ಬೆಳಗಾವಿ: ಕೊರೊನಾ ಕಾರಣಕ್ಕೆ ಕಳೆದ ಮಾರ್ಚ್‌ನಿಂದ ಇಲ್ಲಿಯವರೆಗೆ ರಾಜ್ಯ ಸಾರಿಗೆ ಇಲಾಖೆಗೆ 4,000 ಕೋಟಿ ರೂ.ಗೂ ಹೆಚ್ಚು ನಷ್ಟವಾಗಿದೆ ಎಂದು ಸಾರಿಗೆ ಸಚಿವರೂ ಆಗಿರುವ ಉಪಮುಖ್ಯಮಮಂತ್ರಿ ಹೇಳಿದ್ದಾರೆ. ಬೆಳಗಾವಿಯಲ್ಲಿ ಮಾಧ್ಯಮಗಳ ಜತೆ ಮಾತನಾಡಿದ ಅವರು, ಮೊದಲಿಗೆ ಕೊರೊನಾ ಮೊದಲ ಅಲೆ ಬಂತು. ನಂತರ ನೌಕರರು ಮುಷ್ಕರ ನಡೆಸಿದರು. ಇದು ಮುಗಿಯಿತು ಎನ್ನುವಾಗ ಕೊರೊನಾ ಎರಡನೇ ಅಲೆ ಬಂತು. ಇದರಿಂದ ಸಂಸ್ಥೆಗೆ ಭಾರಿ ನಷ್ಟವಾಗಿದೆ ಎಂದು ವಿವರಿಸಿದರು. ಇಲಾಖೆ ಭಾರಿ ನಷ್ಟ ಅನುಭವಿಸಿದರೂ ನೌಕರರಿಗೆ ಪೂರ್ಣ ಪ್ರಮಾಣದಲ್ಲಿ ವೇತನ ನೀಡಲಾಗಿದೆ. ಹಣಕಾಸಿನ ಅಗತ್ಯಗಳಿಗಾಗಿ ಸರಕಾರ 2,600 ಕೋಟಿ ರೂ.ಗಳನ್ನು ನೀಡಿದೆ ಎಂದು ಅವರು ಮಾಹಿತಿ ನೀಡಿದರು. ಸದ್ಯ ಬಸ್‌ನಲ್ಲಿ ಶೇ. 50ರಷ್ಟು ಪ್ರಯಾಣಿಕರ ಪ್ರಯಾಣಕ್ಕೆ ಅವಕಾಶ ಮಾಡಿಕೊಡಲಾಗಿದೆ. ಗಳಿಸುತ್ತಿರುವ ಆದಾಯ ಡೀಸೆಲ್‌ ಹಾಗೂ ಸಂಬಳಕ್ಕೂ ಸಾಲುತ್ತಿಲ್ಲ. ವೇತನ ನೀಡಲು ಸರಕಾರದಿಂದ ಹಣ ಪಡೆಯಲೇಬೇಕಾಗಿದೆ. ಬೇರೆ ದಾರಿ ಇಲ್ಲ ಎಂದು ಅವರು ಅಸಹಾಯಕತೆ ವ್ಯಕ್ತಪಡಿಸಿದರು. ಇನ್ನು ಜುಲೈ 5 ರಿಂದ ಸಾರಿಗೆ ನೌಕರರ ಸಂಘಗಳು ಪ್ರತಿಭಟನೆ ನಡೆಸುವ ವಿಚಾರವಾಗಿ ಪ್ರತಿಕ್ರಿಯಸಿದ ಅವರು, ಸಂಘಟನೆಗಳ ನಾಯಕರು ಈ ಬಿಕ್ಕಟ್ಟಿನ ಸಂದರ್ಭದಲ್ಲಿ ಮುಷ್ಕರಕ್ಕೆ ಇಳಿಯುವುದಿಲ್ಲ ಎಂದು ಭರವಸೆ ನೀಡಿದ್ದಾರೆ ಎಂದರು. "ಮಾತುಕತೆ ವೇಳೆ, ತಾವು ಸಂಚಿಗೆ ಬಲಿಯಾಗಿದ್ದಾಗಿ ಸಂಘಟನೆಗಳ ನಾಯಕರು ಹೇಳಿದ್ದಾರೆ. ಇದರಿಂದಾಗಿ ಮುಷ್ಕರ ನಡೆಸಿದೆವು ಎಂದಿದ್ದಾರೆ. ಈಗ ಅವರು ಸರಕಾರದ ಜತೆ ಕೈಜೋಡಿಸಲು ಉದ್ದೇಶಿಸಿದ್ದಾರೆ," ಎಂದು ಸವದಿ ತಿಳಿಸಿದರು.
from India & World News in Kannada | VK Polls https://ift.tt/3dcZGdG
