ಅಬು ಧಾಬಿ: ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯ 42ನೇ ಪಂದ್ಯದಲ್ಲಿ ವಿರುದ್ಧ ಸೋಲು ಅನುಭವಿಸಿದ ಬಳಿಕ ಪ್ರತಿಕ್ರಿಯಿಸಿದ ಪಂಜಾಬ್‌ ಕಿಂಗ್ಸ್ ನಾಯಕ ಒತ್ತಡ ನಿಭಾಯಿಸುವ ತಂಡದ ಅಸಮರ್ಥತತೆಯ ಬಗ್ಗೆ ಬೇಸರ ವ್ಯಕ್ತಪಡಿಸಿದ್ದಾರೆ. ಮಂಗಳವಾರ ಇಲ್ಲಿನ ಶೇಖ್‌ ಜಾಯೆದ್ ಕ್ರೀಡಾಂಗಣದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ್ದ ಪಂಜಾಬ್‌ ಕಿಂಗ್ಸ್ ತಂಡ ತನ್ನ ಪಾಲಿನ 20 ಓವರ್‌ಗಳಿಗೆ 6 ವಿಕೆಟ್‌ ನಷ್ಟಕ್ಕೆ 135 ರನ್‌ ಕಲೆ ಹಾಕಿತ್ತು ಹಾಗೂ ಹಾಲಿ ಚಾಂಪಿಯನ್ಸ್ ಮುಂಬೈ ಇಂಡಿಯನ್ಸ್‌ಗೆ 136 ರನ್‌ ಸಾಧಾರಣ ಗುರಿ ನೀಡುವಲ್ಲಿ ಶಕ್ತವಾಯಿತು. ಬಳಿಕ ಗುರಿ ಹಿಂಬಾಲಿಸಿದ ಮುಂಬೈ ಇಂಡಿಯನ್ಸ್ ತಂಡ ಸೌರಭ್‌ ತಿವಾರಿ(45) ಹಾಗೂ ಹಾರ್ದಿಕ್‌ ಪಾಂಡ್ಯ(40) ಅವರ ಜವಾಬ್ದಾರಿಯುತ ಬ್ಯಾಟಿಂಗ್‌ ನೆರವಿನಿಂದ 6 ವಿಕೆಟ್‌ ಗೆಲುವು ಪಡೆಯಿತು ಹಾಗೂ ಯುಎಇ ಚರಣದಲ್ಲಿ ಮೊದಲ ಗೆಲುವಿನ ನಗೆ ಚೆಲ್ಲಿತು. ಈ ಗೆಲುವಿನೊಂದಿಗೆ ಮುಂಬೈ ಇಂಡಿಯನ್ಸ್ ಪಾಯಿಂಟ್ಸ್‌ ಟೇಬಲ್‌ನಲ್ಲಿ 5ನೇ ಸ್ಥಾನಕ್ಕೇರಿತು, ಆದರೆ, ಪಂಜಾಬ್‌ 6ನೇ ಸ್ಥಾನದಲ್ಲಿಯೇ ಉಳಿಯಿತು. ಪಂದ್ಯದ ಬಳಿಕ ಮಾತನಾಡಿದ ಕೆ.ಎಲ್ ರಾಹುಲ್‌, "ನಾವು ಒತ್ತಡ ನಿಭಾಯಿಸುವಲ್ಲಿ ವಿಫಲರಾಗಿದ್ದೇವೆ. ಒಂದು ತಂಡವಾಗಿ ನಾವೆಲ್ಲರು ಆಡಿದಾಗ ಹೆಚ್ಚಿನದನ್ನು ಕಲಿಯುತ್ತೇವೆ ಹಾಗೂ ಒತ್ತಡಕ್ಕೆ ಹೊಂದಿಕೊಳ್ಳುತ್ತೇವೆ. ಅಂದಹಾಗೆ ನಮಗೆ ಸಕಾರಾತ್ಮಕ ಮನೋಭಾವದ ಅಗತ್ಯವಿದೆ. ನಮಗೆ ಇನ್ನೂ ಮೂರು ಪಂದ್ಯಗಳಿದ್ದು, ಪಾಯಿಂಟ್ಸ್‌ ಟೇಬಲ್‌ ನೋಡಲು ತುಂಬಾ ಆಸಕ್ತದಾಯಕವಾಗಿದೆ. ಎಲ್ಲಾ ತಂಡಗಳಿಗೂ ಇನ್ನೂ ಚಾನ್ಸ್ ಇದೆ, ಹಾಗಾಗಿ, ನಾವು ಏಕಕಾಲದಲ್ಲಿ ಒಂದು ಪಂದ್ಯದ ಕಡೆ ಗಮನಹರಿಸುತ್ತೇವೆ," ಎಂದು ಹೇಳಿದರು. "ಪಂದ್ಯದ ಫಲಿತಾಂಶದ ಬಗ್ಗೆ ನಾವು ತಲೆ ಕೆಡಿಸಿಕೊಳ್ಳಬಾರದು, ಏಕೆಂದರೆ ಗೆಲುವು ಹಾಗೂ ಸೋಲು ನಮ್ಮ ಕೈಯಲ್ಲಿಲ್ಲ. ಹಾಗಾಗಿ ಮೈದಾನದಲ್ಲಿ ಪಂದ್ಯವನ್ನು ಆನಂದಿಸಬೇಕು ಹಾಗೂ ನಮ್ಮ ಕೈಯಿಂದ ಸಾಧ್ಯವಾದಷ್ಟು ಪ್ರಯತ್ನ ಹಾಕಬೇಕು. ಯುಎಇ ಪಂದ್ಯಗಳಲ್ಲಿ ನಾವು ಉತ್ತಮ ಪೈಪೋಟಿ ನೀಡಿದ್ದೇವೆ ಹಾಗೂ ಇದನ್ನೇ ನಾವು ಇನ್ನಷ್ಟು ಬೆಳೆಸುತ್ತೇವೆ. ನಮ್ಮ ಕಡೆ ಸ್ವಲ್ಪ ಅದೃಷ್ಟ ಬಂದರೆ, ಖಂಡಿತಾ ಸಂಗತಿಗಳು ನಮ್ಮ ಪರ ನಿಲ್ಲುತ್ತವೆ," ಎಂದು ಪೋಸ್ಟ್‌ ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ಕೆ.ಎಲ್ ತಿಳಿಸಿದರು. ನಾವು 170 ರನ್‌ ಕಲೆ ಹಾಕಬೇಕಿತ್ತು: ರಾಹುಲ್‌ ಪ್ರಸಕ್ತ ಟೂರ್ನಿಯ ಬಹುತೇಕ ಪಂದ್ಯಗಳಲ್ಲಿ ಬ್ಯಾಟಿಂಗ್‌ ವಿಭಾಗ ವೈಫಲ್ಯ ಅನುಭವಿಸಿದರೂ ಶಕ್ತಿಯುತವಾಗಿ ಕಮ್‌ಬ್ಯಾಕ್‌ ಮಾಡಿದ ಬೌಲರ್‌ಗಳನ್ನು ಕೆ.ಎಲ್ ರಾಹುಲ್‌ ಇದೇ ವೇಳೆ ಶ್ಲಾಘಿಸಿದರು. ಅದರಂತೆ ಮುಂಬೈ ಇಂಡಿಯನ್ಸ್‌ಗೆ 136 ರನ್‌ ಸಾಧಾರಣ ಗುರಿ ನೀಡಿದರೂ ಕೊನೆಯ ಓವರ್‌ವರೆಗೂ ಪಂದ್ಯವನ್ನು ಪಂಜಾಬ್‌ ಬೌಲರ್‌ಗಳು ತೆಗೆದುಕೊಂಡು ಹೋಗಿದ್ದರು. "ಬೌಲರ್‌ಗಳಿಂದ ಇದು ನಿಜಕ್ಕೂ ಅತ್ಯುತ್ತಮ ಹೋರಾಟ. ಈ ಪಿಚ್‌ನಲ್ಲಿ ನಾವು ಗಳಿಸಿದ್ದ 135 ರನ್‌ ಸಾಕಾಗಲಿಲ್ಲ. ನಾವು ಆಡಿದ ಈ ವಿಕೆಟ್‌ ಅತ್ಯುತ್ತಮವಾಗಿಯೇ ಇತ್ತು, ಹಾಗಾಗಿ ನಾವು 170 ರನ್‌ ಕಲೆ ಹಾಕಬೇಕಾಗಿತ್ತು. ಆದರೆ, ಚೆಂಡಿನೊಂದಿಗೆ ನಮ್ಮ ಹುಡುಗರು ತೋರಿದ ಹೋರಾಟ ನಿಜಕ್ಕೂ ಶ್ಲಾಘನೀಯ. ಮುಂದಿನ ಎರಡು ಪಂದ್ಯಗಳು ನಮ್ಮ ಪಾಲಿಗೆ ಆಸಕ್ತದಾಯಕವಾಗಿರಲಿವೆ," ಎಂದು ಹೇಳಿದರು. ಮುಂದಿನ ಶುಕ್ರವಾರ ದುಬೈ ಇಂಟರ್‌ನ್ಯಾಷನಲ್‌ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ಸೆಣಸಲಿದೆ. ಇನ್ನುಳಿದ ಮೂರೂ ಪಂದ್ಯಗಳು ಪಂಜಾಬ್‌ ಪಾಲಿಗೆ ನಿರ್ಣಾಯಕವಾಗಿವೆ. ಹಾಗಾಗಿ ಉಳಿದ ಎಲ್ಲಾ ಪಂದ್ಯಗಳಲ್ಲಿ ಗೆಲುವು ಪಡೆಯುವುದು ತುಂಬಾ ಮುಖ್ಯ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3AQomm7
