ಹೊಸದಿಲ್ಲಿ: ಜಮ್ಮು ಮತ್ತು ಕಾಶ್ಮೀರ ಹಾಗೂ ಲಡಾಕ್‌ ಪ್ರಾಂತ್ಯಗಳನ್ನು ಭಾರತದಿಂದ ಪ್ರತ್ಯೇಕ ಎಂದು ತೋರಿಸುವ ನಕ್ಷೆ ಪ್ರಕಟಿಸಿದ್ದ ಟ್ವಿಟರ್‌ ಕಂಪನಿ ವಿರುದ್ಧ ಉತ್ತರಪ್ರದೇಶ ಪೊಲೀಸರು ಎಫ್‌ಐಆರ್‌ ದಾಖಲಿಸಿದ್ದಾರೆ. ಬಹುರಾಷ್ಟ್ರೀಯ ಕಂಪನಿ ಟ್ವಿಟರ್‌ನ ಭಾರತದ ವ್ಯವಸ್ಥಾಪಕ ನಿರ್ದೇಶಕ ಮನೀಶ್‌ ಮಹೇಶ್ವರಿ ಅವರನ್ನು ಕೂಡ ಎಫ್‌ಐಆರ್‌ನಲ್ಲಿ ಹೆಸರಿಸಲಾಗಿದೆ. ಐಟಿ ಕಾಯಿದೆಯ ಸೆಕ್ಷನ್‌ 74 ಮತ್ತು ಭಾರತೀಯ ದಂಡ ಸಂಹಿತೆಯ ಸೆಕ್ಷನ್‌ 505(2) ಅಡಿಯಲ್ಲಿ'ಶತೃತ್ವ ಬಿತ್ತುವುದು, ಸಮುದಾಯಗಳ ನಡುವೆ ದ್ವೇಷಕ್ಕೆ ಪ್ರಚೋದನೆ' ಆರೋಪವನ್ನು ಕಂಪನಿಯ ವಿರುದ್ಧ ಹೊರಿಸಲಾಗಿದೆ. ಇದೊಂದು ದೇಶದ್ರೋಹದ ಕೃತ್ಯ, ಉದ್ದೇಶಪೂರ್ವಕವಾಗಿಯೇ ಎಸಗಲಾಗಿದೆ ಎಂದು ಬಜರಂಗ ದಳದ ಮುಖಂಡ ಪ್ರವೀಣ್‌ ಭಾತಿ ದೂರಿನಲ್ಲಿ ಆರೋಪಿಸಿದ್ದಾರೆ. ಕೇಂದ್ರ ಸರಕಾರದ ಹೊಸ ಐಟಿ ಕಾನೂನು ಪಾಲನೆಗೆ ಟ್ವಿಟರ್‌ ಹಿಂದೇಟು ಹಾಕುತ್ತಾ ಸರಕಾರದ ಕೆಂಗಣ್ಣಿಗೆ ಗುರಿಯಾಗಿರುವ ನಡುವೆಯೇ ಈ ಎಫ್‌ಐಆರ್‌ ದಾಖಲಾಗಿದೆ. ಕೆಲವು ತಿಂಗಳ ಹಿಂದೆ ಕೂಡ ಟ್ವಿಟರ್‌, ಭಾರತೀಯ ನಕ್ಷೆಯಲ್ಲಿ ಲೇಹ್‌ ಪ್ರಾಂತ್ಯವು ಚೀನಾಕ್ಕೆ ಸೇರಿದ್ದು ಎಂದು ಬಿತ್ತರಿಸುವ ಮೂಲಕ ಪ್ರಮಾದ ಎಸಗಿತ್ತು. ತೀವ್ರ ಆಕ್ಷೇಪ ವ್ಯಕ್ತವಾದ ಬಳಿಕ ತಪ್ಪು ನಕ್ಷೆಗಳನ್ನು ಟ್ವಿಟರ್‌ ಡಿಲೀಟ್‌ ಮಾಡಿತ್ತು. ಹಲ್ಲೆ ಪ್ರಕರಣದಲ್ಲೂ ಎಫ್‌ಐಆರ್‌: ಘಾಜಿಯಾಬಾದ್‌ ಮುಸ್ಲಿಂ ವೃದ್ಧರೊಬ್ಬರ ಮೇಲಿನ ಹಲ್ಲೆ ಪ್ರಕರಣದ ವಿಡಿಯೊ ಪ್ರಸಾರಕ್ಕೆ ಅವಕಾಶ ನೀಡಿದ ಪ್ರಕರಣದಲ್ಲೂ ಮನೀಶ್‌ ಮಹೇಶ್ವರಿ ವಿರುದ್ಧ ಎಫ್‌ಐಆರ್‌ ದಾಖಲಾಗಿದೆ. 2 ದಿನಗಳ ಗಡುವು: ಕೆಲವು ಗಂಟೆಗಳವರೆಗೆ ಕೇಂದ್ರ ಸಚಿವ ರವಿಶಂಕರ್‌ ಪ್ರಸಾದ್‌ ಮತ್ತು ಕಾಂಗ್ರೆಸ್‌ ಮುಖಂಡ ಶಶಿ ತರೂರ್‌ ಅವರ ಅಧಿಕೃತ ಟ್ವಿಟರ್‌ ಖಾತೆಗಳನ್ನು ಬ್ಲಾಕ್‌ ಮಾಡಿದ್ದ ಕೃತ್ಯದ ಬಗ್ಗೆ ವಿವರ ನೀಡುವಂತೆ ಸಂಸದೀಯ ಸ್ಥಾಯಿ ಸಮಿತಿಯು ಟ್ವಿಟರ್‌ ಕಂಪನಿಗೆ ಎರಡು ದಿನಗಳ ಗಡುವು ನೀಡಿದೆ. ಜೂ.21ರಂದು ರಾಜಕೀಯ ನಾಯಕರ ಟ್ವಿಟರ್‌ ಖಾತೆಗಳು ತಾತ್ಕಾಲಿಕವಾಗಿ ಬ್ಲಾಕ್‌ ಆಗಿದ್ದವು. ಅಮೆರಿಕದ ಹಕ್ಕು ಸ್ವಾಮ್ಯ ಕಾಯಿದೆ ಉಲ್ಲಂಘನೆ ಹಿನ್ನೆಲೆಯಲ್ಲಿ ಈ ಕ್ರಮ ಜರುಗಿಸಲಾಗಿತ್ತು ಎಂದು ಈ ಹಿಂದೆ ಟ್ವಿಟರ್‌ ಸಮರ್ಥನೆ ನೀಡಿದೆ. ಮುಂದಿನ ವಾರಗಳಲ್ಲಿ ಯೂಟ್ಯೂಬ್‌, ಫೇಸ್‌ಬುಕ್‌ ಇಂಡಿಯಾ, ಗೂಗಲ್‌ ಇಂಡಿಯಾ ಮುಖ್ಯಸ್ಥರಿಗೆ ಐಟಿ ಕುರಿತಾದ ಸಂಸದೀಯ ಸ್ಥಾಯಿ ಸಮಿತಿಯು ಸಮನ್ಸ್‌ ನೀಡುವ ನಿರೀಕ್ಷೆಯಿದೆ.
from India & World News in Kannada | VK Polls https://ift.tt/3drISzP
