ಹೊಸದಿಲ್ಲಿ: ನ್ಯೂಜಿಲೆಂಡ್ ವಿರುದ್ಧ ಉದ್ಘಾಟನಾ ಆವೃತ್ತಿಯ ಪಂದ್ಯದ ವೇಳೆ ಗಾಯವಾಗಿದ್ದ ಭಾರತದ ಹಿರಿಯ ವೇಗಿ ಇಶಾಂತ್ ಶರ್ಮಾ ಅವರ ಬಲಗೈಗೆ ಹೊಲಿಗೆ ಹಾಕಲಾಗಿದೆ. ಅದರಂತೆ, ಆಗಸ್ಟ್ 4 ರಿಂದ ಇಂಗ್ಲೆಂಡ್ ವಿರುದ್ಧ ಆರಂಭವಾಗುವ ಐದು ಪಂದ್ಯಗಳ ಟೆಸ್ಟ್ ಸರಣಿ ವೇಳೆಗೆ ಹಿರಿಯ ವೇಗಿ ಸಂಪೂರ್ಣವಾಗಿ ಚೇತರಿಸಿಕೊಳ್ಳುವ ಸಾಧ್ಯತೆ ಇದೆ. ಸೌಥ್ಹ್ಯಾಂಪ್ಟನ್ನ ರೋಸ್ಬೌಲ್ ಅಂಗಳದಲ್ಲಿ ಬುಧವಾರ ಮುಕ್ತಾಯವಾಗಿದ್ದ ಡಬ್ಲ್ಯುಟಿಸಿ ಫೈನಲ್ ಪಂದ್ಯದ ನ್ಯೂಜಿಲೆಂಡ್ನ ದ್ವಿತೀಯ ಇನಿಂಗ್ಸ್ನಲ್ಲಿ ತಮ್ಮ ಬೌಲಿಂಗ್ನಲ್ಲಿಯೇ ಸ್ಟ್ರೈಟ್ ಡ್ರೈವ್ ತಡೆಯಲು ಪ್ರಯತ್ನಿಸುವ ವೇಳೆ ಇಶಾಂತ್ ಶರ್ಮಾ ಅವರು ತನ್ನ ಬೌಲಿಂಗ್ ಕೈಗೆ ಗಾಯ ಮಾಡಿಕೊಂಡಿದ್ದರು. ಅವರ ಕೈಯಲ್ಲಿ ರಕ್ತ ಬರುತ್ತಿದ್ದ ಕಾರಣ ತಕ್ಷಣ ಅಂಗಳ ತೊರೆದಿದ್ದರು. ಅಂತಿಮವಾಗಿ ಈ ಪಂದ್ಯದಲ್ಲಿ ಭಾರತ ಎಂಟು ವಿಕೆಟ್ಗಳಿಂದ ಕಿವೀಸ್ ವಿರುದ್ಧ ಸೋಲು ಅನುಭವಿಸಿತ್ತು. "ಇಶಾಂತ್ ಶರ್ಮಾ ಅವರ ಬಲಗೈನ ಮಧ್ಯ ಹಾಗೂ ನಾಲ್ಕನೇ ಬೆರಳಿಗೆ ಹೊಲಿಗೆಗಳನ್ನು ಹಾಕಲಾಗಿದೆ. ಆದರೆ, ಇದು ಗಂಭೀರ ಗಾಯವೇನಲ್ಲ," ಎಂದು ಬಿಸಿಸಿಐ ಹಿರಿಯ ಅಧಿಕಾರಿಯೊಬ್ಬರು ಪಿಟಿಐಗೆ ತಿಳಿಸಿದ್ದಾರೆ. "ಹಿರಿಯ ವೇಗಿ ಇಶಾಂತ್ ಶರ್ಮಾ ಅವರಿಗೆ ಹಾಕಿರುವ ಹೊಲಿಗೆಗಳನ್ನು ಮುಂದಿನ 10 ದಿನಗಳ ಒಳಗಾಗಿ ತೆಗೆಯಲಾಗುತ್ತದೆ. ಇಂಗ್ಲೆಂಡ್ ವಿರುದ್ಧ ಆರಂಭವಾಗುವ ಐದು ಪಂದ್ಯಗಳ ಟೆಸ್ಟ್ ಸರಣಿಗೆ ಇನ್ನೂ ಆರು ವಾರಗಳ ಸಮಯವಿದೆ. ಹಾಗಾಗಿ, ಈ ಸಮಯದ ಹೊತ್ತಿಗೆ ಅವರು ಸಂಪೂರ್ಣ ಚೇತರಿಸಿಕೊಳ್ಳಲಿದ್ದಾರೆ," ಎಂದು ಅವರು ಹೇಳಿದ್ದಾರೆ. ಭಾರತ ಟೆಸ್ಟ್ ತಂಡದ ಆಟಗಾರರು ಸೌಥ್ಹ್ಯಾಂಪ್ಟನ್ನಿಂದ ಲಂಡನ್ಗೆ ತೆರಳಿದ್ದು, ಇನ್ನೂ ಮೂರು ವಾರಗಳ ಕಾಲ ತಮಗೆ ಇಷ್ಟಬಂದ ಕಡೆ ಸುತ್ತಾಡಲಿದ್ದಾರೆ. "ಭಾರತ ತಂಡದ ಎಲ್ಲಾ ಆಟಗಾರರು ಜೊತೆಯಾಗಿ ಲಂಡನ್ಗೆ ತೆರಳಿದ್ದು, ಮುಂದಿನ 20 ದಿನಗಳ ಕಾಲ ಅವರಿಗೆ ಬಿಡುವು ನೀಡಲಾಗಿದೆ. ಈ ಅವಧಿಯಲ್ಲಿ ಯುಕೆ ವ್ಯಾಪ್ತಿಯೊಳಗೆ ತಮ್ಮ ಕುಟುಂಬದ ಜತೆ ತಮಗೆ ಇಷ್ಟವಾದ ಸ್ಥಳಗಳಿಗೆ ಆಟಗಾರರು ತೆರಳಬಹುದಾಗಿದೆ," ಎಂದು ಅಧಿಕಾರಿ ತಿಳಿಸಿದ್ದಾರೆ. ತಂಡದ ಹೆಚ್ಚಿನ ಆಟಗಾರರು ಲಂಡನ್ ಮತ್ತು ಸುತ್ತಮುತ್ತ ಪರಿಚಯಸ್ಥರನ್ನು ಹೊಂದಿರುವುದರಿಂದ, ಅವರು ಯುಕೆ ರಾಜಧಾನಿಯಲ್ಲಿ ಮಾತ್ರ ಉಳಿಯಲಿದ್ದಾರೆಂದು ನಿರೀಕ್ಷಿಸಲಾಗಿದೆ. "ತಂಡದ ಕೆಲವು ಆಟಗಾರರು ಟೆನಿಸ್ ಅಭಿಮಾನಿಗಳಾಗಿದ್ದು, ಪ್ರೇಕ್ಷಕರಿಗೆ ವಿಂಬಲ್ಡನ್ ಅವಕಾಶ ಕಲ್ಪಿಸಿದರೆ ಕೆಲವರು ಕೋರ್ಟ್ ಪಂದ್ಯಗಳನ್ನು ಕಣ್ತುಂಬಿಸಿಕೊಳ್ಳಲು ತೆರಳಬಹುದು. ಇನ್ನು ಕೆಲವರು ಯುರೋ ಫುಟ್ಬಾಲ್ ಪಂದ್ಯಗಳ ವೀಕ್ಷಿಸುವ ಸಲುವಾಗಿ ವೆಂಬ್ಲೀಯಲ್ಲಿ ಟಿಕೆಟ್ಗಳ ಲಭ್ಯತೆ ಬಗ್ಗೆ ಪರಿಶೀಲಿಸುತ್ತಿದ್ದಾರೆ," ಎಂದು ಮೂಲಗಳು ತಿಳಿಸಿವೆ. ಜುಲೈ 14 ರಂದು ಟೀಮ್ ಇಂಡಿಯಾದ ಎಲ್ಲಾ ಆಟಗಾರರು ಒಂದು ಕಡೆ ಸೇರಲಿದ್ದು, ಇಂಗ್ಲೆಂಡ್ ವಿರುದ್ಧ ಮೊದಲನೇ ಟೆಸ್ಟ್ ಪಂದ್ಯವಾಡಲು ನಾಟಿಂಗ್ಹ್ಯಾಮ್ಗೆ ಪ್ರಯಾಣ ಬೆಳೆಸಲಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3h6yzlx
