ಹೊಸದಿಲ್ಲಿ: ಸೌಥ್‌ಹ್ಯಾಂಪ್ಟನ್‌ನಲ್ಲಿ ಇತ್ತೀಚೆಗೆ ಮುಕ್ತಾಯವಾಗಿದ್ದ ಉದ್ಘಾಟನಾ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್ ಹಣಾಹಣಿಯಲ್ಲಿ ನ್ಯೂಜಿಲೆಂಡ್‌ ವಿರುದ್ಧ ಸೋಲು ಅನುಭವಿಸಿದ್ದ ಭಾರತ ತಂಡವನ್ನು ಮಾಜಿ ನಾಯಕ ಕಪಿಲ್ ದೇವ್ ಸಮರ್ಥಿಸಿಕೊಂಡಿದ್ದಾರೆ. ಡಬ್ಲ್ಯುಟಿಸಿ ಫೈನಲ್ ಪಂದ್ಯದಲ್ಲಿ ಸೋಲುವುದರೊಂದಿಗೆ 2013ರ ಬಳಿಕ ಐಸಿಸಿ ಟೂರ್ನಿಗಳಲ್ಲಿ ಭಾರತ ತಂಡದ ಸತತ ಐದನೇ ವೈಫಲ್ಯ ಇದಾಗಿದೆ. ನಾಯಕತ್ವದ ಹುಡುಗರು ಒತ್ತಡವನ್ನು ಎದುರಿಸುವಲ್ಲಿ ವಿಫಲರಾಗುತ್ತಿದ್ದಾರೆ ಎಂಬುದು ಇದಕ್ಕೆ ಪ್ರಮುಖ ಕಾರಣ ಎನ್ನಬಹುದು. ಆದರೆ, ಫೈನಲ್ ಹಣಾಹಣಿಯ ಸೋಲಿನ ಹೊರತಾಗಿಯೂ ಸೆಮಿಫೈನಲ್‌ ಅಥವಾ ಫೈನಲ್ ತಲುಪುವುದು ಕೂಡ ತಂಡದ ದೊಡ್ಡ ಸಾಧನೆ ಎಂಬುದು ಕಪಿಲ್ ದೇವ್ ಅಭಿಪ್ರಾಯ. ಈ ಹಿಂದೆ ಕಠಿಣ ಸನ್ನಿವೇಶಗಳಲ್ಲಿ ಅತ್ಯುತ್ತಮ ಪ್ರದರ್ಶನ ತೋರುವ ಮೂಲಕ ಭಾರತ ತಂಡ ಹಲವು ಬಾರಿ ಜಯ ದಾಖಲಿಸಿದೆ. ಹಾಗಾಗಿ ಒಂದೇ ಒಂದು ಸೋಲು ತಂಡದ ಚಾರಿತ್ರ್ಯವನ್ನು ಬದಲಾಯಿಸುವುದಿಲ್ಲ ಎಂದು ಭಾರತ ತಂಡದ ಮಾಜಿ ನಾಯಕ ತಿಳಿಸಿದ್ದಾರೆ. "ಪ್ರತಿ ಟೂರ್ನಿಗಳಲ್ಲಿಯೂ ಭಾರತ ತಂಡ ಸೆಮಿಫೈನಲ್‌ ಹಾಗೂ ಫೈನಲ್‌ಗೆ ತಲುಪುತ್ತಿದೆ. ಹಾಗಾದರೆ ಇದು ತಂಡದ ಸಾಧನೆ ಅಲ್ಲವೇ? ಒಂದು ಪಂದ್ಯದಲ್ಲಿ ಸೋತ ಮಾತ್ರಕ್ಕೆ ನಾವು ಬಹುಬೇಗ ಟೀಕಿಸಲು ಮುಂದಾಗುತ್ತೇವೆ. ನೋಡಿ, ಒಂದು ತಂಡ ಎಂದ ಮಾತ್ರಕ್ಕೆ ಪ್ರತಿ ಬಾರಿಯೂ ಟ್ರೋಫಿ ಗೆಲ್ಲಲು ಸಾಧ್ಯವಾಗುವುದಿಲ್ಲ. ಅವರು(ಭಾರತ) ಎಂತಹ ಅತ್ಯುತ್ತಮ ಪ್ರದರ್ಶನವನ್ನು ತೋರಿದ್ದಾರೆ ಎಂಬುದನ್ನು ನೀವೇ ಒಮ್ಮೆ ನೋಡಿ! ವಿಶ್ವಕಪ್‌ ಸೆಮಿಫೈನಲ್‌ ಅಥವಾ ಮಹತ್ವದ ಒಂದು ಹಣಾಹಣಿಯಲ್ಲಿ ಅವರು ಸೋತಿದ್ದಾರೆ ಎಂದಾದರೆ, ಅವರು ಒತ್ತಡಕ್ಕೆ ಬಲಿಯಾಗುತ್ತಿದ್ದಾರೆಂದು ಅರ್ಥವಲ್ಲ," ಎಂದು ಕಪಿಲ್ ದೇವ್ ಸ್ಪೋರ್ಟ್ಸ್‌ ಯಾರಿ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಹೇಳಿದ್ದಾರೆ. ಮಾತು ಮುಂದುವರಿಸಿದ ಅವರು, "ಒತ್ತಡಕ್ಕೆ ಭಾರತ ತಂಡ ಬಲಿಯಾಗುತ್ತಿದೆ ಎಂದು ನಾನು ಒಪ್ಪುವುದಿಲ್ಲ. ಆ ದಿನ ಎದುರಾಳಿ ತಂಡದ ಪರ ಅತ್ಯುತ್ತಮವಾಗಿರುತ್ತದೆ ಅಥವಾ ಎದುರಾಳಿ ತಂಡ ಭಾರತಕ್ಕಿಂತ ಉತ್ತಮ ಪ್ರದರ್ಶನ ತೋರಿರುತ್ತದೆ. ಆದರೆ, ಒಂದೇ ಒಂದು ಪಂದ್ಯದಲ್ಲಿ ಸೋತ ಮಾತ್ರಕ್ಕೆ ಮಾಧ್ಯಮಗಳು ಭಾರತ 100 ಬಾರಿ ಸೋಲು ಅನುಭವಿಸಿದ ರೀತಿ ಟೀಕೆಗಳನ್ನು ಮಾಡುತ್ತಿವೆ. ಅಷ್ಟಕ್ಕೂ ಕೊಹ್ಲಿ ಹುಡುಗರು ಒತ್ತಡದಲ್ಲಿ ಪಂದ್ಯವನ್ನು ಬಿಟ್ಟುಕೊಡುತ್ತಿಲ್ಲ, ಅವರು ಈ ಹಿಂದೆ ಹಲವು ಬಾರಿ ಒತ್ತಡದ ಪಂದ್ಯಗಳಲ್ಲಿ ಕೆಚ್ಚೆದೆಯ ಪ್ರದರ್ಶನ ತೋರಿ ಗೆಲುವು ಸಾಧಿಸಿದ್ದಾರೆ," ಎಂದು ಭಾರತ ತಂಡವನ್ನು ಸಮರ್ಥಿಸಿಕೊಂಡರು. 2019-21ರ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ನಲ್ಲಿ ಭಾರತ ತಂಡ 12 ಪಂದ್ಯಗಳಲ್ಲಿ ಜಯ, 4 ಸೋಲು ಹಾಗೂ ಒಂದೇ ಒಂದು ಪಂದ್ಯದಲ್ಲಿ ಡ್ರಾ ಸಾಧಿಸಿತ್ತು. ಆ ಮೂಲಕ ವಿರಾಟ್‌ ಕೊಹ್ಲಿ ಬಳಗ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಅಗ್ರ ಸ್ಥಾನವನ್ನು ಪಡೆದುಕೊಂಡಿತ್ತು. ಆಗಸ್ಟ್ 4 ರಿಂದ ಇಂಗ್ಲೆಂಡ್‌ ವಿರುದ್ಧ ಐದು ಪಂದ್ಯಗಳ ಟೆಸ್ಟ್ ಸರಣಿ ಆಡುವ ಮೂಲಕ ಭಾರತ, 2021/23ರ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಅಭಿಯಾನ ಶುರು ಮಾಡಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3w0f5Vl
