ಭೀಮರಾವ್‌ ಬುರಾನಪುರ : ನಿರಂತರ ಸುರಿಯುತ್ತಿರುವ ಮಳೆಯಿಂದಾಗಿ ಜಿಲ್ಲೆಯಲ್ಲಿ ಪ್ರಸಕ್ತ ಮುಂಗಾರಿಗೆ ಬಿತ್ತನೆ ಮಾಡಲಾದ ಬಹುತೇಕ ಬೆಳೆಗಳು ನೀರು ಪಾಲಾಗಿವೆ. ಈವರೆಗೆ ಜಿಲ್ಲೆಯಾದ್ಯಂತ 1,03,092 ಹೆಕ್ಟೇರ್‌ ಪ್ರದೇಶದಲ್ಲಿನ ಸಂಭವಿಸಿದೆ. ಹೀಗಾಗಿ, ಅನ್ನದಾತ ಕಷ್ಟಪಟ್ಟು ಬೆಳೆದಿದ್ದ ಹೆಸರು, ಉದ್ದು, ಸೋಯಾಬಿನ್‌, ತೊಗರಿ ಮತ್ತಿತರೆ ಬೆಳೆಗಳು ಕೈಗೆ ಬಂದರೂ ಬಾಯಿಗೆ ಬಾರದಂತಾಗಿದೆ. ಕೋಟ್ಯಂತರ ರೂಪಾಯಿ ಮೌಲ್ಯದ ಬೆಳೆಗಳು ನೀರು ಪಾಲಾಗಿದ್ದರಿಂದ ಜಿಲ್ಲೆಯ ರೈತ ಮತ್ತೊಮ್ಮೆ ಸಂಕಷ್ಟಕ್ಕೆ ಸಿಲುಕಿದ್ದಾನೆ. ಜುಲೈ ತಿಂಗಳಲ್ಲಿ ಸುರಿದ ಮಳೆಗೆ 989.16 ಹೆಕ್ಟೇರ್‌, ಆಗಸ್ಟ್‌ ತಿಂಗಳಲ್ಲಿ ಬಿದ್ದ ಮಳೆಗೆ 1728.92 ಹೆಕ್ಟೇರ್‌, ಸೆಪ್ಟೆಂಬರ್ 15ರವರೆಗೆ ಸುರಿದ ಮಳೆಗೆ 55,465.72 ಹೆಕ್ಟೇರ್‌ ಹಾಗೂ ಸೆಪ್ಟೆಂಬರ್ 21ರಿಂದ ಸೆಪ್ಟೆಂಬರ್ 27ರವರೆಗೆ ಸುರಿದ ಭಾರಿ ಮಳೆಗೆ 44,909 ಹೆಕ್ಟೇರ್‌ ಸೇರಿ ಒಟ್ಟು 1,03,092 ಹೆಕ್ಟೇರ್‌ ಪ್ರದೇಶದಲ್ಲಿನ ಬೆಳೆ ನೀರು ಪಾಲಾಗಿದೆ. ಏನೇ ಆದರೂ ರೈತರ ಕೈ ಹಿಡಿಯುತ್ತದೆ ಎನ್ನುವ ಭರವಸೆ ಹುಟ್ಟಿಸಿರುವ ಹಾಗೂ ರಾಜ್ಯದಲ್ಲೇ ಅತೀ ಹೆಚ್ಚು ಬೀದರ್‌ನಲ್ಲೇ ಬಿತ್ತನೆ ಮಾಡಲಾಗಿರುವ ಸೋಯಾ ಅವರೆ (ಸೋಯಾಬಿನ್‌) ಬೆಳೆಯಲ್ಲಿ ಭಾರಿ ಪ್ರಮಾಣದ ನೀರು ನಿಂತಿರುವುದರಿಂದ ಗುಣಮಟ್ಟ ಹಾಳಾಗಿ, ಇಳುವರಿ ಕುಂಠಿತವಾಗುವುದಲ್ಲದೆ, ರಾಶಿ ಮಾಡಲು ಆಗದಂತಹ ದುಸ್ಥಿತಿ ಎದುರಾಗಿದೆ. ಜತೆಗೆ ಹೆಸರು, ಉದ್ದು, ತೊಗರಿಯಂತಹ ಪ್ರಮುಖ ಬೆಳೆಗಳಿಗೆ ಕಂಟಕ ಎದುರಾಗಿದೆ. ಮಾರಕವಾದ ಸೆಪ್ಟೆಂಬರ್ ತಿಂಗಳು: ಸೆಪ್ಟೆಂಬರ್ 15ರವರೆಗೆ ಸುರಿದ ಮಳೆಗೆ ಬರೋಬ್ಬರಿ 55,465 ಹೆಕ್ಟೇರ್‌ ಬೆಳೆ ಹಾನಿಯಾಗಿದ್ದರೆ, ಸೆಪ್ಟೆಂಬರ್ 21ರಿಂದ 27ರ ಒಂದೇ ವಾರ ಸುರಿದ ಮಳೆಗೆ 44,909 ಹೆಕ್ಟೇರ್‌ ಪ್ರದೇಶದಲ್ಲಿನ ಬೆಳೆ ಹಾನಿಯಾಗಿದೆ. ಸೆಪ್ಟೆಂಬರ್ ಒಂದೇ ತಿಂಗಳಲ್ಲಿ ಜಿಲ್ಲೆಯಾದ್ಯಂತ ಬರೋಬ್ಬರಿ 1,00,374 ಹೆಕ್ಟೇರ್‌ ಪ್ರದೇಶದಲ್ಲಿ ಬೆಳೆಯಲಾಗಿದ್ದ ಮುಂಗಾರಿನ ಬೆಳೆ ನೀರಿಗೆ ಆಹುತಿಯಾಗಿವೆ. ಬೆಳೆಗಳಲ್ಲಿ2 ರಿಂದ ನಾಲ್ಕು ಅಡಿಯಷ್ಟು ನೀರು ಸಂಗ್ರಹವಾಗಿದ್ದು, ರಾಶಿ ಮಾಡಲಾಗದ ಸ್ಥಿತಿಯಲ್ಲಿದೆ. ಕಣ್ಣೆದುರೆ ಬೆಳೆಗಳು ಹಾಳಾಗುತ್ತಿರುವುದು ಅನ್ನದಾತರ ನೋವಿಗೆ ಕಾರಣವಾಗಿದೆ. ಬೆಳೆಯನ್ನೇ ನೆಚ್ಚಿಕೊಂಡಿದ್ದ ರೈತಾಪಿ ವಲಯ ಕಂಗಾಲಾಗಿದ್ದು, ಸುರಿಯುತ್ತಿರುವ ಮಳೆಗೆ ಹಿಡಿ ಶಾಪ ಹಾಕುತ್ತಿದ್ದಾರೆ. ಭಾಲ್ಕಿ ತಾಲ್ಲೂಕಿನಲ್ಲಿ ದಾಖಲೆ ..! ಬೀದರ್ ಜಿಲ್ಲೆ ಭಾಲ್ಕಿ ತಾಲೂಕಿನಲ್ಲಿ ವರುಣನ ಆರ್ಭಟ ಮುಂದುವರೆದಿದೆ. ಸೆಪ್ಟೆಂಬರ್‌ನಲ್ಲಿ ವಾಡಿಕೆಗಿಂತ ಹೆಚ್ಚು ಮಳೆ ಸುರಿದಿದ್ದು, ಭಾರಿ ಅವಾಂತರ ಸೃಷ್ಟಿಸಿದೆ. ಸೆಪ್ಟೆಂಬರ್ 1 ರಿಂದ 25 ರವರೆಗೆ ವಾಡಿಕೆಯಂತೆ 151 ಮಿ.ಮೀ. ಮಳೆ ಆಗಬೇಕಿತ್ತು. ಆದರೆ, ದಾಖಲೆ ರೀತಿಯಲ್ಲಿ 233 ಮಿ. ಮೀ. ಮಳೆ ಆಗಿದ್ದು, ಭಾರಿ ಪ್ರಮಾಣದಲ್ಲಿ ಬೆಳೆ ಹಾನಿಗೆ ಕಾರಣವಾಗಿದೆ. ಈ ಹಿಂದೆ ಆಗಸ್ಟ್‌ ಕೊನೆಯ ಮತ್ತು ಸೆಪ್ಟೆಂಬರ್ ಮೊದಲ ವಾರದಲ್ಲಿ ಸುರಿದ ಭಾರಿ ಮಳೆಗೆ ಸಾಕಷ್ಟು ಪ್ರಮಾಣದಲ್ಲಿ ಬೆಳೆ ಹಾನಿ ಸಂಭವಿಸಿತು. ಹಲವು ಕಡೆಗಳಲ್ಲಿ ಸೇತುವೆ ಕೊಚ್ಚಿ ಹೋಗಿದ್ದವು. ಮನೆ ಕುಸಿತ ಕಂಡು ಬಡ ಜನರು ಸಂಕಷ್ಟ ಅನುಭವಿಸಿದ್ದರು. ಸೆಪ್ಟಂಬರ್‌ ಮಧ್ಯದಲ್ಲಿ ಒಂದೆರಡು ವಾರ ಬಿಡುವು ನೀಡಿದ್ದ ಮಳೆರಾಯ ಮತ್ತೆ ಆವರಿಸಿದ್ದು, ಜನರು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಹೆಚ್ಚು ಕಮ್ಮಿ ಮತ್ತೆ ಒಂದು ವಾರದಿಂದ ಮಳೆ ಸುರಿಯುತ್ತಿದ್ದು, ಬಹುತೇಕ ಹೊಲಗಳು ಕೆರೆ ಸ್ವರೂಪ ಪಡೆದುಕೊಂಡಿವೆ.
from India & World News in Kannada | VK Polls https://ift.tt/3CWwH8z
