ಚೆನ್ನೈ: ಕೊರೊನಾ ವೈರಸ್ ಕಾಯಿಲೆಗೆ ಡಿಆರ್‌ಡಿಓ ಸಿದ್ಧಪಡಿಸಿದ ಆಂಟಿ ಕೋವಿಡ್ ಡ್ರಗ್‌ ಡಿಯಾಕ್ಸಿ ಡಿ ಗ್ಲುಕೋಸ್‌(2DG)ಯನ್ನು ಡಾ.ರೆಡ್ಡಿ ಲ್ಯಾಬೋರೇಟರಿ ಸೋಮವಾರ ಮಾರುಕಟ್ಟೆಗೆ ಪರಿಚಯಿಸಿದೆ. ಡಿಆರ್‌ಡಿಓ ಸಿದ್ಧಪಡಿಸಿದ ಡಿಯಾಕ್ಸಿ ಡಿ ಗ್ಲುಕೋಸ್‌ ಔಷಧ ಉತ್ಪಾದನೆಯ ಪರವಾನಿಗೆಯನ್ನು ಇತ್ತೀಚೆಗೆ ಕೇಂದ್ರ ಸರ್ಕಾರ ಡಾ.ರೆಡ್ಡೀಸ್ ಲ್ಯಾಬೋರೇಟರಿಗೆ ನೀಡಿತ್ತು. ಕೊರೊನಾ ವೈರಸ್‌ನಿಂದ ಬಳಲುತ್ತಿರುವ ಸೋಂಕಿತರ ತುರ್ತು ಚಿಕಿತ್ಸೆಗೆ ಬಳಸುವುದಕ್ಕಾಗಿ 2DG ಔಷಧವನ್ನು ಡಿಆರ್‌ಡಿಓ ಅನುಮೋದಿಸಿತ್ತು. ತಾತ್ವಿಕವಾಗಿ ಮಧ್ಯಮದಿಂದ ತೀವ್ರತರದ ಕೋವಿಡ್ ಸೋಂಕಿನಿಂದ ಬಳಲುತ್ತಿರುವ ಕೊರೊನಾ ಸೋಂಕಿತರಿಗೆ ಗರಿಷ್ಠ ಹತ್ತು ದಿನಗಳವರೆಗೆ ಈ ಔಷಧವನ್ನು ನೀಡಲು ಸೂಚಿಸಬೇಕು ಡಿಆರ್‌ಡಿಒ ಎಂದು ಹೇಳಿದೆ. ಅಲ್ಲದೇ ಅನಿಯಂತ್ರಿತ ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆ, ಎಆರ್‌ಡಿಎಸ್‌, ಪಿತ್ತ ಜನಕಾಂಗ ಮತ್ತು ಮೂತ್ರಪಿಂಡ ಸಮಸ್ಯೆಯನ್ನು ಎದುರಿಸುತ್ತಿರುವ ರೋಗಿಗಳ ಮೇಲೆ ಈ 2DG ಔಷಧ ಯಾವ ರೀತಿಯ ಪರಿಣಾಮವನ್ನು ಬೀರುತ್ತದೆ ಅನ್ನುವುದರ ಮೇಲೆ ಇನ್ನೂ ಅಧ್ಯಯನ ನಡೆಸಿಲ್ಲ. ಹಾಗಾಗಿ ಎಚ್ಚರ ವಹಿಸಬೇಕು ಎಂದು ಡಿಆರ್‌ಡಿಒ ತಿಳಿಸಿದೆ. ಅಲ್ಲದೇ 2DG ಔಷಧವನ್ನು ಗರ್ಭಿಣಿಯರು, ಹಾಲುಣಿಸುವ ಮಕ್ಕಳು ಮತ್ತು ಹದಿನೆಂಟು ವರ್ಷ ವಯಸ್ಸಿನ ಕೆಳಗಿನ ರೋಗಿಗಳಿಗೆ ನೀಡಬಾರದು ಎಂದೂ ಡಿಆರ್‌ಡಿಒ ಎಚ್ಚರಿಸಿದೆ. ಡಿಆರ್‌ಡಿಒದ ಆಂಟಿ ಕೋವಿಡ್ ಡ್ರಗ್‌ ಔಷಧದ ಮೊದಲ ಬ್ಯಾಚ್‌ನ್ನು 2DG ಔಷಧದ ತುರ್ತು ಬಳಕೆಗೆ ಡಿಸಿಜಿಐ ಅನುಮತಿ ನೀಡಿದ ನಂತರ ಕಳೆದ ಮೇ 17ರಂದು ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗಿತ್ತು. ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮತ್ತು ಕೇಂದ್ರ ಆರೋಗ್ಯ ಸಚಿವ ಡಾ.ಹರ್ಷವರ್ಧನ್ ಈ ಔಷಧವನ್ನು ಬಿಡುಗಡೆ ಮಾಡಿದ್ದರು. 2DG ಔಷಧವು ಪ್ಯಾಕೆಟ್‌ನಲ್ಲಿ ಪುಡಿ ರೂಪದಲ್ಲಿ ಸಿಗುತ್ತಿದ್ದು, ಇದನ್ನು ನೀರಿನಲ್ಲಿ ಬೆರೆಸಿ ಸೇವಿಸಬಹುದಾಗಿದೆ. ಈ ಔಷಧ ಕೊರೊನಾ ವೈರಸ್ ರೋಗಾಣುವನ್ನು ದೇಹದ ಒಂದು ಕಡೆ ಸಂಗ್ರಹಿಸಿ ದೇಹಪೂರ್ತಿ ಹರಡುವುದನ್ನು ತಪ್ಪಿಸುವ ಮೂಲಕ ವೈರಸ್ ವಿರುದ್ಧ ಹೋರಾಡಲಿದೆ. ಅಲ್ಲದೇ 2DG ಸೇವನೆಯಿಂದ ರೋಗಿಯು ಚೇತರಿಕೆಯ ಸರಾಸರಿ ಸಮಯವನ್ನು ಎರಡೂವರೆ ದಿನಗಳಷ್ಟು ಕಡಿಮೆ ಮಾಡುತ್ತದೆ. ಅಲ್ಲದೇ ಸೋಂಕಿತರಲ್ಲಿ ಉಸಿರಾಟದ ಸಮಸ್ಯೆ ನಿಯಂತ್ರಣಕ್ಕೆ ಬಂದು ವೈದ್ಯಕೀಯ ಆಮ್ಲಜನಕದ ಬಳಕೆಯ ಪ್ರಮಾಣ ಶೇ.40%ರಷ್ಟು ಕಡಿಮೆಯಾಗಲಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ.
from India & World News in Kannada | VK Polls https://ift.tt/2TaZpkA
