ಒಲಿಂಪಿಕ್ಸ್‌: ಈಜಿನಲ್ಲಿ ಒಬ್ಬ ಚಾಂಪಿಯನ್‌ ಸ್ವಿಮ್ಮರ್‌ಗೆ ಬೇಕಾದ ಎತ್ತರ ಇಲ್ಲದೇ ಇದ್ದರೂ ಆತ್ಮಬಲ ಮತ್ತು ಸಾಧಿಸುವ ಹಠದಿಂದ ವಹಿಸಿರುವ ಪರಿಶ್ರಮದ ಫಲವಾಗಿ ಇಂದು ಟೋಕಿಯೋ ಒಲಿಂಪಿಕ್ಸ್‌ಗೆ 200 ಮೀ. ಬಟರ್‌ಫ್ಲೈ ವಿಭಾಗದಲ್ಲಿ 'ಎ' ಸ್ಟ್ಯಾಂಡರ್ಡ್‌ ಅರ್ಹತೆ ಮೊದಲ ಭಾರತೀಯ ಎಂಬ ಹೆಗ್ಗಳಿಗೆ ಬಸವನಗುಡಿ ಆಕ್ವಾಟಿಕ್‌ ಸೆಂಟರ್‌ (ಬಿಸಿಎ)ನ ಈಜುಗಾರ ಸಾಜನ್ ಪ್ರಕಾಶ್ ಅವರಿಗೆ ಸಿಕ್ಕಿದೆ. ಇದು ಭಾರತೀಯ ಇತಿಹಾಸದಲ್ಲಿ ಅವಿಸ್ಮರಣೀಯ ಸಾಧನೆ ಆಗಿದೆ. ಕೋಚ್‌ ಅವರ ಗರಡಿಯಲ್ಲಿ ಪಳಗಿದ ಹಲವು ಚಾಂಪಿಯನ್‌ ಈಜುಪಟುಗಳಲ್ಲಿ ಕೂಡ ಒಬ್ಬರಾಗಿದ್ದು, ರೋಮ್‌ನಲ್ಲಿ ಶನಿವಾರ ನಡೆದ ಅರ್ಹತಾ ಸುತ್ತಿನ ಈಜು ಸ್ಪರ್ಧೆಯಲ್ಲಿ 200 ಮೀ. ಬಟರ್‌ಫ್ಲೈ ಸ್ಪರ್ಧೆಯನ್ನು 1:56.30 ಸೆಕೆಂಡ್‌ಗಳಲ್ಲಿ ಪೂರೈಸಿ 'ಎ' ಸ್ಟ್ಯಾಂಡರ್ಡ್‌ ಒಲಿಂಪಿಕ್ಸ್‌ ಅರ್ಹತೆ ಪಡೆದುಕೊಂಡಿದ್ದಾರೆ. ಕೇರಳದ ತಿರುವನಂತಪುರ ಮೂಲದವರಾದ 27 ವರ್ಷದ ಸಾಜನ್ ಪ್ರಕಾಶ್, 2020 ಕ್ರೀಡಾಕೂಟಕ್ಕೆ 'ಎ' ಗುಣಮಟ್ಟದ ಅರ್ಹತೆ ಪಡೆಯಲು 1:56.48 ಸೆಕೆಂಡ್‌ಗಳ ಒಳಗೆ ಗುರಿ ಮುಟ್ಟಬೇಕಿತ್ತು. ಇದೀಗ .18 ಸೆಕೆಂಡ್‌ಗಳ ಮುನ್ನಡೆಯಲ್ಲಿ ಅರ್ಹತೆ ಸಂಪಾದಿಸಿದ್ದಾರೆ. ಕಳೆದ ವಾರ ಸರ್ಬಿಯಾದಲ್ಲಿ ನಡೆದ ಈಜು ಸ್ಪರ್ಧೆಯಲ್ಲಿ ಸಾಜನ್ ಚಿನ್ನ ಗೆದ್ದಿದ್ದರು. ಆದರೆ, ಕೆಲವೇ ಸೆಕೆಂಡ್‌ಗಳ ಅಂತರದಲ್ಲಿ ಅರ್ಹತೆ ತಪ್ಪಿಸಿಕೊಂಡಿದ್ದರು. ಈಗ ಸ್ವರ್ಣ ಪದಕದ ಜೊತೆಗೆ 'ಎ' ಸ್ಯಾಂಡರ್ಡ್‌ ಅರ್ಹತೆಯನ್ನೂ ಬಾಚಿಕೊಂಡಿದ್ದಾರೆ. ಇದು ಸಾಜನ್ ಅವರ ವೃತ್ತಿ ಬದುಕಿನ ಅತ್ಯಂತ ವೇಗದ ಈಜಾಗಿದೆ. ಮೊದಲ 50 ಮೀ. ದೂರವನ್ನು 25.99 ಸೆಕೆಂಡ್‌ಗಳಲ್ಲಿ ಪೂರೈಸಿ ನಂತರದ 50 ಮೀ. ದೂರಕ್ಕೆ 29.57 ಸೆಕೆಂಡ್‌ಗಳನ್ನು ತೆಗೆದುಕೊಂಡರು. ಕೊನೆಯ ಎರಡೂ 50 ಮೀ.ಗಳನ್ನು 30.41 ಸೆಕೆಂಡ್‌ಗಳಲ್ಲಿ ಪೂರೈಸುವ ಮೂಲಕ ಸ್ವರ್ಣಕ್ಕೆ ಕೊರಳೊಡ್ಡಿದರು. ಅವರಿಗೆ ಝೆಕ್‌ ಗಣರಾಜ್ಯದ ಲುನಾಕ್ ಸೆಬಾಸ್ಟಿನ್‌ ಅವರಿಂದ ಕಠಿಣ ಸ್ಪರ್ಧೆ ಎದುರಾಯಿತು. ರಿಯೋ ಒಲಿಂಪಿಕ್ಸ್‌ ಬಳಿಕ ಅತ್ಯಂತ ಸ್ಥಿರ ಪ್ರದರ್ಶನ ನೀಡುತ್ತಿರುವ ಈಜುಪಟುಗಳಲ್ಲಿ ಒಬ್ಬರಾದ ಸಾಜನ್, ಎಫ್‌ಐಎನ್‌ಎ (ಫಿನಾ) ಒದಗಿಸಿಕೊಟ್ಟ ಸ್ಕಾಲರ್‌ಷಿಪ್‌ ಮೂಲಕ ಥಾಯ್ಲೆಂಡ್‌ನಲ್ಲಿ ಅಭ್ಯಾಸ ನಡೆಸಿದ್ದರು. ಭಾರತದಲ್ಲಿನ ಕೊರೊನಾ ವೈರಸ್‌ ಸಂಕಷ್ಟದ ಕಾರಣ ದುಬೈಗೆ ತೆರಳಿ ಒಳಾಂಗಣ ಈಜು ಕೇಂದ್ರದಲ್ಲಿ ಅಭ್ಯಾಸ ಮಾಡಿದ್ದ ಸಾಜನ್, ತಮ್ಮ ಪ್ರದರ್ಶನದಲ್ಲಿ ಮಿಂಚಿನ ವೇಗ ಕಂಡುಕೊಂಡಿದ್ದಾರೆ. "ಆರಂಭದಲ್ಲಿ ಅವರನ್ನು 50 ಮೀ. ಈಜಿನಲ್ಲಿ ಇರಿಸಲಾಗಿತ್ತು. ನಂತರ 200 ಮೀ. ಸ್ಪರ್ಧೆತೆ ತಂದೆವು. ಮೊದಲೆಲ್ಲಾ ಬಹಳಾ ತರಲೆ ಹುಡುಗ. ಈಗ ಬಹಳಾ ಗಂಭೀರವಾಗಿದ್ದಾನೆ. ಆತನಿಗೆ ಕೋಚಿಂಗ್‌ ಮಾಡುವುದು ಬಹಳಾ ಸುಲಭ. ಇದು ಆತನಿಗೆ ಮತ್ತು ಭಾರತಕ್ಕೆ ಬಹುದೊಡ್ಡ ಸಾಧನೆ ಆಗಿದೆ. ಬೇರೆಯವರಿಂದಲೂ ಇದು ಸಾಧ್ಯ ಎಂಬ ಭರವಸೆ ಆತ ತಂದುಕೊಟ್ಟಿದ್ದಾನೆ. ಭಾರತದಲ್ಲಿ ಈ ಸಾಧನೆ ಒಬ್ಬನಿಂದ ಆಗಲೇ ಬೇಕು ಎಂದು ನಾನು ಬಯಸಿದ್ದೆ. ಈ ಒಳ್ಳೆ ಹುಡಗನಿಂದ ಇದು ಸಾಧ್ಯವಾಗಿರುವುದಕ್ಕೆ ಬಹಳಾ ಸಂತಸವಿದೆ," ಎಂದು ಬಿಎಸಿ ಕೋಚ್‌ ಪ್ರದೀಪ್‌ ಕುಮಾರ್‌ ಹೇಳಿದ್ದಾರೆ. ಈ ಒದಲು ಭಾರತೀಯ ಈಜುಪಟುಗಳು 'ಬಿ' ಸ್ಟ್ಯಾಂಡರ್ಡ್‌ ಅರ್ಹತೆಯ ಮೂಲಕ ಒಬ್ಬ ಪುರುಷ ಒಬ್ಬ ಮಹಿಳೆ ಒಲಿಂಪಿಕ್ಸ್‌ ಕ್ರೀಡಾಕೂಟಗಳಲ್ಲಿ ಪಾಲ್ಗೊಳ್ಳುತ್ತಿದ್ದರು. ಆದರೆ, ಇದೇ ಮೊದಲ ಬಾರಿ 'ಎ' ಸ್ಟ್ಯಾಂಡರ್ಡ್‌ ಅರ್ಹತೆ ಲಭ್ಯವಾಗಿದೆ. ಈಜಿನಲ್ಲಿ ಈ ಐತಿಹಾಸಿಕ ಸಾಧನೆಗೆ ಸೋಷಿಯಲ್‌ ಮೀಡಿಯಾಗಳಲ್ಲಿ ಗಣ್ಯಾತಿ ಗಣ್ಯರು ಸಾಜನ್ ಪ್ರಕಾಶ್‌ಗೆ ಶುಭ ಹಾರೈಕೆಯ ಹೊಳೆಯನ್ನೇ ಹರಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3w5S5EA
