ಶ್ರೀನಗರ: ಬಂಧನಕ್ಕೆ ಒಳಗಾಗಿದ ಉಗ್ರನನ್ನು ಮರುದಿನವೇ ಎನ್‌ಕೌಂಟರ್‌ನಲ್ಲಿ ಹತ್ಯೆ ಮಾಡಲಾಗಿದೆ. ಶ್ರೀನಗರದ ಪರಿಂಪೊರಾ ಪ್ರದೇಶದಲ್ಲಿ ಈ ನಡೆದಿದ್ದು, ಪಾಕಿಸ್ತಾನಿ ಪ್ರಜೆ ಕೂಡ ಗುಂಡೇಟಿಗೆ ಬಲಿಯಾಗಿದ್ದಾನೆ ಎಂದು ಪೊಲೀಸರು ಮಂಗಳವಾರ ತಿಳಿಸಿದ್ದಾರೆ. ಲಷ್ಕರ್‌ನ ಹಿರಿಯ ಕಮಾಂಡರ್ ಆಗಿದ್ದ ನದೀಮ್ ಅಬ್ರಾರ್ ಅನೇಕ ಹತ್ಯೆ ಪ್ರಕರಣಗಳಲ್ಲಿ ಭಾಗಿಯಾಗಿದ್ದ. ಸೋಮವಾರ ಪರಿಂಪೊರಾದಲ್ಲಿ ವಾಹನಗಳ ತಪಾಸಣೆ ವೇಳೆ ಆತ ಸಿಕ್ಕಿಬಿದ್ದಿದ್ದ. ಆತನನ್ನು ವಿಚಾರಣೆಗೆ ಒಳಪಡಿಸಲಾಗಿತ್ತು. ತಾನು ಮಲೂರಾ ಎಂಬಲ್ಲಿ ತನ್ನ ಎಕೆ 47 ರೈಫಲ್ ಇರಿಸಿದ್ದ ಸ್ಥಳವನ್ನು ಉಗ್ರ ಬಹಿರಂಗಪಡಿಸಿದ್ದ. ಅದನ್ನು ವಶಪಡಿಸಿಕೊಳ್ಳಲು ಆ ಮನೆಗೆ ಆತನನ್ನು ಕರೆದೊಯ್ಯಲಾಗಿತ್ತು. ಶಸ್ತ್ರಾಸ್ತ್ರ ವಶಪಡಿಸಿಕೊಳ್ಳುವುದಕ್ಕಾಗಿ ಮನೆ ಪ್ರವೇಶಿಸುತ್ತಿದ್ದಂತೆಯೇ, ಒಳಗೆ ಅಡಗಿ ಕುಳಿತಿದ್ದ ಅಬ್ರಾರ್‌ನ ಸಹಚರ, ಪಾಕಿಸ್ತಾನಿ ಪ್ರಜೆ ಗುಂಡಿನ ದಾಳಿ ನಡೆಸಿದ್ದಾನೆ. ಮನೆಯಲ್ಲಿ ಆತ ಇರುವುದರ ಬಗ್ಗೆ ಅಬ್ರಾರ್ ಮಾಹಿತಿ ನೀಡಿರಲಿಲ್ಲ. ಆರಂಭಿಕ ಸುತ್ತಿನ ಕಾದಾಟದಲ್ಲಿ ಸಿಆರ್‌ಪಿಎಫ್‌ನ ಮೂವರು ಸಿಬ್ಬಂದಿ ಗಾಯಗೊಂಡರು. ಅವರ ಜತೆಗಿದ್ದ ಅಬ್ರಾರ್ ಕೂಡ ಗಾಯಗೊಂಡಿದ್ದ. ಬಳಿಕ ಸ್ಥಳಕ್ಕೆ ಮತ್ತಷ್ಟು ಪಡೆಗಳನ್ನು ಕರೆಸಿಕೊಂಡು ತೀವ್ರ ಗುಂಡಿನ ದಾಳಿ ನಡೆಸಲಾಯಿತು. ಇದರಲ್ಲಿ ಅಬ್ರಾರ್ ಹಾಗೂ ಆತನ ಸಹಚರ ಇಬ್ಬರೂ ಹತ್ಯೆಯಾದರು. ಬಂಧಿಸಿದ್ದು ಹೇಗೆ?ಉಗ್ರರು ಹೆದ್ದಾರಿಯಲ್ಲಿ ದಾಳಿಯೊಂದನ್ನು ನಡೆಸಲು ಸಂಚು ರೂಪಿಸಿದ್ದಾರೆ ಎಂಬ ನಿರ್ದಿಷ್ಟ ಮಾಹಿತಿ ಆಧಾರದಲ್ಲಿ ಪೊಲೀಸರು ಕಠಿಣ ತಪಾಸಣೆ ನಡೆಸುತ್ತಿದ್ದರು. ಹೆದ್ದಾರಿಯುದ್ದಕ್ಕೂ ಪಡೆಗಳನ್ನು ನಿಯೋಜಿಸಲಾಗಿತ್ತು. ಪರಿಂಪೊರಾ ನೆಲೆಯ ಬಳಿ ವಾಹನವೊಂದನ್ನು ತಡೆದು, ಗುರುತಿನ ಚೀಟಿ ಕೇಳಲಾಯಿತು. ವಾಹನದ ಹಿಂದಿನ ಸೀಟಿನಲ್ಲಿ ಕುಳಿತಿದ್ದ ವ್ಯಕ್ತಿ ತನ್ನ ಬ್ಯಾಗ್ ತೆರೆದು ಗ್ರೆನೇಡ್ ಹೊರತೆಗೆಯಲು ಪ್ರಯತ್ನಿಸುತ್ತಿದ್ದಾಗ ಕೂಡಲೇ ಕಾರ್ಯಪ್ರವೃತ್ತರಾದ ಭದ್ರತಾ ಪಡೆ ಆತನನ್ನು ಸೆರೆಹಿಡಿಯಿತು. ಚಾಲಕ ಹಾಗೂ ಆ ವ್ಯಕ್ತಿ ಇಬ್ಬರನ್ನೂ ಸಮೀಪದ ಪೊಲೀಸ್ ಠಾಣೆಗೆ ಎಳೆದೊಯ್ಯಲಾಗಿತ್ತು. ವ್ಯಕ್ತಿಯ ಮಾಸ್ಕ್ ತೆರೆದ ಬಳಿಕ ಆತ ಎಲ್‌ಇಟಿ ಕಮಾಂಡರ್ ನದೀಮ್ ಅಬ್ರಾರ್ ಎಂದು ಗುರುತಿಸಲು ಸಾಧ್ಯವಾಯಿತು. ಆತನನ್ನು ಪೊಲೀಸರು, ಸಿಆರ್‌ಪಿಎಫ್ ಮತ್ತು ಸೇನೆ ಜಂಟಿಯಾಗಿ ವಿಚಾರಣೆಗೆ ಒಳಪಡಿಸಿತ್ತು. ಮತ್ತೊಂದು ಡ್ರೋನ್ ಪತ್ತೆಭಾರತದ ಮೇಲಿನ ಮತ್ತೊಂದು ಡ್ರೋನ್ ದಾಳಿಯನ್ನು ವಿಫಲಗೊಳಿಸಿದ ಬಳಿಕ, ಮಂಗಳವಾರ ಜಮ್ಮುವಿನ ಮೂರು ವಿಭಿನ್ನ ಸೇನಾ ನೆಲೆಗಳ ಬಳಿ ಮತ್ತೆ ಡ್ರೋನ್ ಪತ್ತೆಯಾಗಿದೆ. ಜಮ್ಮುವಿನ ಕುಂಜ್ವಾನಿ, ಸುಂಜ್ವಾನ್ ಹಾಗೂ ಕಲುಚಕ್ ಪ್ರದೇಶಗಳಲ್ಲಿ ರಾತ್ರಿ 2ರ ಸುಮಾರಿಗೆ ಡ್ರೋನ್ ಕಾಣಿಸಿಕೊಂಡಿದೆ. ಆದರೆ ಕೆಲವು ಸಮಯದ ಬಳಿಕ ಅದು ನಾಪತ್ತೆಯಾಗಿದೆ. ಒಂದೇ ಡ್ರೋನ್ ಈ ಮೂರೂ ಪ್ರದೇಶಗಳಿಗೆ ಬಂದಿತ್ತೇ ಅಥವಾ ಮೂರು ವಿಭಿನ್ನ ಡ್ರೋನ್‌ಗಳು ಹಾರಾಡಿದ್ದವೇ ಎನ್ನುವುದು ಸ್ಪಷ್ಟವಾಗಿಲ್ಲ. ಕಳೆದ ಮೂರು ದಿನಗಳಲ್ಲಿ ಐದು ಡ್ರೋನ್‌ಗಳು ಕಾಣಿಸಿಕೊಂಡಿವೆ.
from India & World News in Kannada | VK Polls https://ift.tt/3A2bedw
