ಶಶಿಧರ್‌ ಎಸ್‌. ದೋಣಿಹಕ್ಲು: ವಿಶ್ವವನ್ನೇ ಹೈರಾಣಾಗಿಸಿದ ಕೊರೊನಾ ಜನರ ಜೀವನದ ಜತೆ ಚೆಲ್ಲಾಟವಾಡಿತು. ಲಾಕ್‌ಡೌನ್‌ನಿಂದ ಲೆಕ್ಕವಿಲ್ಲದಷ್ಟು ಮಂದಿ ಉದ್ಯೋಗ ಕಳೆದುಕೊಂಡರು. ನಗರಗಳಲ್ಲಿ ಕನಸಿನ ಬದುಕು ಕಟ್ಟಿಕೊಂಡಿದ್ದವರು, ಬಣ್ಣದ ಬದುಕಿನ ಕನಸು ಕಂಡವರು ಕೂಡ ಹುಟ್ಟಿದ ಊರಿನತ್ತ ಮುಖ ಮಾಡಿದರು. ಲಾಕ್‌ಡೌನ್‌ ತೆರವಿನ ಬಳಿಕ ಒಂದಿಷ್ಟು ಮಂದಿ ವಾಪಸ್‌ ನಗರಗಳತ್ತ ಬಸ್‌ ಹಿಡಿದಿದ್ದಾರೆ..! ಆದರೆ, ಕೆಲವರು ಮಾತ್ರ ಹೊಸ ಬದುಕಿಗೆ ಮುನ್ನುಡಿ ಬರೆದು, ಕೃಷಿಯಲ್ಲಿ ಖುಷಿ ಕಾಣುತ್ತಿದ್ದಾರೆ. ಅಂತಹವರಲ್ಲಿ ತುಮಕೂರಿನ ಪ್ರಜ್ವಲ್‌.ಕೆ. ಕೂಡ ಒಬ್ಬರು. ತಂದೆ ಪೊಲೀಸ್‌ ಅಧಿಕಾರಿ: ತುಮಕೂರಿನ ಬನಶಂಕರಿಯವರಾದ ಪ್ರಜ್ವಲ್‌, ಕೃಷ್ಣಮೂರ್ತಿ ಮತ್ತು ರತ್ನ ದಂಪತಿ ಪುತ್ರ. ತಂದೆ ಎಸ್‌ಐ, ಸದ್ಯ ಕ್ಯಾತ್ಸಂದ್ರ ಪೊಲೀಸ್‌ ಠಾಣೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಅಮ್ಮ ಗೃಹಿಣಿ, ಅಕ್ಕ ತೇಜಸ್ವಿನಿ ಎಂಜಿನಿಯರ್‌. ಪ್ರಜ್ವಲ್‌ ಪದವೀಧರರು (ಬಿಎಸ್‌ಸಿ ಅಗ್ರಿಕಲ್ಚರ್‌). ಗುಡ್‌ ಬೈ: ವಿದ್ಯಾಭ್ಯಾಸ ಬಳಿಕ ಬೆಂಗಳೂರಿನ ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ಪ್ರಜ್ವಲ್‌, ಲಾಕ್‌ಡೌನ್‌ ವೇಳೆ ಕೆಲಸಕ್ಕೆ ಗುಡ್‌ ಬೈ ಹೇಳಿದರು. ಗಂಟು-ಮೂಟೆ ಕಟ್ಟಿಕೊಂಡೇ ಮರಳಿದ್ದ ಅವರು ಅರೆಕ್ಷಣವೂ ಹಿಂತಿರುಗುವ ಮನಸ್ಸು ಮಾಡಲಿಲ್ಲ. ಬರುವ ಸಂಬಳ ಮನೆ ಬಾಡಿಗೆ, ಊಟ-ತಿಂಡಿಗೆ ಸಾಕಾಗುತ್ತೆ. ಉಳಿತಾಯ ಕನಸಿನ ಮಾತು. ಎಲ್ಲೋ ಸಂಬಳ ನೆಚ್ಚಿಕೊಂಡು ಹಗಲಿರುಳು ದುಡಿಯುವ ಬದಲು ಸ್ವಯಂ ಉದ್ಯೋಗ ಮಾಡಿದರೆ ಹೇಗೆ ಎಂದು ಯೋಚಿಸಿದರು. ಕೃಷಿ ವಿಷಯದಲ್ಲಿ ಪದವಿ ಪಡೆದಿರುವ ತಾನು ವೈಜ್ಞಾನಿಕ ಪದ್ಧತಿ ಅಳವಡಿಸಿಕೊಂಡು ಕೃಷಿಯಲ್ಲೇ ಏನಾದರು ಸಾಧಿಸಬೇಕೆಂದು ಪಣತೊಟ್ಟರು. ಆಗ ಥಟ್‌ ಅಂತ ಹೊಳೆದಿದ್ದೇ ಬೇಸಾಯ. ನಂತರ ನಿರ್ಧಾರ ಬದಲಿಸಲಿಲ್ಲ. ತಂದೆಯ ಸಹಕಾರ, ಪ್ರೋತ್ಸಾಹದಿಂದ ಶಿವಗಂಗೆ ಸಮೀಪದ ಚಿಕ್ಕ ಕೊರಟಗೆರೆಯಲ್ಲಿ 1 ಎಕರೆ ಜಾಗದಲ್ಲಿ ಶೆಡ್‌ ನಿರ್ಮಿಸಿದರು. 1/4 ಎಕರೆ ಜಾಗದಲ್ಲಿ ಮಿಲ್ಕಿ ಮಶ್ರೂಮ್‌ ಬೆಳೆಯಲು ಆರಂಭಿಸಿದರು. ಪ್ರಸ್ತುತ ಮಾಸಿಕ 55-60 ಸಾವಿರ ರೂ. ಗಳಿಸುತ್ತಿದ್ದಾರೆ. ಶೆಡ್‌ ವ್ಯಾಪ್ತಿಯ ಸಂಪೂರ್ಣ 1 ಎಕರೆಯಲ್ಲಿ ಬೇಸಾಯ ಮಾಡಿದರೆ ದಿನಕ್ಕೆ 1 ಕ್ವಿಂಟಾಲ್‌ನಷ್ಟು ಉತ್ಪಾದಿಸಬಹುದು ಎನ್ನುತ್ತಾರೆ ಪ್ರಜ್ವಲ್‌. ಕೆಜಿಗೆ 250 ರೂ.: ಪ್ರಸ್ತುತ ಮಿಲ್ಕಿ ಮಶ್ರೂಮ್‌ ಕೆಜಿಗೆ 250 ರೂ. ಇದೆ. ಎಕರೆಗೆ ದಿನಕ್ಕೆ ಕ್ವಿಂಟಾಲ್‌ ಉತ್ಪಾದಿಸಿ ತಿಂಗಳಿಗೆ 7.5 ಲಕ್ಷ ರೂ. ಆದಾಯ ಗಳಿಸುವ ಗುರಿ ಪ್ರಜ್ವಲ್‌ ಅವರದ್ದು. ಯಾಂತ್ರೀಕೃತ ಪದ್ಧತಿ ಅಳವಡಿಕೆ: ಮಿಲ್ಕಿ ಮಶ್ರೂಮ್‌ ಬೇಸಿಗೆಯಲ್ಲಿ ಅಂದರೆ ಮಾರ್ಚ್-ಸೆಪ್ಟೆಂಬರ್‌ ಅವಧಿಯಲ್ಲಿ ಬೆಳೆಯಲಾಗುತ್ತದೆ. 30-35 ಡಿಗ್ರಿ ಸೆಲ್ಸಿಯಸ್‌ ಉಷ್ಣತೆ ಬೇಕು. ಹೀಗಾಗಿ ವರ್ಷದ 365 ದಿನಗಳಲ್ಲೂ ಬೆಳೆಯುವಂತೆ ಪ್ರಜ್ವಲ್‌ ಯಾಂತ್ರಿಕೃತ ಪದ್ಧತಿ ಅಳವಡಿಸಿಕೊಂಡು ಕೃತಕ ಪರಿಸರ ನಿರ್ಮಿಸಿ ಬೇಸಾಯ ಮಾಡುತ್ತಿದ್ದಾರೆ. ಸ್ಥಳೀಯ ಮಾರುಕಟ್ಟೆಯಲ್ಲೇ ಬೇಡಿಕೆ ಇದ್ದು, ಮುಂದಿನ ದಿನಗಳಲ್ಲಿ ವಿಸ್ತರಿಸುವ ಇರಾದೆ ಅವರದ್ದಾಗಿದೆ. ಅಲ್ಲದೆ ಔಷಧೀಯ ಉದ್ದೇಶದಲ್ಲಿ ಪೌಡರ್‌ ಮಾಡಿ ಮಾರುವ ಚಿಂತನೆ ಕೂಡ ಇದೆ. ತರಬೇತಿ: ಪ್ರಜ್ವಲ್‌ ತಾವು ಅಣಬೆ ಬೇಸಾಯದಲ್ಲಿ ಬದುಕು ಕಟ್ಟಿಕೊಂಡಿರುವುದಲ್ಲದೆ ಆಸಕ್ತರಿಗೆ ತರಬೇತಿ ಕೂಡ ನೀಡುತ್ತಿದ್ದಾರೆ. ಜೈಲು, ಸಂಘ-ಸಂಸ್ಥೆಗಳು, ಇಲಾಖೆ ಹೀಗೆ ಎಲ್ಲಿಂದ ತರಬೇತಿಗೆ ಆಹ್ವಾನ ಬಂದರೂ ತರಬೇತಿ ನೀಡಲು ಧಾವಿಸುತ್ತಿದ್ದಾರೆ. ಆರ್ಥಿಕ ಸಹಾಯ: ಅಣಬೆ ಬೇಸಾಯಕ್ಕೆ ತೋಟಗಾರಿಕೆ ಇಲಾಖೆಯಿಂದ ನೆರವು ಸಿಗಲಿದೆ. ಪಿಎಂಇಜಿಪಿಯಡಿ, ಬ್ಯಾಂಕ್‌ಗಳಲ್ಲಿ ಸಾಲ ಸೌಲಭ್ಯ ಸಿಗಲಿದ್ದು, ಕಡಿಮೆ ಬಂಡವಾಳದಲ್ಲಿ ಹೆಚ್ಚು ಲಾಭ ಗಳಿಸಬಹುದು ಎನ್ನುತ್ತಾರೆ ಪ್ರಜ್ವಲ್‌. ತರಬೇತಿಗಾಗಿ ಸಂಪರ್ಕಿಸಿ ಪ್ರಜ್ವಲ್‌ ಕೆ. ಅಣಬೆ ಕೃಷಿ ಬಗ್ಗೆ ಆಸಕ್ತರಿಗೆ ತರಬೇತಿ ನೀಡುತ್ತಿದ್ದಾರೆ. ಜತೆಗೆ ಮಾರುಕಟ್ಟೆ ವ್ಯವಸ್ಥೆ ಕೂಡ ಕಲ್ಪಿಸುತ್ತಿದ್ದಾರೆ. ಆಸಕ್ತರು 7022727475 ಸಂಪರ್ಕಿಸಿ. 'ಕರ್ನಾಟಕಕ್ಕೆ ಬೇರೆ ಕಡೆಗಳಿಂದ ಅಣಬೆ ಹೆಚ್ಚಾಗಿ ಬರುತ್ತದೆ. ರಾಜ್ಯದ ಜನರೇ ಅಣಬೆ ಮಾರುಕಟ್ಟೆ ಆಳುವಂತಾಗಬೇಕು. ಓದಿದ್ದು ಬಿಎಸ್‌ಸಿ ಅಗ್ರಿಕಲ್ಚರ್‌. ಹೀಗಾಗಿ ನಾನೇ ಕೃಷಿಯಲ್ಲಿ ತೊಡಗಿಕೊಳ್ಳಬಹುದಲ್ಲ ಎಂದುಕೊಂಡೆ. ಆಸಕ್ತಿ ಇತ್ತು, ಶ್ರಮ ವಹಿಸಿದೆ, ಉತ್ತಮ ಲಾಭ ಪಡೆಯುತ್ತಿದ್ದೇನೆ' ಎನ್ನುತ್ತಾರೆ, ಪ್ರಜ್ವಲ್‌.
from India & World News in Kannada | VK Polls https://ift.tt/3h5jktg
