ಹೊಸದಿಲ್ಲಿ: ಅಚ್ಚರಿಯ ಬೆಳವಣಿಗೆಯೊಂದರಲ್ಲಿ, ಅಪ್ರಾಪ್ತ ವಯಸ್ಸಿನ ಬಾಲಕಿಯನ್ನು ಅತ್ಯಾಚಾರ ಮಾಡಿದ ಆರೋಪಿಗೆ ಸಂತ್ರಸ್ತೆಯನ್ನು ವಿವಾಹವಾಗುವುದಾದರೆ ಪ್ರಕರಣ ಕೈ ಬಿಡುವುದಾಗಿ ಸುಪ್ರೀಂ ಕೋರ್ಟ್‌ ಸೋಮವಾರ ಹೇಳಿದೆ. ಪೋಕ್ಸೊ ಪ್ರಕರಣದ ವಿಚಾರಣೆ ವೇಳೆ ಸರ್ವೋಚ್ಚ ನ್ಯಾಯಾಲಯ ನೀಡಿದ ಈ ಹೇಳಿಕೆ ಬಗ್ಗೆ ಚರ್ಚೆಗಳು ಆರಂಭವಾಗಿದೆ. ''ಅತ್ಯಾಚಾರಕ್ಕೆ ಒಳಗಾದ ಹುಡುಗಿಯನ್ನು ಆಕೆಗೆ 18 ವರ್ಷ ತುಂಬಿದ ಬಳಿಕ ಮದುವೆಯಾಗಲು ಒಪ್ಪುವುದಾದರೆ ನಾವು ಸಹಾಯ ಮಾಡಲು ಸಾಧ್ಯ. ಇಲ್ಲದಿದ್ದರೆ, ನೀನು ನಿನ್ನ ಸರಕಾರಿ ಉದ್ಯೋಗ ಕಳೆದುಕೊಳ್ಳುವ ಜತೆಗೆ ಜೈಲು ಸೇರಬೇಕಾಗುತ್ತದೆ,'' ಎಂದು ಮುಖ್ಯ ನ್ಯಾಯಮೂರ್ತಿ ಎಸ್‌.ಎ.ಬೊಬ್ಡೆ ಅವರಿದ್ದ ನ್ಯಾಯಪೀಠ ಆರೋಪಿಗೆ ಹೇಳಿತು. ಈ ಬಗ್ಗೆ ಅಭಿಪ್ರಾಯ ಹೇಳಲು ಆರೋಪಿ ಪರ ವಕೀಲರು ಸಮಯ ಕೇಳಿದ್ದರಿಂದ ವಿಚಾರಣೆ ಮುಂದೂಡಲಾಯಿತು. ''ನೀನೊಬ್ಬ ಸರಕಾರಿ ನೌಕರ. ಅತ್ಯಾಚಾರ ಮಾಡುವ ಮೊದಲು ಯೋಚನೆ ಮಾಡಬೇಕಾಗಿತ್ತು. ಹಾಗೆಂದು ನಾವು ನಿನಗೆ ಮದುವೆಯಾಗಲು ಒತ್ತಾಯ ಮಾಡುವುದಿಲ್ಲ. ನಿನಗೆ ಇಚ್ಛೆ ಇದೆಯೇ ಇಲ್ಲವೇ ಎಂಬುದನ್ನು ತಿಳಿಸು. ನಾವು ಒತ್ತಾಯ ಮಾಡಿದೆವು ಎಂದು ಹೇಳಬಾರದು,'' ಎಂದು ನ್ಯಾಯಮೂರ್ತಿ ಬೊಬ್ಡೆ ಆರೋಪಿಗೆ ಹೇಳಿದರು. ''ಆರೋಪಿಯು ಒಪ್ಪಿಗೆ ನೀಡಿದರೆ ಬಾಲಕಿಗೆ 18 ವರ್ಷದ ಆಗುವ ತನಕ ಪ್ರಕರಣವನ್ನು ತಡೆ ಹಿಡಿಯಲಾಗುವುದು. ಒಂದು ವೇಳೆ ಮಾತಿಗೆ ತಪ್ಪಿದರೆ ಕೇಸ್‌ ಮುಂದುವರಿಯಲಿದೆ,'' ಎಂದು ಪೀಠ ಸ್ಪಷ್ಟಪಡಿಸಿತು. ''ನನಗೆ ಮದುವೆಯಾಗಿರುವುದರಿಂದ ಮತ್ತೊಂದು ವಿವಾಹವಾಗಲು ಸಾಧ್ಯವಿಲ್ಲ,'' ಎಂದು ಆರೋಪಿ ಹೇಳಿದ್ದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಾಲಯ, ''ಈ ಕಾರಣದಿಂದಲೇ ಯೋಚನೆ ಮಾಡಲು ಅವಕಾಶ ಕೊಡುತ್ತಿದ್ದೇವೆ,'' ಎಂದು ಹೇಳಿತು. ಏನು ಹಿನ್ನೆಲೆ? ಮಹಾರಾಷ್ಟ್ರ ವಿದ್ಯುತ್‌ ಉತ್ಪಾದನಾ ಕಂಪನಿಯ ಉದ್ಯೋಗಿ ಸುಭಾಷ್‌ ಚೌಹಾಣ್‌ ಅಪ್ರಾಪ್ತ ವಯಸ್ಸಿನ ಬಾಲಕಿಯನ್ನು ಅತ್ಯಾಚಾರ ಮಾಡಿರುವ ಆರೋಪದ ಮೇಲೆ ಜೈಲು ಸೇರಿದ್ದಾನೆ. ಈ ಪ್ರಕರಣದಲ್ಲಿ ಆರೋಪಿಗೆ ಕೆಳ ನ್ಯಾಯಾಲಯ ಬಂಧನದಿಂದ ಮುಕ್ತಿ ನೀಡಿತ್ತು. ಆದರೆ, ಹೈಕೋರ್ಟ್‌ ಅದನ್ನು ತಿರಸ್ಕರಿಸಿತ್ತು. ಹೀಗಾಗಿ ಆರೋಪಿ ಸುಪ್ರೀಂ ಕೋರ್ಟ್‌ ಮೆಟ್ಟಿಲೇರಿದ್ದ. ಸುಭಾಷ್‌ ವಿರುದ್ಧ ಪ್ರಕರಣ ದಾಖಲಾಗುತ್ತಿದ್ದಂತೆ ಆತನ ತಾಯಿ, ಬಾಲಕಿಯನ್ನು ಮದುವೆ ಮಾಡಿಕೊಳ್ಳುವ ಆಹ್ವಾನ ನೀಡಿದ್ದರು. 18 ವರ್ಷವಾದ ಬಳಿಕ ಮದುವೆಯಾಗುವುದಾಗಿ ಆತ ವಚನ ಪತ್ರ ಬರೆದು ಕೊಟ್ಟಿದ್ದ.
from India & World News in Kannada | VK Polls https://ift.tt/37Z9MfH
