ವಿಕ ವಿಶೇಷ (): ಜಿಲ್ಲೆ ಭಾಲ್ಕಿ ತಾಲೂಕಿನಲ್ಲಿ ವರುಣನ ಆರ್ಭಟ ಮುಂದುವರೆದಿದೆ. ಸೆಪ್ಟೆಂಬರ್‌ನಲ್ಲಿ ವಾಡಿಕೆಗಿಂತ ಹೆಚ್ಚು ಮಳೆ ಸುರಿದಿದ್ದು, ಭಾರಿ ಅವಾಂತರ ಸೃಷ್ಟಿಸಿದೆ. ಸೆಪ್ಟೆಂಬರ್ 1 ರಿಂದ 25 ರವರೆಗೆ ವಾಡಿಕೆಯಂತೆ 151 ಮಿ.ಮೀ. ಮಳೆ ಆಗಬೇಕಿತ್ತು. ಆದರೆ, ದಾಖಲೆ ರೀತಿಯಲ್ಲಿ 233 ಮಿ. ಮೀ. ಮಳೆ ಆಗಿದ್ದು, ಭಾರಿ ಪ್ರಮಾಣದಲ್ಲಿ ಬೆಳೆ ಹಾನಿಗೆ ಕಾರಣವಾಗಿದೆ. ಈ ಹಿಂದೆ ಆಗಸ್ಟ್‌ ಕೊನೆಯ ಮತ್ತು ಸೆಪ್ಟೆಂಬರ್ ಮೊದಲ ವಾರದಲ್ಲಿ ಸುರಿದ ಭಾರಿ ಮಳೆಗೆ ಸಾಕಷ್ಟು ಪ್ರಮಾಣದಲ್ಲಿ ಸಂಭವಿಸಿತು. ಹಲವು ಕಡೆಗಳಲ್ಲಿ ಸೇತುವೆ ಕೊಚ್ಚಿ ಹೋಗಿದ್ದವು. ಮನೆ ಕುಸಿತ ಕಂಡು ಬಡ ಜನರು ಸಂಕಷ್ಟ ಅನುಭವಿಸಿದ್ದರು. ಸೆಪ್ಟಂಬರ್‌ ಮಧ್ಯದಲ್ಲಿ ಒಂದೆರಡು ವಾರ ಬಿಡುವು ನೀಡಿದ್ದ ಮಳೆರಾಯ ಮತ್ತೆ ಆವರಿಸಿದ್ದು, ಜನರು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಹೆಚ್ಚು ಕಮ್ಮಿ ಮತ್ತೆ ಒಂದು ವಾರದಿಂದ ಮಳೆ ಸುರಿಯುತ್ತಿದ್ದು, ಬಹುತೇಕ ಹೊಲಗಳು ಕೆರೆ ಸ್ವರೂಪ ಪಡೆದುಕೊಂಡಿವೆ. ಕಟಾವಿಗೆ ಬಂದಿದ್ದ ಸೋಯಾ ಅವರೆ, ಉದ್ದು ಮತ್ತು ತೊಗರಿ ನೀರಿನಲ್ಲಿ ಮುಳಗಡೆ ಕಂಡಿದ್ದು, ರೈತರ ಮೊಗದಲ್ಲಿ ಆತಂಕ ಮನೆ ಮಾಡಿದೆ. ಇದೀಗ ಹೊಲಗಳಲ್ಲಿ ನಿಂತಿರುವ ಮಳೆ ನೀರು ಹೊರ ಹಾಕಿ ಬೆಳೆ ಉಳಿಸಿಕೊಳ್ಳುವ ಪ್ರಯತ್ನದಲ್ಲಿ ರೈತರು ತಲ್ಲೀನರಾಗಿದ್ದಾರೆ. ಇದರ ಜತೆಗೆ ತೋಟಗಾರಿಕೆಯ ತರಕಾರಿ, ಪಪ್ಪಾಯಿ, ಬಾಳೆ ಸೇರಿ ಮತ್ತಿತರ ಬೆಳೆಗಳು ನೀರು ಪಾಲಾಗಿದ್ದು ರೈತರಲ್ಲಿ ಸಂಕಷ್ಟ ತಂದೊಡ್ಡಿದೆ. ಉಕ್ಕಿ ಹರಿಯುತ್ತಿದೆ ದಾಡಗಿ ಬ್ಯಾರೇಜ್: ತಾಲೂಕಿನಲ್ಲಿ ವ್ಯಾಪಕ ಮಳೆ ಸುರಿಯುತ್ತಿರುವ ಹಿನ್ನೆಲೆಯಲ್ಲಿ ದಾಡಗಿ ಸಮೀಪ ಕಾರಂಜಾ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ಬ್ಯಾರೇಜ್‌ನಿಂದ ನೀರು ಉಕ್ಕಿ ಹರಿಯುತ್ತದೆ. ಬ್ಯಾರೇಜ್ ದಡದ ಹೊಲಗಳಲ್ಲಿ ಬೆಳೆದು ನಿಂತಿದ್ದ ಬೆಳೆಗಳು ಕೊಚ್ಚಿ ಹೋಗಿವೆ. ಹಳ್ಳ ಕೊಳ್ಳಗಳು ತುಂಬಿ ಹರಿಯುತ್ತಿವೆ. ಕೆರೆಗಳಿಗೆ ಒಳ ಹರಿವು ಹೆಚ್ಚಾಗುತ್ತಿದೆ. ವಾರದಲ್ಲೇ 110 ಮಿ. ಮೀ. ಮಳೆ: ತಾಲೂಕಿನಲ್ಲಿ ವಾರದಲ್ಲಿ ವಾಡಿಕೆಯಂತೆ 42 ಮಿ. ಮೀ. ಮಳೆ ಆಗಬೇಕಿತ್ತು. ಆದರೇ ಸೆಪ್ಟೆಂಬರ್ 19 ರಿಂದ 25 ರವರಗೆ ದಾಖಲೆ ರೀತಿಯಲ್ಲಿ 110 ಮಿ. ಮೀ. ಮಳೆ ಆಗಿದೆ. ಅತಿ ಹೆಚ್ಚು ನಿಟ್ಟೂರು (ಬಿ) ಹೋಬಳಿಯಲ್ಲಿ 194 ಮಿ. ಮೀ. ಮಳೆ ಆಗಿದೆ. ಉಳಿದಂತೆ ಲಖಣಗಾಂವ 157, ಭಾಲ್ಕಿ 96, ಖಟಕ್‌ ಚಿಂಚೋಳಿ 75 ಮತ್ತು ಸಾಯಿಗಾಂವ ಹೋಬಳಿಯಲ್ಲಿ 70 ಮಿ. ಮೀ. ಮಳೆ ಸುರಿದಿದೆ. 'ಈಗಾಗಲೇ ಮೊದಲ ಹಂತದ ಪ್ರಾಥಮಿಕ ಹಂತದ ಸಮೀಕ್ಷೆಯಲ್ಲಿ ಅಂದಾಜು 5 ಸಾವಿರ ಹೆಕ್ಟೇರ್‌ಗೂ ಹೆಚ್ಚು ಬೆಳೆ ಹಾನಿ, ಹಲವು ಕಡೆಗಳಲ್ಲಿ ಆಸ್ತಿ ಪಾಸ್ತಿ ಹಾನಿಗೀಡಾಗಿವೆ. ರಸ್ತೆ, ಸೇತುವೆಗಳು ಕೊಚ್ಚಿ ಹೋಗಿವೆ. ಮತ್ತೊಮ್ಮೆ ಸಮಗ್ರವಾಗಿ ಬೆಳೆ ಹಾನಿ ಸಮೀಕ್ಷೆ ನಡೆಸಿ ತಕ್ಷಣ ವರದಿ ಸಲ್ಲಿಸುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದೇನೆ' ಎಂದು ಭಾಲ್ಕಿ ಶಾಸಕರಾದ ಈಶ್ವರ ಖಂಡ್ರೆ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/2Y4089P
