ಸುನಿಲ್‌ ಪೊನ್ನೇಟಿ (): ಮಡಿಕೇರಿಯಲ್ಲಿರುವ ಜಿಲ್ಲೆಯ ಪ್ರಮುಖ ಪ್ರವಾಸಿ ತಾಣ ರಾಜಾ ಸೀಟ್‌ 'ಗ್ರೇಟರ್‌ ರಾಜಾ ಸೀಟ್‌' ಆಗಿ ಬದಲಾಗುತ್ತಿದೆ. ಇಲ್ಲಿಯೇ ಇರುವ ಕೊಡಗಿನ ಪ್ರಥಮ ಸಂಗೀತ ಕಾರಂಜಿಯೂ ಆಧುನಿಕ ಕಾಲಕ್ಕೆ ಅನುಗುಣವಾಗಿ ಅಪ್‌ಡೇಟ್‌ ಆಗುತ್ತಿದೆ. ಭೇಟಿ ನೀಡುವ ಪ್ರವಾಸಿಗರು ತಮ್ಮ ಅರ್ಧ ದಿನವನ್ನು ಖುಷಿಯಿಂದ ಕಳೆಯಬಹುದಾದ ವಾತಾವರಣ ಸೃಷ್ಟಿಯಾಗುತ್ತಿದೆ. 'ಗ್ರೇಟರ್‌ ರಾಜಾ ಸೀಟ್‌' ಪರಿಕಲ್ಪನೆ ಅಡಿಯಲ್ಲಿ ರಾಜಾ ಸೀಟ್‌ ಪ್ರವಾಸಿ ತಾಣ ವಿಸ್ತರಣೆ ಆಗುತ್ತಿದೆ. ಅರ್ಧ ಎಕರೆಯಷ್ಟು ವಿಸ್ತೀರ್ಣದಲ್ಲಿದ್ದ ಉದ್ಯಾನ ವನವನ್ನು 4.5 ಎಕರೆಗೆ ಹೆಚ್ಚಿಸಲಾಗುತ್ತಿದೆ. 4.5 ಕೋಟಿ ರೂ. ವೆಚ್ಚದಲ್ಲಿ ಪ್ರವಾಸಿ ಆಕರ್ಷಣೆಯನ್ನು ಜಾಸ್ತಿ ಮಾಡಲಾಗುತ್ತಿದೆ. ಈ ಸಂಬಂಧದ ಕೆಲಸಗಳು ಭರದಿಂದ ನಡೆದಿದ್ದು, ನವೆಂಬರ್‌ನಲ್ಲಿ ಪ್ರವಾಸಿಗರ ವೀಕ್ಷಣೆಗೆ ಲಭ್ಯವಾಗಲಿದೆ. 'ಗ್ರೇಟರ್‌ ರಾಜಾ ಸೀಟ್‌' ಕಾಮಗಾರಿ ಬಹುತೇಕ ಅಂತಿಮ ಹಂತಕ್ಕೆ ಬಂದಿದೆ. ರಾಜಾ ಸೀಟ್‌ ಪಕ್ಕದ ಬೆಟ್ಟ ಕೊರೆದು ಉದ್ಯಾನ ವನ ವಿಸ್ತರಿಸಲಾಗುತ್ತಿದೆ. ಇದಕ್ಕಾಗಿ ಆರಂಭದಲ್ಲಿ ಯಂತ್ರಗಳನ್ನು ಬಳಸಿಕೊಳ್ಳಲಾಗುತ್ತಿತ್ತು. ಆದರೆ ಪರಿಸರ ಪ್ರೇಮಿಗಳಿಂದ ವಿರೋಧ ಬಂದಿದ್ದ ಹಿನ್ನೆಲೆಯಲ್ಲಿ ಈಗ ಇಲ್ಲಿ ಎಲ್ಲಾಕೆ ಲಸಕ್ಕೂ ಕಾರ್ಮಿಕರನ್ನು ಬಳಸಿಕೊಳ್ಳಲಾಗುತ್ತಿದೆ. ಕಾಮಗಾರಿ ವೇಳೆ ಪರಿಸರ ಕಾಳಜಿ ವ್ಯಕ್ತಪಡಿಸಲಾಗುತ್ತಿದ್ದು, ಭವಿಷ್ಯದಲ್ಲಿ ಭೂ ಕುಸಿತದಂತಹ ಅನಾಹುತಗಳು ಸಂಭವಿಸದಂತೆ ಮುನ್ನೆಚ್ಚರಿಕೆ ವಹಿಸಲಾಗಿದೆ. ಆಧುನಿಕ ತಾಂತ್ರಿಕತೆಯನ್ನು ಬಳಸಿಕೊಂಡು ಕಾಮಗಾರಿ ನಡೆಸಲಾಗುತ್ತಿದ್ದು, ಮಳೆ ನೀರು ಬಸಿದು ಹೋಗಲು ವ್ಯವಸ್ಥೆ ಮಾಡಲಾಗಿದೆ. ಇದರಿಂದ ಮಳೆಗಾಲದಲ್ಲಿ ಯಾವುದೇ ಸಮಸ್ಯೆ ಸಂಭವಿಸುವುದಿಲ್ಲ ಎಂದು ಅಧಿಕಾರಿಗಳು ವಿಶ್ವಾಸ ವ್ಯಕ್ತಪಡಿಸುತ್ತಾರೆ. ದಸರಾ ವೇಳೆಗೆ ಮಡಿಕೇರಿ ರಾಜಾ ಸೀಟ್‌ನ ಸಂಗೀತ ಕಾರಂಜಿ ತನ್ನ ಆಕರ್ಷಣೆ ಹೆಚ್ಚಿಸಿಕೊಳ್ಳಲಿದೆ. ಹೊಸ ಸಾಫ್ಟ್‌ವೇರ್‌, ಹೊಸ ಹಾಡುಗಳು, ನವನವೀನ ಬಣ್ಣದ ದೀಪಗಳು, ವೈವಿಧ್ಯಮಯ ವಿನ್ಯಾಸದ ಕಾರಂಜಿ ನೃತ್ಯಗಳು.. ಹೀಗೆ ಈಗಿನ ಜಮಾನಕ್ಕೆ ತಕ್ಕಂತೆ ಜಿಲ್ಲೆಯ ಪ್ರಥಮ ಸಂಗೀತ ಕಾರಂಜಿ ಸಿಂಗರಿಸಿಕೊಳ್ಳುತ್ತಿದೆ. ಇದಕ್ಕಾಗಿ ಸುಮಾರು 20 ಲಕ್ಷ ರೂ. ತೋಟಗಾರಿಕೆ ಇಲಾಖೆಯಿಂದ ವೆಚ್ಚ ಮಾಡಲಾಗುತ್ತಿದೆ. ಹೊಸದು ಏನು? - 3 ವೀಕ್ಷಣಾ ಗೋಪುರಗಳು - ವಾಕಿಂಗ್‌ ಪಾಥ್‌ - ಪ್ರವಾಸಿಗರ ವಿಶ್ರಾಂತಿಗೆ 30 ಬೆಂಚ್‌ಗಳು - ಸುರಕ್ಷತೆಗಾಗಿ ಕಬ್ಬಿಣದ ಬೇಲಿ - ಹುಲ್ಲುಹಾಸು ನಿರ್ಮಾಣ - ಹಣ್ಣಿನ ಗಿಡಗಳ ನಾಟಿ ಪುಟಾಣಿ ರೈಲು ಸಂಚಾರ ಆರಂಭವಾಗಲಿ ರಾಜಾ ಸೀಟ್‌ನ ಮತ್ತೊಂದು ಆಕರ್ಷಣೆಯಾಗಿದ್ದ ಜಿಲ್ಲೆಯ ಏಕೈಕ ರೈಲು ಹೆಗ್ಗಳಿಕೆಯ ಪುಟಾಣಿ ರೈಲು ಸಂಚಾರ ಸ್ಥಗಿತಗೊಳಿಸಿ 5 ವರ್ಷ ಕಳೆಯುತ್ತಿದ್ದರೂ ಅದನ್ನು ದುರಸ್ತಿಪಡಿಸುವ ಕೆಲಸ ಆಗಿಲ್ಲ. 2 ವರ್ಷದ ಹಿಂದೆ ನಗರಸಭೆ ವತಿಯಿಂದ ಹೊಸ ಪುಟಾಣಿ ರೈಲು ಖರೀದಿಸುವ ಪ್ರಸ್ತಾಪ ಆಗಿದ್ದರೂ ಅದಿನ್ನೂ ಕಾರ್ಯರೂಪಕ್ಕೆ ಬಂದಿಲ್ಲ. ಒಂದು ವೇಳೆ ಇಲ್ಲಿ ಪುಟಾಣಿ ರೈಲು ಸಂಚಾರ ಮರು ಆರಂಭಗೊಂಡರೆ ರಾಜಾಸೀಟ್‌ನ ಪ್ರವಾಸಿ ಆಕರ್ಷಣೆ ಮತ್ತಷ್ಟು ಹೆಚ್ಚಲಿದೆ. ಪಕ್ಕದಲ್ಲಿಯೇ ಕೂರ್ಗ್‌ ಟೂರಿಸ್ಟ್‌ ವಿಲೇಜ್‌ ಕೂಡ ಇದ್ದು, ಇದು ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸಲು ಆರಂಭಿಸಿದರೆ ರಾಜಾ ಸೀಟ್‌ ಇನ್ನೂ ಆಕರ್ಷಣೀಯವಾಗಲಿದೆ. ರಾಜಾಸೀಟ್‌ನಲ್ಲಿ ಪ್ರತಿ ವರ್ಷ ಫಲಪುಷ್ಪ ಪ್ರದರ್ಶನ ಏರ್ಪಡಿಸಿಕೊಂಡು ಬರಲಾಗುತ್ತಿತ್ತು. ಇದನ್ನು ದಸರಾ ಸಂದರ್ಭದಲ್ಲಿ ಆಯೋಜಿಸಿದರೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರನ್ನು ಸೆಳೆಯಬಹುದು ಎನ್ನುವ ಅಭಿಪ್ರಾಯಗಳಿವೆ.
from India & World News in Kannada | VK Polls https://ift.tt/3uhnSCR
