ನವೀನ್‌ ಮಂಡ್ಯ: ಜಿಲ್ಲೆಯ ಜನರು ಮತ್ತು ರೈತರ ಆರ್ಥಿಕ ಶಕ್ತಿಯಾಗಿದ್ದ () ಈ ವರ್ಷವೂ ಆರಂಭವಾಗುವ ಲಕ್ಷಣಗಳು ಕಾಣುತ್ತಿಲ್ಲ. ದುರಸ್ತಿ ಮತ್ತು ಆರ್ಥಿಕ ನಷ್ಟದ ನೆಪವೊಡ್ಡಿ ಮೂರ್ನಾಲ್ಕು ವರ್ಷಗಳಿಂದ ಅರೆಯುವಿಕೆ ಸ್ಥಗಿತಗೊಂಡಿರುವ ಮೈಷುಗರ್‌ನ ಯಂತ್ರಗಳು 2021ರಲ್ಲೂ ಚಾಲನೆಗೊಳ್ಳುವುದು ಅನುಮಾನವಾಗಿದೆ. ಮೈಷುಗರ್‌ನ್ನು ಸರಕಾರವೇ ನಡೆಸಬೇಕೆ? ಕಾರ‍್ಯಚರಣೆ ಮತ್ತು ನಿರ್ವಹಣೆ (ಒ ಅಂಡ್‌ ಎಂ) ವಿಧಾನದಡಿ ಆರಂಭಿಸಬೇಕೇ? ಅಥವಾ ಖಾಸಗಿಯವರಿಗೆ ಗುತ್ತಿಗೆಗೆ ನೀಡಬೇಕೆ? ಎಂಬ ಯಾವುದೇ ನಿರ್ಧಾರಕ್ಕೂ ಸರಕಾರ ಇನ್ನೂ ಬಂದಿಲ್ಲ. ಈ ತಕ್ಷಣಕ್ಕೆ ಯಾವುದೇ ನಿರ್ಧಾರಕ್ಕೆ ಬಂದರೂ ಅದರ ಅನುಷ್ಠಾನಕ್ಕೆ ಕನಿಷ್ಠ ನಾಲ್ಕೈದು ತಿಂಗಳಾದರೂ ಕಾಲಾವಕಾಶ ಬೇಕು. ಅಷ್ಟರೊಳಗೆ ಈಗ ಮೈಷುಗರ್‌ ಅಚ್ಚುಕಟ್ಟು ವ್ಯಾಪ್ತಿಯಲ್ಲಿ ಬೆಳೆದು ನಿಂತಿರುವ ಕಬ್ಬು ಬೆಳೆಯ ಗತಿ ಏನೆಂಬುದು ಪ್ರಶ್ನೆಯಾಗಿದೆ. ಮೈಷುಗರ್‌ ವ್ಯಾಪ್ತಿಯಲ್ಲಿ ಪ್ರಸ್ತುತ ಸರಿಸುಮಾರು 7 ಲಕ್ಷ ಟನ್‌ ಕಬ್ಬು ಬೆಳೆಯಲಾಗಿದೆ. ಈಗಾಗಲೇ ಇದರಲ್ಲಿ ಶೇ.60ಕ್ಕೂ ಹೆಚ್ಚು ಪ್ರಮಾಣದ ಕಬ್ಬಿಗೆ 11 ತಿಂಗಳು ಮುಗಿದಿದೆ. ತಕ್ಷಣಕ್ಕೆ ಆರಂಭವಾಗದಿದ್ದರೆ ಅಥವಾ ಬೇರೆ ಕಾರ್ಖಾನೆಗಳಿಗೆ ವರ್ಗಾವಣೆ ಮಾಡಲು ಸಾಧ್ಯವಾಗದಿದ್ದರೆ ರೈತರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ಮೊದಲೇ ಕೊರೊನಾದಿಂದ ಆರ್ಥಿಕವಾಗಿ ಜರ್ಝರಿತರಾಗಿರುವ ರೈತರಿಗೆ ತಾವು ಬೆಳೆದ ಕಬ್ಬು ಬೆಳೆ ಕಟಾವಾಗಿ, ಸಕಾಲದಲ್ಲಿ ಹಣ ಸಿಗದಿದ್ದರೆ ಆರ್ಥಿಕವಾಗಿ ಇನ್ನಷ್ಟು ದೊಡ್ಡ ಹೊಡೆತ ಅನುಭವಿಸಲಿದ್ದಾರೆ. ಸರಕಾರವೇ ಕಾರ್ಖಾನೆ ನಡೆಸಲು ಅಥವಾ ಒ ಅಂಡ್‌ ಎಂ ವಿಧಾನದಲ್ಲಾದರೂ ಆರಂಭಿಸಲು ಒತ್ತಾಯ ಜಿಲ್ಲೆಯ ರೈತರು, ಹೋರಾಟಗಾರರ ವಿರೋಧ-ಮನವಿಗಳನ್ನು ಧಿಕ್ಕರಿಸಿ ಮೈಸೂರು ಸಕ್ಕರೆ ಕಾರ್ಖಾನೆಯನ್ನು ಗುತ್ತಿಗೆ ಪುನರ್ವಸತಿ ಕಾರಾರ‍ಯಚರಣೆ ವರ್ಗಾವಣೆ ಆಧಾರದ ಮೇಲೆ ಖಾಸಗಿಯವರಿಗೆ 40 ವರ್ಷಕ್ಕೆ ಗುತ್ತಿಗೆ ನೀಡಲು ರಾಜ್ಯ ಸರಕಾರ ತೀರ್ಮಾನಿಸಿದೆ. ಇದರೊಂದಿಗೆ ಸರಕಾರಿ ಏಕೈಕ ಸಕ್ಕರೆ ಕಾರ್ಖಾನೆಯೂ ಖಾಸಗಿಯವರ ಪಾಲಾಗುವ ಸಾಧ್ಯತೆಯಿದೆ. ಜು.8ರಂದು ಉಪ ಮುಖ್ಯಮಂತ್ರಿ ಗೋವಿಂದ ಎಂ.ಕಾರಜೋಳ ಅಧ್ಯಕ್ಷತೆಯಲ್ಲಿ ನಡೆದ ಸಚಿವ ಸಂಪುಟ ಉಪ ಸಮಿತಿ ಸಭೆಯು ಮೈಷುಗರ್‌ನ್ನು 10 ವರ್ಷಗಳಿಗೆ ಕಾರ್ಯಾಚರಣೆ ಮತ್ತು ನಿರ್ವಹಣೆ(ಒ ಅಂಡ್‌ ಎಂ) ವಿಧಾನದಲ್ಲಿ ಖಾಸಗಿಯವರಿಗೆ ವಹಿಸಿಕೊಡಲು ನಿರ್ಣಯ ಕೈಗೊಂಡಿತ್ತು. ಬಳಿಕ ಇದೀಗ ತನ್ನದೇ ನಿರ್ಣಯವನ್ನು ಬದಲಿಸಿಕೊಂಡು ಕಾರ್ಖಾನೆಯನ್ನು ಸಂಪೂರ್ಣವಾಗಿ ಗುತ್ತಿಗೆಗೆ ನೀಡಲು ನಿರ್ಧರಿಸಿದೆ. ಅದರಲ್ಲೂ 40 ವರ್ಷಗಳಿಗೆ ಗುತ್ತಿಗೆ ನೀಡಿರುವುದು ರೈತರ ಕಣ್ಣು ಕೆಂಪಾಗಿಸಿದೆ. ಸಚಿವ ಸಂಪುಟ ನಿರ್ಣಯದಂತೆ ಸರಕಾರದ ಪ್ರಧಾನ ಕಾರ‍್ಯದರ್ಶಿಯು ನ.18ರಂದು ಮೈಷುಗರ್‌ನ್ನು 2021-22ನೇ ಸಾಲಿನ ಹಂಗಾಮಿನಿಂದ ಗುತ್ತಿಗೆಗೆ ನೀಡುವ ಬಗ್ಗೆ ಆದೇಶ ಹೊರಡಿಸಿದ್ದಾರೆ. ಜತೆಗೆ, ಎಲ್‌ಆರ್‌ಒಟಿ ಆಧಾರದ ಮೇಲೆ 'ಇದ್ದಲ್ಲಿಇದ್ದಂತೆಯೇ' ಖಾಸಗಿಯವರಿಗೆ ನೀಡಲು 17 ಷರತ್ತುಗಳನ್ನು ವಿಧಿಸಲಾಗಿದೆ. ಇದರ ಆಧಾರದ ಮೇಲೆ ಟೆಂಡರ್‌ ಕರೆಯಲು ಸಿದ್ಧತೆಯೂ ನಡೆದಿದೆ. ಸರಕಾರದ ಈ ನಿರ್ಧಾರಕ್ಕೆ ರೈತರು, ಹೋರಾಟಗಾರರಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. ಸಕ್ಕರೆ ಲಾಬಿಗೆ ಮಣಿದಿರುವ ಸರಕಾರ ಎಲ್‌ಆರ್‌ಒಟಿ ಆಧಾರದ ಮೇಲೆ ಖಾಸಗಿಯವರಿಗೆ ಮೈಷುಗರ್‌ನ್ನು ನೀಡಿರುವುದು ಸರಿಯಲ್ಲ, ಯಾವುದೇ ಕಾರಣಕ್ಕೂ ಕಾರ್ಖಾನೆಯ ಖಾಸಗೀಕರಣ ಬೇಡ. ಸರಕಾರವೇ ಮೈಷುಗರ್‌ನ್ನು ನಡೆಸಬೇಕು. ಇಲ್ಲವೇ ಒ ಅಂಡ್‌ ಎಂ ವಿಧಾನದಲ್ಲಾದರೂ ಆರಂಭಿಸಬೇಕೆಂದು ಆಗ್ರಹಿಸಿದ್ದಾರೆ. ಆಲೆಮನೆಗಳಿಗೆ ಕಬ್ಬು ಸಾಗಣೆ ಈಗಾಗಲೇ ಆಲೆಮನೆಗಳು ಪ್ರಾರಂಭವಾಗಿದ್ದು, ಕಟಾವಿಗೆ ಬಂದಿರುವ ಕಬ್ಬನ್ನು ರೈತರಿಂದ ಆಲೆಮನೆ ಮಾಲೀಕರು ಖರೀದಿಸಲು ಮುಂದಾಗಿದ್ದಾರೆ. ಪ್ರತಿ ಟನ್‌ಗೆ 1800ರಿಂದ 2000ರೂ. ದರ ನೀಡಲಾಗುತ್ತಿದೆ. ಆಲೆಮನೆ ಮಾಲೀಕರೇ ಕಬ್ಬು ಕಟಾವು ಮತ್ತು ಸಾಗಣೆ ವೆಚ್ಚವನ್ನು ಭರಿಸುತ್ತಿದ್ದಾರೆ. ಮೈಷುಗರ್‌ ಕಾರ್ಖಾನೆ ಆರಂಭವಾಗದಿರುವ ಮುನ್ಸೂಚನೆಯಿಂದ ಕೆಲವು ರೈತರು ಬಂದಷ್ಟೇ ಬರಲಿ. ನಿಗದಿತ ಅವಧಿಯೊಳಗೆ ಕಬ್ಬು ಕಟಾವು ಮಾಡಬೇಕು ಎಂಬ ಉದ್ದೇಶದಿಂದ ಆಲೆಮನೆಗಳಿಗೆ ನೀಡುತ್ತಿದ್ದಾರೆ. ಜತೆಗೆ, ಪಾಂಡವಪುರ ಸಹಕಾರ ಸಕ್ಕರೆ ಕಾರ್ಖಾನೆ(ಪಿಎಸ್‌ಎಸ್‌ಕೆ) ಕೂಡ ಆರಂಭವಾಗಿರುವುದರಿಂದ ಜಿಲ್ಲೆಯಲ್ಲಿ ಕಳೆದ ವರ್ಷದಿಂದ ಕಬ್ಬಿಗೆ ಸ್ವಲ್ಪ ಬೇಡಿಕೆ ಬಂದಿದೆ. ಹೀಗಾಗಿ ಮೈಷುಗರ್‌ ವ್ಯಾಪ್ತಿಯ ಕಬ್ಬನ್ನು ಹಂಚಿಕೊಳ್ಳಲು ಪಿಎಸ್‌ಎಸ್‌ಕೆ ಹಾಗೂ ಇತರ ಖಾಸಗಿ ಸಕ್ಕರೆ ಕಾರ್ಖಾನೆಗಳು ಮುಂದಾಗುವ ಸಾಧ್ಯತೆಯಿದೆ. ಮೈಷುಗರ್‌ನ್ನು ಖಾಸಗಿಯವರಿಗೆ ವಹಿಸಲು ಸರಕಾರ ನಿರ್ಧರಿಸಿರುವುದು ಸರಿಯಲ್ಲ. ಜಿಲ್ಲೆಯ ಎಲ್ಲ ಶಾಸಕರು ಮುಖ್ಯಮಂತ್ರಿಗಳ ಮೇಲೆ ಒತ್ತಡ ತಂದು ಕಾರ್ಖಾನೆಯನ್ನು ಸರಕಾರಿ ಒಡೆತನದಲ್ಲಿ ನಡೆಸುವಂತೆ ಕ್ರಮ ಕೈಗೊಳ್ಳಬೇಕು. ಎಸ್‌.ಕೃಷ್ಣ, ಅಧ್ಯಕ್ಷ, ಮೈಷುಗರ್‌ ಕಬ್ಬು ಒಪ್ಪಿಗೆದಾರರ ಸಂಘ, ಮಂಡ್ಯ
from India & World News in Kannada | VK Polls https://ift.tt/35WP3HY
