ದುಬೈ: ಸತತ ಎರಡು ಸೋಲಿನ ಬಳಿಕ ಮುಂಬೈ ಇಂಡಿಯನ್ಸ್ ವಿರುದ್ಧ 54 ರನ್ಗಳಿಂದ ಗೆದ್ದು 2021ರ ಇಂಡಿಯನ್ ಪ್ರೀಮಿಯರ್ ಲೀಗ್ ಯುಎಇ ಚರಣದಲ್ಲಿ ಭರ್ಜರಿ ಕಮ್ಬ್ಯಾಕ್ ಮಾಡಿದ್ದಕ್ಕೆ ನಾಯಕ ಸಂತಸ ವ್ಯಕ್ತಪಡಿಸಿದ್ದಾರೆ. ಭಾನುವಾರ ರಾತ್ರಿ ಇಲ್ಲಿನ ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದಿದ್ದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ್ದ ಆರ್ಸಿಬಿ ತನ್ನ ಪಾಲಿನ 20 ಓವರ್ಗಳಿಗೆ 6 ವಿಕೆಟ್ ನಷ್ಟಕ್ಕೆ 165 ರನ್ ಗಳಿಸಿತ್ತು ಹಾಗೂ ಮುಂಬೈ ಇಂಡಿಯನ್ಸ್ಗೆ 166 ರನ್ ಸವಾಲಿನ ಗುರಿ ನೀಡಿತ್ತು. ಬಳಿಕ ಗುರಿ ಹಿಂಬಾಲಿಸಿದ್ದ ಮುಂಬೈ ಮುಂಬೈ ಇಂಡಿಯನ್ಸ್ಗೆ ರೋಹಿತ್ ಶರ್ಮಾ(43) ಹಾಗೂ ಕ್ವಿಂಟನ್ ಡಿ ಕಾಕ್(24) ಉತ್ತಮ ಆರಂಭದ ಹೊರತಾಗಿಯೂ 18.1 ಓವರ್ಗಳಿಗೆ 111 ರನ್ಗಳಿಗೆ ಆಲೌಟ್ ಆಯಿತು. ಆ ಮೂಲಕ ಮುಂಬೈ ಹ್ಯಾಟ್ರಿಕ್ ಸೋಲಿನ ಆಘಾತ ಅನುಭವಿಸಿತು. ಪಂದ್ಯದ ಗೆಲುವಿನ ಬಳಿಕ ಮಾತನಾಡಿದ ವಿರಾಟ್ ಕೊಹ್ಲಿ, ಮುಂಬೈ ಇಂಡಿಯನ್ಸ್ ನಂತಹ ಅಗ್ರ ತಂಡದ ಮೇಲೆ ಆರಂಭದಿಂದಲೂ ಪ್ರಾಬಲ್ಯ ಸಾಧಿಸಿದ ಮಹತ್ವದ ಬಗ್ಗೆ ಒತ್ತಿ ಹೇಳಿದರು ಹಾಗೂ ತಂಡದ ಪ್ರದರ್ಶನದ ಬಗ್ಗೆ ಮುಕ್ತಕಂಠದಿಂದ ಗುಣಗಾನ ಮಾಡಿದರು. "ಮುಂಬೈ ವಿರುದ್ಧ ನಾವು ಗೆದ್ದ ಹಾದಿಯ ಬಗ್ಗೆ ನನಗೆ ತುಂಬಾ ಸಂತೋಷವಾಗಿದೆ. ಎರಡನೇ ಓವರ್ನಲ್ಲಿಯೇ ದೇವದತ್ ಪಡಿಕ್ಕಲ್ ವಿಕೆಟ್ ಕಳೆದುಕೊಂಡ ನಮಗೆ ತುಂಬಾ ಕಠಿಣವಾಗಿತ್ತು. ಆ ಓವರ್ನಲ್ಲಿ ಜಸ್ಪ್ರಿತ್ ಬುಮ್ರಾ ಬೌಲಿಂಗ್ ಹಾದಿ ನೋಡುತ್ತಿದ್ದರೆ, ಪಂದ್ಯ ಮುಂಬೈ ಇಂಡಿಯನ್ಸ್ ಕಡೆ ಟರ್ನ್ ಆಗುವ ಸಾಧ್ಯತೆ ದಟ್ಟವಾಗಿತ್ತು. ಈ ಒತ್ತಡದಲ್ಲಿ ನಾವು ಸ್ವಲ್ಪ ಅಪಾಯವನ್ನು ಸ್ವೀಕರಿಸುವುದು ತುಂಬಾ ಮುಖ್ಯವಾಗಿತ್ತು. ನಾನು ಉತ್ತಮ ಆರಂಭ ಪಡೆದುಕೊಂಡೆ ಹಾಗೂ ಕೆಎಸ್ ಭರತ್ ನನ್ನಿಂದ ಒತ್ತಡವನ್ನು ಕಸಿದುಕೊಂಡರು. ಅದರಲ್ಲೂ ಮ್ಯಾಕ್ಸ್ವೆಲ್ ಇನಿಂಗ್ಸ್ ನಂಬಲು ಅಸಾಧ್ಯವಾಗಿತ್ತು," ಎಂದು ಕೊಹ್ಲಿ ಗುಣಗಾನ ಮಾಡಿದರು. ಗ್ಲೆನ್ ಮ್ಯಾಕ್ಸ್ವೆಲ್ ಮುಂಬೈ ಬೌಲರ್ಗಳಿಗೆ ತಿರುಗೇಟು ನೀಡುವುದಕ್ಕೂ ಮುನ್ನ ನಾಯಕ ವಿರಾಟ್ ಕೊಹ್ಲಿ ಪ್ರಸಕ್ತ ಟೂರ್ನಿಯ ಮೂರನೇ ಅರ್ಧಶತಕವನ್ನು ಪೂರೈಸಿದರು. ವಿರಾಟ್ ಕೊಹ್ಲಿ 42 ಎಸೆತಗಳಲ್ಲಿ 51 ರನ್ ಸಿಡಿಸಿದರೆ, ಮ್ಯಾಕ್ಸ್ವೆಲ್ ಕೇವಲ 37 ಎಸೆತಗಳಲ್ಲಿ 56 ರನ್ ಚೆಚ್ಚಿ ಆರ್ಸಿಬಿ 165 ರನ್ ಗಳಿಸಲು ನೆರವಾಗಿದ್ದರು. ಹರ್ಷಲ್ ಪಟೇಲ್ರಿಂದ ನಂಬಲಾಗದ ಪ್ರದರ್ಶನ: ಕೊಹ್ಲಿ ಕ್ವಿಂಟನ್ ಡಿ ಕಾಕ್ ಹಾಗೂ ರೋಹಿತ್ ಶರ್ಮಾ ಅವರು 57 ರನ್ಗಳ ಜೊತೆಯಾಟವಾಡುವ ಮೂಲಕ ಮುಂಬೈ ಇಂಡಿಯನ್ಸ್ಗೆ ಅದ್ಭುತ ಆರಂಭ ತಂದುಕೊಟ್ಟಿದ್ದರು. ಆದರೆ, ಈ ಇಬ್ಬರನ್ನು ಕ್ರಮವಾಗಿ ಚಹಲ್ ಹಾಗೂ ಮ್ಯಾಕ್ಸ್ವೆಲ್ ಸರಿಯಾದ ಸಮಯದಲ್ಲಿ ಔಟ್ ಮಾಡಿದರು. ನಂತರ, ಹಾಲಿ ಚಾಂಪಿಯನ್ಸ್ಗೆ ಹರ್ಷಲ್ ಪಟೇಲ್ ಹ್ಯಾಟ್ರಿಕ್ ವಿಕೆಟ್ ಆಘಾತ ನೀಡಿದರು. ನಂತರ, ಮುಂಬೈ ಇಂಡಿಯನ್ಸ್ ಪಂದ್ಯದಲ್ಲಿ ಕಮ್ಬ್ಯಾಕ್ ಮಾಡಲೇ ಇಲ್ಲ. "ನಾನು ಎಬಿ ಹಾಗೂ ಮ್ಯಾಕ್ಸಿ ಬಳಿ ಮಾತನಾಡಿದ್ದೆ ಹಾಗೂ ಅವರು ನನಗೆ 'ನಿಮ್ಮ ಮನಸಿನ ಭಾವನೆಯೊಂದಿಗೆ ಹೋಗಿ' ಎಂದು ಹೇಳಿದ್ದರು. ಡೇನಿಯಲ್ ಕ್ರಿಸ್ಟಿಯನ್ ಅನುಭವಿ ಬೌಲರ್ ಎಂದು ನನ್ನ ಮನಸು ಹೇಳುತ್ತಿತ್ತು. ಅವರಲ್ಲಿ ಸ್ಲೋ ಬೌನ್ಸರ್ ಇದ್ದು, ವಿಕೆಟ್ ಪಡೆಯಬಹುದಾದ ಅವಕಾಶವಿದೆ. ಯುಜ್ವೇಂದ್ರ ಚಹಲ್ ಕೂಡ ಅತ್ಯುತ್ತಮವಾಗಿ ಬೌಲ್ ಮಾಡಿದ್ದರು," ಎಂದು ಕೊಹ್ಲಿ ಗುಣಗಾನ ಮಾಡಿದರು. "ಕೈರೊನ್ ಪೊಲಾರ್ಡ್ ಹಾಗೂ ಹಾರ್ದಿಕ್ ಪಾಂಡ್ಯ ಕ್ರೀಸ್ನಲ್ಲಿದ್ದಾಗ ಚಹಲ್ನಿಂದ ಅವರನ್ನು ನಿಯಂತ್ರಿಸಲು ಸಾಧ್ಯವಿಲ್ಲ ಎಂದು ನನಗೆ ಅನಿಸಿತ್ತು. ಹಾಗಾಗಿ, ಕ್ರಿಸ್ಟಿಯನ್ಗೆ ಬೌಲಿಂಗ್ ನೀಡಿದೆ. ಅದರಂತೆ ಅವರು ಅದ್ಭುತವಾಗಿ ಬೌಲ್ ಮಾಡಿ, ಪಂದ್ಯದಲ್ಲಿ ಸಂಪೂರ್ಣವಾಗಿ ನಮ್ಮ ಕಡೆಗೆ ಟರ್ನ್ ಮಾಡಿದರು. ಹರ್ಷಲ್ ಪಟೇಲ್ ನಂಬಲಾಗದ ಬೌಲಿಂಗ್ ಪ್ರದರ್ಶನವನ್ನು ತೋರಿದರು," ಎಂದು ವಿರಾಟ್ ಕೊಹ್ಲಿ ತಿಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3icp1Hj