ಹೊಸದಿಲ್ಲಿ: ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಮುಗಿದ ಕೇವಲ ಎರಡು ದಿನಗಳ ಬಳಿಕ ಅಂದರೆ ಅಕ್ಟೋಬರ್‌ 17 ರಿಂದ 2021ರ ಪುರುಷರ ಟಿ20 ವಿಶ್ವಕಪ್‌ ಟೂರ್ನಿ ಯುಎಇಯಲ್ಲಿ ಆರಂಭವಾಗಲಿದೆ. ನವೆಂಬರ್‌ 14 ರಂದು ಫೈನಲ್‌ ಹಣಾಹಣಿಯ ಮೂಲಕ ಟೂರ್ನಿ ಅಂತ್ಯವಾಗಲಿದೆ ಎಂದು ಇಎಸ್‌ಪಿಎನ್‌ ಕ್ರಿಕ್‌ಇನ್ಪೋ ವರದಿ ತಿಳಿಸಿದೆ. ಕಳೆದ ಮೇ ಮೊದಲನೇ ವಾರ ಬಯೋ ಬಬಲ್‌ ಒಳಗೆ ಕೋವಿಡ್‌-19 ಪ್ರಕರಣಗಳು ಕಂಡು ಬಂದ ಹಿನ್ನೆಲೆಯಲ್ಲಿ 2021ರ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯನ್ನು ಅರ್ಧಕ್ಕೆ ನಿಲ್ಲಿಸಲಾಗಿತ್ತು. ಸೆಪ್ಟೆಂಬರ್‌ 19 ರಿಂದ 14ನೇ ಐಪಿಎಲ್‌ ಟೂರ್ನಿಯ ಸೆಕಂಡ್ ಆಫ್‌ ಯುಎಇಯಲ್ಲಿ ಮುಂದುವರಿಯಲಿದ್ದು, ಅಕ್ಟೋಬರ್‌ 15 ರಂದು ಫೈನಲ್‌ ಪಂದ್ಯದ ಮೂಲಕ ಅಂತ್ಯವಾಗಲಿದೆ ಎಂದು ಎಎನ್‌ಐ ಇತ್ತೀಚೆಗೆ ವರದಿ ಮಾಡಿತ್ತು. ಮುಂದಿನ ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ ಒಟ್ಟು 16 ತಂಡಗಳು ಭಾಗವಹಿಸಲಿವೆ. ಈ ಹಿಂದೆ ಟೂರ್ನಿಯ ಆಯೋಜನೆಯ ಹಕ್ಕುಗಳನ್ನು ಭಾರತಕ್ಕೆ ನೀಡಲಾಗಿತ್ತು. ಆದರೆ, ಭಾರತದಲ್ಲಿ ಸದ್ಯ ಕೋವಿಡ್‌-19 ಪರಿಸ್ಥಿತಿ ಸರಿ ಇಲ್ಲದ ಕಾರಣ ಟೂರ್ನಿಯನ್ನು ಯುಎಇಗೆ ಶಿಫ್ಟ್ ಮಾಡಿರುವ ಬಗ್ಗೆ ಇದೀಗ ವರದಿಗಳು ತಿಳಿಸಿವೆ. ಆದರೆ, ಈ ಬಗ್ಗೆ ಅಧಿಕೃತ ಪ್ರಕಟಣೆ ಹೊರಬೀಳುವುದು ಬಾಕಿ ಇದೆ. "ಮೊದಲನೇ ಸುತ್ತಿನಲ್ಲಿ ಒಟ್ಟು 12 ಪಂದ್ಯಗಳು ನಡೆಯಲಿದ್ದು, ಇದರಲ್ಲಿ ಸೆಣಸುವ ಎಂಟು ತಂಡಗಳಲ್ಲಿ ನಾಲ್ಕು ತಂಡಗಳು(ಎರಡೂ ಗುಂಪಿನಿಂದ ಅಗ್ರ ಎರಡು ತಂಡಗಳು) ಸೂಪರ್‌12ಕ್ಕೆ ಅರ್ಹತೆಯನ್ನು ಪಡೆದುಕೊಳ್ಳಲಿವೆ," ಎಂದು ಇಎಸ್‌ಪಿಎನ್‌ ಕ್ರಿಕ್‌ಇನ್ಪೋ ವರದಿ ತಿಳಿಸಿದೆ. "ಟೂರ್ನಿಯ ಪ್ರಧಾನ ಸುತ್ತಿನ ಸೂಪರ್‌ 12ಕ್ಕೆ ಅರ್ಹತೆ ಪಡೆಯಲು ಬಾಂಗ್ಲಾದೇಶ, ಶ್ರೀಲಂಕಾ, ಐರ್ಲೆಂಡ್‌, ನೇದರ್‌ಲೆಂಡ್ಸ್‌, ಸ್ಕಾಟ್‌ಲೆಂಡ್‌, ಓಮನ್‌, ಪಪುವಾ ನ್ಯೂಗಿನಿಯಾ ಹಾಗೂ ನಮೀಬಿಯಾ ತಂಡಗಳು ಸೆಣಸಲಿವೆ. ಇಲ್ಲಿ ಯಶಸ್ಸು ಕಂಡ ನಾಲ್ಕು ತಂಡಗಳು ಐಸಿಸಿ ಶ್ರೇಯಾಂಕದ ಅಗ್ರ ಎಂಟು ತಂಡಗಳ ಜೊತೆಗೆ ಸೇರ್ಪಡೆಯಾಗಲಿವೆ," ಎಂದು ವರದಿ ಹೇಳಿದೆ. ಸೂಪರ್‌ 12ರ ಹಂತದಲ್ಲಿ ಒಟ್ಟು 30 ಪಂದ್ಯಗಳು ನಡೆಯಲಿದ್ದು, ಅಕ್ಟೋಬರ್‌24 ರಿಂದ ಯುಎಇಯ ದುಬೈ, ಅಬುಧಾಬಿ ಹಾಗೂ ಶಾರ್ಜಾ ಅಂಗಳಗಳಲ್ಲಿ ಆರಂಭವಾಗಲಿವೆ. ಸೂಪರ್‌ 12ರ ಪಂದ್ಯಗಳು ಮುಗಿದ ಬಳಿಕ ಮೂರು ಪ್ಲೇಆಫ್ಸ್‌ ಪಂದ್ಯಗಳು ನಡೆಯಲಿದ್ದು, ನಂತರ ಎರಡು ಸೆಮಿಫೈನಲ್ಸ್ ಹಾಗೂ ಒಂದು ಫೈನಲ್‌ ಪಂದ್ಯದ ಮೂಲಕ ಟೂರ್ನಿ ಅಂತ್ಯವಾಗಲಿದೆ. ಭಾರತದಿಂದ ಟಿ20 ವಿಶ್ವಕಪ್‌ ಟೂರ್ನಿ ಯುಎಇಗೆ ಶಿಫ್ಟ್ ಆದರೂ ಆತಿಥ್ಯದ ಹಕ್ಕುಗಳನ್ನು ಉಳಿಸಿಕೊಳ್ಳಲಿದೆ ಎಂದು ಈ ಹಿಂದೆ ನಡೆದಿದ್ದ ಬೋರ್ಡ್‌ ಮೀಟಿಂಗ್‌ನಲ್ಲಿ ಐಸಿಸಿ ತಿಳಿಸಿತ್ತು. ಯುಎಇಯಲ್ಲಿ ಟಿ20 ವಿಶ್ವಕಪ್‌ ಆಯೋಜಿಸುವ ಬಗ್ಗೆ ಐಸಿಸಿ ಈ ತಿಂಗಳಾಂತ್ಯದಲ್ಲಿ ಅಂತಿಮ ನಿರ್ಧಾರ ಪ್ರಕಟಿಸಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3h7JPOH
