ಹೊಸದಿಲ್ಲಿ: ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್ ಲೀಗ್ ಟೂರ್ನಿಯ 56 ಲೀಗ್ ಪಂದ್ಯಗಳಲ್ಲಿ ಸದ್ಯ 40 ಹಣಾಹಣಿಗಳು ಮುಕ್ತಾಯವಾಗಿವೆ. ಅಂದಹಾಗೆ ಗುಂಪು ಹಂತದ 16 ಪಂದ್ಯಗಳು ಬಾಕಿ ಇವೆ. ಮುಂದಿನ ಪ್ರತಿಯೊಂದು ಪಂದ್ಯದ ಫಲಿತಾಂಶ ಎಲ್ಲಾ ತಂಡಗಳ ನಾಕೌಟ್‌ ತಲುಪುವ ಹಾದಿಯ ಮೇಲೆ ಪರಿಣಾಮ ಬೀರಲಿದೆ. ಸೋಮವಾರ ರಾಜಸ್ಥಾನ್‌ ರಾಯಲ್ಸ್ ವಿರುದ್ಧ ಗೆಲುವು ಪಡೆದಿರುವ ಹಿನ್ನೆಲೆಯಲ್ಲಿ ಸನ್‌ರೈಸರ್ಸ್ ಹೈದರಾಬಾದ್‌ ತಂಡದ ಪ್ಲೇಆಫ್ಸ್‌ ಕನಸು ಜೀವಂತವಾಗಿದೆ. ಎಸ್‌ಆರ್‌ಎಚ್‌ ಗಿಂತಲೂ ರಾಜಸ್ಥಾನ್‌ ರಾಯಲ್ಸ್‌ಗೆ ಪ್ಲೇಆಫ್ಸ್‌ ತಲುಪುವ ಹಾದಿ ಉತ್ತಮವಾಗಿದೆ. ಮುಂದಿನ ಪಂದ್ಯಗಳನ್ನು ಗಮನದಲ್ಲಿಟ್ಟುಕೊಂಡು ಎಲ್ಲಾ ತಂಡಗಳ ಪ್ಲೇ-ಆಫ್ಸ್‌ಗೆ ತಲುಪಬಹುದಾದ ಹಾದಿಯ ಬಗ್ಗೆ ಸೋಮವಾರದ ಪಂದ್ಯದ ಬಳಿಕ ಟೈಮ್ಸ್ ಆಫ್‌ ಇಂಡಿಯಾದ ವಿಸ್ತಾರವಾದ ವಿಶ್ಲೇಷಣೆಯನ್ನು ನೀಡಿದೆ. ಪ್ತತಿಯೊಂದು ತಂಡಕ್ಕೂ ಇನ್ನೂ ನಾಲ್ಕು ಪಂದ್ಯಗಳು ಬಾಕಿ ಇರುವ ಹಿನ್ನೆಲೆಯಲ್ಲಿ ರನ್‌ರೇಟ್‌ ಕೂಡ ಇಲ್ಲಿ ಪ್ರಮುಖ ಪಾತ್ರವನ್ನು ನಿರ್ವಹಿಸಲಿದೆ. ಎಲ್ಲಾ 8 ತಂಡಗಳ ಪ್ಲೇಆಫ್‌ ತಲುಪಬಹುದಾದ ಹಾದಿ ಈ ರೀತಿ ಇದೆ. 1. ಚೆನ್ನೈ ಸೂಪರ್‌ ಕಿಂಗ್ಸ್: ಅತ್ಯುತ್ತಮ ಪ್ರದರ್ಶನ ತೋರುತ್ತಿರುವ ಚೆನ್ನೈ ಸೂಪರ್‌ ಕಿಂಗ್ಸ್ ಇದುವರೆಗೂ ಪಾಯಿಂಟ್ಸ್ ಟೇಬಲ್‌ನಲ್ಲಿ ಜಂಟಿ ಮೂರನೇ ಸ್ಥಾನಕ್ಕಿಂತ ಕೆಳಗೆ ಇಳಿದಿಲ್ಲ. ಸದ್ಯ 16 ಅಂಕಗಳನ್ನು ಕಲೆ ಹಾಕಿರುವ ಎಂಎಸ್‌ ಧೋನಿ ನಾಯಕತ್ವದ ಅತ್ಯುತ್ತಮ ರನ್‌ ರೇಟ್‌ನೊಂದಿಗೆ ಪಾಯಿಂಟ್ಸ್ ಟೇಬಲ್‌ನಲ್ಲಿ ಅಗ್ರ ಸ್ಥಾನದಲ್ಲಿದೆ. ಆದರೆ, ಮುಂದಿನ ನಾಲ್ಕು ಪಂದ್ಯಗಳ ಬಳಿಕ ಸಿಎಸ್‌ಕೆ ಒಂದು ಅಥವಾ ಎರಡನೇ ಸ್ಥಾನದಲ್ಲಿ ಉಳಿಯುವ ಸಾಧ್ಯತೆ ಶೇ. 97ರಷ್ಟು ಇದೆ. ಆದರೆ, ಇದು ಆರ್‌ಸಿಬಿಯ ಮುಂದಿನ ಪಂದ್ಯಗಳ ಫಲಿತಾಂಶವನ್ನು ಅವಲಂಬಿಸಿರುತ್ತದೆ. 2. ಡೆಲ್ಲಿ ಕ್ಯಾಪಿಟಲ್ಸ್: ಚೆನ್ನೈ ಸೂಪರ್‌ ಕಿಂಗ್ಸ್ ತಂಡದಂತೆಯೇ ಡೆಲ್ಲಿ ಕ್ಯಾಪಿಟಲ್ಸ್ ಕೂಡ ಪ್ರಸಕ್ತ ಆವೃತ್ತಿಯಲ್ಲಿ ಉತ್ತಮ ಪ್ರದರ್ಶನ ತೋರುತ್ತಿದೆ. ಇದುವರೆಗೂ ಪಂತ್ ನಾಯಕತ್ವದ ಡಿಸಿ ಪಾಯಿಂಟ್ಸ್ ಟೇಬಲ್‌ನಲ್ಲಿ ಜಂಟಿ ಮೂರನೇ ಸ್ಥಾನದಿಂದ ಕೆಳಗೆ ಇಳಿದಿಲ್ಲ. ಲೀಗ್ ಹಂತದ ಪಂದ್ಯಗಳು ಮುಗಿಯುವ ಹೊತ್ತಿಗೆ ಪಾಯಿಂಟ್ಸ್ ಟೇಬಲ್‌ನಲ್ಲಿ ಡಿಲ್ಲಿ ಒಂದು ಅಥವಾ ಎರಡನೇ ಸ್ಥಾನದಲ್ಲಿ ಉಳಿಯುವ ಸಾಧ್ಯತೆ ಇದೆ. ಆದರೆ, ಮುಂದಿನ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ತೋರಿದರೆ, ಕ್ಯಾಪಿಟಲ್ಸ್ ಮೂರನೇ ಸ್ಥಾನಕ್ಕೂ ಇಳಿಯುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ. 3. ರಾಯಲ್ ಚಾಲೆಂಜರ್ಸ್ ಬೆಂಗಳೂರು: ವಿರಾಟ್‌ ಕೊಹ್ಲಿ ನಾಯಕತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಕೂಡ ಪ್ಲೆಆಫ್ಸ್‌ಗೆ ಅರ್ಹತೆ ಪಡೆಯುವ ಸಾಧ್ಯತೆ ದಟ್ಟವಾಗಿದೆ. ಪ್ರಸಕ್ತ ಆವೃತ್ತಿಯ ಆರ್‌ಸಿಬಿ ಪಾಯಿಂಟ್ಸ್ ಟೇಬಲ್‌ನಲ್ಲಿ 7ನೇ ಸ್ಥಾನಕ್ಕೆ ಕುಸಿದಿದ್ದರೂ, ನಂತರ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿತ್ತು. ಸದ್ಯ ಮೂರನೇ ಸ್ಥಾನದಲ್ಲಿರುವ ಆರ್‌ಸಿಬಿ, ಒಂದು ಅಥವಾ ಎರಡನೇ ಸ್ಥಾನಕ್ಕೆ ಇನ್ನುಳಿದ ನಾಲ್ಕು ಪಂದ್ಯಗಳಲ್ಲಿ ಹೋರಾಟ ನಡೆಸಲಿದೆ. 4.ಕೋಲ್ಕತಾ ನೈಟ್ ರೈಡರ್ಸ್: ಭಾರತದಲ್ಲಿ ನಡೆದಿದ್ದ 2021ರ ಇಂಡಿಯನ್‌ ಪ್ರೀಮಿಯರ್ ಲೀಗ್ ಮೊದಲ ಅವಧಿಯಲ್ಲಿ ಕೋಲ್ಕತಾ ನೈಟ್ ರೈಡರ್ಸ್ ತಂಡ ಅತ್ಯಂತ ಹೀನಾಯ ಪ್ರದರ್ಶನ ತೋರಿತ್ತು. ಆದರೆ, ಐಯಾನ್‌ ಮಾರ್ಗನ್‌ ನಾಯಕತ್ವದಲ್ಲಿ ಯುಎಇ ಚರಣದಲ್ಲಿ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿದೆ. ಆ ಮೂಲಕ ಪ್ಲೇ-ಆಫ್ಸ್‌ಗೆ ಅರ್ಹತೆ ಪಡೆಯುವ ಹಾದಿಯಲ್ಲಿದೆ. ಅತ್ಯುತ್ತಮ ರನ್‌ರೇಟ್‌ ಹೊಂದಿರುವ ಕೆಕೆಆರ್‌, ಇನ್ನುಳಿದ ನಾಲ್ಕು ಪಂದ್ಯಗಳಲ್ಲಿ ಮೂರರಲ್ಲಿ ಗೆದ್ದರೆ ನಾಕೌಟ್‌ ಹಂತದ ಹಾದಿ ಸುಗಮವಾಗಲಿದೆ. 5.ಪಂಜಾಬ್‌ ಕಿಂಗ್ಸ್: ಕೆ.ಎಲ್ ರಾಹುಲ್‌ ನಾಯಕತ್ವದ ಪಂಜಾಬ್‌ ಕಿಂಗ್ಸ್ ತಂಡ ಸದ್ಯ ಪಾಯಿಂಟ್ಸ್ ಟೇಬಲ್‌ನಲ್ಲಿ 5ನೇ ಸ್ಥಾನದಲ್ಲಿದ್ದು, ಪ್ಲೇ-ಆಫ್ಸ್‌ಗೆ ಅರ್ಹತೆ ಪಡೆಯುವ ಹಾದಿಯಲ್ಲಿದೆ. ಇನ್ನುಳಿದ ನಾಲ್ಕು ಪಂದ್ಯಗಳಲ್ಲಿ ಕನಿಷ್ಠ 3 ಪಂದ್ಯಗಳಲ್ಲಿ ಅತ್ಯುತ್ತಮ ರನ್‌ರೇಟ್‌ನೊಂದಿಗೆ ಪಂಜಾಬ್‌ ಗೆಲುವು ಪಡೆದರೆ, ನಾಕೌಟ್‌ ಹಂತ ಪ್ರವೇಶಿಸಬಹುದು. ಪಂಜಾಬ್‌ ಕಿಂಗ್ಸ್‌ಗೆ ಪ್ಲೇಆಫ್‌ಗೆ ಅರ್ಹತೆ ಪಡೆಯುವ ಅವಕಾಶ ಶೇ.41ರಷ್ಟಿದೆ. ಒಂದು ವೇಳೆ ಮೂರಿಗಿಂತ ಕಡಿಮೆ ಪಂದ್ಯಗಳಲ್ಲಿ ಗೆಲುವು ಪಡೆದರೆ, ಪ್ಲೇಆಫ್ಸ್‌ ಹಾದಿ ಇತರೆ ತಂಡಗಳ ಫಲಿತಾಂಶವನ್ನು ಅವಲಂಬಿಸಿರುತ್ತದೆ. 6.ರಾಜಸ್ಥಾನ್‌ ರಾಯಲ್ಸ್: ಸಂಜು ಸ್ಯಾಮ್ಸನ್‌ ನಾಯಕತ್ವದ ರಾಜಸ್ಥಾನ್‌ ರಾಯಲ್ಸ್ ತಂಡ ಕೂಡ ಇಲ್ಲಿಯವರೆಗೂ ನಾಲ್ಕು ಪಂದ್ಯಗಳಲ್ಲಿ ಗೆದ್ದಿದ್ದು, ಪ್ಲೇ-ಆಫ್ಸ್‌ ತಲುಪುವ ಹಾದಿಯನ್ನು ಇನ್ನೂ ಜೀವಂತವಾಗಿರಿಕೊಂಡಿದೆ. ಇದಕ್ಕೆ ಪಂಜಾಬ್‌ ಕಿಂಗ್ಸ್ ಹಾಗೂ ಕೋಲ್ಕತಾ ನೈಟ್ ರೈಡರ್ಸ್ ತಂಡಗಳು ಪ್ರಬಲ ಸ್ಪರ್ಧಿಗಳಾಗಿವೆ. ಆದರೆ, ಮುಂದಿನ ನಾಲ್ಕು ಪಂದ್ಯಗಳಲ್ಲಿ ಮೂರು ಪಂದ್ಯಗಳಲ್ಲಿ ಗೆಲುವು ಪಡೆದರೆ, ಅಗ್ರ ನಾಲ್ಕರ ಸ್ಥಾನದಲ್ಲಿ ಆರ್‌ಆರ್‌ ಅವಕಾಶ ಪಡೆಯುವುದರಲ್ಲಿ ಯಾವುದೇ ಅನುಮಾನವಿಲ್ಲ. 7.ಮುಂಬೈ ಇಂಡಿಯನ್ಸ್: ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್ ಲೀಗ್ ಟೂರ್ನಿಯ ಭಾರತದ ಚರಣದಲ್ಲಿಉತ್ತಮ ಪ್ರದರ್ಶನ ತೋರಿದ್ದ ಮುಂಬೈ ಇಂಡಿಯನ್ಸ್ ಯುಎಇ ಚರಣದಲ್ಲಿ ಆಡಿರುವ ಮೂರೂ ಪಂದ್ಯಗಳಲ್ಲಿ ಸೋಲು ಅನುಭವಿಸಿದೆ. ಇದರ ಹೊರತಾಗಿಯೂ ಮುಂಬೈಗೆ ಪ್ಲೇಆಫ್ಸ್‌ ಅರ್ಹತೆ ಪಡೆಯಲು ಇನ್ನೂ ಅವಕಾಶವಿದೆ. ಕೆಕೆಆರ್‌, ಆರ್‌ಆರ್‌ ಹಾಗೂ ಪಿಬಿಕೆಎಸ್‌ ತಂಡಗಳ ಜೊತೆ ರೋಹಿತ್‌ ಪಡೆ ಕಠಿಣ ಪೈಪೋಟಿ ಎದುರಿಸಬೇಕಾಗಿದೆ. ಆದ್ದರಿಂದ ಮುಂದಿನ ಪಂದ್ಯಗಳಲ್ಲಿ ಮುಂಬೈ ಮೂರು ಪಂದ್ಯಗಳಲ್ಲಿ ಗೆಲುವು ಪಡೆದರೆ, ನಾಕೌಟ್‌ ಪ್ರವೇಶಿಸಬಹುದು. ಆದರೆ, ಇಲ್ಲಿ ಉತ್ತಮ ರನ್‌ರೇಟ್‌ನಲ್ಲಿ ಗೆಲ್ಲುವುದು ಅನಿವಾರ್ಯ. 8.ಸನ್‌ರೈಸರ್ಸ್ ಹೈದರಾಬಾದ್‌: 2021ರ ಟೂರ್ನಿಯಲ್ಲಿ ಅತ್ಯಂತ ಕಳಪೆ ಪ್ರದರ್ಶನ ತೋರುತ್ತಿರುವ ಸನ್‌ರೈಸರ್ಸ್ ಹೈದರಾಬಾದ್‌ ತಂಡ ಆಡಿರುವ 10 ಪಂದ್ಯಗಳಲ್ಲಿ ಗೆದ್ದಿರುವುದು ಕೇವಲ ಎರಡು ಪಂದ್ಯಗಳಲ್ಲಿ ಮಾತ್ರ. ಎಸ್‌ಎಚ್‌ಆರ್‌ ಪ್ಲೇ-ಆಫ್ಸ್‌ಗೆ ಅರ್ಹತೆ ಪಡೆಯಬೇಕೆಂದರೆ, ಇನ್ನುಳಿದ ನಾಲ್ಕೂ ಪಂದ್ಯಗಳಲ್ಲಿ ಅತ್ಯುತ್ತಮ ರನ್‌ರೇಟ್‌ನೊಂದಿಗೆ ಗೆಲ್ಲುವುದು ಅನಿವಾರ್ಯ. ಇದರ ಹೊರತಾಗಿಯೂ ಇನ್ನುಳಿದ ತಂಡಗಳ ಫಲಿತಾಂಶದ ಮೇಲೆಯೂ ಹೈದರಾಬಾದ್‌ ತಂಡದ ನಾಕೌಟ್‌ ತಲುಪುವ ಹಾದಿ ಅವಲಂಬಿಸಿರುತ್ತದೆ. ಆದರೆ, ಎಸ್‌ಆರ್‌ಎಚ್‌ ನಾಕೌಟ್‌ ತಲುಪುವ ಸಾಧ್ಯತೆ ಕೇವಲ 5ರಷ್ಟು ಮಾತ್ರ ಇದೆ. 9. ಒಂದು ಸ್ಥಾನಕ್ಕೆ 5 ತಂಡಗಳಿಂದ ಸ್ಪರ್ಧೆ: ಪಾಯಿಂಟ್ಸ್ ಟೇಬಲ್‌ನಲ್ಲಿ ಅಗ್ರ ಮೂರು ಸ್ಥಾನಗಳಲ್ಲಿರುವ ಚೆನ್ನೈ ಸೂಪರ್‌ ಕಿಂಗ್ಸ್ , ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳು ಅಗ್ರ ಸ್ಥಾನಕ್ಕೆ ಮುಂದಿನ ನಾಲ್ಕು ಪಂದ್ಯಗಳಲ್ಲಿ ಪೈಪೋಟಿ ನಡೆಸಲಿವೆ. ವಿರಾಟ್‌ ಕೊಹ್ಲಿ ನಾಯಕತ್ವದ ಆರ್‌ಸಿಬಿಗೆ ಪಾಯಿಂಟ್ಸ್ ಟೇಬಲ್‌ನಲ್ಲಿ ಅಗ್ರ ಸ್ಥಾನ ಪಡೆಯಲೂ ಇನ್ನೂ ಅವಕಾಶವಿದೆ. ಈ ಹಿನ್ನೆಲೆಯಲ್ಲಿ ಈ ಮೂರೂ ತಂಡಗಳನ್ನು ಹೊರತುಪಡಿಸಿ ಇನ್ನುಳಿದ ಒಂದು ಪ್ಲೇ-ಆಫ್ಸ್‌ ಸ್ಥಾನಕ್ಕೆ 5 ತಂಡಗಳು ಪೈಪೋಟಿ ನಡೆಸಲಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3kKBGmk
