ಹುಬ್ಬಳ್ಳಿ: ಮಾಜಿ ಶಾಸಕನ ಪುತ್ರನಿಗೆ ವಿಡಿಯೊ ಕಾಲ್ ಮಾಡಿದ ಅಪರಿಚಿತ ವಂಚಕರು ಅವರ ಮುಖಕ್ಕೆ ಬೇರೆ ವ್ಯಕ್ತಿಯ ನಗ್ನ ದೇಹದ ವಿಡಿಯೋ ಜೋಡಿಸಿ ಹಣ ನೀಡದಿದ್ದರೆ ವಿಡಿಯೋ ವೈರಲ್ ಮಾಡುವುದಾಗಿ ಬೆದರಿಕೆ ಹಾಕಿರುವ ಬಗ್ಗೆ ಸೈಬರ್ ಕ್ರೈಂ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಮಾಜಿ ಶಾಸಕ ಎನ್ಎಚ್ ಕೋನರಡ್ಡಿ ಅವರ ಪುತ್ರ ನವೀನ್ ವಿಡಿಯೋ ಟ್ರ್ಯಾಪ್ ವಂಚಕರ ಬಲೆಗೆ ಬಿದ್ದಿದ್ದಾರೆ. ಇತ್ತೀಚೆಗಷ್ಟೇ ನವೀನ್ ಅವರಿಗೆ ಅಪರಿಚಿತರಿಂದ ವಾಟ್ಸಪ್ ವಿಡಿಯೊ ಕಾಲ್ ಬಂದಿದೆ. ಅದನ್ನು ರಿಸೀವ್ ಮಾಡಿ ಮಾತನಾಡಿದ್ದಾರೆ. ಈ ವೇಳೆ ವಂಚಕರು ವಿಡಿಯೊ ಕಾಲ್ ಸ್ಕ್ರೀನ್ ರೆಕಾರ್ಡ್ ಮಾಡಿ ಬಳಿಕ ಬೇರೊಬ್ಬ ವ್ಯಕ್ತಿಯ ನಗ್ನ ದೇಹದ ವಿಡಿಯೊ ಜೋಡಿಸಿದ್ದಾರೆ. ಅಲ್ಲದೇ, ಹಣ ನೀಡುವಂತೆ ಪೀಡಿಸಿ ಅವರಿಂದ ಆನ್ಲೈನ್ ಮೂಲಕ 13 ಸಾವಿರ ರೂ. ವರ್ಗಾವಣೆ ಸಹ ಮಾಡಿಕೊಂಡಿದ್ದಾರೆ. ಹೆಚ್ಚಿನ ಹಣಕ್ಕೆ ಬೇಡಿಕೆ: ಇಷ್ಟಾದರೂ ಸುಮ್ಮನಾಗದ ವಂಚಕರು ಇನ್ನೂ ಹೆಚ್ಚಿನ ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಅಲ್ಲದೇ, ಹಣ ನೀಡದಿದ್ದರೆ ವಿಡಿಯೋ ವೈರಲ್ ಮಾಡುವ ಬೆದರಿಕೆ ಹಾಕಿದ್ದಾರೆ. ಇದರಿಂದ ಬೇಸತ್ತ ನವೀನ್ ಇಲ್ಲಿಯ ಸೈಬರ್ ಕ್ರೈಂ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ತನಿಖೆ ಮುಂದುವರಿದಿದೆ.
from India & World News in Kannada | VK Polls https://ift.tt/315Pcqd
