ಮುಂಬಯಿ: ಒಂದು ಕೆ.ಜಿ 100 ರೂ. ಒಳಗೆ ಸಿಗುವಾಗ ಒಂದು ಡಜನ್‌ ಮಾವಿನ ಹಣ್ಣನ್ನು 1.20 ಲಕ್ಷ ರೂಪಾಯಿಗೆ ಮಾರಲು ಸಾಧ್ಯವೇ? ಖಂಡಿತಾ ಸಾಧ್ಯ ಎಂಬುದನ್ನು ಸಾಧಿಸಿ ತೋರಿಸಿದ್ದಾಳೆ . ಆಕೆ ಯಾರಿಗೂ ಮೋಸ ಮಾಡಿಲ್ಲ. ಬದಲಾಗಿ ತನ್ನ ಪರಿಶ್ರಮ ಹಾಗೂ ವಿದ್ಯೆ ಕಲಿಯುವ ಹಂಬಲಕ್ಕೆ ದೊರೆತ ಫಲವದು. ಬಾಲಕಿಯ ಹೆಸರು ತುಳಸಿ ಕುಮಾರಿ. ಐದನೇ ತರಗತಿಯಲ್ಲಿ ಕಲಿಯುತ್ತಿರುವ ಬಾಲಕಿಗೆ ವಿದ್ಯಾಭ್ಯಾಸ ಮುಂದುವರಿಸುವ ಆಸೆ. ಆದರೆ, ಕೊರೊನಾ ಲಾಕ್‌ಡೌನ್‌ನಿಂದ ಶಾಲೆ ಬಂದ್‌ ಆಗಿದೆ. ಆನ್‌ಲೈನ್‌ ಕ್ಲಾಸ್‌ನಲ್ಲಿ ಪಾಲ್ಗೊಳ್ಳಲು ಆಕೆಯ ಬಳಿ ಸ್ಮಾರ್ಟ್‌ಫೋನ್‌ ಇಲ್ಲ. ಹೀಗಾಗಿ ಸ್ಥಳೀಯ ಮಾಧ್ಯವೊಂದರ ಮೂಲಕ ಮೊಬೈಲ್‌ ಕೊಡಿಸುವಂತೆ ದಾನಿಗಳಿಗೆ ಮೊರೆ ಇಟ್ಟಿದ್ದಳು. ಯಾರೂ ಆಕೆಯ ಬೇಡಿಕೆಗೆ ಸ್ಪಂದಿಸಿರಲಿಲ್ಲ. ನಿರಾಸೆಗೆ ಒಳಗಾಗದ ಆಕೆ ಮಾವಿನ ಹಣ್ಣು ಮಾರಿ, ದುಡ್ಡು ಸಂಪಾದಿಸಿ ಮೊಬೈಲ್‌ ಕೊಳ್ಳಲು ಮುಂದಾದಳು. ಈ ವಿಷಯ ತಿಳಿದ ಶೈಕ್ಷಣಿಕ ಸಂಸ್ಥೆಯೊಂದರ ವ್ಯವಸ್ಥಾಪಕ ನಿರ್ದೇಶಕ ಅಮೇಯ ಹೇಟೆ ಆಕೆಗೆ ಸಹಾಯ ಮಾಡಲು ಮುಂದಾದರು. ಅದಕ್ಕಾಗಿ ಅವರು ಕಂಡುಕೊಂಡ ಮಾರ್ಗವೆಂದರೆ ಬಾಲಕಿಯಿಂದ ಮಾವಿನ ಹಣ್ಣು ಖರೀದಿ. ತುಳಸಿ ಕುಮಾರಿ ಮಾವಿನ ಹಣ್ಣು ಮಾರುತ್ತಿದ್ದ ಜಾಗಕ್ಕೆ ಹೋದ ಅವರು 12 (ಡಜನ್‌) ಮಾವಿನ ಹಣ್ಣುಗಳನ್ನು ಖರೀದಿಸಿದರು. ಒಂದು ಹಣ್ಣಿಗೆ 10 ಸಾವಿರ ರೂಪಾಯಿಯಂತೆ ಒಟ್ಟು 1 ಲಕ್ಷ 20 ಸಾವಿರ ರೂಪಾಯಿಯನ್ನು ಆಕೆಯ ತಂದೆಯ ಖಾತೆಗೆ ವರ್ಗಾಯಿಸಿದರು. ಬಳಿಕ ಆಕೆಗೆ ವಿಷಯ ತಿಳಿಸಿ ಮೊಬೈಲ್‌ ಕೊಂಡುಕೊಂಡು ಆನ್‌ಲೈನ್‌ ಕ್ಲಾಸ್‌ನಲ್ಲಿ ಪಾಲ್ಗೊಳ್ಳುವಂತೆ ಹೇಳಿದರು. ಬಳಿಕ ತಂದೆ ಸ್ಮಾರ್ಟ್‌ಫೋನ್‌ ಕೊಡಿಸಿದ್ದಾರೆ. ''ಬಾಲಕಿಯ ಉದ್ದೇಶ ಹಾಗೂ ಅದಕ್ಕಾಗಿ ಆಕೆ ಮಾವಿನ ಹಣ್ಣು ಮಾರುವುದಕ್ಕೆ ಮುಂದಾದ ಕತೆ ಕೇಳಿ ಸಹಾಯ ಮಾಡಬೇಕು ಎಂದು ಅನಿಸಿತು. ಆಕೆಯ ಶಿಕ್ಷಣಕ್ಕೆ ಇನ್ನಷ್ಟು ನೆರವು ನೀಡುತ್ತೇನೆ,'' ಎಂದು ಅಮೇಯ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/35VtBmD
