ವೆಲ್ಲಿಂಗ್ಟನ್: ಪ್ರಸಕ್ತ ನ್ಯೂಜಿಲೆಂಡ್ ಪ್ರವಾಸದಲ್ಲಿ ಕಿಂಗ್ ಕೊಹ್ಲಿ ಬ್ಯಾಟ್ ಮೌನಕ್ಕೆ ಜಾರಿದಂತಿದೆ. ಕಿವೀಸ್ ನೆಲದಲ್ಲಿ ಈ ಬಾರಿ ಆಡಿರುವ ಒಟ್ಟು 9 ಇನಿಂಗ್ಸ್ಗಳಿಂದ ವಿರಾಟ್ ಕೊಹ್ಲಿ ಗಳಿಸಿರುವುದು ಕೇವಲ 201 ರನ್ಗಳನ್ನು ಮಾತ್ರ. ಇದರಲ್ಲಿ ಕೇವಲ ಒಂದು ಅರ್ಧಶತಕ ಮಾತ್ರ ಮೂಡಿಬಂದಿದೆ. ಜಗತ್ತಿನ ಎಲ್ಲ ಭಾಗಗಳಲ್ಲೂ ರನ್ ಹೊಳೆ ಹರಿಸಿ ವಿಶ್ವ ಶ್ರೇಷ್ಠ ಬ್ಯಾಟ್ಸ್ಮನ್ ಆಗಿ ಹೊರಹೊಮ್ಮಿರುವ ಕೊಹ್ಲಿ, ಇದೀಗ ನ್ಯೂಜಿಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯ ಮೊದಲ ಪಂದ್ಯದ ಎರಡು ಇನಿಂಗ್ಸ್ಗಳಲ್ಲಿ ನಿರಾಶಾದಾಯಕ ಪ್ರದರ್ಶನ ನೀಡಿ ಕ್ರಮವಾಗಿ 2 ಮತ್ತು 19 ರನ್ಗಳನ್ನು ಗಳಿಸಿದ್ದಾರೆ. ಟೀಮ್ ಇಂಡಿಯಾ ವಿರುದ್ಧ ಯಶಸ್ಸು ಗಳಿಸಬೇಕಾದರೆ ತಂಡದ ಬ್ಯಾಟಿಂಗ್ ಬೆನ್ನೆಲುಬಾಗಿರುವ ಅವರ ರನ್ಗಳಿಕೆಯ ಓಟಕ್ಕೆ ಬ್ರೇಕ್ ಹಾಕಬೇಕು ಎಂಬುದನ್ನು ಚೆನ್ನಾಗಿ ಅರಿತಿದ್ದ ನ್ಯೂಜಿಲೆಂಡ್ ತಂಡ ತನ್ನ ರಣತಂತ್ರವನ್ನು ಯಶಸ್ವಿಯಾಗಿ ಕಾರ್ಯರೂಪಕ್ಕೆ ತಂದಿದೆ. ಇಲ್ಲಿನ ಬೇಸಿನ್ ರಿಸರ್ವ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದ ಮೂರನೇ ದಿನವಾದ ಭಾನುವಾರ, 43 ಎಸೆತಗಳಲ್ಲಿ 3 ಫೋರ್ ಒಳಗೊಂಡ 19 ರನ್ ಗಳಿಸಿದ್ದ ಕೊಹ್ಲಿ ಉತ್ತಮವಾಗಿ ಆಡುತ್ತಿದ್ದರು. ಆದರೂ ಅವರನ್ನು ಪೆವಿಲಿಯನ್ಗೆ ಸೇರುವಂತೆ ಮಾಡುವಲ್ಲಿ ನ್ಯೂಜಿಲೆಂಡ್ನ ಎಡಗೈ ವೇಗಿ ಯಶಸ್ವಿಯಾದರು. ದಿನದಾಟದ ಅಂತ್ಯದ ಬಳಿಕ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಬೌಲ್ಟ್ ಟೀಮ್ ಇಂಡಿಯಾದ ರನ್ ಮಷೀನ್ ಕೊಹ್ಲಿಯ ವೀಕ್ನೆಸ್ ಕುರಿತಾಗಿ ಮಾತನಾಡಿದ್ದಾರೆ. ಕೊಹ್ಲಿ ರನ್ ಗಳಿಸುವ ಜಾಗದಲ್ಲೆಲ್ಲಾ ತಡೆಯೊಡ್ಡಿ ಅವರನ್ನು ಕಟ್ಟಿಹಾಕಿದರೆ ಅವರು ಹೆಚ್ಚು ಅಬ್ಬರಿಸಲಾರರು ಎಂದು ಕೊಹ್ಲಿಯ ವೀಕ್ ಸ್ಪಾಟ್ ಬಗ್ಗೆ ವಿವರಣೆ ನೀಡಿದ್ದಾರೆ. "ನಾವು ಕೊಂಚ ತಪ್ಪು ಮಾಡಿದರೂ ಅದರ ಲಾಭ ಪಡೆದು ಚೆಂಡನ್ನು ಬಡಿದಟ್ಟಿ ರನ್ ಗಳಿಸುತ್ತಾರೆ. ಹೀಗಾಗಿ ಅವರು ಬೌಂಡರಿ ಗಳಿಸದಂತೆ ಕಟ್ಟಿಹಾಕುವ ಪ್ರಯತ್ನ ನಮ್ಮದಾಗಿತ್ತು. ಪಿಚ್ನ ಅಂಪೂರ್ಣ ಲಾಭ ಪಡೆದು ಬೌನ್ಸರ್ಗಳನ್ನು ಉತ್ತಮವಾಗಿ ಬಳಸಿಕೊಂಡದ್ದು ಒಳ್ಳೆ ಯೋಜನೆಯಾಗಿ ಫಲ ನೀಡಿದೆ. ಇದರಿಂದ ಕೊಹ್ಲಿಯ ರನ್ಗತಿಗೆ ಬ್ರೇಕ್ ಹಾಕಲು ಸಾಧ್ಯವಾಯಿತು. ಅವರಲ್ಲಿನ ಆತ್ಮವಿಶ್ವಾಸ ಕುಗ್ಗುವಂತೆ ಮಾಡಿದ್ದು ಸಂತಸ ನೀಡಿದೆ," ಎಂದು ಬೌಲ್ಟ್ ಹೇಳಿದ್ದಾರೆ. ಇನ್ನು ಟೆಸ್ಟ್ ಸರಣಿ ಆರಂಭಕ್ಕೂ ಮೊದಲೇ ಕೊಹ್ಲಿ ವಿಕೆಟ್ ಪಡೆಯಲು ಎದುರು ನೋಡುತ್ತಿದ್ದೇನೆ ಎಂದು ಸವಾಲೆಸಗಿದ್ದ ವಿಶ್ವದ ನಂ.1 ಒಡಿಐ ಬೌಲರ್ ಬೌಲ್ಟ್, ಇದೀಗ ಯಶಸ್ಸು ಗಳಿಸಿದ್ದಾರೆ ಕೂಡ. ಎರಡನೇ ಇನಿಂಗ್ಸ್ನಲ್ಲಿ ಕೊಹ್ಲಿ ಹೊರತಾಗಿ ಟೀಮ್ ಇಂಡಿಯಾದ ಸ್ಟಾರ್ಗಳಾದ ಚೇತೇಶ್ವರ್ ಪೂಜಾರ (11) ಮತ್ತು ಪೃಥ್ವಿ ಶಾ (16) ಅವರ ವಿಕೆಟ್ ಕೂಡ ಪಡೆದ ಬೌಲ್ಟ್ ಆತಿಥೇಯರಿಗೆ ಪಂದ್ಯದ ಮೇಲಿನ ಹಿಡಿತ ತಂದುಕೊಟ್ಟಿದ್ದಾರೆ. ಇದಕ್ಕೂ ಮುನ್ನ ಬ್ಯಾಟಿಂಗ್ನಲ್ಲೂ ಮಿಂಚಿದ ಬೌಲ್ಟ್ 24 ಎಸೆತಗಳಲ್ಲಿ 38 ರನ್ ಬಾರಿಸಿ ತಂಡಕ್ಕೆ 183 ರನ್ಗಳ ಮುನ್ನಡೆ ಒದಗಿಸಿಕೊಡುವಲ್ಲಿ ಮುಖ್ಯ ಪಾತ್ರವಹಿಸಿದರು. "ಪಂದ್ಯದಲ್ಲಿ ನಾನು ಮತ್ತೆ ಬ್ಯಾಟ್ ಮಾಡದೇ ಇರುವಂತಾಗಲಿ ಎಂದು ಆಶಿಸುತ್ತೇನೆ. ನಾನು ನನ್ನ ಕೆಲಸವನ್ನು ಅಚ್ಚುಕಟ್ಟಾಗಿ ಮಾಡಿದರೆ ಹೆಚ್ಚಿನ ರನ್ ಗುರಿ ಬೆನ್ನತ್ತುವ ಪ್ರಮೇಯ ಬರುವುದಿಲ್ಲ. ಪಿಚ್ ಈಗಲೂ ಉತ್ತಮವಾಗಿದೆ. ಅಲ್ಲಿ ಒಂದು ಉತ್ತಮ ಎಸೆತವನ್ನು ಎಸೆಯಬೇಕೆಂಬುದನ್ನು ನಾವು ತಿಳಿದ್ದೇವೆ. ನಾವು ಈಗಾಗಲೇ ಮೇಲುಗೈ ಸಾಧಿಸಿದ್ದೇವೆಂದು ಆಡಲು ಮುಂದಾಗಬಾರದು. ಏಕೆಂದರೆ ಪಂದ್ಯದಲ್ಲಿ ಇನ್ನು ಸಾಕಷ್ಟು ಕ್ರಿಕೆಟ್ ಬಾಕಿಯಿದೆ," ಎಂದು ಬೌಲ್ಟ್ ಹೇಳಿದ್ದಾರೆ. ನ್ಯೂಜಿಲೆಂಡ್ ನೆಲದಲ್ಲಿ ಕಳೆದ 9 ಇನಿಂಗ್ಸ್ಗಳಲ್ಲಿ ಕೊಹ್ಲಿ ಬ್ಯಾಟಿಂಗ್ ಸಾಧನೆ 45, 11, 38, 11, 51, 15, 09, 02, 19 ಸಂಕ್ಷಿಪ್ತ ಸ್ಕೋರ್ ಭಾರತ: ಮೊದಲ ಇನಿಂಗ್ಸ್ 165/10 ನ್ಯೂಜಿಲೆಂಡ್: ಮೊದಲ ಇನಿಂಗ್ಸ್ 100.2 ಓವರ್ಗಳಲ್ಲಿ 348/10 (ಕೇನ್ ವಿಲಿಯಮ್ಸನ್ 89, ರಾಸ್ ಟೇಲರ್ 44, ಕಾಲಿನ್ ಡಿ'ಗ್ರ್ಯಾಂಡ್ ಹೋಮ್ 43, ಕೈಲ್ ಜೇಮಿಸನ್ 44, ಟ್ರೆಂಟ್ ಬೌಲ್ಟ್ 38; ಇಶಾಂತ್ ಶರ್ಮಾ 68ಕ್ಕೆ 5, ಆರ್. ಅಶ್ವಿನ್ 99ಕ್ಕೆ 3). ಭಾರತ: 2ನೇ ಇನಿಂಗ್ಸ್ 65 ಓವರ್ಗಳಲ್ಲಿ 144/4 (ಮಯಾಂಕ್ ಅಗರ್ವಾಲ್ 58, ಅಜಿಂಕ್ಯ ರಹಾನೆ 25*, ಹನುಮ ವಿಹಾರಿ 15*; ಟ್ರೆಂಟ್ ಬೌಲ್ಟ್ 27ಕ್ಕೆ 3, ಟಿಮ್ ಸೌಥೀ 41ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/38WJvgs
