ಕೋಲ್ಕತಾ: ಅಧಿಕಾರಿಯ ಸೋಗಿನಲ್ಲಿ ನಕಲಿ ಕಾರ್ಯಕ್ರಮ ಶಿಬಿರ ನಡೆಸುತ್ತಿದ್ದ ದೇಬಂಜನ್ ದೇವ್, ತಾನು ಈ ಕೃತ್ಯ ಎಸಗಲು ಕಾರಣ ಏನೆಂಬುದನ್ನು ತೆರೆದಿಟ್ಟಿದ್ದಾರೆ. ಕುಟುಂಬದ ಒತ್ತಡ ಹಾಗೂ ಪ್ರಚಾರದ ಆಸೆಯಿಂದ ಈ ಕೆಲಸ ಮಾಡಿದ್ದಾಗಿ ಹೇಳಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ಕುಟುಂಬದವರ ಒತ್ತಡಕ್ಕೆ ಸಿಲುಕಿದ್ದ ಆತ, ಐಎಎಸ್ ಅಧಿಕಾರಿಯಂತೆ ಸುಳ್ಳು ಹೇಳಿಕೊಂಡಿದ್ದ. ಪ್ರಚಾರಕ್ಕಾಗಿ ನಕಲಿ ಲಸಿಕೆ ಶಿಬಿರ ಆಯೋಜಿಸಿದ್ದ. ಆದರೆ ಆತ ಹೇಳುತ್ತಿರುವುದು ಎಲ್ಲವನ್ನು ಖಾತರಿಪಡಿಸಿಕೊಳ್ಳಬೇಕಾಗಿದೆ. ಆರಂಭದಿಂದಲೂ ಆತ ಅಧಿಕಾರಿಗಳನ್ನು ದಾರಿತಪ್ಪಿಸುವ ಪ್ರಯತ್ನ ಮಾಡುತ್ತಿದ್ದಾನೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಲಸಿಕೆ ಶಿಬಿರಕ್ಕೆ ನಿಧಿ ಹೊಂದಿಸಲು ಆತ ಕೋಲ್ಕತಾ ಪಾಲಿಕೆ ಗುತ್ತಿಗೆದಾರರಿಂದ ಮತ್ತು ವರ್ತಕರಿಗೆ ಹಣ ಪಡೆದುಕೊಂಡಿದ್ದ. ಅದಕ್ಕೆ ಪರ್ಯಾಯವಾಗಿ ಗುತ್ತಿಗೆದಾರರಿಗೆ ಪ್ರಾಜೆಕ್ಟ್‌ಗಳನ್ನು ನೀಡುವ ಭರವಸೆ ನೀಡಿದ್ದ. ಇದಕ್ಕಾಗಿ ಕೆಎಂಸಿ ಗುತ್ತಿಗೆದಾರರ ಸ್ನೇಹ ಸಂಪಾದಿಸಿದ್ದ. ಅವರಿಂದ ಉಪ ಗುತ್ತಿಗೆಗಳನ್ನು ಪಡೆದುಕೊಂಡಿದ್ದ. ಇದಕ್ಕೆ ಪ್ರತಿಯಾಗಿ ತನ್ನ ಉನ್ನತ ಸಂಪರ್ಕಗಳ ಮೂಲಕ ದೊಡ್ಡ ಮಟ್ಟದ ಟೆಂಡರ್‌ಗಳನ್ನು ಕೊಡಿಸುವ ಆಮಿಷ ಒಡ್ಡಿದ್ದ. ದೇವ್‌ನ ತಂದೆ ಹಿರಿಯ ಅಬಕಾರಿ ಅಧಿಕಾರಿಯಾಗಿ ನಿವೃತ್ತರಾಗಿದ್ದರು. ಮಗನನ್ನು ಐಎಎಸ್ ಅಧಿಕಾರಿಯಾಗಿ ನೋಡುವ ಆಸೆ ಹೊಂದಿದ್ದರು. 2017ರ ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ಮೊದಲ ಪ್ರಯತ್ನ ನಡೆಸಿದ್ದ ದೇವ್, ಅದರಲ್ಲಿ ವಿಫಲನಾಗಿದ್ದ. ಆದರೆ ತಾನು ಐಎಎಸ್ ಅಧಿಕಾರಿಯಾಗಿರುವುದಾಗಿ 2018ರಲ್ಲಿ ತಂದೆಗೆ ಹೇಳಿಕೊಂಡಿದ್ದ. ಜನಪ್ರಿಯತೆಯ ಬಯಕೆ ಹೊಂದಿದ್ದ ಆತ, ಅದಕ್ಕಾಗಿ ಸಮಾಜ ಸೇವೆಯ ಕೆಲಸ ಮಾಡುತ್ತಿದ್ದ. ಸ್ಥಳೀಯ ಮಟ್ಟದಲ್ಲಿ ರಕ್ತದಾನ ಶಿಬಿರಗಳು, ಆಹಾರ ವಿತರಣೆ ಕಾರ್ಯಕ್ರಮಗಳು ಮತ್ತು ಪರಿಹಾರ ಶಿಬಿರಗಳನ್ನು ಆಯೋಜಿಸುತ್ತಿದ್ದ. ಸ್ಥಳೀಯ ಮಟ್ಟದ ಮುಖಂಡರು ಮತ್ತು ಪೊಲೀಸರು ಕೂಡ ಸಾಮಾಜಿಕ ಕಾರ್ಯಗಳನ್ನು ಆಯೋಜಿಸುವಾಗ ಆತನ ಸಹಾಯ ಪಡೆಯುತ್ತಿದ್ದರು. ಇಷ್ಟೇ ಅಲ್ಲ, ಆತ ಸಿನಿಮಾ ನಿರ್ದೇಶನದಲ್ಲಿ ನೋಂದಾಯಿಸಿಕೊಂಡು ಕೋಲ್ಕತಾ ಸಿನಿಮೋತ್ಸವದಲ್ಲಿ ಪ್ರವೇಶವನ್ನೂ ಗಿಟ್ಟಿಸಿದ್ದ. ಅಧಿಕಾರಿಗಳ ಜತೆಗೆ ಅಷ್ಟೊಂದು ಬಾಂಧವ್ಯ ಬೆಳೆಸಿಕೊಂಡಿದ್ದ. ಕಳೆದ ವರ್ಷ ಸುಮಾರು 3 ಲಕ್ಷ ರೂ ಹೂಡಿಕೆ ಮಾಡಿ ಮಾಸ್ಕ್‌ಗಳು, ಸ್ಯಾನಿಟೈಜರ್ ಮತ್ತು ಪಿಪಿಇ ಕಿಟ್‌ಗಳನ್ನು ಹೋಲ್‌ಸೇಲ್ ದರದಲ್ಲಿ ಖರೀದಿಸಿ ಸ್ಥಳೀಯ ಮಾರುಕಟ್ಟೆಗಳಲ್ಲಿ ಮಾರಾಟ ಮಾಡಿ ಲಾಭ ಗಳಿಸಿದ್ದ. ಈ ಹಣವನ್ನು ಅಗತ್ಯವಿರುವವರು, ವೈದ್ಯರಿಗೆ ನೆರವು ನೀಡಲು ವಿನಿಯೋಗಿಸಿದ್ದ. ಜತೆಗೆ ಸಮುದಾಯ ಅಡುಗೆಮನೆಯನ್ನು ಆಯೋಜಿಸಿದ್ದ. ಆತನ ಕೆಲಸಗಳಿಗೆ ಭಾರಿ ಬೆಂಬಲ ದೊರಕಿದ್ದರಿಂದ ಕಚೇರಿಯೊಂದನ್ನು ಕೂಡ ತೆರೆದಿದ್ದ. 80 ಲಕ್ಷ ರೂ ನೀಡಿದ್ದ ಉದ್ಯಮಿನಕಲಿ ಲಸಿಕೆಗಳನ್ನು ವ್ಯವಸ್ಥೆ ಮಾಡಲು ಹಣ ಸಂಗ್ರಹಿಸಲು ಆತ ಬಯಸಿದ್ದ. ಇದರಿಂದ ಸಾಕಷ್ಟು ಒಳ್ಳೆಯ ಹೆಸರು ಬರುತ್ತದೆ ಎನ್ನುವುದು ಆತನ ನಿರೀಕ್ಷೆಯಾಗಿತ್ತು. ಉದ್ಯಮಿಯೊಬ್ಬರು ಆತನಿಗೆ 80 ಲಕ್ಷ ರೂ ಹಣ ನೀಡಿದ್ದರು. ಕೆಎಂಸಿ ಕ್ರೀಡಾಂಗಣ ನಿರ್ಮಾಣದ ಗುತ್ತಿಗೆಯನ್ನು ಅವರಿಗೆ ಕೊಡಿಸುವುದಾಗಿ ಭರವಸೆ ನೀಡಿದ್ದ. ಮತ್ತೊಬ್ಬ ವ್ಯಾಪಾರಿಗೆ 10 ಲಕ್ಷ ರೂ ವಂಚಿಸಿದ್ದ. ಈಗ ಆಯೋಜಿಸಿದ್ದ ಲಸಿಕೆ ಶಿಬಿರದಲ್ಲಿ ಅತಿಥಿಯಾಗಿ ಭಾಗವಹಿಸಿದ್ದ ಸಂಸದೆ ಮಿಮಿ ಚಕ್ರವರ್ತಿ, ಲಸಿಕೆ ಪಡೆದುಕೊಂಡ ತಮಗೆ ಯಾವುದೇ ಸಂದೇಶ ಬಾರದಿದ್ದರಿಂದ ಅನುಮಾನಗೊಂಡು ಪೊಲೀಸರಿಗೆ ದೂರು ನೀಡಿದ್ದರು. ಬಳಿಕ ದೇವ್‌ನ ಬೆಳಕಿಗೆ ಬಂದಿತ್ತು.
from India & World News in Kannada | VK Polls https://ift.tt/3y9vMzh
