ಬೆಂಗಳೂರು/ಶಿರಸಿ: ರಾಜ್ಯದ ಸುಪರ್ದಿಯಲ್ಲಿದ್ದ 80,000 ಕೋಟಿ ರೂ.ಗಳನ್ನು ಕೇಂದ್ರದ ಬೊಕ್ಕಸಕ್ಕೆ ವರ್ಗಾವಣೆ ಮಾಡುವುದಕ್ಕಾಗಿಯೇ ಅವರು 15 ಗಂಟೆಗಳ ಮಟ್ಟಿಗೆ ಮಹಾರಾಷ್ಟ್ರ ಸಿಎಂ ಪಟ್ಟಕ್ಕೇರಿದರು ಎಂಬ ಸುಳ್ಳು ಸುದ್ದಿಯನ್ನು ಮಹಾ ಸತ್ಯವೆಂದು ನಂಬಿ ಚುನಾವಣಾ ಪ್ರಚಾರದ ವೇಳೆ ಭಾಷಣ ಬಿಗಿದ ಕಾರವಾರ ಕ್ಷೇತ್ರದ ಬಿಜೆಪಿ ಸಂಸದ ಸರ್ವತ್ರ ಗೇಲಿಗೆ ಒಳಗಾಗಿದ್ದಾರೆ. ಸ್ವತಃ ಫಡ್ನವಿಸ್ ಅವರೇ ಇದೊಂದು ಸುಳ್ಳು ಸುದ್ದಿ ಎಂದು ಸ್ಪಷ್ಟೀಕರಣ ನೀಡಿದ್ದಾರೆ. 80 ಗಂಟೆಗಳ ಕಾಲ ಅಧಿಕಾರದಲ್ಲಿದ್ದ ಫಡ್ನವಿಸ್, ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡ 15 ಗಂಟೆಯೊಳಗೇ ತಮ್ಮ ಸುಪರ್ದಿಯಲ್ಲಿದ್ದ 40,000 ಕೋಟಿ ರೂ.ಗಳನ್ನು ಕೇಂದ್ರ ಸರಕಾರಕ್ಕೆ ವರ್ಗಾವಣೆ ಮಾಡಿ, ನಂತರ ರಾಜೀನಾಮೆ ನೀಡಿದರು. ಅದೇ ಉದ್ದೇಶಕ್ಕಾಗಿ ಈ 'ಮಹಾ' ನಾಟಕ ನಡೆದಿತ್ತು ಎಂದು ಹೆಗಡೆ ಹೇಳಿದ್ದರು. ಈ ಹೇಳಿಕೆ ಈಗ ಎಲ್ಲೆಡೆ ಟ್ರೋಲ್ ಆಗುವುದರ ಜತೆಗೆ ಕೇಂದ್ರ ಸರಕಾರವನ್ನೂ ಮುಜುಗರಕ್ಕೆ ಸಿಲುಕಿಸಿದೆ. ಶಿರಸಿ ತಾಲೂಕಿನ ಬಂಕನಾಲಾದಲ್ಲಿ ನ.29ರಂದು ಚುನಾವಣಾ ಪ್ರಚಾರದ ವೇಳೆ ಪ್ರತಿಪಕ್ಷಗಳನ್ನು ಗುರಿಯಾಗಿಸಿಕೊಂಡು ಅವರು ನೀಡಿದ ಹೇಳಿಕೆ ಅನಂತ್ ಕುಮಾರ್ ಅವರಿಗೇ ತಿರುಗುಬಾಣವಾಗಿದೆ. ಸ್ವತಃ ಫಡ್ನವಿಸ್ ಅವರೇ ಈ ಹೇಳಿಕೆ ತಿರಸ್ಕರಿಸಿದರೂ, ವಿವಾದ ತಣ್ಣಗಾಗಿಲ್ಲ. ಈ ಹೇಳಿಕೆಯಿಂದಾಗಿ ಬಿಜೆಪಿ ಮತ್ತು ಪ್ರಧಾನಿ ಮೋದಿ ವಿರುದ್ಧ ವಾಗ್ದಾಳಿಗೆ ಪ್ರತಿಪಕ್ಷಗಳಿಗೆ ಮತ್ತೊಂದು ಅಸ್ತ್ರ ದೊರೆತಂತಾಗಿದೆ.
ಫಡ್ನವಿಸ್ ಅವರೇ 'ಕತೆ' ಎಂದರುಮಹಾರಾಷ್ಟ್ರ ಮಾಜಿ ಸಿಎಂ ದೇವೇಂದ್ರ ಫಡ್ನವಿಸ್ ಅವರು ಅನಂತ್ ಕುಮಾರ್ ಹೇಳಿಕೆಯನ್ನು ಸಾರಾಸಗಟಾಗಿ ತಿರಸ್ಕರಿಸಿದ್ದಾರೆ. ''ಮಹಾರಾಷ್ಟ್ರ ಸರಕಾರ ಬುಲೆಟ್ ರೈಲು ಯೋಜನೆಗಾಗಿ ಕೇಂದ್ರದಿಂದ ಯಾವುದೇ ಹಣ ಕೇಳಿರಲಿಲ್ಲ,'' ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಅನಂತ್ ಕುಮಾರ್ ಹಳೆ ವಿವಾದಗಳು
- ರಾಹುಲ್ ಗಾಂಧಿ ಹೈಬ್ರಿಡ್. ಮುಸ್ಲಿಂ ತಂದೆ-ಕ್ರೈಸ್ತ ತಾಯಿಯ ಮಗ 'ಗಾಂಧಿ' ಹೆಸರಿನಲ್ಲಿ ಬ್ರಾಹ್ಮಣ ಆಗಲು ಹೇಗೆ ಸಾಧ್ಯ? ರಾಹುಲ್ ಗಾಂಧಿ ಹಿಂದೂ ಎಂಬುದಕ್ಕೆ ಆಧಾರವಿದೆಯೇ? ಡಿಎನ್ಎ ಸಾಕ್ಷ್ಯಗಳನ್ನು ನೀಡಲಿ. (ಸರ್ಜಿಕಲ್ ಸ್ಟ್ರೈಕ್ ಪ್ರಶ್ನಿಸಿದ್ದ ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ ಕುರಿತು)
- ಮನುಸ್ಮೃತಿ ನಮ್ಮ ಮೊದಲ ಸಂವಿಧಾನ. ವಿದೇಶಿ ಶಕ್ತಿಗಳಿಗೆ ತಮ್ಮನ್ನು ಮಾರಿಕೊಂಡಿರುವ ಬುದ್ಧಿಜೀವಿಗಳನ್ನು ಇದನ್ನು ಒಪ್ಪಲು ಸಿದ್ಧವಿಲ್ಲ. 'ಜಾತ್ಯತೀತ' ಎಂಬ ಪದವನ್ನು ಒಳಗೊಂಡ ಸಂವಿಧಾನವನ್ನು ನಾವು (ಬಿಜೆಪಿ) ಬದಲಾಯಿಸುತ್ತೇವೆ. ಸಂವಿಧಾನವನ್ನು ಬದಲಾಯಿಸಲೆಂದೇ ಅಧಿಕಾರಕ್ಕೆ ಬಂದಿದ್ದೇವೆ.
- ಕಾಗೆಗಳು, ಮಂಗಗಳು, ನರಿಗಳು ಮತ್ತು ಕತ್ತೆಗಳು ಬಿಜೆಪಿಯನ್ನು ಎದುರಿಸಲು ಒಂದಾಗುತ್ತಿವೆ (ಪ್ರತಿಪಕ್ಷಗಳನ್ನು ಕುರಿತು ಟೀಕೆ)
- ಹಿಂದೂ ಹುಡುಗಿಯನ್ನು ಮುಟ್ಟಿದವರ ಕೈಯನ್ನು ಕತ್ತರಿಸಬೇಕು. (ಕೊಡಗಿನಲ್ಲಿಹೇಳಿದ್ದು)
ಅನಂತ್ ಕುಮಾರ್ ಹೆಗಡೆ ಹೇಳಿದ್ದೇನು?''ಮಹಾರಾಷ್ಟ್ರದಲ್ಲಿ ನಮ್ಮವರು (ಫಡ್ನವಿಸ್) ಕೇವಲ 80 ಗಂಟೆಗಳ ಕಾಲ ಸಿಎಂ ಆಗಿದ್ದರು, ನಂತರ ರಾಜೀನಾಮೆ ನೀಡಿದರು ಎಂದು ನಿಮಗೆಲ್ಲಾ ಗೊತ್ತೇ ಇದೆ. ಇಷ್ಟೆಲ್ಲಾ ನಾಟಕ ನಡೆದಿದ್ದು ಏಕೆ? ನಮಗೆ (ಬಿಜೆಪಿ) ಬಹುಮತ ಇಲ್ಲದಿದ್ದರೂ ಸಿಎಂ ಆಗಿ ಪ್ರಮಾಣವಚನ ಸ್ವೀಕರಿಸಿದ್ದು ಏಕೆ? ಇದು ಸಹಜವಾಗಿಯೇ ಪ್ರತಿಯೊಬ್ಬರೂ ಕೇಳುವ ಪ್ರಶ್ನೆ. ಆಗ 40,000 ಕೋಟಿ ರೂ.ಗಿಂತಲೂ ಹೆಚ್ಚಿನ ಹಣ ಸಿಎಂ ಸುಪರ್ದಿಯಲ್ಲಿತ್ತು. ಕಾಂಗ್ರೆಸ್-ಎನ್ಸಿಪಿ-ಶಿವಸೇನಾ ಮೈತ್ರಿಕೂಟ ಅಧಿಕಾರಕ್ಕೆ ಬಂದರೆ ಖಂಡಿತಾ ಅದಕ್ಕೆ ತುಳಸಿ ನೀರು ಬಿಡ್ತಾರೆ, ಅಭಿವೃದ್ಧಿಗೆ ಬಳಸುವುದಿಲ್ಲ ಅಂತ ಗೊತ್ತಿತ್ತು. ಹೀಗಾಗಿ ಏನಾದರೂ ಒಂದು ಮಾಡಲೇಬೇಕೆಂದು- ದೊಡ್ಡ ಡ್ರಾಮಾ ಮಾಡಬೇಕೆಂದು ನಾವು ನಿರ್ಧರಿಸಿದೆವು. ಅದರ ಭಾಗವಾಗಿಯೇ ಸಿಎಂ ಆಗಿ ಫಡ್ನವಿಸ್ ಪ್ರಮಾಣವಚನ ಸ್ವೀಕರಿಸಿದರು. ಕೇವಲ 15 ಗಂಟೆಗಳ ಅವಧಿಯಲ್ಲಿ ಆ ಹಣವನ್ನು ಅವರು ಅದು ಎಲ್ಲಿಗೆ, ಕೇಂದ್ರ ಸರಕಾರಕ್ಕೆ ಸೇರಬೇಕಿತ್ತೂ ಅಲ್ಲಿಗೆ ಕಳುಹಿಸಿಬಿಟ್ಟರು. ಆ ಹಣ ಒಂದು ವೇಳೆ ಇಲ್ಲೇ ಇದ್ದಿದ್ದರೆ, ಮುಂದಿನ ಸಿಎಂ... ಪರಿಸ್ಥಿತಿ ಏನಾಗುತ್ತಿತ್ತು ಎಂದು ನಿಮಗೆಲ್ಲಾಗೊತ್ತು,'' ಎಂದು ಹೆಗ್ಡೆ ಹೇಳಿದ್ದಾರೆ.
ಸುಳ್ಳು ಸುದ್ದಿ ತೇಲಿಬಿಟ್ಟರು! ಮುಂಬಯಿ: ರಾಜಕೀಯ ಪಕ್ಷಗಳು ಮತ್ತು ಅವುಗಳ ಹಿಂಬಾಲಕರು ಜನಸಾಮಾನ್ಯರನ್ನು ದಾರಿ ತಪ್ಪಿಸಲು ಸೋಷಿಯಲ್ ಮೀಡಿಯಾಗಳನ್ನು ಹೇಗೆ ದುರುಪಯೋಗ ಪಡಿಸಿಕೊಳ್ಳುತ್ತಿದ್ದಾರೆ ಎನ್ನುವುದಕ್ಕೆ ಫಡ್ನವಿಸ್ ಪ್ರಕರಣ ಮತ್ತೊಂದು ನಿದರ್ಶನ. ಎನ್ಸಿಪಿಯ ಅಜಿತ್ ಪವಾರ್ ಬೆಂಬಲದೊಂದಿಗೆ ರಾತ್ರಿ ಬೆಳಗಾಗುವಷ್ಟರಲ್ಲಿ ರಚನೆಯಾಗಿದ್ದ ಫಡ್ನವಿಸ್ ನೇತೃತ್ವದ ಬಿಜೆಪಿ ಸರಕಾರ ಮೂರೇ ದಿನಗಳಲ್ಲಿ ಪತನಗೊಂಡಿತ್ತು. ಅವಸರದ ನಿರ್ಧಾರದಿಂದಾಗಿ ಬಿಜೆಪಿ ಮುಖಭಂಗ ಅನುಭವಿಸಿತ್ತು. ಮುಜುಗರ ತಪ್ಪಿಸಿಕೊಳ್ಳಲು ಕೆಲವು ಕಿಡಿಗೇಡಿಗಳು ಸುಳ್ಳು ಕತೆ ಸೃಷ್ಟಿಸಿ ಜನರ ಹಾದಿತಪ್ಪಿಸಿದ್ದರು. ಸಂಸದ ಅನಂತ್ಕುಮಾರ್ ಹೆಗಡೆ ಕೂಡ ಇದನ್ನೇ ನಂಬಿ ಹೇಳಿಕೆ ನೀಡಿ ಮುಖಭಂಗಕ್ಕೊಳಗಾಗಿದ್ದಾರೆ. 80 ಗಂಟೆಗಳ ಮಹಾರಾಷ್ಟ್ರ ಸರಕಾರದ ಹಿಂದಿರುವ ಭಯಂಕರ ಬೆತ್ತಲೆ ಸತ್ಯ ಎಂಬ ಶೀರ್ಷಿಕೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಫೇಕ್ ನ್ಯೂಸ್ ಹರಿದಾಡಿತ್ತು. ''ಫಡ್ನವಿಸ್ ಅವರು ಎನ್ಸಿಪಿ ಬಲೆಗೆ ಬಿದ್ದು, ಮೂರು ದಿನದ ರಾಜನಾಗಿ ಮೆರೆದು, ಪ್ರತಿಷ್ಠೆ ಹಾಳು ಮಾಡಿಕೊಂಡಿದ್ದು ಮಹಾರಾಷ್ಟ್ರ ಮತ್ತು ದೇಶದ ಒಳಿತಿಗಾಗಿ. ಇದರ ಹಿಂದಿರುವ ಮೋದಿ, ಶಾ ಬಗ್ಗೆ ಹೆಮ್ಮೆ ಎನಿಸುತ್ತದೆ. ಬುಲೆಟ್ ಟ್ರೇನಿಗಾಗಿ ತೆಗೆದಿರಿಸಿದ 40 ಸಾವಿರ ಕೋಟಿ ರೂ. ಮಹಾರಾಷ್ಟ್ರದ ಖಜಾನೆಯಲ್ಲಿತ್ತು. ಅದರ ಮೇಲೆ ಸೋನಿಯಾ ಗಾಂಧಿಯ ಕಣ್ಣಿತ್ತು. ಆ ದೊಡ್ಡ ಮೊತ್ತದ ಹಣವನ್ನು ಈ ಕಳ್ಳರಿಂದ ಉಳಿಸಲು ಬಿಜೆಪಿ ತುರ್ತಾಗಿ ಅಜಿತ್ ಪವಾರ್ ಜತೆ ಸರಕಾರ ನಡೆಸಿತು. 3 ದಿನಗಳಲ್ಲಿ ಯಶಸ್ವಿಯಾಗಿ ಆ ಹಣವನ್ನು ಕೇಂದ್ರ ಸರಕಾರದ ಬೊಕ್ಕಸಕ್ಕೆ ಫಡ್ನವಿಸ್ ವರ್ಗಾಯಿಸಿದರು,'' ಎನ್ನುವುದು ಈ ಸುಳ್ಳು ಸುದ್ದಿಯ ಸಾರವಾಗಿತ್ತು.
from India & World News in Kannada | VK Polls https://ift.tt/2sCcVQF
