್ಕಿದ್ದನ್ನು ತಿನ್ನುವುದರಿಂದ ದೂರವಿರಬೇಕು. ಬದಲಿಗೆ ಕಚ್ಚಾ ಪದಾರ್ಥಗಳಾದ ಮೊಳಕೆಯೊಡೆದ ಕಾಳುಗಳು, ಸೌತೆಕಾಯಿ, ಗಜ್ಜರಿಯಂಥ ಗ್ರೀನ್‌ ಸಲಾಡ್‌ ಸೇವಿಸುವುದರಿಂದ ಹೃದಯವನ್ನು ಚೆನ್ನಾಗಿ ಕಾಪಾಡಿಕೊಳ್ಳಬಹುದಾಗಿದೆ ಎಂದರು. ಬೇಡ ಝಂಕ್‌ ಫುಡ್‌ಹೃದಯ ಸಂಬಂಧಿ ರೋಗಗಳಿಂದ ಬಳಲುತ್ತಿರುವ ರೋಗಿಗಳಂತೂ ಝಂಕ್‌ಫುಡ್‌ನಿಂದ ದೂರವೇ ಉಳಿಯುವುದು ಒಳಿತು. ಜೊತೆಗೆ ಉಪ್ಪು, ಕೊಬ್ಬಿನಂಶ ಹೆಚ್ಚಿರುವ ಆಹಾರ ಸೇವನೆ ಮಾಡಬಾರದು. ಜೊತೆಗೆ ಸಿಹಿ ಪದಾರ್ಥಗಳನ್ನು ಬಿಟ್ಟರೆ, ಸಂಪೂರ್ಣ ಆರೋಗ್ಯದಿಂದ ಇರಬಹುದಾಗಿದೆ. ಜೊತೆಗೆ ಅಡುಗೆಗೆ ಶೇಂಗಾ ಎಣ್ಣೆ, ಕುಸುಬೆ ಎಣ್ಣೆ , ಸೂರ್ಯಕಾಂತಿ, ಆಲೀವ್‌ ಎಣ್ಣೆ, ರೈಸ್‌ಬ್ರಾನ್‌ ಎಣ್ಣೆ ಹೀಗೆ ಆಗಾಗ್ಗೆ ಅಡುಗೆ ಎಣ್ಣೆ ಬದಲಾಯಿಸಿ ಇಡೀ ಕುಟುಂಬದ ಆರೋಗ್ಯ ಕಾಪಾಡಿಕೊಳ್ಳಬಹುದು ಎಂದು ಡಾ.ನಿತಿನ್‌ ಅಗರ್‌ವಾಲ್‌ ಉಪಯುಕ್ತ ಸಲಹೆ ನೀಡಿದರು. ಹೆಚ್ಚು ಸಸ್ಯಾಹಾರ ಸೇವನೆ ಒಳ್ಳೆಯದು. ರಾತ್ರಿ ಊಟದ ಬಳಿಕ ಅನ್ನ ತ್ಯಾಗ ಮಾಡಿದರೆ ಆರೋಗ್ಯದಿಂದ ಇರಬಹುದಾಗಿದೆ. ಮನುಷ್ಯನ ಶರೀರ ವಾಹನದ ಎಂಜಿನ್‌ ಇದ್ದಂತೆ. ವಾಹನವನ್ನು 3 ತಿಂಗಳಿಗೊಮ್ಮೆ ಸರ್ವಿಸ್‌ ಮಾಡಿಸಿ ಆರೋಗ್ಯ ತಪಾಸಣೆ ಮಾಡಿಸಿಕೊಂಡು ಆರೋಗ್ಯವನ್ನು ಸುಸ್ಥಿತಿಯಲ್ಲಿಟ್ಟುಕೊಳ್ಳಬಹುದಾಗಿದೆ. ಮನೆ ಬೀಳುವತನಕ ಕಾಯುವುದಕ್ಕಿಂತ, ಸುರಿಯುವ ಹಂತದಲ್ಲಿ ಮನೆ ದುರಸ್ತಿ ಮಾಡಿಸುವಂತೆ ನಾವು ಕೂಡ ನಿಯಮಿತವಾಗಿ ಆರೋಗ್ಯ ತಪಾಸಣೆಗೊಳಪಡಿಸುವ ಮೂಲಕ ಸೈಲೆಂಟ್‌ ಕಿಲ್ಲರ್‌ ರೋಗಗಳಿಂದ ಎಚ್ಚರದಿಂದಿರಬೇಕು ಎಂದು ವೈದ್ಯರು ತಿಳಿಸಿದರು. ಹಾರ್ಟ್‌ ಸೇಫ್‌ಗೆ ನಡಿಗೆ ನಮಗಾಗಿ 24 ಗಂಟೆ ಕಾಲ ಬಡಿದುಕೊಳ್ಳುವ ಹೃದಯದ ರಕ್ಷಣೆಗಾಗಿ ಪ್ರತಿಯೊಬ್ಬರೂ ನಿಯಮಿತ ವಾಯುವಿಹಾರ, ಜಾಗಿಂಗ್‌, ಸ್ವಿಮ್ಮಿಂಗ್‌, ಸೂರ್ಯ ನಮಸ್ಕಾರದಂಥ ಶಾರೀರಿಕ ಚಟುವಟಿಕೆ ಕೈಗೊಳ್ಳಬೇಕು. ದಿನವೊಂದಕ್ಕೆ ಕನಿಷ್ಠ 40 ನಿಮಿಷ ದೈಹಿಕ ಕಸರತ್ತಿಗೆ ಮೀಸಲಿಡಬೇಕು. ಒಂದು ದಿನ ವಾಕಿಂಗ್‌, ಜಾಗಿಂಗ್‌, ವ್ಯಾಯಾಮ ಮಾಡಿದೆ ಎಂದು 6 ದಿನ ಸುಮ್ಮನೆ ಕುಳಿತರೆ ಆಗದು. ಇವೆಲ್ಲ ನಿತ್ಯದ ದಿನಚರಿಯಲ್ಲೊಂದಾಗಬೇಕು. ಹಾಗಾದಾಗ ಮಾತ್ರ ಅಮೂಲ್ಯ ಜೀವವನ್ನು ಉಳಿಸಿಕೊಳ್ಳುವುದರ ಜೊತೆಗೆ ದೀರ್ಘಾಯುಷಿಗಳಾಗಿ ಬಾಳಬಹುದಾಗಿದೆ ಎಂದರು.
from India & World News in Kannada | VK Polls https://ift.tt/3ARtMgJ
