ಹೊಸದಿಲ್ಲಿ: ಪ್ರಸ್ತುತ ಸಾಗುತ್ತಿರುವ ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯ ಕೊನೆಯ ಎರಡು ಲೀಗ್‌ ಪಂದ್ಯಗಳು ಅಕ್ಟೋಬರ್ 8 ರಂದು ಏಕಕಾಲದಲ್ಲಿ ನಡೆಯಲಿವೆ. ಆ ಮೂಲಕ ಐಪಿಎಲ್‌ ಟೂರ್ನಿಯ ಇತಿಹಾಸದಲ್ಲಿಯೇ ಎರಡು ಪಂದ್ಯಗಳು ಏಕಕಾಲದಲ್ಲಿ ನಡೆಯುವುದು ಇದೇ ಮೊದಲು. ಅಂದಹಾಗೆ ಭಾರತದಲ್ಲಿ ನಡೆದಿದ್ದ 2021ರ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಮೊದಲ ಅವಧಿಯ ಒಂದು ದಿನ ಮಧ್ಯಾಹ್ನ ಹಾಗೂ ಸಂಜೆ ಎರಡು ಪಂದ್ಯಗಳನ್ನು ನಿಗದಿಪಡಿಸಲಾಗಿತ್ತು. ಆದರೆ, ಬಯೋ-ಬಬಲ್ ಒಳಗಡೆ ಕೋವಿಡ್‌-19 ಪಾಸಿಟಿವ್‌ ಬಂದ ಹಿನ್ನೆಲೆಯಲ್ಲಿ ಆ ಎರಡೂ ಪಂದ್ಯಗಳನ್ನು ಮುಂದೂಡಲಾಗಿತ್ತು. ಹಾಗಾಗಿ, ಈ ಎರಡೂ ಪಂದ್ಯಗಳನ್ನು ಅಕ್ಟೋಬರ್ 8 ರಂದು ರಾತ್ರಿ 07:30ಕ್ಕೆ ಅಬು ಧಾಬಿ(ಮುಂಬೈ vs ಹೈದರಾಬಾದ್‌) ಹಾಗೂ ದುಬೈ(ಆರ್‌ಸಿಬಿ vs ಡಿಸಿ) ನಲ್ಲಿ ಆಯೋಜಿಸಲಾಗಿದೆ. "ವಿವೋ ಐಪಿಎಲ್‌ ಟೂರ್ನಿಯ ಕೊನೆಯ ಎರಡು ಲೀಗ್‌ ಪಂದ್ಯಗಳು ಏಕಕಾಲದಲ್ಲಿ ನಡೆಯಲಿವೆ. ಪ್ರಸಕ್ತ ಆವೃತ್ತಿಯ ಲೀಗ್‌ ಹಂತದ ಕೊನೆಯ ದಿನ ಮಧ್ಯಾಹ್ನಕ್ಕೆ ಒಂದು ಪಂದ್ಯ ಹಾಗೂ ಸಂಜೆಗೆ ಒಂದು ಪಂದ್ಯ ನಿಗದಿಪಡಿಸಲಾಗಿತ್ತು. ಆದರೆ, ಕಾರಣಾಂತರಗಳಿಂದ ಎರಡೂ ಪಂದ್ಯಗಳನ್ನು ರಾತ್ರಿ 07:30ಕ್ಕೆ ಏಕಕಾಲದಲ್ಲಿ ಆಯೋಜಿಸಲಾಗುತ್ತಿದೆ," ಎಂದು ಬಿಸಿಸಿಐ ತನ್ನ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದೆ. ಕೊನೆಯ ಎರಡು ಲೀಗ್‌ ಪಂದ್ಯಗಳು ಏಕಕಾಲದಲ್ಲಿ ನಡೆಯಲು ಕಾರಣವೇನು? ಸ್ಪರ್ಧೆಯ ತೀವ್ರತೆಯನ್ನು ಗಮನಿಸುತ್ತಿದ್ದರೆ, ಕೊನೆಯ ಲೀಗ್‌ ಪಂದ್ಯದವರೆಗೂ ಟೂರ್ನಿಯ ಪ್ಲೇ-ಆಫ್‌ ಸ್ಥಾನಗಳನ್ನು ನಿರ್ಧರಿಸಲು ಸಾಧ್ಯವಿಲ್ಲ. ಈ ಹಿನ್ನೆಲೆಯಲ್ಲಿ ಮಧ್ಯಾಹ್ನದ ಪಂದ್ಯದ ಫಲಿತಾಂಶವನ್ನು ಆಧರಿಸಿ ಸಂಜೆಯ ಪಂದ್ಯ ಆಡುವ ತಂಡಗಳಿಗೆ ಲಾಭವಾಗಬಾರದು ಎಂಬ ಉದ್ದೇಶದಿಂದ ಎರಡೂ ಹಣಾಹಣಿಗಳನ್ನು ಏಕಕಾಲದಲ್ಲಿ ಆಯೋಜಿಸಲಾಗುತ್ತಿದೆ. ಅಲ್ಲದೆ, ಇದರಿಂದ ಯಾವುದೇ ತಂಡಕ್ಕೆ ಅನ್ಯಾಯವಾಗದಂತೆ ನೋಡಿಕೊಳ್ಳುವುದು ಕೂಡ ಇದರ ಮುಖ್ಯ ಉದ್ದೇಶ. ಅಂದಹಾಗೆ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಅಗ್ರ ಸ್ಥಾನದಲ್ಲಿರುವ ಚೆನ್ನೈ ಸೂಪರ್‌ ಕಿಂಗ್ಸ್ ಹಾಗೂ ಎರಡನೇ ಸ್ಥಾನದಲ್ಲಿರುವ ತಂಡಗಳು ತಲಾ 16 ಅಂಕಗಳನ್ನು ಕಲೆಹಾಕಿದ್ದರೂ ಇನ್ನೂ ಪ್ಲೇಆಫ್‌ಗೆ ಅರ್ಹತೆ ಪಡೆದಿಲ್ಲ. ಈ ಹಿನ್ನೆಲೆಯಲ್ಲಿ ಈ ಬಾರಿಯ ಟೂರ್ನಿಯ ಸ್ಪರ್ಧೆ ತೀವ್ರತೆಯಿಂದ ಕೂಡಿದೆ. ಸಿಎಸ್‌ಕೆ ಹಾಗೂ ಡಿಸಿ ಇನ್ನೊಂದು ಪಂದ್ಯದಲ್ಲಿ ಗದ್ದರೆ ಪ್ಲೇಆಫ್ ಟಿಕೆಟ್‌ ಪಡೆದುಕೊಳ್ಳಲಿವೆ. ಆದರೆ, ಮೂರನೇ ಸ್ಥಾನದಲ್ಲಿರುವ ಹಾಗೂ ಕೋಲ್ಕತಾ ನೈಟ್‌ ರೈಡರ್ಸ್ ತಂಡಗಳ ನಡುವೆ ಪ್ಲೇಆಫ್‌ಗೆ ತೀವ್ರ ಪೈಪೋಟಿ ನಡೆಯಬಹುದು. ಇವೆರಡೂ ತಂಡಗಳ ನಡುವೆ ನೆಟ್‌ ರನ್‌ರೇಟ್‌ ಪ್ರಧಾನ ಪಾತ್ರವಹಿಸಬಹುದು. ಆದರೆ, ಲೀಗ್‌ನ ಕೊನೆಯ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ ಹಾಗೂ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ನಡುವಿನ ಪಂದ್ಯ ಆರ್‌ಸಿಬಿಗೆ ಲಾಭದಾಯಕವಾಗಲಿದೆ. ಈ ಪಂದ್ಯದಲ್ಲಿ ಆರ್‌ಸಿಬಿ ಸೋಲು ಅನುಭವಿಸಿದರೂ 18ನೇ ಓವರ್‌ ಒಳಗಾಗಿ ಡಿಸಿ ತಂಡವನ್ನು ಚೇಸ್‌ ಮಾಡಲು ಬಿಡಬಾರದಷ್ಟೆ. ಹಾಲಿ ಚಾಂಪಿಯನ್ಸ್ ವಿರುದ್ಧ ಕಳೆದ ಪಂದ್ಯದಲ್ಲಿ 54 ರನ್‌ಗಳಿಂದ ಭರ್ಜರಿ ಗೆಲುವು ಪಡೆದಿದ್ದ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡ ಬುಧವಾರ ರಾಜಸ್ಥಾನ್‌ ರಾಯಲ್ಸ್ ವಿರುದ್ಧ ಸೆಣಸಲಿದೆ. ಅಂದಹಾಗೆ ಮುಂದಿನ ಎರಡು ಪಂದ್ಯಗಳು ಆರ್‌ಸಿಬಿ ಪಾಲಿಗೆ ಅತ್ಯಂತ ನಿರ್ಣಾಯಕವಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ogKvXb
