ಹೊಸದಿಲ್ಲಿ: ಕ್ರಿಸ್‌ ವೋಕ್ಸ್(18ಕ್ಕೆ4 ) ಮಾರಕ ಬೌಲಿಂಗ್‌ ದಾಳಿ ಹಾಗೂ (79*) ಅಜೇಯ ಅರ್ಧಶತಕದ ನೆರವಿನಿಂದ ತಂಡ ಮೊದಲನೇ ಓಡಿಐ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ 5 ವಿಕೆಟ್ ಗೆಲುವು ಪಡೆಯಿತು. ಆ ಮೂಲಕ ಮೂರು ಪಂದ್ಯಗಳ ಓಡಿಐ ಸರಣಿಯಲ್ಲಿ ಆತಿಥೇಯರು 1-0 ಮುನ್ನಡೆ ಗಳಿಸಿದ್ದಾರೆ. ಚೆಸ್ಟರ್‌-ಲೀ ಸ್ಟ್ರೀಟ್‌ನ ರಿವರ್ಸ್‌ಸೈಡ್‌ ಅಂಗಣದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್‌ ಮಾಡಿದ ಶ್ರೀಲಂಕಾ ತಂಡ 42.3 ಓವರ್‌ಗಳಿಗೆ 185 ರನ್‌ಗಳಿಗೆ ಆಲೌಟ್‌ ಆಯಿತು. ಬಳಿಕ ಗುರಿ ಹಿಂಬಾಲಿಸಿದ ಇಂಗ್ಲೆಂಡ್‌ 34.5 ಓವರ್‌ಗಳಿಗೆ ಐದು ವಿಕೆಟ್ ನಷ್ಟಕ್ಕೆ 189 ರನ್ ಗಳಿಸಿ ಸುಲಭ ಗೆಲುವು ಪಡೆಯಿತು. ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್‌ ಮಾಡುವಂತೆ ಶ್ರೀಲಂಕಾ ತಂಡವನ್ನು ಆಹ್ವಾನಿಸಿದ ಇಂಗ್ಲೆಂಡ್‌ ನಾಯಕ ಐಯಾನ್‌ ಮಾರ್ಗನ್‌ ಅವರ ನಿರ್ಧಾರವನ್ನು ಸಹ ಆಟಗಾರರು ಸಕಾರಗೊಳಿಸಿದರು. ಆರಂಭದಿಂದಲೇ ಮಾರಕ ದಾಳಿ ನಡೆಸಿದ ಕ್ರಿಸ್‌ ವೋಕ್ಸ್ ಹಾಗೂ ಡೇವಿಡ್‌ ವಿಲ್ಲೀ ಶ್ರೀಲಂಕಾ ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳನ್ನು ಬಹುಬೇಗ ಕೆಡವಿದರು. ಶ್ರೀಲಂಕಾ ಪರ ಅದ್ಬುತ ಪ್ರದರ್ಶನ ತೋರಿದ ಆರಂಭಿಕ ಬ್ಯಾಟ್ಸ್‌ಮನ್‌ ಕುಸಾಲ್‌ ಪೆರೆರಾ ಹಾಗೂ ಹಸರಂಗ ಇಂಗ್ಲೆಂಡ್‌ ಬೌಲರ್‌ಗಳನ್ನು ಮೆಟ್ಟಿ ನಿಂತರು. ಈ ಜೋಡಿ ಮುರಿಯದ ನಾಲ್ಕನೇ ವಿಕೆಟ್‌ಗೆ 99 ರನ್ ಜೊತೆಯಾಟವಾಡುವ ಮೂಲಕ ಆರಂಭಿಕ ಮೂರು ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿದ್ದ ಶ್ರೀಲಂಕಾ ತಂಡವನ್ನು ಮೇಲೆತ್ತಿದರು. ಆದರೆ. 65 ಎಸೆತಗಳಲ್ಲಿ ಒಂದು ಸಿಕ್ಸರ್‌ ಹಾಗೂ 6 ಬೌಂಡರಿಯೊಂದಿಗೆ 54 ರನ್ ಗಳಿಸಿ ಆಡುತ್ತಿದ್ದ ಹಸರಂಗ ಅವರನ್ನು ಕ್ರಿಸ್‌ ವೋಕ್ಸ್ ಔಟ್‌ ಮಾಡುವ ಮೂಲಕ ದೊಡ್ಡ ಜೊತೆಯಾಟವನ್ನು ಬ್ರೇಕ್‌ ಮಾಡಿದರು. ನಂತರ ಕ್ರೀಸ್‌ಗೆ ಬಂದ ಧನಂಜಯ್‌ ಲಕ್ಷಣ್‌, ಆರ್‌ ಮೆಂಡಿಸ್‌ ಸೇರಿದಂತೆ ಇನ್ನುಳಿದ ಆಟಗಾರರು ಬಾಲಂಗೋಚಿಗಳಂತೆ ಪೆವಿಲಿಯನ್‌ ಸೇರಿದರು. ಆದರೆ, ಆರಂಭದಿಂದಲೂ ಒಂದು ತುದಿಯಲ್ಲಿ ಗಟ್ಟಿಯಾಗಿ ನಿಂತು ಆಡುತ್ತಿದ್ದ ಕುಸಾಲ್‌ ಪೆರೆರಾ 81 ಎಸೆತಗಳಲ್ಲಿ 73 ರನ್ ಗಳಿಸಿ ಡೇವಿಡ್‌ ವಿಲ್ಲೀಗೆ ವಿಕೆಟ್ ಒಪ್ಪಿಸಿದರು. ಅಂತಿಮವಾಗಿ ಪ್ರವಾಸಿಗರು 185ಕ್ಕೆ ಆಲೌಟ್‌ ಆದರು. ಇಂಗ್ಲೆಂಡ್‌ ಪರ ಕ್ರಿಸ್‌ ವೋಕ್ಸ್ 4 ವಿಕೆಟ್ ಪಡೆದರೆ, ಡೇವಿಡ್‌ ವಿಲ್ಲೀ 3 ವಿಕೆಟ್ ಪಡೆದುಕೊಂಡರು. ಬಳಿಕ ಸುಲಭ ಗುರಿ ಹಿಂಬಾಲಿಸಿದ ಇಂಗ್ಲೆಂಡ್‌ ತಂಡಕ್ಕೆ ಆರಂಭಿಕರಾದ ಜಾನಿ ಬೈರ್‌ಸ್ಟೋವ್‌ ಹಾಗೂ ಲಿಯಾಮ್‌ ಲಿವಿಂಗ್‌ಸ್ಟೋನ್‌ ಜೋಡಿ ಮುರಿಯದ ಮೊದಲನೇ ವಿಕೆಟ್‌ಗೆ 54 ರನ್ ಗಳಿಸಿ ತಂಡಕ್ಕೆ ಉತ್ತಮ ಆರಂಭ ನೀಡಿತ್ತು. ಆದರೆ, ಲಿಯಾಮ್‌ ಲಿವಿಂಗ್‌ಸ್ಟೋನ್‌(9) ಹಾಗೂ ಜಾನಿ ಬೈರ್‌ಸ್ಟೋವ್‌(43) ಕೇವಲ 5 ರನ್‌ಗಳ ಅಂತರದಲ್ಲಿ ವಿಕೆಟ್ ಒಪ್ಪಿಸಿದರು. ಜೋ ರೂಟ್‌ ಅಜೇಯ ಅರ್ಧಶತಕ: ಮೂರನೇ ಕ್ರಮಾಂಕದಲ್ಲಿ ಕ್ರೀಸ್‌ಗೆ ಬಂದ ಜೋ ರೂಟ್‌ ಸೊಗಸಾದ ಬ್ಯಾಟಿಂಗ್‌ ಪ್ರದರ್ಶನ ತೋರಿದರು. ಎದುರಿಸಿದ 87 ಎಸೆತಗಳಲ್ಲಿ ಅವರು 4 ಬೌಂಡರಿಗಳೊಂದಿಗೆ 79 ರನ್ ಗಳಿಸಿ ಇಂಗ್ಲೆಂಡ್‌ ತಂಡದ 5 ವಿಕೆಟ್‌ಗಳ ಗೆಲುವಿಗೆ ನೆರವಾದರು. ಇವರಿಗೆ ಕೆಲ ಕಾಲ ಸಾಥ್ ನೀಡಿದ್ದ ಮೊಯೀನ್‌ ಅಲಿ 28 ರನ್ ಗಳಿಸಿದ್ದರು. ಶ್ರೀಲಂಕಾ ಪರ ಅತ್ಯುತ್ತಮ ಬೌಲಿಂಗ್‌ ಮಾಡಿದ ದುಷ್ಮಂತ ಚಮೀರಾ 3 ವಿಕೆಟ್ ಪಡೆದು ಯಶಸ್ವಿ ಬೌಲರ್‌ ಎನಿಸಿಕೊಂಡರು. ಇವರಿಗೆ ಸಾಥ್ ನೀಡಿದ ಬಿನುರಾ ಫೆರ್ನಾಂಡೊ ಹಾಗೂ ಚಮಿಕಾ ಕರುಣರತ್ನೆ ತಲಾ ಒಂದೊಂದು ವಿಕೆಟ್ ಕಬಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3w3ZwvF
