ಹರೀಶ ಎಲ್‌. ತಲಕಾಡು : ನಗರದಲ್ಲಿ ಮತ್ತೆ ಟೈಗರ್‌ ಸದ್ದು ಮಾಡಲಿದೆ. ಸಂಚಾರ ಪೊಲೀಸರ ಪರವಾಗಿ ಮತ್ತೆ ಟೈಗರ್‌ ಕಾರ್ಯಾಚರಣೆ ಹೆಸರಿನಲ್ಲಿ ಟೋಯಿಂಗ್ ವಾಹನಗಳು ರಸ್ತೆಗೆ ಇಳಿಯಲಿವೆ. ಸಂಚಾರ ನಿಯಮ ಉಲ್ಲಂಘಿಸುವ ದ್ವಿಚಕ್ರ ವಾಹನಗಳನ್ನು ಟೋಯಿಂಗ್ ವಾಹನಗಳ ಮೂಲಕ ತೆರವುಗೊಳಿಸುವ ಸಂಬಂಧ ನಡೆಯುತ್ತಿದ್ದ ಕಾರ್ಯಾಚರಣೆಯನ್ನು ಮತ್ತೆ ಆರಂಭಿಸಲು ನಗರ ಸಂಚಾರ ಪೊಲೀಸರು ನಿರ್ಧರಿಸಿದ್ದಾರೆ. ನೋ ಪಾರ್ಕಿಂಗ್‌ ಸ್ಥಳದಲ್ಲಿ ನಿಲ್ಲುವ ವಾಹನಗಳಿಗೆ ವ್ಹೀಲ್‌ ಲಾಕ್‌ ಮಾಡುವ ಮೂಲಕ ಸ್ಥಳದಲ್ಲಿಯೇ ದಂಡ ವಸೂಲಿ ಮಾಡುತಿದ್ದ ಪೊಲೀಸರು, ಈಗ ಮತ್ತೆ ಹಳೆ ಮಾರ್ಗವನ್ನೇ ಅನುಸರಿಸಲು ಮುಂದಾಗಿದ್ದಾರೆ. ಸತತ ಎರಡು ವರ್ಷಗಳ ಬಳಿಕ ಸುಗಮ ಸಂಚಾರ ವ್ಯವಸ್ಥೆ ಕಲ್ಪಿಸಲು ಮತ್ತೆ ಟೋಯಿಂಗ್ ವಾಹನಗಳನ್ನು (ಟೈಗರ್‌ ಕಾರ್ಯಾಚರಣೆ) ಬಳಕೆ ಮಾಡಲು ನಿರ್ಧರಿಸಿದ್ದಾರೆ. ಶೀಘ್ರದಲ್ಲಿಯೇ ಟೋಯಿಂಗ್ ವಾಹನ ನಗರದೆಲ್ಲೆಡೆ ಸಂಚರಿಸುವ ಮೂಲಕ ಅನಧಿಕೃತವಾಗಿ ನೋ ಪಾರ್ಕಿಂಗ್‌ ಸ್ಥಳ ಸೇರಿದಂತೆ ಸಂಚಾರ ದಟ್ಟಣೆ ಇರುವ ಪ್ರದೇಶಗಳಲ್ಲಿ ಸುಗಮ ಸಂಚಾರ ವ್ಯವಸ್ಥೆಗೆ ಅಡಚಣೆಯಾಗುವಂತೆ ನಿಲ್ಲುವ ದ್ವಿ ಚಕ್ರ ವಾಹನ ತೆರವು ಕಾರ್ಯಾಚರಣೆಯನ್ನು ಸಂಚಾರ ಪೊಲೀಸರು ಪುನಾರಂಭಿಸಲಿದ್ದಾರೆ. ಈ ಹಿಂದೆ ಟೋಯಿಂಗ್ ವಾಹನಗಳ ಕಾರ್ಯವೈಖರಿ ವಿರುದ್ಧ ವ್ಯಾಪಕ ದೂರು ಬಂದಿತ್ತು. ನೋ ಪಾರ್ಕಿಂಗ್‌ ಸ್ಥಳದಲ್ಲಿ ವಾಹನ ನಿಲ್ಲಿಸಿರುವ ಬಗ್ಗೆ ಮೈಕ್‌ನಲ್ಲಿ ಅನೌನ್ಸ್‌ ಮಾಡದೇ ವಿಡಿಯೋ ಚಿತ್ರೀಕರಣ ಮಾಡದೇ ಮತ್ತು ಸ್ಥಳದಲ್ಲಿಯೇ ದಂಡ ಪಾವತಿಸಲು ಅವಕಾಶ ನೀಡದೇ ವಾಹನಗಳನ್ನು ಟೋಯಿಂಗ್ ಮಾಡಲಾಗುತ್ತಿದೆ ಎಂದು ಆರೋಪ ಕೇಳಿ ಬಂದ ಹಿನ್ನೆಲೆಯಲ್ಲಿ ಟೋಯಿಂಗ್ ವಾಹನಗಳ ಟೈಗರ್‌ ಕಾರ್ಯಾಚರಣೆಯನ್ನು ಸ್ಥಗಿತೊಳಿಸಲಾಗಿತ್ತು. ನೋ ಪಾರ್ಕಿಂಗ್‌ ಸ್ಥಳದಲ್ಲಿ ನಿಲ್ಲುವ ದ್ವಿಚಕ್ರ ವಾಹನಗಳಿಗೆ ವ್ಹೀಲ್‌ ಲಾಕ್‌ ಮಾಡಿ, ವಾಹನ ಸವಾರರಿಂದ ದಂಡ ವಸೂಲಿ ಮಾಡಲು ಪೊಲೀಸರು ಹರಸಾಹಸ ಪಡುತ್ತಿದ್ದರು. ವಾಹನ ಸವಾರ ಬರುವವರೆಗೂ ಗಂಟೆಗಟ್ಟಲ್ಲೇ ಕಾಯಬೇಕಿತ್ತು. ಇದರಿಂದ ಪೊಲೀಸರ ಕರ್ತವ್ಯದ ಸಮಯ ಕೂಡ ವ್ಯರ್ಥವಾಗುತ್ತಿತ್ತು. ಇದಲ್ಲದೇ ನಗರದ ಪ್ರಮುಖ ರಸ್ತೆ ಮತ್ತು ವೃತ್ತಗಳಲ್ಲಿ ಸಂಚಾರಕ್ಕೆ ಅಡಚಣೆಯಾಗಿ ನಿಲ್ಲುತ್ತಿದ್ದ ವಾಹನಗಳನ್ನು ತೆರವುಗೊಳಿಸಲು ಟೋಯಿಂಗ್ ವಾಹನಗಳು ಇಲ್ಲದೇ ಸಮಸ್ಯೆಯಾಗುತ್ತಿತ್ತು. ದಂಡ ವಿಧಿಸಲು ವ್ಹೀಲ್‌ ಲಾಕ್‌ ಮಾಡಿದರೂ, ಸಕಾಲದಲ್ಲಿ ವಾಹನ ತೆರವುಗೊಳಿಸಲು ಸಾಧ್ಯವಾಗುತ್ತಿರಲಿಲ್ಲ. ಇದರಿಂದ ಸುಗಮ ಸಂಚಾರಕ್ಕೆ ಅಡಚಣೆಯಾಗುತ್ತಿತ್ತು. ಈ ಹಿನ್ನೆಲೆಯಲ್ಲಿ ಮೈಸೂರು ನಗರದಲ್ಲಿ ಮತ್ತೆ ಟೋಯಿಂಗ್ ವಾಹನಗಳನ್ನು ಬಳಕೆ ಮಾಡಲು ಸಂಚಾರ ಪೊಲೀಸರು ನಿರ್ಧರಿಸಿದ್ದಾರೆ. ದಂಡದೊಂದಿಗೆ ಶುಲ್ಕ: ಸಂಚಾರ ನಿಯಮ ಉಲ್ಲಂಘನೆ ಸಂಬಂಧ ದಂಡದ ಮೊತ್ತ ಪರಿಷ್ಕರಣೆಯಾಗಿದ್ದು, ನೋ ಪಾರ್ಕಿಂಗ್‌ನಲ್ಲಿ ನಿಲ್ಲುವ ದ್ವಿಚಕ್ರ ವಾಹನಗಳಿಗೆ ಸಾವಿರ ರೂ. ದಂಡದೊಂದಿಗೆ ಹೆಚ್ಚುವರಿಯಾಗಿ ಟೋಯಿಂಗ್ ಶುಲ್ಕ ವಿಧಿಧಿಸಲಾಗುತ್ತಿದೆ. ಈ ಹಿಂದೆ ಟೋಯಿಂಗ್ ಶುಲ್ಕವೆಂದು 250 ರೂ. ವಿಧಿಸಲಾಗುತ್ತಿತ್ತು. ಈಗ ಟೋಯಿಂಗ್ ವಾಹನಗಳಿಂದ ತೆರವುಗೊಳಿಸಿದರೆ ಸಾವಿರ ರೂ. ದಂಡದೊಂದಿಗೆ ಟೋಯಿಂಗ್ ಶುಲ್ಕವನ್ನು ಸಹ ನಿಯಮ ಉಲ್ಲಂಘನೆ ಮಾಡಿದ ವಾಹನ ಸವಾರರು ಪಾವತಿ ಮಾಡಬೇಕಾಗುತ್ತದೆ ಎನ್ನುತ್ತಾರೆ ಪೊಲೀಸ್‌ ಅಧಿಕಾರಿಗಳು.
from India & World News in Kannada | VK Polls https://ift.tt/3CQkYZ1
