ಹೊಸದಿಲ್ಲಿ: ನ್ಯೂಜಿಲೆಂಡ್‌ ವಿರುದ್ಧ ಉದ್ಘಾಟನಾ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್‌ ಹಣಹಣಿಯಲ್ಲಿ ಭಾರತ ತಂಡ ಸೋಲು ಅನುಭವಿಸಿದ ಬಳಿಕ ಎಲ್ಲರ ಚಿತ್ತ ಇದೀಗ ಶ್ರೀಲಂಕಾ ವಿರುದ್ಧದ ಸೀಮಿತ ಓವರ್‌ಗಳ ಸರಣಿ ಮೇಲೆ ನೆಟ್ಟಿದೆ. ಜುಲೈ 13 ರಿಂದ ಆರಂಭವಾಗುವ ಲಂಕಾ ಪ್ರವಾಸಕ್ಕೆ 20 ಸದಸ್ಯರ ಭಾರತ ತಂಡವನ್ನು ಈಗಾಗಲೇ ಬಿಸಿಸಿಐ ಪ್ರಕಟಿಸಿದೆ. ಶಿಖರ್ ಧವನ್‌ಗೆ ನಾಯಕತ್ವದ ಜವಾಬ್ದಾರಿ ನಿಡಲಾಗಿದ್ದು, ರಾಹುಲ್‌ ದ್ರಾವಿಡ್‌ ಅವರು ಮುಖ್ಯ ಕೋಚ್‌ ಆಗಿ ಕಾಣಿಸಿಕೊಳ್ಳಲಿದ್ದಾರೆ. 20 ಸದಸ್ಯರ ತಂಡದಲ್ಲಿ ಪ್ಲೇಯಿಂಗ್‌ ಇಲೆವೆನ್‌ಗೆ ಆಯ್ಕೆ ಮಾಡುವುದು ಟೀಮ್‌ ಮ್ಯಾನೇಜ್‌ಮೆಂಟ್‌ಗೆ ಸ್ವಲ್ಪ ತಲೆ ನೋವುಂಟಾಗಬಹುದು. ಏಕೆಂದರೆ ತಂಡದಲ್ಲಿ ಸ್ಥಾನ ಪಡೆದಿರುವ ಎಲ್ಲಾ ಆಟಗಾರರು ಕೂಡ ಪ್ರತಿಭಾವಂತ ಆಟಗಾರರಾಗಿದ್ದಾರೆ. ಆರಂಭಿಕರಾಗಿ ನಾಯಕ ಶಿಖರ್ ಧವನ್ ಹಾಗೂ ಫೃಥ್ವಿ ಶಾ ಕಾಣಿಸಿಕೊಳ್ಳುವುದು ಬಹುತೇಕ ಖಚಿತ. ಮಧ್ಯಮ ಕ್ರಮಾಂಕದಲ್ಲಿ ಹಾರ್ದಿಕ್‌ ಪಾಂಡ್ಯ, ಬೌಲಿಂಗ್ ವಿಭಾಗದಲ್ಲಿ ಉಪ ನಾಯಕ ಭುವನೇಶ್ವರ್‌ ಕುಮಾರ್ ಆಡುವುದು ಬಹುತೇಕ ಸ್ಪಷ್ಟವಾಗಿದೆ. ಹಾಗಾಗಿ, ಇನ್ನುಳಿದ ಸ್ಥಾನಗಳಲ್ಲಿ ಯಾರಿಗೆ ಅವಕಾಶ ಸಿಗಲಿದೆ ಎಂಬುದು ತೀವ್ರ ಕುತೂಹಲ ಕೆರಳಿಸಿದೆ. ಧವನ್-ಪೃಥ್ವಿ ಆರಂಭಿಕರು: ಶ್ರೀಲಂಕಾ ವಿರುದ್ಧದ ಮೂರು ಪಂದ್ಯಗಳ ಓಡಿಐ ಸರಣಿಗೆ ನಾಯಕ ಶಿಖರ್ ಧವನ್ ಅವರ ಜೊತೆಗೆ ಪೃಥ್ವಿ ಇನಿಂಗ್ಸ್ ಅರಂಭಿಸುವುದು ಬಹುತೇಕ ಖಚಿತ. 2021ರ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌) ಟೂರ್ನಿಯ ಮೊದಲ ಅವಧಿಯಲ್ಲಿ ಈ ಜೋಡಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಅತ್ಯುತ್ತಮ ಪ್ರದರ್ಶನ ತೋರಿತ್ತು. ಈ ಹಿನ್ನೆಲೆಯಲ್ಲಿ ಈ ಜೋಡಿ ಭಾರತದ ಪರ ಇನಿಂಗ್ಸ್ ಆರಂಭಿಸುವುದು ಪಕ್ಕಾ. ಈ ಹಿನ್ನೆಲೆಯಲ್ಲಿ ದೇವದತ್‌ ಪಡಿಕ್ಕಲ್ ಬೆಂಚ್‌ ಕಾಯಬೇಕಾಗುತ್ತದೆ. ಐಪಿಎಲ್‌ ಹಾಗೂ ದೇಶಿ ಕ್ರಿಕೆಟ್‌ನಲ್ಲಿ ಮೂರನೇ ಕ್ರಮಾಂಕದಲ್ಲಿ ಯಶಸ್ಸು ಗಳಿಸಿರುವ ಸೂರ್ಯಕುಮಾರ್‌ ಯಾದವ್‌ ಅವರು ಮೂರನೇ ಕ್ರಮಾಂಕದಲ್ಲಿ ಆಡಬಹುದಾಗಿದೆ. 2021ರ ಆವೃತ್ತಿಯಲ್ಲಿ ಆಡಿದ್ದ ಏಳು ಪಂದ್ಯಗಳಲ್ಲಿ ಅವರು ಮುಂಬೈ ಇಂಡಿಯನ್ಸ್ ಪರ 173 ರನ್‌ ಗಳಿಸಿದ್ದರು. ಅಲ್ಲದೆ, ಇಂಗ್ಲೆಂಡ್‌ ವಿರುದ್ಧ ತವರು ಟಿ20 ಸರಣಿಯಲ್ಲಿ ಆಡಿದ್ದ ಚೊಚ್ಚಲ ಪಂದ್ಯದಲ್ಲಿಯೇ ಅವರು ಅರ್ಧಶತಕ ಸಿಡಿಸಿದ್ದರು. ಮನೀಷ್‌ -ಕಿಶನ್ ಇನ್‌?: ಇನ್ನು ನಾಲ್ಕು ಹಾಗೂ ಐದನೇ ಕ್ರಮಾಂಕಗಳಲ್ಲಿ ಕ್ರಮವಾಗಿ ಮನೀಷ್‌ ಪಾಂಡೆ ಹಾಗೂ ಇಶಾನ್‌ ಕಿಶನ್ ಅವರನ್ನು ಆಡಿಸಬಹುದಾಗಿದೆ. ಅರ್ಧಕ್ಕೆ ನಿಂತಿರುವ ಐಪಿಎಲ್‌ ಟೂರ್ನಿಯಲ್ಲಿ ಮನೀಷ್‌ ಪಾಂಡೆ ಆಡಿದ್ದ ಐದು ಇನಿಂಗ್ಸ್‌ಗಳಲ್ಲಿ 193 ರನ್‌ಗಳನ್ನು ಗಳಿಸಿದ್ದರು. ಇಶಾನ್‌ ಕಿಶನ್ ಅವರು ಐಪಿಎಲ್‌ ಟೂರ್ನಿಯಲ್ಲಿ ವೈಫಲ್ಯ ಅನುಭವಿಸಿದ್ದರು. ಆದರೆ, ಇಂಗ್ಲೆಂಡ್‌ ವಿರುದ್ಧ ತಮ್ಮ ಚೊಚ್ಚಲ ಟಿ20 ಪಂದ್ಯದಲ್ಲಿಯೇ ಅರ್ಧಶತಕ ಸಿಡಿಸಿದ್ದರು. ಈ ಕಾರಣದಿಂದ ಅವರನ್ನು ಮೊದಲ ಆಯ್ಕೆಯ ವಿಕೆಟ್‌ ಕೀಪರ್‌ ಆಗಿ ಆಡಿಸಬಹುದು. ಹಾರ್ದಿಕ್‌ ಪಾಂಡ್ಯ ಹಾಗೂ ಕೃಣಾಲ್‌ ಪಾಂಡ್ಯ ಅವರಿಂದ ಮಧ್ಯಮ ಕ್ರಮಾಂಕ ಬಲಿಷ್ಠವಾಗಿದ್ದು. ಕೋಲ್ಕತಾ ನೈಟ್‌ ರೈಡರ್ಸ್ ತಂಡದ ಸ್ಟಾರ್‌ ಬ್ಯಾಟ್ಸ್‌ಮನ್‌ ನಿತೀಶ್‌ ರಾಣಾ ಅವರಿಗೆ ಅಂತಿಮ 11ರಲ್ಲಿ ಸ್ಥಾನ ನೀಡುವುದು ಅಥವಾ ಬಿಡುವುದು ಕಠಿಣ ಕರೆಯಾಗಿದೆ. ಯುಜ್ವೇಂದ್ರ ಚಹಲ್‌ ಅವರು ಆಡುವುದು ಬಹುತೇಕ ಖಚಿತವಾಗಿದ್ದು, ಅವರಿಗೆ ಕೃಣಾಲ್‌ ಪಾಂಡ್ಯ ಸಾಥ್‌ ನೀಡುವ ಸಾಧ್ಯತೆ ಇದೆ. ಉಪ ನಾಯಕ ಭುವನೇಶ್ವರ್‌ ಕುಮಾರ್ ಹಾಗೂ ದೀಪಕ್‌ ಚಹರ್‌ ಅವರು ವೇಗದ ಬೌಲಿಂಗ್ ವಿಭಾಗವನ್ನು ಮುನ್ನಡೆಸಲಿದ್ದು, ಹಾರ್ದಿಕ್‌ ಪಾಂಡ್ಯ ಈ ಸರಣಿಯಲ್ಲಿ ಬೌಲ್‌ ಮಾಡುವ ನಿರೀಕ್ಷೆ ಇದೆ. ರಾಜಸ್ಥಾನ್‌ ರಾಯಲ್ಸ್ ಪರ ಐಪಿಎಲ್‌ನಲ್ಲಿ ಮಿಂಚಿದ್ದ ಚೇತನ್‌ ಸಕಾರಿಯಾ ಅವರು ಅಂತಾರಾಷ್ಟ್ರೀಯ ಓಡಿಐ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡುವ ಸಾಧ್ಯತೆ ಇದೆ. ಶ್ರೀಲಂಕಾ ವಿರುದ್ಧದ ಓಡಿಐ ಸರಣಿಗೆ ಭಾರತ ಪ್ಲೇಯಿಂಗ್‌ XI: ಶಿಖರ್ ಧವನ್(ನಾಯಕ), ಪೃಥ್ವಿ ಶಾ, ಸೂರ್ಯಕುಮಾರ್‌ ಯಾದವ್‌, ಮನೀಷ್‌ ಪಾಂಡೆ, ಇಶಾನ್‌ ಕಿಶನ್ (ವಿ.ಕೀ), ಹಾರ್ದಿಕ್‌ ಪಾಂಡ್ಯ, ಕೃಣಾಲ್‌ ಪಾಂಡ್ಯ, ಭುವನೇಶ್ವರ್‌ ಕುಮಾರ್, ದೀಪಕ್‌ ಚಹರ್‌, ಯುಜ್ವೇಂದ್ರ ಚಹಲ್‌, ಚೇತನ್‌ ಸಕರಿಯಾ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3A3KdGL
