ಶಾರ್ಜಾ: ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌) ಟೂರ್ನಿಯ 41ನೇ ಪಂದ್ಯದ ಮಧ್ಯದಲ್ಲಿ ತಂಡದ ಹಿರಿಯ ಆಫ್‌ ಸ್ಪಿನ್ನರ್‌ ಅವರೊಂದಿಗೆ ನಡೆದಿದ್ದ ಮಾತಿನ ಚಕಮಕಿ ಬಗ್ಗೆ ನಾಯಕ ಪ್ರತಿಕ್ರಿಯಿಸಿದ್ದಾರೆ. ಇಲ್ಲಿನ ಶಾರ್ಜಾ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದಿದ್ದ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ತನ್ನ ಪಾಲಿನ 20 ಓವರ್‌ಗಳಿಗೆ 9 ವಿಕೆಟ್‌ ನಷ್ಟಕ್ಕೆ 127 ರನ್‌ಗಳಿಗೆ ಸೀಮಿತವಾಗಿತ್ತು. ಬಳಿಕ ಸಾಧಾರಣ ಗುರಿ ಹಿಂಬಾಲಿಸಿದ್ದ ಕೋಲ್ಕತಾ ನೈಟ್‌ ರೈಡರ್ಸ್ ತಂಡ 18.2 ಓವರ್‌ಗಳಿಗೆ 7 ವಿಕೆಟ್‌ ನಷ್ಟಕ್ಕೆ 130 ರನ್‌ ಗಳಿಸಿ ಗೆಲುವಿನ ದಡ ಸೇರಿತು. ಆದರೆ, ಡೆಲ್ಲಿ ಕ್ಯಾಪಿಟಲ್ಸ್ ಇನಿಂಗ್ಸ್‌ನ 20ನೇ ಓವರ್‌ ಮೊದಲನೇ ಎಸೆತದಲ್ಲಿ ಆರ್‌ ಅಶ್ವಿನ್, ಟಿಮ್‌ ಸೌಥಿ ಎಸೆತದಲ್ಲಿ ನಿತೀಶ್‌ ರಾಣಾಗೆ ಸುಲಭ ಕ್ಯಾಚ್‌ ನೀಡಿದ್ದರು. ಈ ವೇಳೆ ಅಶ್ವಿನ್, ಸೌಥಿ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ನಂತರ ಐಯಾನ್‌ ಮಾರ್ಗನ್‌ ಪಿಚ್ ಬಳಿ ಬಂದು ಅಶ್ವಿನ್‌ಗೆ ತಿರುಗೇಟು ನೀಡಿದರು. ಈ ವೇಳೆ ಅಶ್ವಿನ್ ಹಾಗೂ ಮಾರ್ಗನ್‌ ನಡುವೆ ಮಾತಿನ ಚಕಮಕಿ ನಡೆಯಿತು. ನಂತರ ದಿನೇಶ್‌ ಕಾರ್ತಿಕ್‌ ಮಧ್ಯ ಪ್ರವೇಶಿಸಿ ಆರ್‌ ಅಶ್ವಿನ್ ಅವರನ್ನು ಸಮಾಧಾನ ಪಡಿಸಿ ಪರಿಸ್ಥಿತಿಯನ್ನು ಸರಿದೂಗಿಸಿದ್ದರು. ಇದಾದ ಬಳಿಕ ಕೆಕೆಆರ್‌ ಇನಿಂಗ್ಸ್‌ನಲ್ಲಿ ನಾಯಕ ಐಯಾನ್‌ ಮಾರ್ಗನ್‌ ಅವರನ್ನು ಆರ್‌ ಅಶ್ವಿನ್ ಶೂನ್ಯಕ್ಕೆ ಔಟ್‌ ಮಾಡಿ ಸಂಭ್ರಮಿಸಿದ್ದರು. ಆದರೂ, ನಿತೀಶ್‌ ರಾಣಾ ಹಾಗೂ ಸುನೀಲ್‌ ನರೇನ್‌ ಅವರ ಆಲ್‌ರೌಂಡ್‌ ಆಟದ ನೆರವಿನಿಂದ ಕೆಕೆಆರ್‌ ಮೂರು ವಿಕೆಟ್‌ಗಳಿಂದ ಗೆದ್ದು ಸಂಭ್ರಮಿಸಿತ್ತು. ಪಂದ್ಯದ ಬಳಿಕ ಪೋಸ್ಟ್ ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ಈ ಘಟನೆ ಬಗ್ಗೆ ಕೆಕೆಆರ್‌ ನಾಯಕ ಐಯಾನ್‌ ಮಾರ್ಗನ್‌ಗೆ ಇಯಾನ್‌ ಬಿಷಪ್‌ ಕೇಳಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಕೆಕೆಆರ್‌ ನಾಯಕ, ಎರಡೂ ತಂಡಗಳಿಂದ ಕಠಿಣ ಹೋರಾಟ ನಡೆಯುತ್ತಿತ್ತು. ಈ ಹಿನ್ನೆಲೆಯಲ್ಲಿ ಯಾವುದೇ ಸನ್ನಿವೇಶದಲ್ಲಿ ಇಂತಹ ಘಟನೆಗಳು ನಡೆಯಬಹುದು ಎಂದು ಹೇಳಿದ್ದಾರೆ. "ಪಂದ್ಯದಲ್ಲಿ ಎರಡೂ ತಂಡಗಳಿಂದ ಕಠಿಣ ಪೈಪೋಟಿ ನಡೆಯುತ್ತಿತ್ತು. ಬಿಸಿ ದಿನಗಳಲ್ಲಿ ಸಂಗತಿಗಳು ಕುದಿಯಬಹುದು. ಇದರ ನಡುವೆ ಇಂತಹ ಘಟನೆಗಳು ನಡೆಯುವುದು ಸಾಮಾನ್ಯ. ಅದೃಷ್ಟವಶಾತ್‌ ಇದು ನಡೆಯಲಿಲ್ಲ. ಆದರೆ, ನಾವೆಲ್ಲರೂ ಕ್ರೀಡಾ ಸ್ಪೂರ್ತಿಯೊಂದಿಗೆ ಆಡಿದ್ದೇವೆ," ಎಂದು ಮಾರ್ಗನ್‌ ಸ್ಪಷ್ಟಪಡಿಸಿದ್ದಾರೆ. "ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದಲ್ಲಿ ಕಠಿಣ ಸ್ಪರ್ಧೆ ಏರ್ಪಟ್ಟಿತ್ತು. ಪಂದ್ಯದ ಗೆಲುವಿನ ಶ್ರೇಯ ಹೆಡ್‌ ಕೋಚ್ ಬ್ರೆಂಡನ್‌ ಮೆಕಲಮ್‌ಗೆ ಸಲ್ಲಬೇಕು. ಅವರಲ್ಲಿನ ಕಾರ್ಯ ಪ್ರವೃತ್ತಿ, ಸಕಾರಾತ್ಮಕ ಮನೋಭಾವ ಎಲ್ಲವೂ ಆಟಗಾರರಿಗೆ ಸ್ಪೂರ್ತಿ ನೀಡಿದೆ," ಎಂದು ಮಾರ್ಗನ್‌ ತನ್ನ ಹೆಡ್‌ಕೋಚ್‌ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು. ಈ ಪಂದ್ಯದ ಗೆಲುವಿನೊಂದಿಗೆ ಕೋಲ್ಕತಾ ನೈಟ್‌ ರೈಡರ್ಸ್ ತಂಡ 10 ಅಂಕಗಳೊಂದಿಗೆ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ನಾಲ್ಕನೇ ಸ್ಥಾನದಲ್ಲಿದೆ. ಆದರೆ, ಡೆಲ್ಲಿ ಕ್ಯಾಪಿಟಲ್ಸ್ ಸೋಲಿನ ಹೊರತಾಗಿಯೂ 16 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿಯೇ ಉಳಿದಿದೆ. ಮುಂದಿನ ಮೂರು ಪಂದ್ಯಗಳು ಕೆಕೆಆರ್‌ ಪಾಲಿಗೆ ಅತ್ಯಂತ ನಿರ್ಣಾಯಕವಾಗಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2XZqjxP
