ಹೊಸದಿಲ್ಲಿ: ಇಂಗ್ಲೆಂಡ್ ವಿರುದ್ಧ ಭಾರತ ತಂಡ ಐದು ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್ ಸರಣಿಯನ್ನು ಆಡಲಿದೆ. ಈ ಮಹತ್ವದ ಸರಣಿಯಲ್ಲಿ ಭಾರತ ಟೆಸ್ಟ್‌ ಕ್ರಿಕೆಟ್ ತಂಡವು ತನ್ನ ಆರಂಭಿಕ ಬ್ಯಾಟ್ಸ್‌ಮನ್‌ಗಳ ಸಂಯೋಜನೆ ಬದಲಾಯಿಸಿಕೊಳ್ಳಬೇಕು ಎಂದು ಮಾಜಿ ನಾಯಕ ಅಭಿಪ್ರಾಯ ಪಟ್ಟಿದ್ದಾರೆ. ವಿರಾಟ್‌ ಕೊಹ್ಲಿ ಸಾರಥ್ಯದ ಟೀಮ್‌ ಇಂಡಿಯಾ ಅಂಕಪಟ್ಟಿಯ ಅಗ್ರಸ್ಥಾನಿಯಾಗಿ ಚೊಚ್ಚಲ ಆವೃತ್ತಿಯ ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಟೂರ್ನಿಯಲ್ಲಿ ಫೈನಲ್‌ಗೆ ಕಾಲಿಟ್ಟಿತ್ತು. ಆದರೆ, ನಿರೀಕ್ಷಿತ ಪ್ರದರ್ಶನ ಹೊರತರಲಾಗದೆ ಫೈನಲ್‌ನಲ್ಲಿ ನ್ಯೂಜಿಲೆಂಡ್‌ ಎದುರು 8 ವಿಕೆಟ್‌ಗಳ ಹೀನಾಯ ಸೋಲುಂಡಿತು. ಈ ಬಗ್ಗೆ ಆಜ್‌ ತಕ್‌ ವಾಹಿನಿಯ ಕ್ರೀಡಾ ಕಾರ್ಯಕ್ರಮ 'ಸ್ಪೋರ್ಟ್ಸ್‌ ತಕ್‌'ನಲ್ಲಿ ಮಾತನಾಡಿರುವ ಜನಪ್ರಿಯ ಕಾಮೆಂಟೇಟರ್‌ ಕೂಡ ಆದ ಸುನಿಲ್‌ ಗವಾಸ್ಕರ್‌, ವಿರುದ್ದದ ಸರಣಿಗೆ ಭಾರತ ತಂಡದ ಆರಂಭಿಕನಾಗಿ ಶುಭಮನ್‌ ಗಿಲ್‌ ಬದಲು ಮಯಾಂಕ್ ಅಗರ್ವಾಲ್ ಆಡಬೇಕು ಎಂದಿದ್ದಾರೆ. ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಟೂರ್ನಿಯಲ್ಲಿ ಮಿಂಚಿನ ಪ್ರದರ್ಶನ ನೀಡಿದ್ದ ಯುವ ಓಪನರ್ ಮಯಾಂಕ್ ಅಗರ್ವಾಲ್ ಅವರನ್ನು ಆಸ್ಟ್ರೇಲಿಯಾ ಪ್ರವಾಸಲ್ಲಿ 2 ಪಂದ್ಯಗಳಲ್ಲಿ ನೀಡಿದ ಕಳಪೆ ಪ್ರದರ್ಶನ ಆಧಾರದ ಮೇಲೆ ತಂಡದಿಂದ ಕೈ ಬಿಡಲಾಯಿತು. ಬಳಿಕ ಗಿಲ್‌ಗೆ ಓಪನರ್ ಆಗಿ ಆಡುವ ಅವಕಾಶ ಸಿಕ್ಕಿತ್ತು. ಕರ್ನಾಟಕದ ಅನುಭವಿ ಬ್ಯಾಟ್ಸ್‌ಮನ್‌ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಈವರೆಗೆ ಆಡಿದ 14 ಪಂದ್ಯಗಳಿಂದ 45.74ರ ಸರಾಸರಿಯಲ್ಲಿ 1052 ರನ್‌ಗಳನ್ನು ಬಾರಿಸಿದ್ದಾರೆ. ಇದರಲ್ಲಿ ದ್ವಿಶತಕ ಸೇರಿದಂತೆ ಮೂರು ಶತಕಗಳು ಸೇರಿವೆ. ಇದೀಗ ಭಾರತ ತಂಡ ಇಂಗ್ಲೆಂಡ್ ವಿರುದ್ದದ ಸರಣಿಗೂ ಮುನ್ನ ಎರಡು ಅಭ್ಯಾಸ ಪಂದ್ಯಗಳನ್ನು ಕೇಳಿದೆ. ಇದರಲ್ಲಿ ಮಯಾಂಕ್‌ಗೆ ಓಪನರ್ ಆಗಿ ಆಡುವ ಅವಕಾಶ ಸಿಕ್ಕರೆ ಅದನ್ನು ಹೇಗಗೆ ಬಳಸಿಕೊಳ್ಳುತ್ತಾರೆ ಎಂಬುದರ ಮೇಲೆ ಭಾರತ ತಂಡಕ್ಕೆ ಅvr ಕಮ್‌ಬ್ಯಾಕ್‌ ನಿರ್ಧಾರವಾಗಲಿದೆ. "ಮಯಾಂಕ್ ಅಗರ್ವಾಲ್ ಓಪನರ್ ಆಗಿ ಅತ್ಯುತ್ತಮ ಕೆಲಸ ಮಾಡಿದ್ದಾರೆ. ಆರಂಭಿಕನಾಗಿ ಆಡಿ ದ್ವಿಶತಕ ಬಾರಿಸಿದ ಅನುಭವ ಅವರಲ್ಲಿದೆ. ಇಂಗ್ಲೆಂಡ್ ವಿರುದ್ಧದ ಟೆಸ್ಟ್‌ ಸರಣಿಗೂ ಮುನ್ನ ಎರಡು ಅಭ್ಯಾಸ ಪಂದ್ಯ ನೀಡುವಂತೆ ಬಿಸಿಸಿಐ ಮತ್ತು ಕಾರ್ಯದರ್ಶಿ ಜಯ ಶಾ, ಇಂಗ್ಲೆಂಡ್ ಕ್ರಿಕೆಟ್ ಸಂಸ್ಥೆಯೊಂದಿಗೆ ಚರ್ಚೆ ನಡೆಸುತ್ತಿದ್ದಾರೆ. ಇದು ಸಾಧ್ಯವಾದರೆ ಗಿಲ್‌ ಮತ್ತು ಅಗರ್ವಾಲ್ ಇಬ್ಬರಲ್ಲಿ ಯಾರು ಆರಂಭಿಕರು ಎಂದು ನಿರ್ಧರಿಸಲು ಸಾಧ್ಯವಾಗುತ್ತದೆ," ಎಂದು ಗವಾಸ್ಕರ್‌ ಹೇಳಿದ್ದಾರೆ. "ಅಭ್ಯಾಸ ಪಂದ್ಯದಲ್ಲಿ ರೋಹಿತ್‌ ಶರ್ಮಾಗೆ ವಿಶ್ರಾಂತಿ ನೀಡಬಹುದು. ಹೀಗಾಗಿ ಮಯಾಂಕ್ ಮತ್ತು ಶುಭಮನ್‌ ಅವರನ್ನು ಆರಂಭಿಕರಾಗಿ ಆಡಲು ಬಿಡಬಹುದು. ಬಳಿಕ ಇಬ್ಬರಲ್ಲಿ ಯಾರಿಗೆ ಇಂಗ್ಲೆಂಡ್ ಪಿಚ್‌ಗಳಲ್ಲಿ ಆಡುವ ಸಾಮರ್ಥ್ಯ ಇದೆ ಎಂಬುದನ್ನು ಅರ್ಥಮಾಡಿಕೊಂಡು ಅವಕಾಶ ನೀಡಬಹುದಾಗಿದೆ," ಎಂದು ಭಾರತ ತಂಡಕ್ಕೆ ಬೇಕಾದ ಅಗತ್ಯದ ಬದಲಾವಣೆ ಕುರಿತಾಗಿ ಗವಾಸ್ಕರ್‌ ಮಾತನಾಡಿದ್ದಾರೆ. "ಗಿಲ್‌ ಅವರ ಫುಟ್‌ವರ್ಕ್‌ ಹೇಳಿಕೊಳ್ಳುವಂತ್ತಿಲ್ಲ. ಇಂಗ್ಲೆಂಡ್‌ನಲ್ಲಿ ಮಾತ್ರವಲ್ಲಿ ಭಾರತದಲ್ಲಿ ಆಡುವಾಗಲೂ ಅವರ ಫುಟ್‌ವರ್ಕ್‌ ಅಷ್ಟೇನು ಉತ್ತಮವಾಗಿ ಇರಲಿಲ್ಲ. ಕೇವಲ ತಮ್ಮ ದೇಹದ ಭಾರವನ್ನು ಮಾತ್ರ ಮುಂದೆ ತರುತ್ತಾರೆ. ಇದರಿಂದ ಬ್ಯಾಕ್‌ಫುಟ್‌ಗೆ ಹೋಗಿ ಆಡಲು ಅವರಿಂದ ಸಾಧ್ಯವಾಗುತ್ತಿಲ್ಲ," ಎಂದು ವಿವರಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3wZEP5D
